Mat : Abraham chilhah David guiya peng Jesu Christa khanggui thusim hitia kisun ahi



Yüklə 136.88 Kb.
səhifə1/6
tarix09.12.2017
ölçüsü136.88 Kb.
  1   2   3   4   5   6

Matthew

Mat 1:1 Abraham chilhah David guiya peng Jesu Christa khanggui thusim hitia kisun ahi.


Mat 1:2 Abrahamin Isaac ahingin, Isaac chun Jacob ahinge; Jacob hin Judah le asopi pasal dang ho ahinge.
Mat 1:3 Judah hin Tamara konin Perez le Zerah ahingin, Perez hin Hezron ahinge; Hezron chun Ram ahingin,
Mat 1:4 Ramin Aminadab ahinge; Aminadab chun Nahshon ahingin, Nahshonin Salmon ahinge;
Mat 1:5 Salmonnin Rahab’a konin Boaz ahingin, Boaz hin Ruth a kon in Obed ahinge; Obed hin Jesse ahingin,
Mat 1:6 Jessen David lengpa ahinge. David hin Uriah jinua kon in Solomon ahingin,
Mat 1:7 Solomonin Rehoboam ahinge; Rehoboamin Abijah ahingin, Abijah chun Asa ahinge;
Mat 1:8 Asan Jehoshaphat ahingin, Jehoshaphat’in Joram ahinge; Joramin Uzziah ahingin,
Mat 1:9 Uzziah chun Jotham ahinge; Jothamin Ahaz ahingin, Ahaz chun Hezekiah ahinge;
Mat 1:10 Hezekiah hin Manasseh ahingin, Manasseh chun Amon ahinge; Amonin Josiah ahingin,
Mat 1:11 Babylon lama gal-hinga akai laiyun Josiah chun Jechoniah le asopi pasal dang ho ahinge.
Mat 1:12 Babylon lama gal-hinga akai nungun Jechoniah chun Shealtiel ahingin, Shealtiel chun Zerubbabel ahinge;
Mat 1:13 Zerubbabel hin Abiud ahingin, Abiud chun Eliakim ahinge; Eliakimin Azor ahingin,
Mat 1:14 Azor chun Zadok ahinge; Zadok hin Achim ahingin, Achimin Eliud ahinge;
Mat 1:15 Eliud chun Eleazar ahingin, Eleazarin Matthan ahinge; Matthanin Jacob ahingin,
Mat 1:16 Jacob chun Joseph ahinge; hiche Joseph hi Messiah kiti Jesu hingnu Mary jipa ahi.
Mat 1:17 Hiti hin Abraham a pat David gei khang som le khang li ahin, David a pat Babylon lama gal-hinga akai mang geiyu chu khang som le khang li ma ahi kit’e; chule Babylon lama gal-hinga akai manguva pat Messiah pen gei chu khang som le li ahi.
Mat 1:18 Jesu Christa pen um chan chu hiti ahi. Anu Mary chu Joseph to kicheng dinga kitepsa ahin, ahinla akigop masang lhonin Lhagao Thenga kona agai chu Mary hin akihet doh tai.
Mat 1:19 Ahin ajipa Joseph hi midih tah ahijeh-in Mary hi lhangphonga mipi seithanga umsah ding a nompon, guh thim cha akitepna lhon suh keh a kikhenpi din agoi.
Mat 1:20 Joseph-in hitobang lung agel laitah hin Pakaiya kon Vantil khat’in mangin akimusah-in, “David chilhah Joseph, Mary khu kipuiya jia nei ding tija hih hel’in; ijeh-inem itile Lhagao Thenga kona gai ahibouve.
Mat 1:21 Chapa khat ahinding, amin Jesu nasah ding ahi; ajeh chu amatah hin amite achonset’uva kona ahuhhing ding ahi,” tin aseipeh-e.
Mat 1:22 thil hicheng hi Pakaiyin Themgao kama aseisa gui lhun theina dinga soh ahin, asei chun,
Mat 1:23 “Ven, nu-ngah chu gaiyin tin chapa khat ahin ding, amin ‘Emmanuel’ kiti ding ahi, Amin hi, ‘Pathenin eiumpiuve,’ tina ahi” ati.
