Mat : Abraham chilhah David guiya peng Jesu Christa khanggui thusim hitia kisun ahi

Mat 18:8 “Nakhut ham nakeng hamin natahsan asuh doi leh tan bong in paimang jengin. Khut le keng kim a tonsot mitmo meidil’a nakile lut sangin khut lang le keng lang beiya hin naa lut ding aphajoi.
Mat 18:9 Namit’in nakipalsah jong le kaldoh in pai mangin! Mit ni neiya damun meidil’a nakile lut sangin mit lang chon hin naa lut le chun aphajoi.
Mat 18:10 “Hiche aneocha ho khat nahsahmoa nabol louna diuvin ching theiyun; kaseipeh nahiuve, van a um avantilteuvin ka-Pa mai amu jingui.
Mat 18:11 (Ijeh-inam itile Mihem Chapa chu amangsa huhhing dia ahi.)
Mat 18:12 “Iti nagel’um? Mi khat’in kelngoi ja khat neihen, khat pen pen che mang taleh, somko le ko chu molvuma dalha ache mang khatseh chu agahol lou ding ham?
Mat 18:13 Kaseipeh nahiuve, agamudoh teng ache mang lou somko le ko sangin amukit khatseh chunga akipah joi.
Mat 18:14 Hiche bangchun hiche aneocha ho khat man ding hi van a um na-Pau lungdei ahipoi.
Mat 18:15 “Nasopi nachunga achonset tah leh, chen lang achangseh a aumpet’in athemmona gaphoh-in. Napho angai leh sopi neikit nahitan;
Mat 18:16 angai lou vang leh, Pathen lekhabua, ‘Mi ni le thum hettohsah a kichai thei ding,’ kiti dungjuiyin michom khat le ni puiyin chen.
Mat 18:17 napuiho thu geiya angai loule Houbung henga thu lhut’in. Houbung thu geiya angai lou vang leh chidang namdang le kaidong ho bolna bangin bol tan.
Mat 18:18 “Dihtah akaseipeh nahiuve, ipi hijongle leiset’a nakhau chu van a jong kikhah ding, leiset’a nahon’u chu van a jong kihong ding ahi.
Mat 18:19 “Kaseipeh kit nahiuve, leiset’a mini lung kitoh tah a nataovu leh van a um ka-Pan nabolpeh tei diu ahi.
Mat 18:20 Ajeh chu hoikom hileh kamin a ni le thum nakikhopna chan’uva ka-umpi jingui,” ati.
Mat 18:21 Peter Jesu henga ahungin, “Pakai, kasopi kachunga chonse se jeng taleh ijat vei ka-ngaidam ding ham? Sagi vei gei ham?” tin adonge.
Mat 18:22 Jesun adonbut’in, “Ken, ‘Sagi vei gei’ katipoi, sagi mun som sagi geiyin katibouve.
Mat 18:23 Ijeh-inem itile van a Lenggam chu asohte sum chin suhto ding goa lengpa to tekah thei ahi.
Mat 18:24 Sum asuto pantan, talent sangsom bat soh khat ahinkai lut’un,
Mat 18:25 soh pan sum sahna ding aneilou hel phat’in ama jong ajinu le achate, anei jouse jong joh a abat sah doh sah tei din apupan thu alhuhsah tai.
Mat 18:26 Chutah chun sohpa jong akoma aboh khup’in adilsun, ‘Nei ngah ta din abonchan sadoh kit nange,’ tin ataotai.
Mat 18:27 Chuphat’in apupan sohpa chu alungsen abat jouse angaidamin, alhadoh tai.
Mat 18:28 “Hiche sohpa hi apotdoh doh-in asoh chanpi ama denarii ja khat bat’a chu atoh khan, atuh chah denin, alol ameh peh-in, Nabat chu neipen,’ tin anotai.
Mat 18:29 Asoh chanpi pa jong boh khup’in adil sun, ‘Nei ngah ta din sadoh kit nange,’ tin ataove.
Mat 18:30 Ahivangin aman anop peh pon, abat chengse asahdoh kahsea din songkul’a agakhumtai.
Mat 18:31 Aumchan hi soh dang hon amu phat’un alung himo lheh jengun, athilsoh ho chu apu pau aseipeh tauve.
