Mat : Abraham chilhah David guiya peng Jesu Christa khanggui thusim hitia kisun ahi

Mat 7:22 Hiche Nikho chuleh mi tamtah hunguva, ‘Pakai, Pakai, keiho namin a gaothu seisa, thilha nodohsa chule thil kidang bolsa kahilouvu ham? ati diu ahi.
Mat 7:23 Chuteng ajah-uva phong tah a, ‘Vo Dan dih lou bolte, kakoma konin potdoh loiyun, nang ho kahe kha hih hel’ui,’ kati ding ahi.
Mat 7:24 “Chuti ahijeh chun kathusei hiche hi ja a bol’a chu mi lungthim pha, song chunga in kisah to kitekah ding ahi.
Mat 7:25 Gon ajuh khuma, vadung in aso den a, huipin ahin mut vangin, hiche in chu aluden poi; ajeh chu a-inbul khom songpi chunga kiphut det chet ahi.
Mat 7:26 Kathusei hicheng hi ja a bol lou vang chu milungthimbei, nellei chunga in kisah toh kitekah ding ahi.
Mat 7:27 Gon ajuh khuma, vadungin aso den a, huipin amut tengleh in chu alhujitan, alhuh chu melse tah ahi,” ati.
Mat 7:28 Jesun chujat asei chai chaiyin mipin athuhil chu kidang asa lheh jenguvin ahi.
Mat 7:29 Ijeh-inem itile aman Danthu themho hil banga hil louva thunei tah banga ahil jeng thei ahi.
Mat 8:1 Jesu molvuma ahung kumsuh chun mihonpin ahin juiyui.
Mat 8:2 Hichun miphah khat ahungin akoma bohkhup’in, “Pakai, nalung ahileh neidam theng sah thei ahi,” ati.
Mat 8:3 Jesun athamin, “Kalung ahinai damthengtan,” ati leh, apettah chun aphahnat adamthengtai.
Mat 8:4 Chuphat’in Jesun ajah a, “Koimacha henga seidoh hih hel’in, amavang chen lang Thempu gakivetsah-in, nadamtheng hi phot chetna din Mose thu peh dungjuiyin nathilto ding lom gatoh tan,” tin ahil’e.
Mat 8:5 Jesu Capernaum khoa alut chun sepai jalamkai khat ahenga ahungtaovin,
Mat 8:6 “Pakai, in a um kalhacha chapang khat langthin agen thei lheh jenge,” ati.
Mat 8:7 Jesun, ajah a, “Hung damsah nang e,” atileh;
Mat 8:8 jalamkaipan adonbut’in, “Pakai, nang hi kei in sunga lut dinga kilom nahipoi, thu mai mai sei jong le chun kalhacha chapang chu dam jeng thei ahinai.
Mat 8:9 Ajeh chu kei jong thunei ho noiya um kahin, kei noiya jong sepaite aum’uvin, khat pen pen jah a, ‘Chen,’ katile achen; achom dang khat jah a, ‘Hungin,’ katile ahunge; chule kalhacha jah a, ‘Hiche hi bol’in,’ katileh, abolji nai,” ati.
Mat 8:10 Athujah hi Jesun kidang asa behseh jengin, anunga hung ho jah a, “Dih tah a kaseipeh nahiuve, Israelte lah jenga jong hitobnag tahsan len kamudoh hih laiye.
Mat 8:11 Hijeh a chu kaseipeh nahiuve, niso lam le nilhum lama kon a mitamtah hung kikhom’uva van a Lenggam a Abraham le Isaac chule Jacob toh ankong aumkhom diu ahi.
Mat 8:12 Ahin lenggam chate dia kigel ho joh chu polam muthim lah a kileh lut diu, hikoma chu ka le hagel um ding ahi,” ati.
Mat 8:13 Chuin Jesun jalamkaipa jah a, “Chetan, natahsan banga lhung ding ahinai,” atipeh-e.
Mat 8:14 Jesu Peter insunga alut leh, Peter nupanu nat lhut’a na a lum agatoh khai.
Mat 8:15 Jesun akhut agah tham leh anat lhut chun alhan, amanu ahung thoudoh paiyin ajen len apangtai.
