Mat : Abraham chilhah David guiya peng Jesu Christa khanggui thusim hitia kisun ahi

Mat 12:43 “Lhagaoboh hi mihem sunga apotdoh teng gamgo lah a avah len choldo mun ahol lelen, mu la amuji poi.
Mat 12:44 Chutengleh, ‘Kahung potdoh namun ma ma a lut kit tange,’ atin, ahung kile kit leh, mihem chu sagoh keova kithen ngimsel’a um amun,
Mat 12:45 ache kit’in ama sanga khohjo lhagaoboh sagi ma agapui ben, mihem sunga chun alut’un achenpha tauve; chutah chun mipa umchan hi amasa sangin akhoh cheh tai. Hiche khanga migiloute jong hung chuti diu ahi,” ati.
Mat 12:46 Jesun mipi jah a thu asei nalaiyin anu le asopite ama to kihou nomin ahungun inpo-ah angah-ui.
Mat 12:47 Hijeh chun mi khat hin Jesu jah a, “Ven, nanu le nasopite nang to kihou nomin ahungun inpo-ah na-ngah-ui,” atipeh-e.
Mat 12:48 Ajah a thuseipa jah a Jesun, “Kanu koi hiya, kasopite koi koi hiuvam?” atin,
Mat 12:49 aseijuite akoh-in, “Ven kanu le kasopite hi!
Mat 12:50 Ajeh chu koi hileh van a ka-pa lungdei bol’a chu kasopipa, kasopinu chule kanu ahiuve,” ati.
Mat 13:1 Hiche nikhoa hi Jesun in dalha dil pang lama chea atou phat’in
Mat 13:2 mipi ahung kikhom’un, Ama kong sunga alut’in atouve. Mipi vang vaokam a adingui.
Mat 13:3 Hichun Jesun mipi jah a thu tampi thulemin aseiye: “Pasal khat muchi the din akontai.
Mat 13:4 Muchi athephat’in abang lamsih a achun, vachaten akilogam tauve.
Mat 13:5 Muchi phabep jong song lheo chung, leipatnaa achun, aleipat jeh-in ahung keh doh loiye.
Mat 13:6 Hinla nisan asah phat’in leipat jeh a ajungkho thuh loujeh chun asang gop jitai.
Mat 13:7 Muchi phabep ma ling lah a achukhan, ling ho akhandoh phat’in adep lih jin ahi.
Mat 13:8 Muchi phabeppi vang leipha laiya achun, akhangdoh-in agatan, abang jakhat cheng, abang somgup cheng chule abang som thum chengin apunge,
Mat 13:9 “Nakhang neiyan ngai hen.” ati.
Mat 13:10 Seijuiten anailut’un Jesu jah a, “I-bol’a mipi koma thulem jenga thu nasei ham?” atiuve.
Mat 13:11 Jesun adonbut’in “Nang ho hi van a lenggam thuguh hetna kiseipeh nahitauvin, amaho vang kiseipeh loulai ahi.
Mat 13:12 Aneiya chu anei let setna dia kipeh be ding, aneilou vang themcha nei jongle kilahpeh ding ahi.
Mat 13:13 Ijeh-inem itile amaho hin veu jongle muthei lou ding, ngai jongle ajah thei lou diu ahi jeh a thulema kisei ahi.
Mat 13:14 Hichea hin Isaiah Themgao seisa: ‘Ja jong leu chun nahet khen thei lou diu, Ve jong leu chun namu chet thei lou diu;
Mat 13:15 Ijeh-inem itile hiche nam mite hi alungthimu amoh-in, Akolseh gam’un, amit’u achosoh tai; Chutilou hileh mit’in mu’vin tin naa ajah diu, kadamsah diu ahi,’ ati chu guilhung ahitai.
Mat 13:16 “Nanghon vang namu’va najah tah jeh-un hampha tah nahiuve!
Mat 13:17 Tahbeh a kaseipeh nahiuve, namu chengseu hi Themgao tampi le midih tam tah-in amu nom vangun amupouvin, ajah nom lheh vangun ajapha pouve.
Mat 13:18 “Hijeh chun muchi thepa thulem hi ngaiyuvin.
