Malta kamra tad-deputati kumitat permanenti dwar il-kontijiet pubbliċI

IS-SUR ANTHONY CASSAR: Iva.
ONOR. ANTHONY ABELA: Issa fuq din il-biċċa tax-xogħol li inti tqabbadt tagħmel. Ovvjament wieħed jifhem - kif implika ċ-Chairman - li inti jkollok il-commission tiegħek fuq din il-ħaġa, pero` naħseb li jirriżulta wkoll li l-vapur li kienu fuqu dawn in-nies illoggja ruħu f’Malta. Jiġifieri għandi nifhem li dawn in-nies ġew trasportati mill-vapur tagħhom għal xi lukanda u lura, jiġifieri wieħed jista’ jivverifika wkoll li dawn in-nies ġew Malta effettivament …
IS-SUR Anthony Cassar: Nimmaġina anke li l-VOM għandu l-lista tan-nies ukoll.
L-ONOR ANTHONY ABELA: Ma nafx jekk iniex qed nidħol f’xi area protetta minn xi data protection - fil-każ waqqfuni – pero` xtaqt nistaqsi jekk dan il-programm Odyssey li qed issemmi hawnhekk kienx jirrikjedi xogħol min-naħa tagħkom ukoll.
IS-SUR ANTHONY CASSAR: Għamilna diversi attivitajiet. (Interruzzjonijiet)
ONOR. ANTHONY ABELA: Iva, imma huma ġabu n-nies hemmhekk u din il-ħaġa kellha x’taqsam mal-VOM. Tajjeb qed ngħid? Issa parti minn dan il-cruise kollu kienet tirrikjedi xi xogħol li kellu x’jaqsam ma’ servizz ieħor li kontu qegħdin tagħtu intom? Jiġifieri li qed nistaqsi jien huwa hekk dan setax kien xogħol li jirrifletti ruħu bħala anċillari ma’ xogħol ieħor li intom kontu qegħdin tagħmlu għall-programmi.
IS-SUR ANTHONY CASSAR: L-event kellha sservi ta’ promotion anke għall-VOM bħala l-partner Malti. Jiġifieri l-VOM kien promoted ma’ dawn il-pajjiżi l-oħra. Saru affarijiet li kienu ta’ promotion għall-VOM, imma mbagħad il-VOM daħal fiha l-iktar bħala organiser. (Interruzzjonijiet) Mhux aħna organizzajnih dan, fis-sens li …
THE CHAIRMAN: Ma kienx parti mis-servizzi li tagħti inti lill-VOM.
IS-SUR ANTHONY CASSAR: Waqt l-events kollha kien hemm forsi xi affarijiet li aħna ħadna sehem fihom, pero` l-proġett kollu kien proġett tal-VOM mhux tagħna.
THE CHAIRMAN: Nassumi Ii ma kellux x’jaqsam max-xogħol tiegħek ta’ IT consultant.
IS-SUR ANTHONY CASSAR: Mhux direttament.
ONOR. HELENA DALLI: Indirettament kif?
IS-SUR ANTHONY CASSAR: Indirettament, per eżempju, waqt li konna hemmhekk konna ddisinjajna xi posters li kellhom jintużaw għall-event promoting il-VOM. (Interruzzjonijiet) Imma ma ċċarġjajniex apparti; il-managing director kien talabna li jiġi ddisinjat poster jew invit u kien sar, pero` huwa ta’ attivita` tal-VOM mitluba mill-managing director.
THE CHAIRMAN: M’hemmx iktar mistoqsijiet u għalhekk naħseb li at this point dan il-punt tal-kuntratti u r-rwol kemm tas-Sur Cassar minn naħa u tas-Sur Borg min-naħa l-oħra ġie eżawrit.
ONOR. AUSTIN GATT: Xtaqt nagħmel domanda lill-awditur. Iktar ‘il quddiem se nidħlu fil-fire-fighting u naħseb hemm ukoll ir-radio software u l-hardware. Huwa s-Sur Borg ukoll li huwa l-espert?
IS-SUR LOUIS BORG: Iva, għalhekk qiegħed jien.
ONOR. AUSTIN GATT: Le, anke għal din qiegħed hawnhekk inti. Fit-tlieta kont espert int!