Mat 1:24 Joseph a-imut khah phat’in Pakaiya kon Vantil’in ahil bang bangin abol’in, Mary chu ji dingin akipuitai;
Mat 1:25 ahin Maryn chapa ahin masangsen nupaa kitimatpina vang aneipi khah hih hel;e, Naosen ahung pen phat’in amin chu Jesu asah tai.
Mat 2:1 Judah gama Herod lengpa lal laiyin Bethlehem khopia Jesu ahung pengin, niso lama ahsi umdol hethem miho Jerusalem khopia ahungun,
Mat 2:2 “Judate chunga leng chang dia hung peng naosen chu hoiya um tam? Ama pen jeh a niso lama ahsi hung kilah kamu-va naosen chu chibai boh dinga hung kahiuve,” tin aseiyui.
Mat 2:3 Athudoh-u ajah phat’un Herod lengpa ti Jerusalem mite ti along jing lheh tauve.
Mat 2:4 Hijeh chun Herod’in Thempu pipu ho leh mipi lah a Danthu lekha them ho akoukhom loiyin, “Messiah chu hoiya hung peng ding ham?” tin adonge.
Mat 2:5 Amahon, “Judea gamsung Bethlehem khopia peng ding ahi; ajeh chu Themgaopan hitin asun’e”
Mat 2:6 ‘Vo Judea gama Bethlehem! Judah vaipote lah a itina ma jongleh aneopen nahipoi; Nanga kona kamite Israel lamkai ding khat Hung peng doh dong ahi,’ ati.” atiuve.
Mat 2:7 Chuphat’in Herod chun ahsi umdol hethem miho chu atumin akimupin, itih phat tah a ahsi hung kilah chu aphochentai.
Mat 2:8 Chujouvin amaho chu Bethlehem lama asol’in, “Cheuvin lang naosen chu phate chan gahol doh-un, keijong ka chea chibai kagabohna dingin, namudoh tenguleh neihung seipeh tauvin,” tin athu lhah-e.
Mat 2:9 Lengpa thusei ajah phat’un akipatdoh paiyun, ahin mupeh sau niso lama ahsi chu amasanguva achepeh-in, naosen umna chung aphah phat’in aki-ngai.
Mat 2:10 Ahsi amudoh kit phat’un akipah behseh jenguve!
Mat 2:11 Chuin insunga agalut’u leh naosen chu anu Mary toh agamu thauvin, boh khup cheh-in chibai aboh tauve. Chujongle agoubomu hongin thil manlu cheh-sana, bego chule myrrh atoh-un, thilpeh hicheng hi apetauve.
Mat 2:12 Herod henglam ahopa kit louhelna diuva Pathenin amanguva ahilchah phat’ in lamchom khat ajuiyun agam languva akile kit tauve.
Mat 2:13 Ahsi umdol hethem miho che nungin, Pakaiya kon Vantil khat Joseph manga akilah-in, “Thouvin, naosen le anu puiyin lang Egypt langa jampin, kahinkou masangsen ga-umpi tan; ajeh chu Herod’in naosen hi suhmang din angaiton ahol’e,” ati.
Mat 2:14 Joseph jong athouvin naosen le anu apuiyin janlaiyin Egypt langa ajampin,
Mat 2:15 Herod thi kahsen aga-umpitai. Hitobang thil hi Pakaiyin themgao kama aseisa, “Egypt’a konin kachapa kakoudoh tai,” ati chu guilhunna dinga soh ahi.
Mat 2:16 Ahsi umdol hethem mihon alhim lhah ahetdoh phat’in Herod alung hang behseh jengin, mi asol’in ahsi umdol hethem mihoa kona naosen pen ahetdoh phat chutoh kitoh chet’in asimin, Bethlehem khopi le khovel dunga naosen pasal kum nia lhah noi lamse se athagam sah tai.
Mat 2:17 Hechea hin Jeremiah Themgao kama kiseia-
Mat 2:18 “Ramah khoa lhaset lunghem Ka le mao ogin nasatah akijan, Rachel in achate aka ka jengin, Athigam tah jeh-un lhepbi jou ahita poi,” kiti chu agui lhung tai.
Mat 2:19 Herod thi nungin Pakaiya kon Vantil khat’in, Egypt gama aumna a Joseph chu amangin kimusah-in,
Mat 2:20 “Thouvin, naosen le anu puiyin lang Israel gam jontan, naosen tha dinga hol ho athigam tauve,” ati.