Mat 8:16 Nilhah lamin thillhavop mi tampi Jesu henga ahin puiyun, Aman thu cheng khatseh seiyin thilhaho anodoh-in, damloute adamsah soh keitai.
Mat 8:17 Hitobang thil hi Isaiah Themgao kama kiseisa, “Aman inatna jouseu le iveiset chengseu akilah-in apomangtai’” kiti chu guilhunna dinga chutiso ahi.
Mat 8:18 Akimvel’a mipi kikhom amudoh phat’in Jesun dil gal lang khat’a galkai ding asomtai.
Mat 8:19 Hichun Danthu lekha them khat ahungin ajah a, “Houhil, nache che naa juiyinge,” ati.
Mat 8:20 Jesun ajah a, “Gam-uiten ko aneiyun, chunga leng vachaten bu aneiyui; mihem Chapan vang lungapna ding jeng jong mun aneipoi,” ati.
Mat 8:21 Seijuiho lah a khat’in, “Pakai amasan kapa vui din neisol tadin,” ati.
Mat 8:22 Jesun ajah a , “Neijui jengin, mithi hon athilongu kivui nauvinte,” ati.
Mat 8:23 Jesu kong sunga alut’in aseijuiten akilhonpiuve.
Mat 8:24 Hetman louva dilpi chu khopihui hattah-in ahin nuh leh, twi kinongin kong chu achup pai ding ahitai. Jesu vang aihmu nalaiye.
Mat 8:25 Seijuiten agasukhang loiyun, “Pakai neihuhhing loiyun twiyin eichup lih diu ahitai!” atiuve.
Mat 8:26 Jesun ajah-uvah, “Vo tahsan lhom ho idia chuti kichat nahiuvam?” atin, athoudoh-in khopihui le dillen chu haphoa apho leh athip del jenge!
Mat 8:27 Mihon adatmo soh keiyun, “Ipi mi bep hiya hui le dillen geiyin athu angai jeng hitam!” atiuve.
Mat 8:28 Jesu agalkaiya Gadara gamsung alhunin, lhankhuh lah a hung kon thilhavop mi nin akimutopi lhon’e. Thilhavop te ni chu kichat aum behseh jeh-in aumna lhon lampi chu koiman ahopa ngampoi.
Mat 8:29 Amani apengjah lhonin, “Vo Pathen Chapa, ilo ding neitiu ham? Akitep phat lhin masanga keiho bolgentheiya hung nahim?” ati lhon’e.
Mat 8:30 Akom’uva kon chun muphah don khat’a hin vohcha tampi hon khat alhai.
Mat 8:31 Thilhahon ahenga, “Neikaidoh tei diu leh hiche vohchate sunga khun neisol’uvin,” tin ataovui.
Mat 8:32 Jesun “Lut tauvin,” ati phat’in, ahung potdoh-un vohchate sunga aluttauve. Chutah chun Vohhonpi chu ha-lhaiyin alhaiyun, kol’ah a alhai lhauvin, dil sunga achomlut soh hel’auvin, twi lah a athidentauve.
Mat 8:33 Chuphat’in vohcha ching ho kho sunga ajamlut’un, thilhavop te ni chunga thusoh le athilmu jouseu agaseisoh tauve.
Mat 8:34 Chutah chun kho sung mite abonchan Jesu henga ahungun, Ama chu agamsunguva kona potdoh din ajoltauve.
Mat 9:1 Jesu konga alut’in, ahung kile tol galkaiyin khopi sung ahung lhungtai.
Mat 9:2 Hichea hin mihon pasal langthi khat alupna pumin Jesu henga ahinpuiyui. Jesun atahsanu amuchet phat’in langthipa jah a, “Kihol lel hih-in chapa, nachonset jouse ki-ngaidam ahitai,” ati.
Mat 9:3 Hichun Danthu lekha them phabep’in, “Hichepan Pathen ataitom’e,” tin agel’ui.
Mat 9:4 Alung gel’u Jesun ahen, “Idia hitobang thilse nagel’u ham?
Mat 9:5 ‘Nachonset aki-ngaidamsoh tai,’ ti leh “Thouvin lam jottan,’ ti hoijoh seibai jom?
Mat 9:6 Leiset chunga Mihem Chapan chonset ngaidamna tha anei kavetsah nahiuve,” atin, lang thipa jah a, “Thouvin, nalupna kilah-in na-inlam jontan,” ati.