Mat 13:19 Lenggam thu kiseipeh la ja a hekhen thei lou miho chu lamsih a chu muchi tobang chu ahiuve. Alung sunguva kikhum lutsa jong Agiloupan ahung lah mangpeh jitai.
Mat 13:20 Lenggam thu kisei ajah teng kipah tah a kisan pai jeng ho chu songlheo chung leipatna a chu muchi tobang ahiuve.
Mat 13:21 Asunguva alut gil loujeh-in chom khat aum jin, akisansau thu jeh a bolsetna ahung teng adonda paijitauve.
Mat 13:22 Ling lah a chu muchi hi lenggam thu ja a, ahivanga leiset khan khoa lungkhamna le haova nopsah ding deinan adep lihji miho ahiuvin, galouvin aumjitauve.
Mat 13:23 Leipha laiya chu muchi hi lenggam thu ja a hethem miho ahiuvin, ahung gaphan, abang ja khat cheng, abang somgup cheng chule abang somthum chengin apungjie,” ati.
Mat 13:24 Jesun ajah-uva thulem khat aseikit’in: “Van a Lenggam chu mi khat loulaiya muchi pha thea to bang ahi.
Mat 13:25 Jan khat mi ihmut thip nungin melma khat ahungin chang lah achun changlhem athen ache mangtai.
Mat 13:26 Chang kung kikhan lhit’a changpah do phat’in changlhem ho jong akilangdoh tai.
Mat 13:27 Hichun in neipa sohte ahungun ajah a, “Kapu, loulaiya muchi pha jeng nathe me, hoilam kona changlhem ho keh ham?” atiu leh,
Mat 13:28 aman, ‘Melma khat touvin abol hinte,’ ati. Hichun asohten, ‘Changlhem ho khu kagabo doh diu nadeiyem?” atiuve.
Mat 13:29 Aman ajah-uva, ‘Gabodoh datauvin, changlhem nabodoh nauva changtah jong bodoh tha khauvin nate,
Mat 13:30 Chang-at phat kah-in changtah le changlhem keh khom tante, chang-at phat teng keiman chang-at ho chu changlhem chengse meiya govam dia akankhom’uva chule changtah chengse kachangpang sunga akhum diuvin seipeh nange,’ tin aseiye,” ati.
Mat 13:31 Jesun thulem khatma aseipeh kit’in, “Van a Lenggam chu mi khat’in loulaiya ankam mu athe to bang ahi.
Mat 13:32 Ankam mu hi muchi lah a aneo pen ahivangin akhandoh phat’in thingphung tejen aphan, chunga leng vacha ten jong bu sahna le ge nan aneitauve,” ati.
Mat 13:33 Jesun thulem khat asei kit’in, “Van a Lenggam chu numei khat’in changbong danthum lah a chol avuiya, apomsoh kahsea abil tobang ahi,” ati.
Mat 13:34 Jesun mipi jah a thulem hijat hi aseiyin, thulem louvin thucheng khat cha aseipoi.
Mat 13:35 Thulem asei hi, “Thulem seinan pao ving ting, Lei set bul kiphu til’a pat kisei thuguh chengse phongdoh inge,” kiti Themgao seisa chu gui lhunna dia asei ahi.
Mat 13:36 Mipi dalhaa Jesu insung agalut leh aseijuite ahungun, “Lou laiya changlhem chu ipi kiseina ham neihil chen’un,” atiuve.
Mat 13:37 Jesun adonbut’in, “Muchi pha thea chu Mihem Chapa ahin,
Mat 13:38 loulai chu vannoi leiset ahi; muchipha chu Lenggama lut chate ahiuvin, changlhem chu Agiloupa mite ahiuve;
Mat 13:39 chule changlhem thepa chu Agiloupa ahiye. Chang-at phat chu Vannoi khang kichaina ahitan, chang-at ho chu Vantilte ahiuve.
Mat 13:40 Changlhem chengse akhop khom’uva meiya ahalvam banguva vannoi leiset khang kichai nikho jong hiding ahi.
Mat 13:41 Mihem Chapan avantilte sol’in tin Alenggam sunga kisuhmo na bolte leh akhangse jouse akhop khomsah a,
Mat 13:42 meilhum deuje ju sunga alelut diu, hikoma chu kap le hagel gel’a um diu ahi.