Mat 2:21 Joseph athoupaiyin, naosen le anu apuiyin Israel gamsung jonin ahung kile kit tai.
Mat 2:22 Ahin Judea gama apa Herod khel’a Archelaus leng chan ajah doh phat’in Judea gama chenden ding Joseph akichan, amanga ma akihil chah jeh chun Galilee gamsung joh ajonin,
Mat 2:23 Nazareth khopia achengtai. Hiche hi Themgaohon, “Nazareth mi kiti ding ahi,” atiu gui lhunna dia chuti ahi.
Mat 3:1 Hiche lai hin John Baptist ahungin Judea gamthip noiya thu ahil lhang len,
Mat 3:2 “Nachonset lung khel’un, ajeh chu van a lenggam chun hikom ahinpha tai !” tin asam’e.
Mat 3:3 John hi Isaiah Themgaovin anaseisa; “Gamthip laiya khosam ogin khat’in, “Pakai lampi semtoh-un lang, Alamlen semjangsan koiyun, tin aseiye,” ati chu ahitai.
Mat 3:4 John pon-ah chu sa-ngongsao mul ahin, akonggah savun, a-anneh khaokhote le gam khoiju ahi.
Mat 3:5 Jerusalem khomite leh Judea gam pumpia mi, chule Jordan gamkol sung pimpia konin miho John henga acheuvin,
Mat 3:6 achonset nau aphong cheh-un, Jordan vadunga john khut’in baptize achangtauve.
Mat 3:7 Pharisee ho leh Saducee ho tamtah ama khut’a baptize chang dia hung amu phat’in Johnin ajahuva, “Vo gulse son ho, kho nunga hung lhung ding Pathen lungsatnaa kona jamdoh dia thu namop’u koi pen ham?
Mat 3:8 Nalung khel’u natohgan phongdoh-un;
Mat 3:9 ‘Abraham son kihina chu,’ tin nalah-uva kihoulim nan neidauvin; kaseipeh nahiuve, Pathenin hiche song ho geiya Abraham chilhah a asemthei ahi.
Mat 3:10 Thingphung bul tin’a heicha aki phutsoh tai, aga phalou chengse kiphuh lhua meilhum sunga kileh lut ding ahi.
Mat 3:11 Nalung khel’u phot chetna twiya baptize kachansah nahiuvin, kei bana hungpa vang khu keisanga gamchenga chungnung jo ahin, kei hi akengchot te ni sut dinga kilom jong kahipoi; ama chun Lhagao Theng le meikonga baptize nachansah diu ahi.
Mat 3:12 Akhut’a chang japna achoiyin, phola chang jap ngimsel’in tin, chuteng achangtah ho changsal’a akhum tup ding, asi chengse vang mit thei lou meilhum sunga agovam ding ahitai,” ati.
Mat 3:13 Hichepet hin Galilee gama konin Jesun Jordan lui ahin jonin, John khut’a bapize chang din ahung tai.
Mat 3:14 Ahivangin John anathu phan, ‘Keijoh nang khut’a baptize kachan dingsih a kei henga nahung tan’e!” anati.
Mat 3:15 Jesun adonbut paiyin, “tun hiti hin molso pou pouvin, ajeh chu hitobanga hi Pathen dei chan ibol bulhingsoh ding ahi,” ati, Hichun John jong anomtai.
Mat 3:16 Baptize achan jouva Jesu twiya kona apotdoh chun, ama din van akihongin Pathen Lhagao vakhu bang a hung kumlha achunga chu amui.
Mat 3:17 Chuin van a konin o-khat ahung gingin, “Ama hi kachapa deitah ahin, achugna kalung alhai ta ngeiye,” ati.
Mat 4:1 Hiche jou hin Diabol lhep patep dingin Jesu chu Lhagaovin gamthip’ah apui toutai.
Mat 4:2 Nisom li le jan som li geiya an ngol’a aum jouvin Jesu agilkeltai.
Mat 4:3 Hichun alhempatep chu ahungin ajah a, “Pathen chapa nahileh hiche song ho hi changlhah so na dingin seipeh-in,” ati.
