Marketinq termini ilk dəfə ABŞ-ın iqtisadi ədəbiyyatlarında XIX əsrin sonlarında və XX əsrin əvvəllərində istifadə edilmişdir. İqtisadi ədəbiyyatlarda marketinq yarandığı gündən bu günə qədər 4 mərhələyə bölünür.
XIX əsrin sonlarından başlayaraq XX əsrin 20-ci illərinə kimi olan dövr marketinq konsepsiyasının yaranması və inkişafının birinci mərhələsi hesab edilir. İqtisadi ədəbiyyatlarda bu mərhələ “istehsal mərhələsi” adlanır. Həmin mərhələdə sahibkarlar arasında rəqabət yox idi. Odur ki, istehsalçılar “nə istehsal etsəm, onu da sata bilərəm ”nəzəriyyəsi əsasında işləməyə üstünlük verirdilər. Həmin dövrdə sahibkarlar belə hesab edirdilər ki, məhsula bazarda tələb yüksəkdirsə, deməli təklifə yalnız məhsul istehsalını artırmaq yolu ilə nail olmaq olar.