IS-SUR LOUIS BORG: Jien għamilt sena u nofs ...
THE CHAIRMAN: Jiġifieri fuq il-fire-fighting u s-security kont inti wkoll bħala konsulent?
IS-SUR LOUIS BORG: Iva.
THE CHAIRMAN: Mela jkollok tibqa’ hawnhekk.
ONOR. AUSTIN GATT: U r-radio uplinks u l-hardware ukoll?
IS-SUR LOUIS BORG: Għamiltu wkoll u għandi ċertifikat.
ONOR. AUSTIN GATT: Le, aħna biex naraw jekk għandekx tibqa’ hawnhekk billi se niddiskutu dawk.
THE CHAIRMAN: Mela inti mitlub tibqa’ hawnhekk. Jidher li s-Sur Cassar m’għandux għalfejn jibqa’ hawnhekk iktar u għalhekk jista’ jmur.
Sur Muscat, għandek xi point of order?
IS-SUR RICHARD MUSCAT (Ambaxxatur ta’ Malta fl-Irlanda u ex Managing Director tal-VOM): Qabel tingħalaq l-Odyssey ...
THE CHAIRMAN: Le, mhux se tingħalaq l-Odyssey. Dik għadha lanqas inbdiet, sempliċement għamilna riferenza għaliha! L-Odyssey hija twila ħafna!
Mela peress li jidher li għallinqas fuq dan il-punt taż-żewġ kuntratti il-mistoqsijiet ġew eżawriti, skond l-ordni li kien hemm qbil dwaru se nitkellmu fuq il-hospitality. (Interruzzjonijiet) Jien qed nistaqsi jekk hemmx domandi addizzjonali għas-Sur Cassar - dan huwa persuna fis-settur privat – ħalli jekk fil-każ inħalluh ikompli bix-xogħol tiegħu. Jidher li s-Sur Cassar jista’ jmur.
Konna se mmorru għall-punt tal-hospitality, pero` naħseb li rigward il-kuntratt li jingħata, l-Onor. Dalli tixtieq tagħmel xi mistoqsijiet.
ONOR. HELENA DALLI: Kif smajna, dan il-kuntratt kien sostanzjali tant li meta twaqqaf, is-Sur Cassar kellu jagħmel restructuring fil-kumpannija tiegħu. Jiena minn dak kollu li ġbart kemm ilna nitkellmu u li naħseb li jinteressa lit-taxpayer u għas-saħħa ta’ l-akkontabilita` u tat-trasparenza, xtaqt nistaqsi kif kuntratt kbir daqshekk, għaddilek minn moħħok li tagħtih b'direct order. Se noħolqu xi preċedent issa biex affarijiet bħal dawn isiru b'dan il-mod?
THE CHAIRMAN: Is-Sur Richard Muscat.
IS-SUR RICHARD MUSCAT: Fil-kors ta' dawn il-laqgħat, Mr Chairman, diġa` ġie stabbilit il-prinċipju li l-financial regulations ma daħlux. Allura jiena kelli l-leeway ...
THE CHAIRMAN: Sur Muscat, ħu paċenzja, ir-risposti nagħtuhom ...
IS-SUR RICHARD MUSCAT: Jiena deherli li għandi leeway biex inkun nista' naġixxi f'ċirkostanzi li nkun iffaċċjat bihom biex nieħu deċiżjonijiet anke mgħaġġlin u li ma jagħtunix l-opportunita` li nsegwi ċerta prassi burokratika li kienet ittellifni l-opportunita`.
Jiena li bqajt għaddej ma' Cyberspace mill-ewwel għat-tieni kuntratt, kien hemm raġuni - fl-opinjoni tiegħi - prattika u loġika. Għaliex jekk jiena fl-ewwel kuntratt li kien għadu għaddej ta' tliet snin, li kien għadu lanqas wasal fin-nofs tiegħu u ġejt iffaċċjat b'sitwazzjoni li dak l-istess xogħol irrid nagħmlu f'post differenti u ferm ikbar - b'dak li ġie diġa` spjegat anke dalgħodu - jiena ma ħassejtx li għandi nittermina l-ewwel kuntratt mas-Sur Anthony Cassar biex noqgħod nerġa' nfittex kuntrattur ieħor ħalli nagħmel il-proċedura mill-ġdid.