Mat 13:43 Midih chengse vang a-Pau lenggama nisa banga vah emsel diu ahi. Nakhang neiyan ngai hen!
Mat 13:44 “Van a lenggam chu loulaiya gou kiselguh, mi khat’in amudoh a, ima akhu khuma kipah tah a chea anei jouse joh a hiche lou chu kichoh jeng tobang ahi.
Mat 13:45 “Van a Lenggam chu sumkolvei min twikohchang manlu tah ahol tobang ahi.
Mat 13:46 Twikohchang chu amudoh phat’in acheloiyin anei jouse ajoh-in twikohchang chu achotai.
Mat 13:47 “Van a Lenggam chu min Twikhanglen lai lunga len aseuva nga tin nga tang amat khomu tobang ahi.
Mat 13:48 Len chu nga adim phat’in akaidoh-un, atoupin nga pha jouse paipeh sunga akhol’un, manmo chengse apaitauve.
Mat 13:49 Vannoi khang kichai nikho jong chutobang ding, Vantilte kon’un tin midih lah a migiloute alhendoh diu,
Mat 13:50 meilhum deuje ju sunga alelut’uva, hikoma chu kap le hagel gel’a um diu ahi.
Mat 13:51 Jesun, “Hicheng hi nahet chet tah-um?” atileh; Mihon, “Henge,” atiuve.
Mat 13:52 Hichun Jesun ajah-uvah, “Hijeh a chu Danthu them mi Van a Lenggam dia seijuiya pang chu akholna in a kona thil thah le alui hinpo doh doh jeng in neipa to bang ahi,” ati.
Mat 13:53 Thulem hijat asei jou phat’in chukom dalhan
Mat 13:54 Jesun akho ajonin, Houthua kikhopna in dunga thu ahil le leh, mihon kidang asauvin, “Hitobang chihna le thaneina hi hoiya akilah ham?
Mat 13:55 Ama hi thingthem bolpa chapa hilou haimo? Anu min jong Mary kitia, asopite Jacob, Joseph, chule Simon le Judas hilou ham?
Mat 13:56 Asopi numei ho jong ilah-uva cheng ahimeu? Hijat chihna le thaneina hi hoiya akilah hintem?” atiuvin,
Mat 13:57 asanda gam tauve. Hijeh chun Jesun ajah-uva, “Themgao chu akho sung le a-insung tilou mundanga vang akija bol tei nai,” ati.
Mat 13:58 Atah san loujeh-un hikoma chun Jesun thil kidang tampi abolpoi.
Mat 14:1 Hiche lai hin gambih vaipo Herod-in Jesu thudol kithang ajan,
Mat 14:2 alhachate jah a, “Hichepa hi athisa John Baptist chu thoukit hitei ding ahitai; hijeh a chu hitobang thil kidang ho hi abol thei ahi,” ati.
Mat 14:3 Herod hin anaopa Philip jinu Herodias thumop jal’a John chu songkul’a anakhum ahi.
Mat 14:4 Ajeh chu John hin Herod jah a, “Herodias nakichenpi hi Dan ngai ahipoi,” tia anaphosa ahi.
Mat 14:5 Herod-in John anatha nom vangin mipin John hi Themgaova agel jeh-un tha jeng ding akichai.
Mat 14:6 Herod pen nikhon Herodias chanu japi lah a ahung lamin, Herod alung lhaisah lheh-e.
Mat 14:7 Hijeh chun Herod-in, “Ipi hijongle nadeipen pen kapeh jeng ding nahi,” tin aki hahselin akiteptai.
Mat 14:8 Anu thumop dungjuiyin Herodias chanun, “Tutah-in John baptist luchang chu kongin hindomin neipen,” tin athumtai.
Mat 14:9 Lengpa alung kham lheh jeng nan, ankong phunga atoupi ho angsunga akitepna jeh chun John luchang apeh tei din anomtai.
Mat 14:10 Mi asol’in Songkul’a John luchang agatansah-in,
Mat 14:11 John luchang chu ahindop’uva nu-ngah chu agapeh-u leh, aman anu agapetai.
Mat 14:12 John seijuite hunguva John long chu agavuiyu ahi; chujouva hunguva Jesu ahung hetsah-u ahiye.
