Mat : Abraham chilhah David guiya peng Jesu Christa khanggui thusim hitia kisun ahi

Mat 27:12 Thempulen ho le upaten ahehsetna thudol’a vang imacha adonbut poi.
Mat 27:13 Pilate’in Jesu jah a, “Mihon hijat’a nahehset nau hi najah lou ham?” ati.
Mat 27:14 Jesun thu cheng khat cha jong adonbut lou phat’in gamvaipopan kidang asa lheh jenge.
Mat 27:15 Kalchuh kut sunga hi sohchang koi hileh japi dei pen pen khat Gamvaipon alhadoh peh ji ahi.
Mat 27:16 Hichepet hin sohchang minse tah – Jesu Barabbas – khat akihen’e.
Mat 27:17 Mipi hung kikhop phat’in Pilate’n ajah uvah, “Jesu Barabbas kalhadoh peh diu ha, Messiah kiti Jesu joh kalhadoh peh diu ham?” tin adonge.
Mat 27:18 Ijeh-inem itile Juda lamkaiten thangset suma Jesu apehdoh-u chu ahet ahi.
Mat 27:19 Thutanna muna Pilate atoupet man ajinun thu ahin thot’in, “Themmona bei hichepa chu limsah hih-in, ama jeh hin tunin kamangin kathoh gim lheh jenge,” ati.
Mat 27:20 Ahin Thempulen ho le upa ten Jesu asuhmanga Barabbas joh alha na din mipi atilseuvin, angeh sah tauve.
Mat 27:21 Gamvaipopan mipi adongin, “Hite ni kah a hoijoh kalhadoh peh ding nadeiyum?” ati. Mipin, “Barabbas!” atiuve.
Mat 27:22 Pilate’n, “Ahile Messiah kiti Jesu hi iba kalo ding hitam?” ati. Mipin, “Thingpel’a khenbehtan!” tin asamtauve.
Mat 27:23 Pilate’n, “Ipi suhset aneiyam?” tin adonge. Miho la a-olheh lheh-in apengun, “Thingpel’a khenbeh-in!” tin asam’ui.
Mat 27:24 Athilbol phat chomlou, boina asojoh amu phat’in Pilate’in twi alan mipi angsunga khut asil’in, “Hichepa thina chung changa mona po ponge, nang hon kivet tauvin,” ati.
Mat 27:25 Mipin adonbut’un, “Hichepa thisan phu chu keiho le katu kachateu chunga chu nante,” atiuve.
Mat 27:26 Pilate’n Barabbas alhadoh peh in, Jesu vang chu ajep’in thingpel’a khetbeh din apedoh tai.
Mat 27:27 Gamvaipopa sepaiten Jesu chu gamvaipo inpi sunga apui lut’un, sepai hon lhingset’in akikhomui.
Mat 27:28 Jesu ponsil ahoh lhauvin, pon sandup asilpeh-un,
Mat 27:29 ling lukhuh apheh-un akhuh peh-uvin, akhut jet lama peng tenggol khat achoisah-un, tot nan aangsunga aboh khup’un, “Judate lengpa hingsot’in!” atiu ve.
Mat 27:30 Chil aset khumun, atenggol’in aluchang ajep’un
Mat 27:31 tot nopna anei jou phat’un asilpeh-u ponsan chu ahoh lhauvin, ama pon asilpeh-un, thingpel’a khetbeh din apui mang tauve.
Mat 27:32 Akijotdoh-u leh sepai hon, Cyrene gam mi Simon atoh khauvin, Jesu thingpel put hu din ada acham louvin aman’ui.
Mat 27:33 Golgotha, “lugu mun,” kiti lai ahung gei phat’un,
Mat 27:34 adon din cheikha toh kihal lengpitwi chu Jesu apeh-u leh, aman la atep’in adon nompoi.
Mat 27:35 Sepaihon Jesu chu thingpel’a akhenbeh-un, vang asan’un apon sil chengse akihomtauve.
Mat 27:36 Hikoma chun atouvun Jesu chu angah-ui.