Mat 9:7 Langthipa akipatdoh paiyin inlam ajontai.
Mat 9:8 Mipin hiche hi amu phat’un akichauvin, ahivangin mihemte chunga hitobang thaneina pea Pathen avahchoitauve.
Mat 9:9 Jesun hikom chu dalhan ache leh Matthew kiti mi khat a kaidonna mun a tou amun, ajah a,”Neijuiyin,” atileh; Matthew akipatdoh-in ajuitai.
Mat 9:10 Matthew in a Jesun ankong aum phat’in kaidong ho tamtah le thet umtah tah miho ahungun Jesu le aseijuite toh ankong aumkhom’uve.
Mat 9:11 Pharisee hon hichu amuphat’un aseijuite jah a, “I-bol’a na Houhil pauvin kaidong ho le thet um tah tah ho to an aneh khom ham?” tin adongui.
Mat 9:12 Jesun aseiyu ajan, “Midamin louthem angaipon, adam louvin bou angaiye.
Mat 9:13 ‘Keiman hepina bou kangeh-in, kilhaina ka-ngeh poi,’ kiti hi ipi kiseina ham gakholtoh-un. Ajeh chu midihho kouva hung kahipon, chonsete kouva hung joh kahibouve,” ati.
Mat 9:14 John seijuite Jesu henga ahungun, “I-atileh keiho le Pharisee hon an ka-ngol mat chet jiuva, nang seijuiten an angol khah louvu ham?” tin ahung dongui.
Mat 9:15 Jesun adonbut’in, “Kichen golvahna hung lha ho chu aji neipan alenkhompi laisea lunghem ngaiyam? Amavang aji neipa akom’uva kona akipui mang nikho hung lhung ding ahin, chutengleh kichen golvah a hung lha hon an angol diu ahinai.
Mat 9:16 “Koiman sopnem loulai ponhal’in ponlui abeh ngaipoi, beh leh abehnan pon lui chu bot-eh jontin, haset cheh lo ding ahi.
Mat 9:17 Chujongle min savun peng lui sunga jong lengpitwi thah akhum ngaipoi, khum ta leh alengpitwi pen gchu tumkeh intin, lengpitwi long jal’a apeng jong man lo ding ahi. Hijeh chun lengpitwi thah chu savun peng thah a akikhum jin, lengpitwi le apeng anigel’in ahoidoh theiye,” ati.
Mat 9:18 Jesun hiche hi asei nalaiyin, vaihom pasal khat akom’a ahung bohkhup’in, “Tutah chun kachanu athitai, hinla hungin achunga na khut ngamle chun hingkit teiyinte,” tin ataove.
Mat 9:19 Jesu akipatdoh paiyin vaihompa to akilhon phat’in aseijuiten jong ajuitauve.
Mat 9:20 Lampia chun kum som-le kum ni thi longa dammo numei khat hi Jesu nunga ahungin apon mong kai atham’e.
Mat 9:21 Amanu kigel’a chu, “Apon mong jeng jong thamkha leng dam inge,” ati ahi.
Mat 9:22 Jesu agah kihei leh numei nu chu amun, “Kihol lel hih-in chanu, natahsanin nadamsah ahitai,” ati. Hiche pet tah chun ama nu adamsel tai.
Mat 9:23 Jesu vaihompa in a alut leh thi-opna a kuli mut ho leh mipi poh chei choiya um amun,
Mat 9:24 “Nabonchan potdoh-un, chapangnu hi athi-ah ahipoi, a-ihmu ahibouve,” atileh amahon amoh nuisat atauve.
Mat 9:25 Hinla mipi adeldoh phat’in Jesu insunga alut’in, chapangnu chu akhut’a akaileh chapangnu athoudoh tai.
Mat 9:26 Hiche thusoh hi chuche gamsungse sea akithangsoh tai.
Mat 9:27 Chukom dalha a Jesu acheleh, mitcho mi nin ajui lhon’in, “Vo David chapa neilungset’in,” tin asam lhontai.
Mat 9:28 Insung khat’a agalut phat’in mitcho tenin jong ajuilut lhontai. Hichun Jesun ajah lhon’a, “Namit lhon hasah thei ding monga neitahsan lhon ham?” atileh; amanin jong, “Henge Pakai!” ati lhon’e.