Mat 14:13 John kibolna thusim ajah phat’in Jesun chukom dalhan achangseh-in gamthip laiya din kongin akitol tai. Mipin achedoh ahet phat’in akhopi chenguva konin ahungun Jesu nung ajuitauve.
Mat 14:14 Jesu konga kona vaokama ahung potdoh leh mipi atoh paiyin, avet leh alainatpi lheh jengin, adamlou ho chu aboldamtai.
Mat 14:15 Nilhah phat’in aseijuite Jesu henga ahungun, “Hikom la gam thip lai ahin, nisa ma lhum pai ding ahitan, akho khoa acheuva neh ding agakichoh na diuvin mipi hi sol ngap tan,” atiuve.
Mat 14:16 Jesun ajah-uva, ‘Ache louvu akhoh poi, nang hon neh ding peuvin,” ati.
Mat 14:17 Seijuiten ajah a, “Changlhah pheng nga le nga ni seh bou kanei yui,” atiuve.
Mat 14:18 Jesun, “Changlhah le nga chu hinchoiyun,” atin;
Mat 14:19 chule japi chu hampa dum lah a tou din asol’e. Chuin changlhah pheng nga le nga ni chu alan, van lam ven Pathen athangvah-in, changlhah ho chu aheh bal bal’in seijuite apen seijuiten mipi ahoppeh tauve.
Mat 14:20 Japin anevaset cheh-un, anehval chengseu paipeh som le paipeh ni dimset alohdoh-ui.
Mat 14:21 Anea chu numei chapang sim louvin pasal sang nga jen ahiuve.
Mat 14:22 Jesun Mipi alhah doh phat’in aseijuite chu masaa gal lang khat kai masa din kong khat sunga alut sah-in asoltai.
Mat 14:23 Mipi asoldoh nung in achangseh a mol chunga tao din akaltouve. Nilhah geiyin mol chunga Jesu achangseh-in aum’e.
Mat 14:24 Hiche don hin kong chu dil lailung ageitai. Huiyin ale lama anuh jehin twi kinongin kong chu aleh le jengin ahi.
Mat 14:25 Jingkah lam nidan thum le nidan gup kikah-in seijuite heng jonin dil’a twi chunga Jesun lam ahinjot’e.
Mat 14:26 Twichunga lam ahinjot chu seijuiten amudoh phat’un, “Lhadam ahi,” tin kichan a-aosot jengui.
Mat 14:27 Jesun ahin houpaiyin, “Lung linglao hih-un Kei kahibouve, kicha hih-un,” ati.
Mat 14:28 Peterin ahin houvin, “Pakai nang nahi nah leh twi chunga naheng kahinjotna din neiseipeh in,” ati.
Mat 14:29 Jesun, “Hungin,” atileh; Peter jong konga akumlhan, twi chunga achen Jesu heng ajontai.
Mat 14:30 Hinla huiyin twi anon amuphat’in akichan alha lut pantan, apeng jah jengin, “Pakai, neihuhhingin!” tin asam tai.
Mat 14:31 Jesun akhut’in agah manloiyin, “Vo tahsan lhom! I-bol’a natahsan lel ham?” tin aphoh-e.
Mat 14:32 Jesu le Peter kong sunga alut lhon phat’in hui jong athip tai.
Mat 14:33 Chuphat’in kong sunga um seijuiten Jesu chu chibai aboh-un, “Pathen Chapa mong mong nahibouve,” tin aphongtauve.
Mat 14:34 Akitol gal kaiyun Gennesaret gamsunga akum lhauve.
Mat 14:35 Agam miten Jesu anahe masauvin, mi asol’un gamsunga ana damlou jouse Jesu henga ahin puikhom’un,
Mat 14:36 apon mongkai beh atham diuvin ataovui. Apon mong jeng tham kha a jong adamhel hel’uve.
Mat 15:1 Jerusalema konin Pharise ho le Danthu them ho Jesu henga ahungun,
Mat 15:2 “Ipi dia nasei juiten an aneh tengu khut sil louva puchon pachon apal keh-u ham?” tin adongui.
Mat 15:3 Jesun adonbut’in, “I-bol’a ba nang hon jong puchon pachon khohsah jal’a Pathen Danthu napal keh-u ham?