Mat 4:4 Jesun adonbut’in “Pathen lekhabua kisun chun Mihem hi changlhah keova hing theilou ding, Pathen kamsoh thuhoa bou hing dinga kisei ahi,” ati.
Mat 4:5 Hichun Diabol’in Jesu khopi thenga apui yin, Houin tingvum asang laiya adinsah-in,
Mat 4:6 “Pathen chapa nahileh kileh lha jengin, ‘Songa nakisuh khah louna dingin Pathenin a-Vantilte thu pentin akhut’uvin nadom nauvinte,’ tin Pathen lekhabua akisun nai,” ati.
Mat 4:7 Jesun aseipeh paiyin, “Hitin jong, ‘Pakai na-Pathen patep a na -lhep chatvai louhel ding ahi,’ tin akisun’e,” ati.
Mat 4:8 Chujouvin diabol chun molsang tah khat chunga Jesu apui touvin, vannoi leiset lenggam jouse le aloupina chengseu avetsah soh keiyin
Mat 4:9 ajah a, “Kahenga naboh khup’a chibai neiboh le hichengpi hi peng kate.” ati.
Mat 4:10 Chutah chun Jesun ajah a, “Chedohin Satan! ‘Pakai na-Pathen chu chibai naboh a, ama jeng bou nahou ding ahi,’ tin Pathen lekhabua akisun bouve!” atitai.
Mat 4:11 Chuphat’in Diabol chun adalhatai. Hichun Vantilte ahungun Jesun angaichatna jousea ahung jenle tauve.
Mat 4:12 John songkul a akhum’u ajah phat’in Jesu jong Galilee gam langa akikhindoh tai.
Mat 4:13 Amavang Nazareth kho dalhan achen, Zebulun le Naphtali gamsung, Galilee dillen pang, Capernaum khoa apansai.
Mat 4:14 Hitia aum hi Isaih Themgao kama kiseisa;
Mat 4:15 “Zebulun gam le Naphtali gam, Jordan gal’a Twikhanglen lampi; Namtin vaipi chenna Galilee,
Mat 4:16 Muthim lah a chengten Khovah vah tah amutauvin; Thina muthim gama chengte chunga Kho ahung vah tai,” kiti chu gui lhunna dinga chuti ahi.
Mat 4:17 Hichelaiya pat chun Jesun thu ahil lhanglen, “Van a Lenggam chun hikom ahinphatai, nachonset lung khel’uvin,” ati.
Mat 4:18 Galilee dillen panga Jesu ava le le pet’in nga man mi ni Peter kitipa Simon le anaopa Andrew Twikhanglen a lensep pet amui.
Mat 4:19 Chuin ajah lhona, “Neijui lhonin mihem matje hil lhon inge,” atileh;
Mat 4:20 alen lhon dalhan Jesu ajui pai lhontai.
Mat 4:21 Ache kit leh ucha chom dang ni, Jacob le anaopa John kiti Zebedee to len anakhui phat pet’u amun, amani jong akouve.
Mat 4:22 Jacob le Johnin kong le apa Zebedee dalhan Jesu nung ajui lhontai.
Mat 4:23 Galilee gam pumpia Jesu ache le len japi houkhomna in tin ah thu ahil len, Lenggam Kipana Thupha aseiphong len, mipilah a nat jat chom choma na ho aboldamin ahi.
Mat 4:24 Chutah chun Syria gam pumpia achung chang thu athangsoh tan, nat jat chom choma naa, natthoh lel, thilhavop, buh thi chule langthi ho jouse Jesu henga ahinpuiyun aman aboldamsoh keitai.
Mat 4:25 Chujongle Galilee, Decapolis, Jerusalem, Judea gam le Jordan gal langa konin mipi tamtah-in Jesu nung ajuitauve.
Mat 5:1 Mipi amu phat’in Jesu molvuma akaltouvin atou leh aseijuite ahenga ahung kikhomtauve.
Mat 5:2 Hichun Jesu apaodoh-in mipi thu ahil’in hitin aseiye:
Mat 5:3 “Lhagaova chimtih neilou ho anun nom’ui, Van a Lenggam chu amahoa ahi!
Mat 5:4 Lung lengvai ho anun nom’ui, Pathenin alhamon diu ahi!
Mat 5:5 Milung neng ho anun nom’ui, Amahon leiset alo diu ahi!