THE CHAIRMAN: Fl-ewwel kuntratt tlabt quotations?
IS-SUR RICHARD MUSCAT: Le.
THE CHAIRMAN: Jiġifieri la fl-ewwel kuntratt u lanqas fit-tieni kuntratt ma tlabt quotations.
IS-SUR RICHARD MUSCAT: Jekk jiena allura bil-mod kif kont qed nirraġuna, mill-ewwel għat-tieni kuntratt kont iffaċċjat b'għaġġla u sitwazzjoni pjuttost diffiċli biex niffaċċjaha, jiena deherli li mhux inwaqqaf kuntratt u nerġa' nibda proċess ġdid biex insib kuntrattur ieħor, imma dak l-istess xogħol se jibqa' jsir b'volum ferm ikbar kif ġie spjegat illum mill-istess persuna li diġa` kienet bdietli l-Furjana. Pero` jiena ...
ONOR. HELENA DALLI: Ippermettili ftit. Issa inti għedtilna storja sħiħa ...

IS-SUR RICHARD MUSCAT: Sħiħa le!
ONOR. HELENA DALLI: ... fuq kif minħabba l-kontinwita`, l-għaġġla u l-pressjoni li kellek, inti tajt il-kuntratt lill-istess persuna. Pero` jiena mhux dak staqsejtek. Inti l-ewwel kuntratt, li wkoll kien sostanzjali, ukoll tajtu b'direct order u inti evitajt li tweġibni għax qbadtli fuq it-tieni wieħed li tħossok ġustifikat li għall-kontinwita` inti ma ħriġtx call for tender, pero` lanqas l-ewwel darba ma ħriġt call for tender.
IS-SUR RICHARD MUSCAT: Le, lanqas l-ewwel darba ma ħriġt ...
ONOR. HELENA DALLI: Mela għidilna fuq dik jekk jogħġbok.
IS-SUR RICHARD MUSCAT: Imma dik l-istess. Jiena diġa` spjegajt f'ċirkostanza oħra li jiena dħalt fil-VOM meta kien qed jispiċċa l-kuntratt mal-Malta media. Fl-istess kuntratt li kien hemm qabli mal-Malta media ma rajt fl-ebda mument li kien hemm call for tenders u dan sar.
THE CHAIRMAN: Mal-Malta Media kkonsultajt fuq l-ewwel kuntratt?
IS-SUR RICHARD MUSCAT: Mhux meta kien hemm litigation u kien ġie stabbilit li l-VOM iwaqqaf il-kuntratt li kien jeżisti diġa`!
THE CHAIRMAN: Konsulenti oħra kkuntattjajt?
IS-SUR RICHARD MUSCAT: Le.
THE CHAIRMAN: Sempliċement mort fuq is-Sur Cassar mill-ewwel, handpicked.
IS-SUR RICHARD MUSCAT: Iva.
THE CHAIRMAN: Mela nistaqsi jekk hemmx iktar mistoqsijiet dwar dan il-kuntratt ħalli almenu jkollna kapitlu magħluq. Jekk tiżviluppa xi ħaġa ġdida, ċertament id-diskussjoni ma tkunx magħluqa, imma nistgħu issa ngħaddu għall-hospitality?
L-Onor. Brincat.
ONOR. LEO BRINCAT: Billi l-aħħar darba qam il-punt - ikkoreġuni jekk jien żbaljat - li min-naħa l-awditur qed jgħid li inti eċċedejt il-limits tal-hospitality allowances li kellek u inti qed tgħid li le, bilfors ikolli nistaqsik xi mistoqsijiet fuq xi items li huma listed fid-dokumenti li tawna dalgħodu.
IS-SUR SIMON CIANTAR: Mr Chairman, qabel ma nibdew nitkellmu fuq dan, xtaqt niċċara waħda għal kulħadd. Il-karti li qassamt huma l-items kollha li vvalidajt fil-hospitality accounts, m'humiex l-items kollha li hemm imsemmija fir-rapport. L-items li ħadt fir-rapport huma l-items li direttament jew indirettament ibbenefika minnhom is-Sur Muscat jew li m'għandix informazzjoni fuqhom. Dawk l-items huma mmarkati b’"very good". Dawk huma l-items li ħadt. L-items l-oħra m'humiex items ....