Mat 27:37 Jesu luvuma ahehsetna, “Hichepa hi Jesu Judate lengpa ahi,” tia kisun chu atah-uve.
Mat 27:38 Gucha michom ni jong Jesu jet le veiya akhetbeh thauve.
Mat 27:39 Ache le avah le jousen Jesu chu ataitom nan akhasuh khum khum’ui.
Mat 27:40 “Houin phelha a nithum sunga sadoh ding Pa! Pathen Chapa nahileh Nangma kihuhhingin lang, thingpel’a konin hung kumlhan! atiuve.
Mat 27:41 hitobangma chun Thempulen ho le Danthu them ho chule upaten jong a-eng houvun,
Mat 27:42 “Midang bon huhhinga, ama akihuhhing theipoi! Israel leng ahi-ong! Tutah-in thingpel’a konin hung kumlha hen tahsan unge!
Mat 27:43 Pathen a kisong ahi me, Pathen lungdei ahileh tutah-in huhdoh hen; ajeh chu, ‘Pathen chapa kahi,’ ati me,” atiuve.
Mat 27:44 Akikhetbeh pi gucha michom te geiyin jong chutobangma chun ahouse lhon’e.
Mat 27:45 Nidan gup a pat nidan ko geiyin leiset pumpi chunga mu athimtai.
Mat 27:46 Nidan ko donin Jesu hapenin apengin, “Eli, Eli, lema sabachthni?” ati. Hichu “Ka-Pathen, ka-Pathen, i-bol’a neilha hitam?” tina ahi.
Mat 27:47 Chukoma ding mi phabeh’in apen gin ajauvin, “Hei, Elijah akouve,” atiuve.
Mat 27:48 Alah-uva mi khat alhaijel’in, twichop phon khat alan, lengpitwithuh adekot’in, tenggol leh a atah-in Jesu chu donsah ding agoi.
Mat 27:49 Midang hon, “Limsah hih-un, ahuhhing dia Elijah hung nam, veu hite,” atiuve.
Mat 27:50 Jesu hapenin apengin ahaitan paitai.
Mat 27:51 Chutah chun Houin pondal chu achunga pat anoi geiyin keh ni akison, ling akihot’in, songpi jouse apoh keh gamtai;
Mat 27:52 hijeh chun lhankot tampi akihongtan, mitheng thisa ho kaithouvin aum’ui.
Mat 27:53 Amahon lhan adalhauvin, Jesu thodoh nungin khopi thenga alut’un, mi tamtah henga akilah-ui.
Mat 27:54 Sepai jalamkai pa le aumpi sepai, Jesu ngah a pang hon, ling kihot le thilsoh chengse amu’vin, akicha behseh jengun, “hiche Pa hi Pathen Chapa tahbeh ahi,” atitauve.
Mat 27:55 Galilee gama pat Jesu nung hinjui, ajen lea pang numei ho chun galkanga konin Jesu ave-lhi jingui.
Mat 27:56 Alah-uva hin Magdalene khoa Mary toh, Jacob le Joseph nu Mary chule Zebedee chapate ni nu jong apanguve.
Mat 27:57 Nilhah phat’in, Jesu seijuisa, Arimathea khoa amin Joseph kiti mihao tah khat ahungin,
Mat 27:58 Pilate henga achen Jesu long chu agathumtai. Pilate’n Jesu long chu Joseph din aphalpeh tai.
Mat 27:59 Joseph-in Jesu long chu adom lhan, tupat pon ngimseh-in atomin,
Mat 27:60 songpi akhet homa akisemsa, ama lhan thah beh sunga chun alupsah-in, lhankot’ah song lentah khat atang lut’in asing chah-in achetai.
Mat 27:61 Magadalene khoa Mary le Mary khat joh chu hikoma chun lhan lam ngan atou lhone.
Mat 27:62 Ajing nikho, kigot ni kichai jouvin thempulen ho le Pharisee ho Pilate henga ahungun,
Mat 27:63 “Pu, hiche milhem chavai pa hin, ahinlaiyin, ‘Nithum jou le kaithouva ka-um ding ahi,’ ati kageldoh-uve.