Mat 5:6 Pathen dei holna gilkel dangchah thoh ho anun nom’ui, Pathen deiya lung nachim diu ahi.
Mat 5:7 Mi hebol ho anun nom’ui, Pathenin amaho ahebol ding ahi.
Mat 5:8 Milung theng ho anun nom’ui, Amahon Pathen amu diu ahi.
Mat 5:9 Mi sucham ho anun nom’ui, Pathen chate kiti diu ahi.
Mat 5:10 Pathen dei boljeh a bolset thoh ho anun nom’ui, Van a Lenggam amahoa ahi.
Mat 5:11 “Keima jal’a min nabolset, nahouset’uva chule nang ho douna jouthu le thu gilou ijakai naseikhum tengu leh anun nom nahiuve.
Mat 5:12 Hitobang tah a hi nang ho sanga masajo Themgao ho jong anabol setsau ahitai! Kipah-un tha nom’un, van a nasan diu kipaman tampi akikoiye.
Mat 5:13 “Nang ho leiset chi nahiuve. Chi khu tamta le ipia ki-alsah kit ding ham? A-al lou teng panna bei ahitan, akipai mang jin, min keng chotphan aneijitai.
Mat 5:14 “Nang ho vannoi salvah nahiuve. Molchunga khopi kisem chu akisel theipoi.
Mat 5:15 Koiman thaomei avah-in lo akhu khum ngaipoi, thaomei khom chunga atungin insunga um jouse asalvahsoh keijie.
Mat 5:16 Hitobang chun navah-u miho masanga kilang hen, chutileh min natoh phat nau muntin, van a um na-pau avahchoi diu ahi.
Mat 5:17 “Kei hi Mose Danthu leThemgao ho thuhil sumang dia hungin neigel hih hel’un, asumang ding hilouva amolso ding joh a hung kahibouve.
Mat 5:18 Dih tah a kaseipeh nahiuve, van le leiset man kahse le thil jouse bei kahsea Danthu kisun lekhajem neopen le ahalsi khat jeng jong mang lou ding ahibouve.
Mat 5:19 Hijeh a chu hiche thupeh lah a aneopen khat susea, midang jong chu tibol dinga hilchan chu van a Lenggama aneopen a pang ding, chu tobangma a anit them le midangin anit themna dinga hilchan chu van a Lenggama alen a kisei ding ahi.
Mat 5:20 Chuti ahijeh a kaseipeh nahiuve, Danthu them ho le Phrisee ho sanga nathem chan nau achung nun joh loule van a Lenggamma nalut louhel diu ahi.
Mat 5:21 “‘Tol natha lou diu ahi, koi hijongle tol that chu achung thu kitan ding kicha jing ding ahi,’ tia malai mite jah a kiseisa chu najatauve.
Mat 5:22 Kenvang kaseipeh nahiuve, koi hijongle asopi chunga lung hang chan chu achung thu kitan ding kicha jing ding ahi; chu jongle koi ahin asopi jah a, ‘Pannabei’ tia house jouse chu hou vaipoloi kikhopnaa athu kitan ding kipha lam jinga, chule asopi jah a, ‘Panabei mi-ngol’ tia house chan jong damun meidil’a lut ding kicha geova um ding ahi.
Mat 5:23 Hijeh chun maicham phunga thiltoh din hung ta jongle chun, chua chu nasopi nachunga lung himona nageldoh leh,
Mat 5:24 maicham maiya nathilto ding dalhan, nasopi chutoh gakicham masan, chujou teng hung kit’in lang thil chu Pathen koma toh-in.
Mat 5:25 “Naheh pan thutanpu heng nalhut masangin lampia kichampin, achuti loule thutanpa koma nakai lut’in tin, thutan pan songkul ngah pa pedoh-in natin, aman songkul’a nakhum lo ding ahi.
Mat 5:26 Tahbeh a kaseipeh nahi, paisa nongnai geiya napeh theng hel masangin songkul’a konin potdoh thei pon nate.
Mat 5:27 “‘Mito najon lou ding ahi,’ tia kisei chu najatauve.
Mat 5:28 Ken vang kichentah a kaseipeh nahiuve, koi hijongle numei jon lung gul’a vea chun alungthima ajonpi ahitai.