ONOR. LEO BRINCAT: Meta tgħid "very good" xi jfisser allura?
IS-SUR SIMON CIANTAR: Jiġifieri li huma ttikkjati.
ONOR. LEO BRINCAT: Għax hemm items minnhom fejn jidher li kien hemm insufficient information fil-comments tagħkom stess.
IS-SUR SIMON CIANTAR: Għall-fini ta' l-exercise fejn ġbart l-informazzjoni.
ONOR. AUSTIN GATT: Mr Chairman, jista' jispjegali ftit aħjar għax ma fhimtx. L-echo ftit ħażin hawnhekk.
THE CHAIRMAN: Jista' jispjega l-hand-out li tana jekk tirrispekkjax il-hospitality kollha jew inkella dak biss li kien jidher invoiced?
IS-SUR SIMON CIANTAR: Il-hand-out li tajtkom hija kopja tal-working papers tiegħi tat-tliet snin li tinvolvi kważi 100% test ta’ l-accounts fil-kotba tal-VOM, under the title “hospitality”. Jiena qbadt dak l-account u analizzajtu u hemmhekk peress li ma kellix ċans noqgħod noħroġ individwali, irriproduċejt l-account kollu. Pero` l-items li hemm imniżżlin fil-lista tar-rapport li qed nattribwixxu li huma hospitality expenses meħudin mis-Sur Muscat huma biss l-items li hemm ittikkjati.
ONOR. AUSTIN GATT: Jiġifieri biex niftehmu, il-VOM …
IS-SUR SIMON CIANTAR: Fuq items oħra, jiena tajt il-benefiċċju tad-dubju u assumejt li huma items li huma imdaħħlin f’dak l-account bi żball.
ONOR. AUSTIN GATT: Il-VOM, mhux il-kuntratt li kellu s-Sur Muscat, kellu hospitality budget.
IS-SUR SIMON CIANTAR: Jien imkien ma sibt indikazzjoni ta’ jekk kellux hospitality budget jew le.
ONOR. AUSTIN GATT: Inti rajt il-budgets tas-snin relattivi?
IS-SUR SIMON CIANTAR: Budgets jien ma rajtx, ma jidhirx li kienu jiġu ppreparati, jew jekk kienu jiġu ppreparati jien ma rajthomx.
ONOR. AUSTIN GATT: Staqsejt jekk kienx hemm budgets?
IS-SUR SIMON CIANTAR: Jekk staqsejtx speċifikament bl-amment ma niftakarx ħalli nkun preċiż, pero` jiena ġbart l-accounts kollha u l-financial statements u l-workings kollha mingħand l-accountant.
ONOR. AUSTIN GATT: Mela ma staqsejtx għall-budgets u ma tafx jekk il-VOM kellux line budget għal hospitality. U allura assumejt ….
IS-SUR SIMON CIANTAR: Le, ma nafx jekk kienx hemm a specific budget for hospitality, pero` din il-ħaġa tqajmet kollha ma’ l-accountant, għamilna interview vast u naħseb li kellu kull opportunita` biex jekk kien hemm specific budget item għall-hospitality, isemmih.
ONOR. AUSTIN GATT: Sabiħa din, twaħħal f’ħaddieħor għal dak li ma tafx int!
THE CHAIRMAN: Ħalli nkunu ċari. Inti, Sur Ciantar, tlabt għad-dokumenti kollha li kienu available, inkluż fejn jirrigwarda hospitality u anke invoices u ħdimt fuq dak li ġie pprovdut lilek.
IS-SUR SIMON CIANTAR: Fuq dak li sibt.
THE CHAIRMAN: Fuq dak li ġie pprovdut lilek u dak li ngħatajt. Qed tgħid li l-accountant ma qallekx li kien hemm xi line item ieħor ta’ hospitality.
IS-SUR SIMON CIANTAR: Fil-kotba hemm items oħra bħal “miscellaneous” u “sundry expenses”.
THE CHAIRMAN: U dawk ivverifikajtuhom jew baqgħu mhux ivverifikati kontra invoices?
