Tədqiqatın obyekti və predmeti. Tədqiqatın obyekti MT-də Azərbaycan və ingilis dillərindəki mətnlərin semantik təhlilidir.
Tədqiqatın predmeti MT ilə əlaqədar Azərbaycan və ingilis dillərindəki mətnlərin, cümlələrin və onların tərkibindəki sözləri bir-birinə bağlayan semantik əlaqələrin müəyyənləşdirilməsi və onların formal modellərinin hazırlanmasıdır.
Tədqiqatın məqsəd və vəzifələri. Tədqiqat işinin əsas məqsədi MT-də semantik təhlil yolu ilə Azərbaycan və ingilis dillərinin materialları əsasında mətnlərdəki sözlərin məna əlaqələrinə və məna bağlılığına görə sıra mövqeyini müəyyənləşdirməkdir. Qarşıya qoyulan məqsədə nail olmaq üçün aşağıdakı vəzifələrin yerinə yetirilməsi nəzərdə tutulmuşdur:
MT üçün söz və söz birləşmələrinin semantik modellərini aşkarlamaq;
Qrammatik cəhətdən bir-biri ilə əlaqəli cümlə cütlükləri arasındakı semantik bağlılığı həll etmək;
Diskursda aşkara çıxarılmış hissənin bir neçə mümkün şərhlərindən hansının daha çox uyğun olduğunu (bura semantik ikimənalılıq və ya çoxmənalılıq aiddir) müəyyənləşdirmək;
MT kontekstində semantik təhlil yolu ilə sözlərin linqvistik mənalarını təyin etmək, onlar arasındakı məntiqi, leksik və qrammatik bağlılıqları şərh etmək;
MT-də semantik təhlil yolu ilə sözlərin tərkib hissəsinin mənalarını açmaq;
Semantik təhlil vasitəsilə sözlərin təkmənalılığını və çoxmənalılığını aşkarlamaq;
Azərbaycan dilindəki söz və ya söz birləşmələrinin ayrılıqda və cümlə daxilində daşıdığı funksiyaları, yerinə yetirdiyi vəzifələri öyrənmək;
Azərbaycan dilində işlənən söz və ya söz birləşmələrinin ingilis dilinə tərcümə yollarını, ifadə üsullarını aydınlaşdırmaq;
Söz və ya söz birləşmələrinin daxili mənalarını aşkara çıxarmaq;
Sözlərin və ya söz birləşmələrinin strukturunu, formal əlamətlərini tədqiq etmək, dillər arasındakı uyğun və fərqli cəhətləri müəyyənləşdirmək.