Mat 27:64 Hijeh chun nithum geiya kitup tah a lhan ngah din mi koiyin, achutiloule aseijuite hunga atahsa longdamsa aguh mang diu, miho jah a, ‘Thina konin kaithouvin aumtai,’ atiuva, amasa eilhep chatvai sanguva anukhah teng khoh cheh a eilhep diu ahi,” atiuve.
Mat 27:65 Pilate’n adonbut’in, “A-ngah ding naneiyu chu me, cheuvin lang pha nasah bangun lhan chu gaki-nga tup tau!” ati.
Mat 27:66 Amaho acheuvin lhankot song chu mohor anam khum’un, angah ding akoitauve.
Mat 28:1 Choldo nikho kichai, hapta kipatna ni masa jingkah khovah thin thenin Magdalene khoa Mary le Mary khat nu chu lhan vedin ahung lhone.
Mat 28:2 Phulou helouvin ling hahon akihot’in, van a konin Pakaiya kon Vantil khat ahung kumlhan, lhankot sin song chu atangdohin, song chunga atouve.
Mat 28:3 Vantil vouso chu kolphe vah-in avah-in, aponsil meibang banin abange.
Mat 28:4 Lhan ngah hon akicha behseh jengun athisa abang jengui.
Mat 28:5 Vantil chun numeiho ahin houvin, “Kicha hih-un, thingpel’a kikhetbeh Jesu chu nahol’u ahin, kahenai.
Mat 28:6 Ama hikoma aumtapoi, Aman aseisa bangin athoudoh tai. Hungin alupna hung veuvin.
Mat 28:7 Cheloiyun aseijuite jah a, ‘Ama thinaa konin athoudoh-in, Galilee gama nang ho sangin amasajotai, hikoma chu nakimupi diu ahi,’ tin gaseiyun. Ngai phauvin kaseipeh nahitauve,” ati.
Mat 28:8 Numeihon kichat le kipa thon lhan phung dalhan, seijuite gaseipehdin lhaijel tauve.
Mat 28:9 Phulou helouvin Jesun numeiho chu akimupin, “Lung monguvin!” ati. Numeihon ahin nailut’un, akeng phang atuh-un aboh khup tauve.
Mat 28:10 Jesun ajah-uva, “Kicha hih-un, kile kit’uvin, kasopite chu Galilee gama che din gaseipeh-un, hikoma chu eimu diu ahi,” ati.
Mat 28:11 Numeiho lamkim agei nalaiyun, lhan ngah sepai ho khopi sunga alut’un, thilsoh chengse abonchan Thempulen ho kom alhut tauve.
Mat 28:12 Thempulen ho le upaho akihou toh loiyun, sepai ho hi sum tampi apeuvin,
Mat 28:13 “Nang hon, ‘Jan ka-ihmut lan’un aseijuiten along ahung gu mang tauve,’ tia nasei tei tei diu ahi.
Mat 28:14 Hiche thu hi Gamvaipon ajah tah jongle keihon houjol’ung ting, nang ho lung olmosah pou vinge,” atiuve.
Mat 28:15 Lhan ngah sepaihon sum chu akilah un, ahil nau bangin abol tauve. Hitobang thujou abol thuu hi Juda ho lah a tuni geiyin akisei son son nalaiye.
Mat 28:16 Jesun che dia ateppeh nau Galilee lhanga chun seijui somle khat chu anachetauve.
Mat 28:17 Abang bang alung opkai vangun, seijuihon Jesu amu phat’un chibai aboh tauve.
Mat 28:18 Jesun ahin nailut’in ajah-uvah, “Van le leiset’a tha neina jouse eikipetai.
Mat 28:19 hijeh chun cheuvin lang muntin a mi jouse seijuiyin gasem tauvin, amaho chu a-Pa, a-Cha chule Lhagao Theng minin baptize gabol’un,
Mat 28:20 chule kathupeh chengse anitna diuvin hilun; veuvin leiset khang kichai ni geiyin Keiman nang ho ka-umpi jing nauve,” ati.