IS-SUR SIMON CIANTAR: Ivverifikajthom imma huwa exercise separat minn dan.
ONOR. AUSTIN GATT: Jimporta, Sur Chairman, għax naħseb li qed niżvijaw l-ambitu. Jien qed nitkellem fuq hospitality account u kontra min jiġu allokati. L-uffiċċju ta’ l-awditur iddeċieda li mill-kotba li huwa hospitality account wieħed - mill-kotba qed ngħid issa - for budgetary purposes jew for management account purposes, uħud jittieħdu kontra l-line item fil-management accounts “personal hospitality” tas-Sur Muscat. Hekk għamel hawn, it-“tick” tfisser kontra l-Lm500 tiegħu. Dan meta ma ġiex ivverifikat jekk fil-management accounts - u fil-budgets relattivi li jkunu ġew approvati - kienx ikun hemm ukoll line item - kif normalment ikun hemm, għax anke fid-dipartimenti tal-gvern hemm - hospitality li tiġi allokata kontra l-VOM stess. Jiena staqsejt domanda speċifika: Inti staqsejt biex tara l-budgets annwali li kienu approvati mill-board of councillors jekk kellhomx line item “hospitality”? Ir-risposta kienet “le, jien ma staqsejtx, għax ħadd ma qalli”. Hekk qal! Jien dak hu li qed nikkontesta. Il-kontestazzjoni tiegħi hija sempliċi għax mill-budgets għandu jirriżulta illi kien hemm line item “hospitality VOM”.
THE CHAIRMAN: Sur Ciantar, jiġifieri inti qed tgħid li dawk li fil-lista huma ttikkjati ġew, biex ngħidu hekk, iddebitati lill-hospitality account tas-Sur Richard Muscat? Hekk qed tgħid jew le?
IS-SUR SIMON CIANTAR: Le, jien kulma qed ngħid huwa li l-istatement li għamilna f’paġna 25, item 10.1 tar-rapport tagħna fejn qed jissemmew il-figuri ta’ Lm750, Lm846 u Lm2,043, dawk huma cumulative figures ta’ l-items li huma ttikkjati.
THE CHAIRMAN: Iva, dak li qed ngħid jien. Jiġifieri qed tgħid li dawk l-items …
IS-SUR SIMON CIANTAR: Biex ma neħdux l-impressjoni li dawn kollha huma dawk.
THE CHAIRMAN: Ħalli nara fhimtekx sew. L-items ittikkjati fuq il-lista li tajtna jikkorelataw ma’ item 10.1 li huwa “hospitality entitlement”. Għax inti affarijiet bħal, per eżempju, Christmas staff party, frames u coffee sets ma nkludejthomx. Jiġifieri dawk jaqgħu forsi taħt xi line item bħal “miscellaneous”?
IS-SUR SIMON CIANTAR: Pero` dawk xorta qegħdin taħt il-“hospitality account”, imma jien qed nassumi li huma mdaħħlin bi żball jew whatever.
THE CHAIRMAN: Mela dawk ma allokajthomx. Issa hawnhekk hawn membership gold card tar-Radisson u inti assumejt li kienet tas-Sur Muscat.
IS-SUR SIMON CIANTAR: Mhux assumejt, dik hija xi ħaġa diretta tiegħu u hemm reimbursement personali għalih.
THE CHAIRMAN: Jiġifieri li rridu ngħidu hu li dawk l-items li huma ticked, inti tikkonfermahom li kienu taħt il-hospitality account tas-Sur Muscat.
IS-SUR SIMON CIANTAR: Il-biċċa l-kbira huma affarijiet li ġew direttament reimbursed lilu - jiġifieri ħariġhom mill-but hu u ġie reimbursed hu, allura bilfors naħseb jien li jridu jkunu parti mill-hospitality - imbagħad hemm xi affarijiet oħra li fl-opinjoni tiegħi huma part and parcel tal-hospitality allowance tiegħu. Issa jekk intom tridu tiġġudikaw kontra ...
THE CHAIRMAN: Le, din m’hijiex kwestjoni ta’ ġudizzju imma kwestjoni ta’ kjarifika. Qed nistaqsi għax hemm lista exhaustive u allura ridna kjarifika għax hemm parti li m’humiex allokati lilu u parti huma allokati taħt spiża oħra. Jiġifieri d-distinzjoni bejn hospitality Mr Muscat u hospitality oħra ta’ kwalunkwe line item li trid, bażikament saret.