Mat 9:29 Chuphat’in Jesun amit lhon athampeh-in, “Natahsan lhon bang in mit hah lhontan,” atileh;
Mat 9:30 hichun amitlhon ahah paitai. Jesun amani akham chah kheh-in, “Koima hetsah-lhon hih beh-in,” ati.
Mat 9:31 Mitchote ni chula apotdoh lhonin chuche gamkol sungse seah Jesu thudol athechansoh lhontai.
Mat 9:32 Agah potdoh-u leh thilhavop mi paomo khat Jesu henga ahinpuiyui.
Mat 9:33 Jesun thilha anodoh peh phat’in paomopa apaothei paitai. Chutah chun mipin kidang asauvin, “Israelte lah jenga jong, hitobang thil akimu kha hih laiye,” atiuve.
Mat 9:34 Pharisee hon vang, “Thilha lengpa vanga thilhate adeldoh hichume,” atiuvin ahi.
Mat 9:35 Jesun khopi jouse le khoneo jouse achonsoh keiyin, Houthua kikhopna intin a thu ahil len, Lenggam Kipana Thupha ahil lhangin, veise dammo jouse aboldamin ahi.
Mat 9:36 Jesun mipi avet leh alainatpi lheh-e. Ajeh chu achingbei kelngoite bangin gim le da athoh-un, apan hu diu aumpoi.
Mat 9:37 Hijeh chun Jesun aseijuite jah a , “Chang-at ding atam lheh nan, natonga alhom’e,
Mat 9:38 chang-at ding mi ahinsol be na din chang-at thunei Pakai henga taovun,” ati.
Mat 10:1 Jesun aseijui som le ni chu akoukhomin, lhagaoboh ho deldohna ding le dammo veiset jouse boldam theina tha apei.
Mat 10:2 Solchah som le ni ho min chu: amasapenin Peter kisah Simon le asopipa Andrew ahin, adang Zebedee chapa te ni Jacob le asopipa John,
Mat 10:3 Philip le Bartholomew, Thomas, kaidongpa Matthew, Alpheus chapa Jacob, Thaddaeus,
Mat 10:4 Canaan mi Simon, chule Jesu matsah a pang Judas Iscariot – hicheng hi ahiuve.
Mat 10:5 Som le ni asoldoh chun Jesun hitin ahilchah-e: “Chidang nam dangte gamsung le Samaria mite khopi ho jot dauvin.
Mat 10:6 Kelngoi mang sa tobang Israel insung mite henga chejo’uvin.
Mat 10:7 Nache pum pum’un, ‘Van a Lenggam chun hikom ahin phatai,’ tin samleuvin.
Mat 10:8 Ana damsah-un, mithi kaithouvun, aphah suthengun, thilha nodoh-un, manbeiya nakisanu ahi, manbeiyin homjal’un.
Mat 10:9 Nasum dip sunga sana, dangka sumsan kipoh dauvin;
Mat 10:10 cholam ding sum thumna din sakhao jeng jong kendauvin, sangkhol tho ni ah hih-un, kengchot hihen tenggol hileh kendauvin. Ajeh chu natong’an aneh ding amu lom ahi.
Mat 10:11 “Khopi hihen khoneo hileh naphah phah nauva nalhunsah nom miu holdoh-un, chukom nadalhah kahseuvin umpiuvin.
Mat 10:12 Nalut lut nau insung jah a , ‘Lungmon leng hen,’ tin salam cheh-uvin.
Mat 10:13 Insung khattouvin lamtoa nalhunsah-u leh salam’un lang, nalhunsah nom lou vangu leh salam datauvin.
Mat 10:14 Insung khattou le khopi khattouvin lamto loule lhunsah da akop’uva, nathu seiyu jong angaidau leh, nakengphanguva leivui geiyin thin lhah khum’un dalhauvin.
Mat 10:15 Tahbeh a kaseipeh nahiuve, Thupi tan nikho leh chuche mun mite thoh ding sanga Sodom le Gomorrah khopi thoh baijo ding ahi.