Mat 5:29 Hijeh chun namit jetlamin nachon setsah le kaldoh-in lang pai mang jengin; tahsa pumpia damun a nakile lut sangin, natibah khat lhin lel ding aphajoi.
Mat 5:30 Nakhut jetlamin nachonset sah jong le sat lhan pai mang jengin, tahsa pumpia damun a nakile lut sangin natibah khat lhin lel ding aphajoi.
Mat 5:31 “‘Koi hileh ajinu daa chun jida na lekha pehen,’ kitisa ahi.
Mat 5:32 Kenvang kaseipeh nahiuve, mito ajonjeh tilouva jida chan chun ajinu ajonso ahin, dasa numei kichenpi jong chu mito jong-ah ahi.
Mat 5:33 “Chukit leh, ‘Nakitepna sukeh hih-in, nakitepna jat chu Pakai koma molson,’ tia malai mite kiseipeh chu najatauve.
Mat 5:34 Kenvang nakihahsel louhel diuva kaseipeh nahiuve; van panin kihahsel dauvin, Pathen laltouna mun ahi,
Mat 5:35 Leiset panin jong kihahsel hih-un Pathen kengto ngapna ahi, Jerusalem panin kihahsel dauvin, Leng loupi khopi ahi,
Mat 5:36 naluchang jong panin kihahsel dauvin, nasamjang khat jeng jong nakansah navomsah theipouve.
Mat 5:37 Naseiyu chu ahile hijeng hen, ahida le hida jeng hen; hiche kalval vang chu Agiloupaa kon ahibouve.
Mat 5:38 ” ‘Mit khel’a mit, ha khel’a ha,’ tia kiseisa chu najatauve.
Mat 5:39 Kenvang kaseipeh nahiuve, Agiloupa chu lethuh hih-un, chusangin nangeiphe jetlam benga chu naveilam jong dopeh-in.
Mat 5:40 Hehset’a nasongkhol sung nung lah peh ding gopa chu nasangkhol ponung – alenpa geiyin peh than.
Mat 5:41 Koi hile nada nacham louva mile khat napuigoa chu mile ni geiyin kilhonpin.
Mat 5:42 Nahenga thil thuma chu pen, bat ding deiya jong peh louvin koidan.
Mat 5:43 ” ‘Naheng nakom ngailut’a melma vang nahot ding ahi,’ tia kiseisa chu najatauve.
Mat 5:44 Kenvang kaseipeh nahiuve, Namelmateu ngailu’vin, nabolse jouseu taopeh-un;
Mat 5:45 chutileh van a um na-Pau chate nahi theidiu ahi. Ajeh chu Aman migilou le mipha chunga kibangin nisa asat sah gel’in, midih le midih lou chunga go ajuhsah gel’e.
Mat 5:46 Ahimonga jong na-ngailute bou na-ngailut’u leh ipi kipaman namu diu ham? Kaidong chonse hon jong chutia abol’u hi louham?
Mat 5:47 Chule nasopi bou nasalam’u leh midang sanga nachungnun nau ipi um am? Pathen heloute jengin jong chutia abol’u hilouham?
Mat 5:48 Hichejeh chun vana um na-Pau chamkimsoh banga naphat chamkimsoh diu ahi.
Mat 6:1 “Houva nakitah nau miho mu ding deina nabol louna diuvin ching theiyun. Chutia nabol vangu leh van a um na-Pauva kona kipaman nanei lou diu ahi.
Mat 6:2 “Mi thil napeh teng, mipha lhem hon pachat deinaa Hou thua kikhopna in tin le lam lhong tin’a abol bangun, namasang sanga sumkon kimut bahsah hih hel’in. Dihtah a kaseipeh nahiuve, amahon kipaman akisanu ahitai.
Mat 6:3 Mi thil napeh tengleh, nathilpeh chu guh thim ahi theina din nakhut jetlama napeh chu veilam jeng jong hetsah dan.
Mat 6:4 Chutileh guh thima vejing na-Pan kipaman napeh tei ding ahi.
Mat 6:5 “Natao tengu leh mipha lhem ho toh bang hih-un, amahon mi mu ding deinan Hou thua kikhopna in tin a dindoh a tao le kholai lamkon dunga din a tao ding bou adeiyui. Dih tah a kaseipeh nahiuve, amahon kipaman akisanu ahitai.