Mat 15:4 Ajeh chu Pathenin, ‘Nanu napa jabol’un,’ chule, Koi hile anu le apa house jousen, athilo diu ahi,’ ati ahi.
Mat 15:5 Nang hon la, ‘Koi hile anu ham apa ham jah a, “Kavanga naphat chomna thei thil ho chu Pathena thilto ding ahitai,” atileh,
Mat 15:6 ama hin anu apa aja bol khoh angaipoi,’ natiuvin; hiti hin puchon pachon khohsah nan Pathen thujoh nathai mil jiuve.
Mat 15:7 Mipha lhem ho! Isaiah-in nachung changu gaothua asei:
Mat 15:8 ‘Hiche nam mite hin kamsungin jabol thu aseiyun, Alungthimu la Keiya konin agamla lheh-e!
Mat 15:9 Thujong mihem thupeh jeng ahil jeh-un Eihouvu jong mohseh ahi,’ ati chu adih lheh jenge,” ati.
Mat 15:10 Jesun mipi akoulut’in ajah-uvah, “Phaten ngaiyun hechen’un.
Mat 15:11 Mihem suboh thei chu akamsunga lutjoh ahipon, akamsunga hung potdoh joh chun asuhboh ahibouve,” ati.
Mat 15:12 Jesu seijuite ahungun, “Nathusei jeh a Pharisee ho lung himo khu nahet’em?” atiuve.
Mat 15:13 Jesun adonbut’in, “Van a um ka-Pa phu hilou changphung jouse chu kibotdoh ding ahi.
Mat 15:14 Hite ho khu limsah hih-un, mitcho ahiuvin, mitcho ma man alamkaiyu ahi. Mitchon mitcho alamkai leh kokhuh a lhalut tei ding ahi,” ati.
Mat 15:15 Peterin Jesu jah a, “Ipi thu lema nasei ham neihil chen’un,” ati.
Mat 15:16 Jesun, “Tugeiya nahet khen thei louvu ham?
Mat 15:17 Ipi hijongle kamsunga lut jousen gilpi ahopaa chujou teng kithadohji ahi helou nahiuvam?
Mat 15:18 Lunggil’a kona kamsunga hung potdoh vang chun mihem asuboh theiye.
Mat 15:19 Ijeh-inam itile lunggil’a konin lung gilou, thilse, mi thana, mito jon na, huhna, guhchatna, hettohsah dih lou, mi housetna – hicheng hi ahungpot jie.
Mat 15:20 Hicheng hin mihem asuboh theiyin, khut sil louva an neh vang in koima aboh theipoi,” ati.
Mat 15:21 Jesun chukom dalhan Tyre le Sidon gamkol alhah tai.
Mat 15:22 Chu che gamsunga cheng Canaan numei khat ahungin, “David chapa kapu, neilungset’in kachanu thilha gilou tah khat to akivop’in akhoh lheh tai!” tin ahinsam’e.
Mat 15:23 Jesun la kamcheng khat’in jong adonbutpoi. Aseijuite ahung un, “Hichenu hi kanung nunguva ahungin apeng peng jenge, sol mang loiyin,” atiuve.
Mat 15:24 Jesun agah houvin, “Israel insung kelngoi mangsa ho henga bou eikisol’a kahi,” ati.
Mat 15:25 Chutah chun numeinu akeng bul’a aboh khup’in, “Kapu, neikithopi tei teiyin!” tin ataotai.
Mat 15:26 Jesun adonbut’in, “Chate neh ban lahpeh a uichate peh ding aphapoi,” ati.
Mat 15:27 Numei nun, “Ahinai kapu, hijongle uichaten jong dokhang chunga apu anmal lhathang anehji khu me!” ati.
Mat 15:28 Chutah chun Jesun adonbut’in, “Numei natahsan alen’e! Nadei banga kibolpeh ding nahi,” ati. Hichepet tah chun achanu adamtai.
Mat 15:29 Jesun chukom dalhan Galilee dillen pang alhah-in, molvum khat’a akaldoh-in atouve.
Mat 15:30 Ahenga mipi ahungun, ana damlou elbai, mitcho, paomo, lhemvei, chule adang dang hivei tampi vei mihem ahinpuiyun, Jesun aboldamsoh hel’e.