Mat 18:32 Apupan hiche sohpa chu akoulut’in ajah a, ‘Soh gilou, kahenga natao tao jeh a nabat chengse kamoh ngaidam nahita me!
Mat 18:33 Ken kalai natpi banga nang in jong nasoh chanpi chu nalai natpi ding hilou ham?’ tin aphoh tai.
Mat 18:34 Hiti hin apupa alung hang jah-in abat chengse asahdoh kahsea din mi bol genthei ho khut’a apedoh tai.
Mat 18:35 “Nang hon jong lung giltah a nasopi na-ngaidam louvu leh van a um ka-Pan hitobanga chu nabol diu ahi,” tin Jesun aseiye.
Mat 19:1 Jesun thu hicheng asei jouvin Galille gam dalhan Jordan luigal Judea gamsung alhungtai.
Mat 19:2 Mi tamtah-in ajuiyun, hikoma chun Aman ana jouse aboldamtai.
Mat 19:3 Pharisee mi phabep ahungun apatep nan thu khat adongun, “I-lou them a min ji ada jeng ding hi Dan ngai hinam?” atiuve.
Mat 19:4 Jesun adonbut’in, “Hiche thua hi ‘Semtil’a pat Asempan pasal le numeiya asemsa ahi,’ kiti Pathen lekhabu nasim khah louvu ham?
Mat 19:5 Chule “Hijeh a hi min anu le apa dalha a ajito kigom ding ahin, amani tikhat hilhon ding ahi,’ kiti ahi.
Mat 19:6 Hichea hi amani pum ni hita louva pumkhat hilhon ding ahi. Hijeh chun Pathen gopsa chu mihemin sukhen hih hen,” ati.
Mat 19:7 Pharisee hon, “Ahile i-bol’a Mose’n, ‘Min ajinu ada leh da na lekha pehen sol hen.’ atiham?” atiuve.
Mat 19:8 Jesun adonbut’in, “Nalungtah jeh-uva Mose’n jida ding naphal peh-u ahibouve, semtil’a chuti ahipoi.
Mat 19:9 Kaseipeh nahiuve, mito ajon jeh tilouva aji daa numei dang kichenpi chan chu mito jong ahi bouve,” ati.
Mat 19:10 Jesu seijuiten ajah a, “Pasal le ajinu chung changa chuti ahi vang leh jinei da phajoi,” atiuve.
Mat 19:11 Jesun adonbut’in, “Mi jouse jop thei ahipoi, Pathenin chuti dia agon hon bou ajop theiye.
Mat 19:12 Ajeh chu apen a thaidepsa peng aumin, mihem semthua nukiso loi aumin, chule van a Lenggam jal’a ama kibol aumin, koi hile ajop thei dol’in jop hen,” ati.
Mat 19:13 Achunga khut ngap’a taopeh din mihon chapang phabep Jesu henga ahin puiyui. Chapang hinpui ho chu seijuiten haphon anaphoh ui.
Mat 19:14 Hinla Jesun, “Chapang ho chu kahenga hinsol’un jada hih-un, ijeh-inem itile van a Lenggam chu amaho tobangte bou chang diu ahi,” ati.
Mat 19:15 Jesun chapang ho chunga khut angamin apotdoh tai.
Mat 19:16 Veuvin pasal khat Jesu henga ahungin, “Houhil tonsot hin na kanei theina dia thilpha itobang kabol ngaiyam?” tin adonge.
Mat 19:17 Jesun, “Itobang thilpha nei doh ham? Apha Khatseh bou aum’e! Tonsot’a nahin nom le Thupeh chengse nit’in,” ati.
Mat 19:18 Aman Jesu jah a, “Hoipen chu am?” ati. Jesun adonbut’in, “tol that hihin, mito jong hih-in, gucha hih-in jouvin hettohsah dan,
Mat 19:19 nanu napa jabol’in, chule nang naki-ngailut bangin naheng nakom ngailun,” ati.
Mat 19:20 Khangdongpan adonbut’in, “Hichengse chu kahin nit jing nai, ipi kabol lou um nalaiyam?” tin adonge.
Mat 19:21 Jesun ajah-ah, “Chamkimsoh ding nadeileh chen lang nanei jouse gajoh-in, sum chu vaicha gentheite to nan neiyin, chutileh van a gou nanei ding ahi; chujo teng neihin juitan,” ati.