Mat 6:6 Nang vang natao teng, na-indan sunga lut’in, kotpi kikam khumin, mit’a mu thei lou na-Pa hengah guh thimin taojon; chutileh guh thima vejing na-Pan kipaman pejon nate.
Mat 6:7 “Natao tengu le chidang namdang ho bangin tampi kisei chu ajah chom ding ngaiton thu hom keo tamtah seidauvin.
Mat 6:8 Amaho umchan tho hih-un; ajeh chu nathum masanguva jong na-pauvin na-ngai chat jouseu ahetsa ahitai.
Mat 6:9 Hijeh chun hiti hin taovun: ‘Van’a um ka-Pau, namintheng kijabol jing hen,
Mat 6:10 Nalenggam hung lhung hen, Van’a bangin leiset’a nalungdei kim soh hen;
Mat 6:11 Tunia kaneh khop diu an neh neipeuvin,
Mat 6:12 Eibolseteu ka-ngaidam bangun, Kasuh khelnau ngaidamin;
Mat 6:13 Chonset lona thei patepna neilhut dauvin, Agiloupaa konin neihuhdoh jo’uvin,’ tin.
Mat 6:14 “Ajeh chu mi suhkhel na-ngaidamu leh van a um na-Pauvin jong nasuh khel nau ngaidamin te.
Mat 6:15 Mi suh khel na-ngaidam lou vanguleh, na-Pauvin jong nasuh khel’u ngaidam ponte.
Mat 6:16 “An na-ngol tengu mipha lhem ho bangin ki-nguisah dauvin. Mipha lhem hon vang an angol’uvin, mi het ding deinan amaisou achom sah jiuve. Tahbeh a kaseipeh nahiuve, amahon kipaman akisanu ahitai.
Mat 6:17 Nangin vang an na-ngol teng nalu thao kinujol’in, namai kiphet ngimjon;
Mat 6:18 na-anngol chu miho hetsah louvin, guh thima um, na-Pa hetsah in; chutileh guh thima vejing na-Pan kipaman pejon nate.
Mat 6:19 “Nget le thih-eh suhmang theina, guchan aphet vanga aguh mang theina leiset chunga gou khol hih-in;
Mat 6:20 chusangin nget le thih-eh suhmang thei louna, guchan jong aphet vanga aguh mang thei louna van a gou khol jo’uvin.
Mat 6:21 Ijeh-inem itile nagou umnaa chu nalung cheng jing ding ahi.
Mat 6:22 “Mit hi tahsa meivah ahin, namit chim leh natahsa pumpi vahsoh ding ahi.
Mat 6:23 Namit aphat lou vang leh natahsa pumpi thim jeng ding ahi. Hijeh chun nasunga vah thim taleh iti khoh ding hitam!
Mat 6:24 “Soh koiman Pakai ni kin abolkop joupoi, kop taleh khat hotbol’in tin, khat joh alungset ding, ahiloule khat’a hakaiya khat joh anahsahmo lo ding ahi. Hijeh chun Pathen kinbol le sum hol kop thei pouvin nate.
Mat 6:25 “Hichejeh a chu kaseipeh nahiuve, hinkhoa neh le chah chunga lungkham bol dauvin, tahsa sille chen dingin jong lungkham hih-un; anneh twidon sanga hinkho thupi joa, nihchen ponsil sanga tah sa khoh jo hilou ham?
Mat 6:26 Vanlai jol’a vachate khu veovin, tu la atu pouvin, at la a-at pouvin, changsal’a akhol sampouvin, hijongle van a um na-Pauvin avah nauve. Vachate sanga khu nang ho manlu jo nahi louvu ham?
Mat 6:27 Nalah-uva lungkham hat’a ahinkho tong khat jopbe thei koi nahiuvam?
Mat 6:28 I-bol’a nihchen ponsil jal’a lungkham nahiuvam? Gamlah a pahcha ho khu iti khandoh ham gel phauvin, na la atong pouvin, sil ding patse bol’a ponkhong jong ahipouve;
Mat 6:29 ahinla kaseipeh nahiuve, Solomon jeng jong ahao dungjui tah a akijep vangin hiche pahcha ho khat hoi bangin ahoi joupoi.