Mat 10:16 “Veuvin, ngeihon lah a kelngoi kilha lut banga kasol nahiuve. Hijeh chun gul bangin ching theiyun, vakhu bangin lung nem’un.
Mat 10:17 Chingtheiyun, mihon man’uvin natin Hou vaipoloi kikhopna nakai lut diu, Houthua kikhopna in dunga najep diu ahi.
Mat 10:18 Keima jal’in vaipote le leng ho anga kailut’un tin, hinla amaho le chidang namdangte henga kathupha hettohsah a napan diu ahi.
Mat 10:19 Hitia nakailut tengu leh nasei diu le nasei ding dol’un lung kham hih-un, apettah leh kipenauvin nate.
Mat 10:20 Ajeh chu nalunggel mai mai nasei diu ahipon, nasunguva cheng na-Pau Lhagao chun naman chah-uva asei ding ahibouve.
Mat 10:21 “Pasal’in asopite aheh lih a, mipaten achate chutima abol diu, chaten jong anu apa adouva athiso cheh diu ahi.
Mat 10:22 Keima jal’a mitin hot le paiya na-um diu, hinla akhon ni geiya thoh lhumpa bou huhhinga um ding ahi.
Mat 10:23 Khopi khat’a nabolset tengu khopi chom khat’a jam lut’in, tahbeh a kaseipeh nahiuve. Mihem Chapa hung kah a Israelte khopi jouse nachotsoh louhel diu ahi.
Mat 10:24 “Seijui chu ahilpa sangin achungnungjo pon, soh jong apu sangin achungnung ngaipoi.
Mat 10:25 Seijui chu ahilpa tobang bep ahiya, soh apu toh abah joule aphaset ahi. Ainneipa bon Beelzebul ahisah ngamu leh a-insung mite ipi ahisah da diu ham?
Mat 10:26 “Mihem kicha hih-un. Ajeh chu phondoh louva sel mang ding aumpon, hetdoh louva im-mang ding jong aumpoi.
Mat 10:27 Muthima kaseipeh-u hi khovah a naphonjal diu, guh thima kahil’u hi intingvuma naphonjal diu ahi.
Mat 10:28 Tahsa sumang thei jongle lhagao that thei lou chu kichat dauvin, chusangin tahsa le lhagao akop’a damun a sol a sumang thei Pathen joh ginguvin.
Mat 10:29 Vasah ni paisa khatseh man a kijoh ji lou ham? Ahivangin na Pau phatsah louva khat jeng cha jong tol’a kimoh selhah lou ding ahi.
Mat 10:30 Nang ho jong nalujang sam jouseu geiya simtohsa kikoi ahitai.
Mat 10:31 Hijeh chun kicha hih-un, vasah ho sanga manlujo nahiuve.
Mat 10:32 “Koi hile japi lah a Christa mi ahi kiphongdoh chan chu Ken jong van a um ka-Pa angsunga kaphondoh ding ahi.
Mat 10:33 Koi hi leh Christa mi ahina japi lah a immang chan chu Ken jong van a um ka-Pa angsunga kaseilep ding ahi.
Mat 10:34 “Leiset chunga chambol’a hungin neigel dauvin, chambolma lah chemjama kidouna dinga hung kahibouve.
Mat 10:35 Ajeh chu pa le chapa kidousah a, nu le chanu kidousah ding, tehpi leh mounu kidousah dinga hung kahibouve.
Mat 10:36 Mihem dia amelma khohpen tahchu a-insung mi ma ma hiding ahi.
Mat 10:37 “Koi hile Kei sanga anu apa lungset jo jong kaseijui lom ahipoi.
Mat 10:38 Athingpel kiput’a kanung jui lou chu kaseijui lom ahipoi.
Mat 10:39 Koi hile kihinso nom chun athilo ding, keijal’a thilo chanin kihinsona anei ding ahi.
Mat 10:40 “Koi hileh nang ho lem a lhunsah chanin Kei eilem a lhunsah a kila ding, Kei eilem a lhunsah jouse chu Eisolpa lema lhunsah a ahi.
Mat 10:41 Pathen Themgao lem a lhunsah chun Themgao kipaman akihoppi ding ahin, mipha lem a lhunsah jong chu mipha kipaman amuding ahi.