Mat 19:22 Khangdongpan athusei ajah phat’in, gou haotah ahijeh-in lung himo tah-in ache mangtai.
Mat 19:23 hijeh chun Jesun aseijuite jah a seiyin, “Tahbeh a kaseipeh nahiuve, mihao dia van a Lenggam alut hah sa lheh ding ahi.
Mat 19:24 Kaseipeh kit nahiuve, mihao Pathen Lenggam a lut sangin heobil hom a sa-ngongsao lut ding abaijoi,” ati.
Mat 19:25 Seijuiten athu chu adatmo behseh jengun, “Achutile koi huhhinga umjou ding hitam!” atiuve.
Mat 19:26 Jesun avechang mel’in ajah-uvah, “Mihem bol dia vang hithei louhel ahin, Pathen din ijakai ahithei soh keiye,” ati.
Mat 19:27 Peter apotdoh-in, “Ven, keihon ima jouse dalhan nanung kahin juiyun, achutile keiho i-kati diu ham?” tin adonge.
Mat 19:28 Jesun ajah-uva, “Dihtah a kaseipeh nahiuve, ahung lhung khangthah a chu Mihem Chapa loupitah a Laltouna atou teng, nang ho kanung jui chengse laltouna som le nia touva, Israel phung som le ni thu natan diu ahi.
Mat 19:29 Hitia chu koi hijongle kamin jal ‘a in le lou, sopi ule nao, nu le pa, cha le nao chule gam leiset geiya dalha jousen ajat ja khat cheng amubea, tonsot hin na aneitei ding ahi.
Mat 19:30 Amavang amasa tamtah nukhah ding, anukhah tamtah masa ding ahi.
Mat 20:1 “Van a Lenggam chu mihao khat jingpi tah a kondoh a alengpi leiya natong dia tha hol’a chepa tobang ahi.
Mat 20:2 Thahol pa chu natong ding ho to, nikhat tohman Denarii khat din akinop touvin, alengpi leiya natong din asoltai.
Mat 20:3 Vai nunga apotdoh kit leh kailhang dunga mohseh a ding ho amun,
Mat 20:4 ‘Nang ho jong lengpi leiya kon’uvin natoh man diuva kilombep pe nang’e tin asol kit’e.
Mat 20:5 Amaho akontauve. Sunkim don le nilhangkai donin jong apotdoh kit leuvin hito bangma chun agabol kit’in ahi.
Mat 20:6 Vaiche kontah a jong apotdoh leh midang hitobanga ding ho agamudoh kit’in, amaho jah a jong, ‘I-bol’a nilhum keiya hikoma mohjen seh a ding nahiuvem?’ atileh;
Mat 20:7 amahon, ‘Koima eigoi diu um louva,’ atiuve. Hiche ho jah a jong, ‘Nang ho jong lengpi leiya kon’uvin,’ ati.
Mat 20:8 “Nilhah phat’in lengpi lei nei pan natoh vaibolpa jah a, ‘Natong ho koukhomin, akon nukhah pen a pat akon masa pen geiyin atoh man’u petan,’ ati.
Mat 20:9 Vaiche phat’a kon ho ahungun Denarii khat cheh akisantauve.
Mat 20:10 Akon masa pen hon asan tam tei diu gingcha ahunguleh, amahon jong Denarii khat cheh akisan bouvui.
Mat 20:11 Akilah vangun mihaopa chunga aphun cheh-un,
Mat 20:12 “Keihon sun nilhum keiya na kitonga nisa hah lai kithoh lhum keiya, hiche nidan khat seh tongho toh kibangin tohman neipeuve,” tin aseiyui.
Mat 20:13 “Mihaopan adonbut’in alah-uva mi khat jah a, ‘Golpa, ken adih lou kabolpoi, Denarii khat bou lo dinga ikinopto lhon hilouham?
Mat 20:14 Natohman kilah-in chetan. Akon nukhah pen pa jong nang kapeh jat jat kapeh nom ahin,
Mat 20:15 kanei chu kadei dei ya kabol thei lou ding ham? Kaphat jeh a hi neimit thip ngap hitam?’ ati.
Mat 20:16 “Hitobanga chu amasa tamtah nukhah ding, anukhah tamtah masa ding ahi,” ati.