ONOR. AUSTIN GATT: Saret fil-ġudizzju tiegħu.
THE CHAIRMAN: Saret min-naħa ta’ l-awditur.
L-Onor. Brincat.
ONOR. LEO BRINCAT: Mela Sur Muscat, ħa nibda daqsxejn fuq il-hospitality expenses. Hawnhekk hawn li fit-18 ta’ Diċembru 2001 li ġiet organizzata reception għal 130 persuna għall-ammont totali ta’ Lm585, jiġifieri ġew iċċarġjati Lm4.50 per person. X’kienet l-okkażjoni għal din l-attivita`?
IS-SUR RICHARD MUSCAT: Tista tgħidli f’liema paġna qiegħda?
ONOR. LEO BRINCAT: Jiena qed nistaqsi għat-tieni item - mhux tal-books and Mdina Glass items - reference number 752, Reception for 130 persons held on 18/12/01 – supplier Primo Leisure company ltd - held at Café Diva at Lm4.50 per person. X’kienet l-attivita’?
IS-SUR RICHARD MUSCAT: Dawk kienu l-Christmas drinks tal-VOM li saru fil-Café Diva.
ONOR. AUSTIN GATT: U skond l-awditur din ġiet allokata għall-personal expenses tas-Sur Muscat.
ONOR. LEO BRINCAT: Nista’ nistaqsi lill-awditur dwar din l-item ref 752 - should read 147, whatever that may mean - reception for 130 persons held on 18/12/01.
Sur Muscat, inti dak iż-żmien kemm kellek impjegati bejn wieħed u ieħor ma' l-istazzjon?
IS-SUR RICHARD MUSCAT: Impjegati dak iż-żmien kelli tnejn inqas mill-2003, jiġifieri madwar 18.
ONOR. LEO BRINCAT: Jiġifieri kellek 18-il impjegat u stedint 130 ruħ?
IS-SUR RICHARD MUSCAT: Le, dak iż-żmien ...
ONOR. LEO BRINCAT: Domanda fattwali biss qed nistaqsik; ma staqsejtx min kienu jien.
IS-SUR RICHARD MUSCAT: Dawk kienu l-Christmas drinks li kienu jsiru kull sena.
ONOR. LEO BRINCAT: Sur Muscat, jien m’iniex nikkontestak. Wieġeb iva jew le għall-mistoqsija tiegħi.
ONOR. RICHARD MUSCAT: X'inhi l-mistoqsija tiegħek?
ONOR. LEO BRINCAT: Il-mistoqsija tiegħi hija sempliċi: Inti kellek 18-il impjegat u stedint 130 ruħ?
THE CHAIRMAN: U inti għedt li kienu drinks għall-istaff.
IS-SUR RICHARD MUSCAT: Kienu 18-il impjegat, kien hemm xi 30 subscribers oħra u ħbieb tal-VOM. Kieku ridt nagħmel party kbir, imma ma kontx naffordjah. U konna f'Diċembru 2001.
ONOR. LEO BRINCAT: Issa jien nixtieq nistaqsi lill-awditur jekk din l-item ta' Lm585 ġietx iċċarġjata għall-hospitality expenses tas-Sur Muscat personali jew għal xi hospitality expenses addizjonali attribwiti għall-VOM infushom.
IS-SUR SIMON CIANTAR: Skond l-accounts hemm biss hospitality account wieħed. U dawn l-items kollha - issa din id-darba kollha - huma f'dawn il-hospitality account.
ONOR. LEO BRINCAT: Sur Muscat, tista' titfa' ftit dawl fuq dan kollu?
THE CHAIRMAN: L-Onor. Gatt, on a point of clarification.
ONOR. AUSTIN GATT: Mr Chairman, is-Sur Ciantar għadu kemm qalilna li hu f'din il-lista ttikkja dawk li deherlu li għandhom jiġu allokati għall-personal account tas-Sur Muscat u l-oħrajn ma ċċarġjahomx biex jagħmel ir-rapport. Issa d-domanda ta' l-Onor. Brincat kienet sempliċi: Din iċċarġjajtha għas-Sur Muscat? Iva jew le. Għax hija ttikkjata!