Mat 6:30 Gamlah hampa tunia kimu, jing teng gop’a meilhum sunga kileh lut ta ding bon Pathenin achuti jep hoi leh, Aman hiche ho sanga najep hoijoh lou diu ham? Vo tahsan lhomho!
Mat 6:31 Hijeh chun, ‘Ipi kaneh-uva ipi kadon diu, ipi kasil’uva kachen diu ham?’ tin lungkham dauvin.
Mat 6:32 Hicheng hi Pathen hepha louten ahol’un, Nang hon na-ngai chat’u jong van a um na-Pauvin ahesoh keiye.
Mat 6:33 Hijongle amasan Pathen dei le alenggam hol masauvin, chuteng adang ho chengse hi nakipehbe dingu ahinai.
Mat 6:34 Jing dingin lungkham hih-un, jing chun anikhoa ding hinkigel nan e. Nikho khat cheh-in agimpi khop cheh anei nai.
Mat 7:1 “Oimo nachan louna diuvin midang oimo dauvin;
Mat 7:2 mithu nakhol bang banga nathu kikhol cheh ding ahin, midang nabol nau dan dungjuiya kibol ding nahiuve.
Mat 7:3 Ipi dinga nasopi mit’a bohsi chu namelchih keova, nang mit’a thing long tejen chu mulouva um nahin?
Mat 7:4 Iti jong nasopi jah a, ‘Namit’a bohsi chu neilahdoh sah-in,’ tia nasei ngam a, nang mit’a thing long tejen chu don louva um nahim?
Mat 7:5 Vo mipha lhem, namit’a thinglong tejen chu kilahdoh masah le chun nasopi mit’a bohsi chu muchenin natin, ladoh thei tan nate.
Mat 7:6 Thil theng chu uichate peh dauvin, hung kiheiya nape lo diu ahi; vohchate masanga jong natwikoh chang sep lha hih-un, akengtoa achil thang bep diu ahi.
Mat 7:7 “Thum’un kipeuvin nate, hol’un namudiu ahi; kiuvun nakihonpeh diu ahi.
Mat 7:8 Ijeh-inem itile athum chan kipe ding, ahol’an amuding akiuva kihonpeh ding ahi.
Mat 7:9 Nalah-uva achapan neh ding changlhah athum le song pea,
Mat 7:10 nga athum leh gul peding koiham?
Mat 7:11 Migiloutah nang hon bon nachateu thilpha pehje nahet’uleh, van a um na-Pauvin ahenga thumte chu itobang tah a thilpha apeh ding hitam!
Mat 7:12 Hijeh chun min iti nabol le nadeiyum, nang hon jong hitobangma chun bolpeh-uvin, hitia bolding hi Danthule Themgaote thuhil to kitoh ahi.
Mat 7:13 “Kot jim a lut’un, ajeh chu manna lam chu akot lentah ahin, alampi alenin, mi tamtah hichea chun alut’ui.
Mat 7:14 Hinna lam chu akot jong akichin, alampi ahah-in, hijeh chun alut’a mi lhomcha ahiuve.
Mat 7:15 “Kelngoi phat’a kiphatsah, asung lam ngeihang tah tobang Themgao lhem nahenguva hungji ho koma kichih theiyun.
Mat 7:16 Itobang ahiu atohgauva nahet diu ahi. Ling phunga lengpi theiga kilouva, meithai seltho linga theichang ga kilou ngaiyam?
Mat 7:17 Hitobang hin thing phung pha aga aphan, thingphung phalou ga aphapoi.
Mat 7:18 Thing phung phaa ga pha lou ga ngai lou, thing phung phalouva jong ga pha ga ngai lou ahi.
Mat 7:19 Aga phalou thingphung jouse chu akiphuh lhun meilhum sunga akileh lutjitai.
Mat 7:20 Hijeh a chu mi atohgauva nahetdoh diu ahi.
Mat 7:21 “Pakai, Pakai eiti chan chu van a lenggam lut lou ding, van a um ka-Pa deilam bol’a bou lut ding ahi.


Dostları ilə paylaş:
  1   2   3   4   5   6


Verilənlər bazası müəlliflik hüququ ilə müdafiə olunur ©muhaz.org 2017
rəhbərliyinə müraciət

    Ana səhifə