Mat 10:42 Dihtah a kaseipeh nahiuve, kaseijuite lah a aneopen khat hijong leh seijui ahina jeh a twidap khon khat pejeng jong chu kipaman akisan tei ding ahi,” ati.
Mat 11:1 Jesun aseijuite som le ni ahilchahsoh phat’in chukom dalhan, naivel khopi dunga thuhil’a seiphong le din achetai.
Mat 11:2 Akihenna songkul’ah Messiah natoh thilbol kithang ajan, John chun aseijui phabep Jesu henga asol’e.
Mat 11:3 Amahon Jesu jah a, “Hung dia kisei chu nahim, achom dang khat ka-nga nah lai diu ham” atiuve.
Mat 11:4 Jesun ajah-uvah, “Kile kit’un lang najah chengseu le namu chengseu hi gaseipeh tauvin;
Mat 11:5 mitchon kho amun, elbaiyin lam a jot tan, miphah suhthengin aumin, na-ngongin kho ajan, mithi kaithouvin aumtai, chule vaichate Kipana Thupha akiseipeh tai.
Mat 11:6 Kachunga lung opkaina neilou chu anun nom’e,” ati.
Mat 11:7 John seijuite kile phat’in, John thudol mipi jah a Jesun aseiyin; “Gamthip laiya ipi vetnom’a che nahiuvem? Hui mut ling peng venom nahiuvam?
Mat 11:8 Ipi vedia che mong nahiuvem? Kile lah ponsil mi ham? Pon kikhel sil miho leng inpia achengbouvui!
Mat 11:9 Ipi vetnoma cheba nahiuvem? Themgao ham? Ahinai, Themgao mai mai ahi poi, thupitah Themgao ahi.
Mat 11:10 Pathen Lekhabua Pathenin, ‘Nalampi sem toh din namasanga kasolle kasol masai,’ tia asei chu John hi ahitai.
Mat 11:11 Tahbeh a kaseipeh nahiuve, numei sung peng cheh ahivangin John Baptist sanga lenjo mihem apeng kha hih laiye; hinla van a lenggama neopen jong ama sangin alenjo nalaiye.
Mat 11:12 John Baptist thuseiphong nikhoa pat tuni geiyin van a lenggam hi min pumhat jengin anon, mi huseten pumhat’a lah din agouve.
Mat 11:13 John khang geiya Themgao jouse le Mose Danthun Lenggam thudol aseiyu ahin,
Mat 11:14 nakisan nom’u leh John hi hung dia kisei Elijah chu ahitai.
Mat 11:15 Nakhang neiyan ngai hen!
Mat 11:16 “Hiche khang mite hi ipi to kitekah theiyin tem? Kailhang dunga tou chapang ho loikhat’in adang ho jah a,
Mat 11:17 Kipana kuli kamut vangun nalam pouvin, thi lhah la kasah-u jongle nakap pouve,’ tia kihouho tobang ahiuve.
Mat 11:18 Ajeh chu John hi mineh neloule midon don louva aumle ‘Thilhavop ahi,’ atiu vin;
Mat 11:19 mihem Chapan mineh ngai aneh a midon ngai adon vangin, Neh het le lengpitwi lop, kaidong ho le chonsete jol le gol,’ tin asei kit’ui. Hoi hileh chihna chu atohgan them achan ahibouve,” ati.
Mat 11:20 Jesun thil kidang ahabol dehna mihon lung ahei loujeh-un aphohsal’in,
Mat 11:21 “Ohe Chorazin khopi nada ahi! Ohe Bethsaida khopi nada ahi! Nakhosunga thil kidang kibol chengse hi Tyre le Sidon kho sunga kibol hileh, khomiten kisihin khaopon sil’a vut kinu’vintin achonset lung heisoh tauvinte.
Mat 11:22 Tahbeh a akseipeh nahiuve, thupi tan nikho le nang ho thoh sanga Tyre le Sidon kho mite thoh oljo ding ahi!
Mat 11:23 Chule Capernaum nang hi! Van geiya kichoisang go nahim? Noimigam a nasot lhah diu ahibouve. Nakho sunga thil kidang kibol sengse hi Sodom kho sunga kibol leh mangthah hih laiyinte.
Mat 11:24 Tahbeh a kaseipeh nahi, thupi tan nikho leh nang thoh sanga Sodom thoh oljo ding ahi,” ati.