Mat 15:31 Paomo paothei, lhemvei damhel, elbai lamjot, mitcho khomu – mipin amudoh phat’un Israel Pathen avahchoi choi jenguve.
Mat 15:32 Jesun aseijuite akoulut’in, “Kakoma mipi nelou chalouva aum nau hi nithum alhingtan, kalung asei; mohsol ding la nelou chalouva lampia lha lhoppa diu ahin kasol nompoi,” ati.
Mat 15:33 Aseijuiten, “Gamthip laiya japi hijat neh ding hoiya kalah diu ham?” tin adongui.
Mat 15:34 Jesun, “Changlhah ijat nanei yum?” ati. Amahon, “Changlhah pheng sagi le nga them khat kaneiyui,” atiuve.
Mat 15:35 Jesun mipi chu tol’a tousah din aseiyin,
Mat 15:36 chuin changlhah pheng sagi le nga them khat chu alan, Pathen athangvah jouvin aheh bal bal’in aseijuite apeh leh, seijuiten mipi ahoppeh tauve.
Mat 15:37 Mipin vaset cheh-in aneuvin, aneh moh-u anong nai longkai sagi dimset aloh doh-ui.
Mat 15:38 An nea chu numei cha pang sim louvin pasal cheh sangli alhinge.
Mat 15:39 Mipi alhah doh phat’in Jesu kong khat’a alut’in Magadan gam kol ajontai.
Mat 16:1 Pharisee ho le Sadducee ho Jesu henga ahungun, akipal sah nom jeh-un, van a kona melchihna khat avetsah diu a-ngeh ui.
Mat 16:2 Jesun adonbut’in, “Nilhah teng, ‘Vansan asoh-e, kho pha ding ahi,’ natiuvin;
Mat 16:3 jingkah leh, ‘Vansan asoh-in, van anim’e, kho phalou ding ahi,’ natiuve. Vandang gongso bon nasuhto theiyu leh phat kiheichin melchihna ho nasuhto thei louvu ham?
Mat 16:4 Agilou le Pathen helou khang miten melchihna ahol’un, Jonah melchihna tilou adang kipe louhel ding ahi,” ati. Chuin amaho dalhan achemangtai.
Mat 16:5 Dil gal lang khat akaidoh-un Seijuiten changlhah anapo haitauve.
Mat 16:6 Jesun ajah-uva, “Ching theiyun; Pharisee ho le Sadducee ho chol phalou lah a kihong phauvin,” ati.
Mat 16:7 Seijuite akihou lhiuvin, “Changlhah ihai jeh-uva asei hinte,” akitiuve.
Mat 16:8 Aseiyu ahe-lhin Jesun ajah-uvah, “Changlhah nanei loujeh-uva idia kihou khohten nahiuvem – tahsan lhom ho!
Mat 16:9 Nahet thei lou mongu ham? Pasal sang nga lah a changlhah pheng nga nahop’uva chu amoh paipeh ijat nalo doh-uva,
Mat 16:10 chule pasal sang li lah a changlhah pheng sagi nahop’uva chu amoh long kai ijat nalodoh uvam?
Mat 16:11 Najah-uva changlhah thu bon kisei lou iti nahet khen thei louvu ham? Pharisee ho le Sadducee ho gu phalou lah a kichih thei dia kaseipeh nahibouvui,” ati.
Mat 16:12 Hichun changlhah lah a kisoji chol asei hilouva, Pharisee ho le Sadducee ho thuhil gu phalou lah a kichih thei dia asei joh ahi Seijuiten ahedoh tauve.
Mat 16:13 Jesu chu Caesarea Philippi gamkol ageiyin, “Mihem Chapa hi mihon koi ahisah-um?” tin asei juite adonge.
Mat 16:14 Amahon, “Mi kim khat’in John Baptist ahisah-un, adangin ma Jeremiah ahiloule Themgao dang khat hitei din aseiyui,” atiuve.
Mat 16:15 Amaho jah a, “Nang hon koiba neihisah-uvam?” tin adonge.
Mat 16:16 Simon Peterin, “Pathen hing jing Chapa, Messiah chu nahi!” tin adonbut’e.