Mat 20:17 Jesun Jerusalem ajonin lampi dunga seijuite chu achomin apuidoh-in achepum pum’un ajah-uva,
Mat 20:18 “Veuvin, Jerusalema icheuvin, hikoma chu mihon Mihem Chapa hi Thempu pipu ho le Danthu them ho apeh doh diu, amahon tha ding pha asah-uva,
Mat 20:19 kichepna anei diu, ajep’uva thingpel’a khetbeh dia chi dang namdangte apeh doh diu ahin, hijongle nithum nia ama kaithouva umtei ding ahi,” ati.
Mat 20:20 Zebedee chapate ni anun apuiyin Jesu henga aboh khup’in ngeh khat neiyin ataove.
Mat 20:21 Jesun, “Ipi nadeiyem?” tin adonge. Amanun, “Leng nahi teng hiche kachapate ni hi najet naveiya tou sah din teppeh-in,” ati.
Mat 20:22 Jesun, “Nathumu hi nahet louvu ahi. Nangnin kadon ding khon a hi nadon ngam lhon ding hinam?” ati. Amanin, “Ka-ngam’e” ati lhon’e.
Mat 20:23 Jesun kakhon a hi nadon tei lhon ding vang ahinan, hijongle kajet kaveiya tousah ding vang hi Kei peh thei ahipoi; hiche touna hi ka-Pan gonsa akoipeh miho tou ding ahibouve,” ati.
Mat 20:24 Seijui somin hichu ajah doh phat’un ucha te ni chunga alung himotauve.
Mat 20:25 Ahivangin Jesun amaho akouvin, “Chidang namdangte lah a vaipoten amite chunga thu aneiyuva, alamkaiteuvin atha neinau ajedoh jing naheuve.
Mat 20:26 Nang ho lah a vang chuti lou ding ahi, koi hileh nalah-uva alenpen hinom chu nalha chauva panga,
Mat 20:27 achungnung pen hinom chu nasoh-uva pang ding ahi.
Mat 20:28 Hitobanga chu Mihem Chapa jeng jong jen dinga hung ahipon, ajen ding le mitamtah lhatdamna a ahinkho toh doh dia hung ahibouve,” ati.
Mat 20:29 Jesu le aseijuiten Jericho khopi agah dalhah-u leh mi tamtah in ajuiye.
Mat 20:30 Mitcho ni lampama anatouvin, Jesun ahin hopa chu aja lhonin, “Vo David Chapa kapu, neilungset’in,” tin asam lhon’e.
Mat 20:31 Amani chu mipin pho thip din agouve. Amanin la ahasap cheh kit lhonin, “David Chapa neilungset’in!” ati kit lhon’e.
Mat 20:32 Jesu adingin amani chu agah kouvin, “Ipi eibolpeh-in nati lhon ham?” ati.
Mat 20:33 Amanin, “Kho neimusah lhonin kapu!” atilhone.
Mat 20:34 Jesun alainat pin, amit lhon akhoipeh leh, kho amu thei pai jeng lhonin, Jesu nung ajui lhontai.
Mat 21:1 Jesu le aseijuiten Jerusalem anai lam tauvin, Olive lhanga Bethphage kho ahung geitauve. Hichea hin Jesun seijui ni asol masan,
Mat 21:2 “Namasang khoa khun lut lhon le chun sa-ngan khat anouto kihen tha mupai lhonin nate; hinsut’in hinkai lhonin.
Mat 21:3 Mi khat touvin i-khat asei leh, ‘Aneipan angaichat ahi,’ ti lhon le chun, aman hinlha peh lhontannate,” ati.
Mat 21:4 Hiche hi Themgao kama kiseisa:
Mat 21:5 “Zion khopi seipeh-un, Ven, na-Lengpan na hinjon’e! Lung nengtah-in sa-ngan chunga atouvin, Sa-ngan nou chunga atouve,” kiti chu guilhung ahitai.
Mat 21:6 Seijuite ni achen, Jesun ahil bang bangin agabol lhon’e.
Mat 21:7 Sangan le anou ahinkai lhonin, achunga pon aphauvin Jesu atouve.
Mat 21:8 Mitamtah-in lampi dunga pon aphauvin, abangin theoboh alham’un, lam dunga aphauve.