Mat 11:25 Hichepat hin Jesun, “Pa van le leiset Pakai! Michingte le mi themte dia na-impeh chengse mimol ho naseipeh jeh-in kathangvah-e!
Mat 11:26 hiti dinga hi nadeimong hinte he-Pa!
Mat 11:27 “Ka-Pan thil ijakai eipedoh tai. Pa tilou koiman Chapa ahepon, Chapa le aman aphondoh peh nom ho tilou koima dangin Pa ahepouve.
Mat 11:28 “Tong gimte leh pohgihte kahenga hungun, Keiman choldoh sah unge!
Mat 11:29 Kanamkoljon kilah-un pouvin, Keiya kihil’un, Keima lung nengtah le nun nemtah kahi, Keiya hinjouna nanei diu ahi.
Mat 11:30 Ijeh-inem itile kanamkoljon apoh anop’in, kapoh jong ajang’e,” ati.
Mat 12:1 Chom khat jouvin Choldo nin Jesun bulei lai ajotpai. Aseijuiten gilkel jeh-in changvui asih pantauve.
Mat 12:2 Athilbol’u hi Pharisee hon amu’uvin Jesu jah a, “Ven, naseijuiten Choldo nin dan ngailou abol’ui!” atiuve.
Mat 12:3 Jesun adonbut’in, “David le aloite agilkel’uva chu ipi abol’u nasim khah louvu ham?
Mat 12:4 I-atileh Pathen Houin a lut’a, Thempu tilou neh ngai louhel, Pathen um jing hetna kitohsa changlhah aloite toh aneh jengu ham?
Mat 12:5 Ole Choldo niseh leh Houin sunga lutji Thempu hon Choldo nikho asuhkeh vanguva themmo achanda diu Danthu chu nasim khah louvu ham?
Mat 12:6 Kaseipeh nahiuve, Houin sanga thupijo khat hikoma aum’e!
Mat 12:7 Pathen lekhabua, ‘Gan a lhai ka-ngeh poi, hepina bou kadeiye,’ kiti chu heleu chun monabei miho themmo nachan lou diu ahi.
Mat 12:8 Ijeh-inem itile Mihem Chapa hi Choldo nikho Pakai ahi,” ati.
Mat 12:9 Hikom chu dalhan Houthua kikhopna in khat’a Jesu aluttai.
Mat 12:10 Kikhopna in a chun pasal khut lang ngoi khat ana umin, alah-uva chun Jesu thilbol dihsah lou jeh a hehse nom mi phabep jong aum’e. Amaho hin, “Choldo nikhoa damlou boldam hi Danthu to kikal hilou ham?” tin adongui.
Mat 12:11 Jesun adonbut’in, “Choldo nikhon nalah-uva koiham khat kelngoi kokhuh a lhalut taleh aneipan agakaidoh lou ding ham?
Mat 12:12 Mihem hi Kelngoi sanga gam chenga mantamjo ahi! Hijeh chun i-Danthuu hin Choldo nikhoa mi kithopi ding aphal’e,” ati.
Mat 12:13 Hijeh chun Jesun khut lang ngoipa jah a, “Nakhut lhangin,” ati. Khut ngoipan alhandoh jeng leh adamtan, adamlang bep bep ahitai.
Mat 12:14 Chuphat’in Pharisee ho apotdoh-un Jesu thana ding akihousomtauve.
Mat 12:15 Ama thana ding akihousomu ahet doh phat’in Jesu chukom dalhan apotdoh le japin ajuitauve. Ana jouse aboldamin
Mat 12:16 Ama thusim chu midang aseipeh da diuvin ahilchah-e.
Mat 12:17 Hitobang thil hi Isaiah Themgao kama kiseisa:
Mat 12:18 “Ven, kalhentum lhacha deitah, Kadeitah le kalung lhaina pen! Achunga ka-Lhagao chensah ingting, Chitin namtin lah a kathutan aphondoh ding ahi!
Mat 12:19 O-sanga mi anelkal lou ding, Kholai dunga jong lhang asap lou ding;
Mat 12:20 Tahlelte dia nun nem ding, Panpibeite akhoto ding ahi! Dan dihtah a thu akitan kahsea Adou dou jeng ding ahi!