IS-SUR SIMON CIANTAR: Mr Chairman, jiena hawnhekk m'iniex nagħmel l-accounts. Jiena ma ċċarġjajt xejn u ma allokajt xejn. Fl-accounts huwa diġa` kollox allokat f'hospitality account. Issa x'ried ifisser bih dan il-hospitality account, is another matter. Jiena wżajt il-judgement tiegħi u assumejt li ċerti affarijiet li huma ovvji, bħal per eżempju, Eco Pure ... Jien ma naħsibx li s-Sur Muscat ... (Interruzzjonijiet)
THE CHAIRMAN: Sur Ciantar, kompli għid il-proċedura li esegwejt.
IS-SUR SIMON CIANTAR: Fl-accounts tal-VOM hemm account wieħed jismu "hospitality " u kollox huwa mitfuħ fih. Dawn l-items kollha li tajtkom huma hemmhekk. B'daqshekk ma jfissirx li kwalunkwe ħaġa li hemm għandi nitfagħhom taħt il-kappell tal-Lm500 jew Lm700 tas-Sur Muscat u jiena ppruvajt nasal għall-figura raġonevoli fejn ngħid li “dawn” huma attribwiti lilu u “dawn” strictly speaking ma misshomx daħlu hemmhekk in the first place. Jien bilfors kelli nuża l-judgement tiegħi. Kieku l-affarijiet saru sew kien ikun hemm żewġ hospitality accounts, wieħed għas-Sur Muscat u wieħed għall-VOM, jekk il-VOM kellu hospitality tiegħu, jew inkella ma jissemmiex hospitality imma jisemma “entertainment” jew “miscellaneous” li hemm ukoll account jismu hekk. Jiġifieri jiena, kull fejn hemm reimbursement diretta lilu, ovvjament irrid nallokaha lilu ...
THE CHAIRMAN: Sur Muscat, jiġifieri fl-opinjoni tiegħek, kien hemm żewġ hospitality accounts fil-VOM jew wieħed?
IS-SUR RICHARD MUSCAT: Is-sitwazzjoni kull sena ma' l-awdituri hemm il-budget, dak li ġie approvat regolarment. Issa f'kull budget hemm allokat item ta' travelling and hospitality. Jien għandi draft hawnhekk. Dawk li kienu allokati lili personalment - ħalli nispjega lil din il-Kamra - permezz ta' dak l-appointment li diġa` tkellimna fuqu, kienu separati, fis-sens li kienu allowance tiegħi on presentation of receipt u ma kellhom x'jaqsmu xejn ma' dawn il-figuri u ma' dawn l-expenses.
THE CHAIRMAN: Imma kienu jinżammu accounts separati?
IS-SUR RICHARD MUSCAT: Le, tiegħi personali qatt ma kien hemm account. Jiena mas-salarju tiegħi kelli Lm700 li kienu jingħatawli mas-salarju u kont neħodhom. Dawk m’għandhomx x’jaqsmu.
THE CHAIRMAN: X'jiġifieri, kien jagħtihomlok mas-salarju?
IS-SUR RICHARD MUSCAT: Ma' l-appointment, kien hemm inkluż dawk is-Lm700.
THE CHAIRMAN: Imma kien jagħtihomlok kull xahar magħhom jew inkella inti kont tiddedika ...?
IS-SUR RICHARD MUSCAT: Kont nippreżenta receipts.
THE CHAIRMAN: Jew waħda jew l-oħra. Jekk kien jagħtihomlok mas-salarju tiegħek, lanqas kellek għalfejn tippreżenta invoices allura għax kont titħallas minn qabel!
IS-SUR RICHARD MUSCAT: Id-diskors preċiż li hawn miktub ...
THE CHAIRMAN: Le, issa qed ngħidu x'kont tirċievi għax bejn dak li hemm u dak li kien isir fil-prattika huma żewġ affarijiet differenti.
IS-SUR RICHARD MUSCAT: Jiena s-Lm700 kont neħodhom mas-salarju.
THE CHAIRMAN: Imma la kont teħodhom mas-salarju, kont terġa' wkoll tippreżenta l-invoices?