Mat 21:9 Jesu nung le maa kijot mipin, “Pakai min a hung pa anun nom’e! David Chapan huhhing hen!” atiuve.
Mat 21:10 Jesu Jerusalem khopi sung alut phat’in, “Hiche Pa hi hoi, koi hitam!” atiuvin, khopi sung akiloh soh jengui.
Mat 21:11 Japin, “Galilee gam Nazareth khoa hung kon Themgao Jesu ahi,” atiuve.
Mat 21:12 Jesu Houin a alut’in, asunga thiljoh ho leh thil cho ho anodoh soh keiyin, sum lheng ho dokhang jouse alekhup peh-in, vapal joh ho touna jong alekhup peh soh keiye.
Mat 21:13 Chule miho jah a aseiyin, “Ka-in chu taona in kiti ding ahi, tia kisun ahin, nang hon michom ho gebuh-in nasemtauve,” ati.
Mat 21:14 Jesu Houin a aumpet chun mitcho ho le elbai ho ahenga ahungun, Aman abonchan aboldam soh keiye.
Mat 21:15 Thempu pipu ho le Danthu them hon thil kidang aboldoh chengse chu amu’vin, chule Houin sunga chapang hon kho asap’uva, “David Chapan huhhing hen” atiu chu ajah phat’un alung hang-un,
Mat 21:16 Jesu jah a, “Hite ho hin ipi aseiyu najah nah em?” atiuve. Jesun, “Kaja nai, ‘Naosen ho le noi chep lai ho kamsunga konin vahchoina nachamkimsah tai,’ kiti Pathen lekhabu chu nasim khah louhel’u ham?” ati.
Mat 21:17 Jesun mipi adalhan, khopia konin apotdoh-in Bethany kho ajonin, aga jan geh tai.
Mat 21:18 Jingkah a Jesun khopi lam ahinjot leh agilkel patai.
Mat 21:19 Hichun lampam a theichang phung khat amun, agavet leh ana tilou aga amupoi. Hijeh chun theichang phung jah a, “Imatih chanin ga kit hih beh-in,” tia agaosap leh, hichepet tah chun agop jenge.
Mat 21:20 Seijuiten amudoh phat’un kidang asa behseh jengun, “I-atileh theichang phung gop jeng hintem?” atiuve.
Mat 21:21 Jesun ajah-uva, “Dih tah a kaseipeh nahiuve, lung opkai louhel’a natahsanu leh theichang phung kibolna tobang keo hilouva hiche molsang jah a khun, ‘Kichon doh-in lang Twikhanglen a kileh lut tan,’ tijongleu chun hithei jeng ding ahi.
Mat 21:22 Hitia chu tahsan tah a nathum chan namu jeng diu ahi,” ati.
Mat 21:23 Jesu Houin a alut’a thu ahil pet’in Thempu pipu ho le upate ahungun, “Ipi tha neina a hiti ho hi nabol’a, hiche thuneina hi koipenin napeh ham?” tin adongui.
Mat 21:24 Jesun adonbut’in, “Kenjong thu khat dong ung ting naseidoh theiyu leh ipi tha neina kaneiya hiti ho hi kabol seipeh nau vinge.
Mat 21:25 John baptize bolji pa hin bol theina van a kon alah ha mihem a kona alah ham?” ati. Chuphat’in amaho le amaho akinel’un, ‘Van a kon ahi,’ tileu hen la, ‘Achutile i-bol’a natahsan dau ham?’ tin tin!
Mat 21:26 ‘Mihem a kon ahi,’ ti ding la japi kichat aumin, ajeh chu mi jousen John chu Themgaova agel cheh ahi,” atiuve.
Mat 21:27 Hijeh chun Jesu jah a, “Kahepoi,” atitauve. Jesun ajah-uvah, “Kenjong ipi thaneina jeh a hiche ho kabol sei peh deh pou vinge.
Mat 21:28 “Iti nagel’um? Pasal khat’in chapa ni aneiyin, apeng masa pa jah a, ‘Chapa, tunin lengpi leiya konin lang na gatongin,’ ati.
Mat 21:29 Achapan, ‘Kon ponge,’ ati. Ahinla chom khat jouvin lung aheiyin akontai.