Mat 12:21 Chule namtin vaipin akineppi diu,” kiti chu guilhunna dia soh ahi.
Mat 12:22 Hichepet hin thilhavop mitcho paomo mi khat hi Jesu henga ahin puiyun, Jesun aboldam phat’in apao theiyin kho amutai.
Mat 12:23 Jesu thil kidang bol hi japin adatmo behseh jengun, “Hichepa hi David Chapa hi-ngap ding hitam?” akitiuve.
Mat 12:24 Pharisee hon ajahdoh phat’un, “Thilha lengpa Beelzebul thahat’a thilhate anodoh hichu me!” atiuve.
Mat 12:25 Alunggel’u ahet phat’in Jesun ajah-uvah, “Kilang khen a kidouto lenggam tapou mangthah ding, ki lang khen a kidouto khopi hihen insung hi jong le mangthah vah ding ahi.
Mat 12:26 Satanin Satan anodoh leh akilangkhen ahitauvin, alenggam beivah ding ahitai.
Mat 12:27 Thilha lengpa Beezebul thahat vanga thilhate nodoh a neiseiyu leh naseijui teuvin koi thahat vanga anodoh-u ba ham? Namo nau phongdoh a naseijuiteu pang diu ahi.
Mat 12:28 Pathen Lhagao vanga thilhate nodoh kahi vang leh Pathen Lenggam chu nalah-u lhung ahitai.
Mat 12:29 “Mihat insunga lut chun ama somkon masa louva kon anei achom thei ngaiyam? Inneipa asomkon jou tengle bou anei achompeh ding ahi.
Mat 12:30 “Koi hileh eipanpi lou chu eidou mong ahin, eilhoh khomhu lou mi chu athecheh a pang ahibouve.
Mat 12:31 Hijeh a chu kaseipeh nahiuve, mihemte chonsetna le Pathen ataitom nau itobang hijongle ki-ngaidam thieyin tin, Lhagao Theng taitom vang ngaidam chang louhel ding ahi.
Mat 12:32 Mihem Chapa douna thusei jong ki-ngaidam theiyin tin, Lhagao Theng taitom vang chu itih chan a jong ngaidam chang louhel ding ahi!
Mat 12:33 “Thingga pha deiyan thing phung pha nei angaiye, nathing phung aphat loule thingga phalou nanei ding ahi. Ajeh chu thingphung hi agan akihei.
Mat 12:34 Gulse guiya peng ho, gitlou puma iti thupha nasei theidiu ham? Ajeh chu lungsung alet teng kamsunga hungpotdoh ahibouve.
Mat 12:35 Miphan athilpha kholna lung sunga konin thilpha asodoh jin, misen athilse kholna lungsunga konin thilse asodoh jie.
Mat 12:36 “Kaseipeh masah nahiuve, thupi tan Nikho leh mintinin manlou thu asei jouseu geiya asuhto soh kei diu ahi.
Mat 12:37 Naseisau thu hoa chu nathem namo nachung thu kitan diu ahi,” ati.
Mat 12:38 Danthu them phabep le Pharisee phabep’in Jesu jah a, “Houhil, thil kidang nabol kavetnom’ui,” atiuve.
Mat 12:39 Jesu a-eojah-in, “Pathen hephaloute leh khang gilouva miten melchihna nahol’um? Jonah Themgao melchihna tilou melchihna dang kipelou ding nahiuve.
Mat 12:40 Ngapi oisunga Jonah nithum le janthum athamden banga Mihem Chapa jong leiset Lailunga nithum le janthum thamden ding ahi.
Mat 12:41 Thupi tan nikho leh Nineveh kho mite chu hiche khang mite toh hung ding khom’uva themmo achan diu ahi; ijeh-inem itile Nineveh kho miten Jonah thusei ajah phat’un chonset lung aheiyui; hinla veuvin Jonah sanga lenjo khat hikoma aum’e!
Mat 12:42 Thupi tan nikho leh Sheba lengnu chu hiche khang mite toh ding khoma themmo achan ding ahi; ajeh chu leiset kolmang lang peh a konin Sheba lengnun Solomon chih thusei ahung ngai gunset theiye; tunla veuvin Solomon sanga lenjo khat hikoma aum’e!