Mat 16:17 Jesun adonbut’in, “John chapa Simon nanun nom’e! Hiche thudih hi tahsa mihema kon ahipon, vana um ka-Pan naphondohsah ahibouve!
Mat 16:18 Hijeh a hi kaseipeh nahi Peter: nangma songpi nahin, hiche songpi inbul’a hi ka-Houbung kasah doh a, mithi kul kotpin jong anan joulou ding ahi.
Mat 16:19 Keiman van a Lenggam kot-heh kapeh ding, leiset’a nakha chan van’a jong kikhah ding, leiset’a nahon chan van a jong kihong ding ahi,” ati.
Mat 16:20 Chujouvin Jesun ama Messiah ahi chu mikoma aseidoh louna diuvin aseijuite akham chah kheh-in ahi.
Mat 16:21 Hichea pat hin Jesun aseijuite jah a kichentah-in aseiyin, “Jerusalem a kachetei ding, upate le Thempu pipu ho chule Danthu them hon eibol gentheiyuva, eitha diu, hijongle nithum lhin nia Pathenin eikaithou ding ahi,” ati.
Mat 16:22 Hichun Peterin achangseh-in apuidoh-in, akihan lhon, “Pathen lungset’a hitobang hi nachunga chulou hel ding ahi Pakai!” tin aseiye.
Mat 16:23 Hitah chun Jesu akiheiyin Peter jah a, “Kinung che jengin Satan! Neikipalsah lo ding ahi, Pathen deibanga lung gel louvin mihem deilam joh nagel’e,” ati.
Mat 16:24 Hichea hin

Jesun aseijuite jah a, “Koi hi le eijui nom chu ama ki-ngaitom a, athingpel kiput’a eijui ding ahi.

Mat 16:25 Ijeh-inem itile kihinso nom chun athiloa, amavang Keima jal’a thi loa chun hinna anei ding ahi.
Mat 16:26 Ajeh chu min vannoi leiset pumpi nei jongle ahinkho akisuh mang teng ipi phat chompin tem? Ahiloule min ahinkho lhenga ipi apeh ding ham?
Mat 16:27 Ijeh-inem itile Mihem Chapa chu a-Pa loupinaa a-Vantilte toh hung ding, mitin atoh dungjui cheh tohman apeh ding ahi!
Mat 16:28 Tahbeh a kaseipeh nahiuve, hikoma ding ho lah a mi phabep hi Mihem Chapa leng loupia ahung amu masang seuva thina tep kha lou ding aum’uve,” ati.
Mat 17:1 Nigup jouvin Jesun Peter le Jacob chule Jacob naopa John toh apuiyin amaho seh molchunga akal toupi.
Mat 17:2 Amaho thum angsunga Jesu vou akikheltan, amai nisa vah bangin avah-in, avon jouse jong avah emsel jenge.
Mat 17:3 Mose le Elijah Jesu henga ahung kilah lhonin akihou lim’uve.
Mat 17:4 Hichea hin Peterin Jesu agah houvin, “Pakai, hikoma i-umu anom lheh jenge, pha nasah le nang ding khat, Mose ding khat chule Elijah ding khat – lhambuh thum song inge,” ati.
Mat 17:5 Pater thusei pettah hin meibang lhang khat’in amaho chu alekhun, meibang lah a konin ogin khat hin, “Hiche hi ka-Chapa deitah ahi, achunga kalung alhai ta-ngeiye, athu ngaiyun,” ati.
Mat 17:6 Ogin ajah phat’un seijuiho akicha behseh jengun, tol’a mai asulut gamtauve.
Mat 17:7 Jesu ahungin agah thamin “Dah doh-un, kicha hih-un!” ati.
Mat 17:8 Agah dadoh phat’un Jesu changseh bou aumin koima dang amupouve.
Mat 17:9 Molchunga kona ahung kumsuh phat’un Jesun amaho hi ahilchah masan, “Mihem Chapa thinaa kona kaithouva aum masangsen nathilmuu hi koima seipeh hih hel’un,” ati.
Mat 17:10 Hichun seijuiten, “I-bol’a ba Danthu them hon Elija hung masa tei dia aseiyu ham?” atiuve.