Mat 21:30 Mipa chu achapa khat joh henga achen hitobangma a chu agaseileh, ‘Kon nange hepa,’ atin, konla akonpoi.
Mat 21:31 Amani koi joh hin apa dei abol ham?” ati. Amahon, “Apeng masapan,” atiuve. Jesun ajah-uvah, “Tahbeh a kaseipeh nahiuve, nang ho sangin kaidong ho le noti ho Pathen Lenggama alutmasajo tauve.
Mat 21:32 Ijeh-inem itile John chun adih a hinje lampi nahil’u ahitan, natahsan pouve; hichea hin kaidong ho le noti hon anatahsan’ui. Ama namutah vangun lungheiyin natahsan deh pouve.
Mat 21:33 “Thulem khat ngai kit’uvin: mihaotah khat’in lengpi lei khat abol’in, akimvel’a tho akaiyin, lengpiga chilna leiko alaiyin, loubuh asan, kemsang adoi. Chuin lengpilei chu aleibol ho ngansen kholgama achetai.
Mat 21:34 Theiga lo phat’in lengpiga po din aleibol ho henga asohte asol’e.
Mat 21:35 Lengpilei bol hon asoh te chu aman’un abang avouvin, abang athat’un chule abang songin asep’ui.
Mat 21:36 Chuin asol masah sohte sanga tamjo asol kit vangin, amahon abol ngai bang bangin anabol’ui.
Mat 21:37 Akhon na keiyin, ‘Kachapa beh jabol teiyunte,’ tin lengpilei bol ho henga achapa asoltai.
Mat 21:38 Ahinla lengpilei bol hon achapa amudoh phat’un, ‘Hichepa hi agoulo dingpa ahi,’ that’u hitin agou eiho changute,’ akitiuvin,
Mat 21:39 aman’un lengpilei polama akaidoh-un athat tauve.
Mat 21:40 “Lengpilei neipa chu ahung teng aleibel ho chu i-lotan tem?” ati.
Mat 21:41 Amahon, “lengpilei neipan hiche migilou ho chu engbol’in tin asuhgam ding, lengpilei chu aphat cha aga pethei lengpilei bol thei dang khat petante,” atiuve.
Mat 21:42 Jesun ajah-uva, “Pathen lekhabua: ‘Insa hon deimoa apaiyu song chu. In-ning songkhom det penin apangtai! Hiche hi Pakai thilbol ahi, Imit mu’vin thil kidangtah ahi,’ kiti lai chu nasim khah louvu ham?
Mat 21:43 Hijeh a chu kaseipeh nahiuve, Pathen Lenggam chu nakilah peh-uva apunbe sah thei nam mite kipedoh ding ahitai.
Mat 21:44 Koi hile hiche song chunga kitat kha chan chu kisep chip jeng ding ahin, alhah khah pen pen jong atagep jeng ding ahi,” ati.
Mat 21:45 Thempu pipu ho le Pharisee hon Jesu thulem sei ajah phat’un, amaho gotna asei chu ahedoh tauve.
Mat 21:46 Ahinla mat dia agot vangun mipi akichauve. Ajeh chu mipin Jesu chu Themgaova angaito cheh u ahi.
Mat 22:1 Jesun mipi henga thulemin aseikit’in,
Mat 22:2 “Van a Lenggam chu achapa dinga jinei golvah bol ding goa lengpa khat tobang ahi.
Mat 22:3 Golvahna lha dia ki-ngeh chengse koukhom dia lengpan asohte asol vangin koima ahung pouve.
Mat 22:4 Soh dang phabep asol kit’in, ‘Akikou ho jah a, “Bongchal ho le gancha thaotah tah kathat’in golvah ankong akigong tupsoh tai, golvahnaa hung lha cheh-un,” ati gatiuvin,’ ati.
Mat 22:5 Ahinla akikouhon imachan agelpouve, abang louva akonin, abang ma kinchom choma achen,
Mat 22:6 adangin ma asohte chu aman’un, melse tah-in avouvin athat tauve.
Mat 22:7 Lengpa alung hang behseh tan, asepaite asol’in mithat ho asugamin, akhopiu ahalvamtai.
Mat 22:8 Hichun asohte jah, ‘Kichen golvah akigong soh tai, ane dia kikouho la ahungpon,
Mat 22:9 cheuvin lang khopi kelkot phunga namuphah chanu koi hileh golvah an ne din hinkhom’un, ati.
Mat 22:10 Sohte chu lamlen dunga acheuvin, amu phah chan, mise mipha ahinpuiyule kichen golvahna ami adimset tai.
Mat 22:11 Lengpan akikou jin ho ahung vet leh moupui golvah vonbei khat amudoh-e.
Mat 22:12 Ajah a, ‘Jol, moupui golvah vonbeiya iti hung lut nahim?’ ati vangin, ama la athip beh jenge.
Mat 22:13 Hichun lengpan lhacha ho jah a, “Akhut akeng kan’un lang polam muthim lah a paidoh-un, hikoma chu kap le hagel gel’a um ding ahi,’ ati.
Mat 22:14 “Akikou atam lheh nan lhen doh vang lhomcha ahi,” ati.
Mat 22:15 Pharisee ho apotdoh-un Jesu chu alona je khat het’a kinelpia kipalsah din akihou lhiuve.
Mat 22:16 Pharisee hon aseijuiteu phabep le Herodia loi phabep asol thauvin, “Houhil, nang hi midih nahin, Pathen lampi dih tah nahil’in, mi le mi kah a dat naneipoi, chule mihem polam maiput gin nanei lou kaheuve.
Mat 22:17 Ahile Caesar henga mikai kipe hi dih hai dih lou ham? Iti nagel’em?” tin adongui.
Mat 22:18 Athilse gonu chu Jesun ahen, “Mipha lhem ho! Ibol’a kipalsah ding neigot’u ham!
Mat 22:19 Mikaiya napeh-u sum chu neivetsah-un!” ati.
Mat 22:20 Jesun “Hiche suma hi koi lim le koi min chong-am?” ati.
Mat 22:21 Amahon, “Caesar lim le min,” atiuve. Hijeh chun Jesun “Caesar a chu Caesar peuvin, Pathen a chu Pathen petau,” ati.
Mat 22:22 Hiche hi ajah phat’un kidang asa lheh jengun, Jesu dalhan achetauve.
Mat 22:23 Hiche ni ma ma chun mithi thokit tahsan lou Sadducee loi Jesu henga ahungun,
Mat 22:24 “Houhil, ‘Pasal khat cha neilouva athi leh asopipan ajinu avetpeh a chi akhaipeh ding,’ tin Mose’n aseiye.
Mat 22:25 Kalah-uva sopi pasal sagia peng aum’un, a-upapen ajinei leh cha neilouvin athin, ajinu anaopa vet din adalhatai.
Mat 22:26 Asopite chu nina pa, thumna pa, aban banin sagina geiyin athisoh hel tauvin ahi.
Mat 22:27 Achaina keiyin numei nu jong athitai.
Mat 22:28 Hichea hin thokit ni leh numeinu hi koipen ji hitan tem? Ajeh chu aboncha jia anei cheh-u ahi,” atiuve.
Mat 22:29 Jesun adonbut’in, Pathen lekhabua thu hihen, Pathen thahat hijongle nahet pen’u aum loujeh a nakhel del’u ahitai.
Mat 22:30 Ijeh-inem itile thokitnaa chu nu le pa kichen jong umlou, chen jong akichensah louvu ahitan, van a Vantilte tobang ahitauve.
Mat 22:31 Hiti hin mithi thokit thudol ahileh Pathenin naseipeh sau chu nasim khah louvu ham?
Mat 22:32 ‘Keima Abraham Pathen, Isaac Pathen, chule Jacob Pathen kahi,’ atilou ham? Pathen chu mithi ho Pathen ahipon, mihing ho Pathen joh ahi,” ati.
Mat 22:33 Mipin hiche hi ajah phat’un athuhil kidang asa behseh jengui.
Mat 22:34 Jesun Sadducee ho anel khup del jeng phat’in Pharisee ho akikhom’un,
Mat 22:35 alah-uva Danthu them khat’in apatep nan,
Mat 22:36 “Houhil Danthu lah a thupeh lenpen hoiche ham?” atin adonge.
Mat 22:37 Jesun adonbut’in, “Nangman Pakai na-Pathen chu nalungthim pumpia, nahinkho pumpia chule nahet theina pumpia na-ngailutding,’ kiti ahi.