Mat 17:11 Jesun, “Elijah chu hung masa ahinai, aman thil ijakai agontoh masah ding ahi.
Mat 17:12 Kaseipeh nahiuve, Elijah ahung tan, mihon ahettoh loujeh-un anop aningin aboltauve. Mihem Chapa jong chuto bangma abol tei diu ahi,” ati.
Mat 17:13 John Baptist thudol aseipeh-u ahi seijuiten ahedohtauve.
Mat 17:14 Mipi lah ahung geiphat’un pasal khat Jesu masanga ahung boh khup’in,
Mat 17:15 “Kapu, kachapa lung set’in! Abuh thi ahin, abang le meilhum sung’ah, abang kom le twilah a aleh lut jin, athoh gim behseh tai.
Mat 17:16 Naseijuite henga kahin pui vangin aboldam theipouve,” tin ataove.
Mat 17:17 Jesun, “Vo tahsan bei khang lamvai mite! Itih chan ka-umpia kakho ngaiding nahiuvem? Chapang pa chu hinpuiyun!” ati.
Mat 17:18 Lhagaoboh chu Jesun haphoa apho leh, hichepet tah chun chapang a konin ahung potdoh paiyin chapang pa adamtai.
Mat 17:19 Seijuite guh thim chan Jesu henga ahungun, “I-ati leh keihon kanodoh jou louvu ham?” tin adongui.
Mat 17:20 Jesun, “Natahsan lhom jeh-u ahi, tahbeh a kaseipeh nahiuve, tah sanna ankam mu te neijong leu chun hiche molsang jah a hin, ‘Hikoma konin khukoma kichonin,’ tijongleu chun kichon jeng ding ahin, imacha bolmo nanei lou diu ahi.
Mat 17:21 (hitobang hi an ngol’a taona beiyin asoh doh theipoi,)” ati.
Mat 17:22 Seijui chengse le Jesu Galilee gamsunga akilhon khom pet’un Jesun ajah-uva, “Mihem Chapa hi mite khut’a kipedoh ding ahin,
Mat 17:23 amahon atha diu, amavang nithum lhin ni le kikaithou kit ding ahi,” ati. Seijuite alung kham lheh jengui.
Mat 17:24 Jesu le aseijuite Capernaum a ahungu leh Houin kaidong ho ahungun Peter jah a , “Nahouhil pau hin Houin kai apehji lou ham?” tin adongui.
Mat 17:25 Peterin, “Apeji nai,” ati. Peter insung agalut leh Jesun ahin hou masan, “Simon iti nagel’em? Leiset lengte hin kai hihen sumlam man hijongle koi lah a don jiuvem? Gamsung mite lah a adon’um, gamchom mite lah a adon’um?” tin anadonge.
Mat 17:26 Peterin, “Gamchom mite lah a,” ati. Jesun, “Achutile gamsung mite ongthol’a hita chula.
Mat 17:27 Hijongle kaidong ho lung himo louna din Twikhanglen a chen nga gakoi le chun, nakoi doh masah pen chu akamsung keh le chun itokham bep sum namu ding ahin, hichu choiyin gapetan,” ati.
Mat 18:1 Hichepet hin seijuite Jesu henga ahungun, “Van a lenggama lenpen chu koi ham?” tin adongui.
Mat 18:2 Jesun chapang khat akoulut’in, alai lunguva adinsah-in,
Mat 18:3 “Dihtah a kaseipeh nahiuve, nakikhel hel’uva chapang ho toh nabah louvu leh van a Lenggama lut pouvin nate.
Mat 18:4 Hiche chapang te bep a kigel’a kineosah a ki-ngaitom chan chu van a Lenggama alen a pang ding ahi.
Mat 18:5 Chule kamin a hitobnag chapang khohsah chun Keima eisan ahi.
Mat 18:6 “Koi hile aneocha hokhat tansan sudoiya chu angonga sumhei song lentah kikhai hen Twikhanglen a kileh lut le ama din aphajoi.
Mat 18:7 Ohe vannoi mite nadau ahi! Ajeh chu mihemte tansan sudoi thei thil tampi aum’e. Kipalna chu hung umtei ding vang ahin, hichea kipal lhuhna bol’a chu ada na-e!