Mat 22:38 Hiche hi thupeh lenpen leh amasapen ahin,
Mat 22:39 thupeh lenpen nina chu: ‘Nang naki-ngailut banga naheng nakom na-ngailut ding,’ kiti ahi.
Mat 22:40 Thupeh hiche te nia hi Danthu pumpi le Themgaote thuhil ki-ngamsoh kei ahi,” ati.
Mat 22:41 Pharisee ho ahung kikhop phat’un Jesun amaho chu adongin,
Mat 22:42 “Messiah thudol iti nagel’um? Koi chilhah ham?” ati. Amahon, “Davidchilhah ahi,” atiuve.
Mat 22:43 Jesun “Iti hinte ahile, Lhagao haikhum jal’in David jengin jong Ama chu, ‘Pakai,’ asah-in;
Mat 22:44 ‘Pakai chun ka-Pakai jah a, namelmate nakeng chotpha kakoisoh masangsen Kajet lama tou jingin,’ atin;
Mat 22:45 David-in Ama chu ‘Pakai atileh, Messiah chu achilhah a iti pen thei ding ham?” ati.
Mat 22:46 Jesu thudoh chu koiman cheng khat chan jong adonbut thei pon hiche nia pat chun koiman jong ima adong ngam tapouve.
Mat 23:1 Jesun mipi le aseijuite jah a,
Mat 23:2 “Danthu themho le Pharisee ho hi Mose Danthu hilchen a pang ahiuvin,
Mat 23:3 ipi hijongle naseipeh-u nit’un bol jong bol’un, amaho chon bangin vang chondauvin.
Mat 23:4 Amahon pohgih hahsa akan’un milengkouva aputsah-uvin, akhut jung jeng chan jong khoiloh ding agoupouve.
Mat 23:5 Abol atoh chanu mi mitmu din bou abol’un ahi. Danthuchih bom akibuu le akibeh chengseu chu apeh aletsah-ui.
Mat 23:6 Golvahna le Houthua kikhopna in dunga touna pipen adeiyun,
Mat 23:7 kailhangdunga min salam abol’a, ‘Rabbi,’ ati diu bou adeiyui.
Mat 23:8 Nang hon vang mi, ‘Rabbi,’ kitisah hih-un, ajeh chu Houhil khat bou naneiyun, naboncha sopi cheh nahiuve.
Mat 23:9 Leiset chunga koima, ‘Pa,’ sah hih-un, van a na-Pau khat bou aum’e.
Mat 23:10 Miho, ‘Lamkai,’ kitisah dauvin, lamkai khatseh, Messiah chu nanei nauve.
Mat 23:11 Nalah-uva alenpen chu nalhachauva pang ding ahi.
Mat 23:12 Mi ama kichoi sang chu kisunem ding, ama kineosah chu kichoi sang ding ahi.
Mat 23:13 “Ohe, danthu them ho le Pharisee mipha lhem ho nadau ahi! Mipha lhem ho! Miho din van a Lenggam kot nakhah tan’un, nang ho la nalut thei deh pouvin, lut dia kigo ho geiyin nalutsah pouve!
Mat 23:14 (Ohe Danthu them ho le Pharisee mipha lhem ho nadau ahi! Meithai ho in dunga sottah tah nataovun nabahgam jiuve. Hijeh a chu genthei hesoh chungnung nathoh diu ahi.)
Mat 23:15 “Ohe, Danthu them ho le Pharisee mipha lhem ho nadau ahi! Mi khatseh jong Juda hou housah din Twikhanglen jousea nakitol’un, gamkai jouse nachonsoh-un, nahousah tengule nangho sanga ajat nijen khoh jon Damun jon din nasemdoh jiuve.
Mat 23:16 “Ohe nadau ahi, ‘Koi hile Houin pan a kihahsel chu ajeh pon, Houin a kikoi sana pan a kihahsel vang ajeh theiye,’ tia mihil lamkai mitcho ho!
Mat 23:17 Mitcho mi-ngol ho! Houin jeh a sana athenga kisimpi chu hoijoh thupi jom sana ham Houin ham?
Mat 23:18 Chuma leh, ‘Maicham pan a kihahsel vangin akijeh pon, maicham chunga kitoh thil-ho pat jeh-in je na aum theiye,’ na tiuve.