Mat : Abraham chilhah David guiya peng Jesu Christa khanggui thusim hitia kisun ahi

Mat 23:19 Mitcho ho! Maicham jeh a thilto thenga kisimpi chu hoijoh thupijom – maicham ham thilto ham?
Mat 23:20 Ajeh chu maicham pan a kihahsel chanin maicham chunga kitoh thil geiya apat tha a kihalsel ahitai.
Mat 23:21 Hitobanga chu Houin pan a kihahsel jong chun Houin sunga Chenga Pathen apat’a kihahsel ahi.
Mat 23:22 Chule van pan a kihahsel’an jong Pathen laltouna min le achunga Toupa pan a kihahsel ahi.
Mat 23:23 “Ohe, Danthu them ho le Pharisee mipha lhem ho nadau ahi! Nang hon pudina le pa-thikhom chule jira-hicheng hi som a khat na toh jiuvin, Danthua thil khoh cheh, adih a thu tan ding, mi hepi ding le tahsan ding hicheng hi don louvin nakoi jiuve. Adang nabol’u chutoh kilhon a hicheng jong hi nabol diu ahi.
Mat 23:24 Lamkai mitcho ho! Nang hon thou vaisi nalhiuvin, sa-ngongsao napum val’ui.
Mat 23:25 “Ohe, Danthu them ho le Pharisee mipha lhem ho nadau ahi! Khon le lheng polam nasil ngim’un, asunga la pumhat’a nathil lah-u le papsetna adimset’e!
Mat 23:26 Pharisee mitcho ho! Khon chu asung silngim leu chun apolam jong ngim ding ahi!
Mat 23:27 “Ohe, Danthu them ho le Pharisee mipha lhem ho nadau ahi! Nang ho hi lhan kiloi bang, polam vet dia hoi, asung la mithigu le aboh anen ijakai dimset tobang nahiuve.
Mat 23:28 Hitobang hin polam vet din dihtah bangin na-um’un, nasungu vang phat lhemna le chonsetna dimset nahiuve.
Mat 23:29 ‘Ohe, Danthu them ho le Pharisee mipha lhem ho nadau ahi! Nang hon Themgaote lhan nasem’un, midih ho lhan khuh najem jem’un,
Mat 23:30 ‘Kapu kapateu khang laiya hing lileu vang Themgaote atha nauva pang kha pou vinge,’ tin na seiyui.
Mat 23:31 Hitobang hin Themgaote that’a pang ho chilhah nahi nau nang hon naphongdoh tauve.
Mat 23:32 Napu napateu toh ban chu tong molso ngal’un!
Mat 23:33 Vo gulse son, gulsete! Damun a talen namat diu chu iti otdoh theiying natiu ham?
Mat 23:34 Veuvin Themgaote le miching ho chule Danthu them ho kahinsol peh-e, abang nathauva, abang thingpel’a nakhet beh diu, abangma Houthua kikhopna in dunga najep’uva, khotin a nadel le diu ahi.
Mat 23:35 Hiche naboljeh-uva hi monabei Abel thisan kisoa pat, muntheng le maicham kah a nathau Berechiah chapa, monabei Zechariah thisan kiso geiya themmona bei miho thisan, tol’a long lha ho jeh a themmona chengse nachunguva chuh lo ding ahi.
Mat 23:36 Kichentah a kaseipeh nahiuve, hicheng jeh a themmona chu hiche khang mite chunga chu ding ahi.
Mat 23:37 “O Jerusalem, Jerusalem! Themgao ho that’a, akisolpeh jouse songa a sep lih-ah! Ahpin anoute ahuikhom banga ijatvei nachate huikhom ding kagot hitam! Hinla neinoppeh poi!
Mat 23:38 Hijeh a chu na-in kamdel’a kidalhah peh ding nahi!
Mat 23:39 Kaseipeh nahiuve, tua pat, ‘Pakai min a Hungpa anun nom’e, nati masangseuva neimukit lou diu ahitai,” ati.
Mat 24:1 Houin dalha apotdoh chun Jesu henga aseijuite ahungun, Houin kisah loupije vetsah agouve.
Mat 24:2 Jesun ajah-uva, “Ahinai, aloupije hi vesoh keiyun, amavang kaseipeh nahiuve, song khat chunga khat kisethom hung umlou hel ding, kiphesoh kei ding ahi,” ati.
Mat 24:3 Olive molchinga Jesu atoupet’in guh thim chan aseijute ahungun, “Hitobang thilse ho chu itih hung lhunga, nahung kit ding phat le leiset kichai ding chu ipia kimel chih ding ham?” tin adongui.
Mat 24:4 Jesun adonbut’in, “Ching theiyun koima kilhep lhahsah dauvin.
Mat 24:5 Mihem tamtah kamin a hunguva, Keima Messiah kahi,’ atiuva mitampi alhep lhah diu ahi.
Mat 24:6 Gal kisat husa le gal kisat thukithang najah diu, hi jongle kicha hih-un; hitobang ho hi soh tei ding, amavang achaina hilou lai ding ahi.
Mat 24:7 Gam khat le gam khat kidouva, lenggam khat le lenggam chom khat kisat ding, muntin a kel lhantin, ling kihot ding ahi.
Mat 24:8 Hicheng hi naoso nat bang da kipatna ahi nalaiye.
Mat 24:9 Min namat’uva midang ho khut’a napeh diu, talen namatsah uva natha diu ahi. Keima jal’a namtinin nahotlo diu ahi.
Mat 24:10 Chutah le mi tampi tahsan a pul lha a, khat le khat kipedoh toa kihoto diu;
Mat 24:11 Themgao lhem tampi sohdoh-in tin, mi tamtah alhep lhah diu ahi.
Mat 24:12 Chon chatvaina pung cheh cheh-in tin, mi tamtah ngailutna dailha diu ahi.
Mat 24:13 Hinla akhon ni geiya thoh lhumkeiya chu huhhinga umtei ding ahinai.
Mat 24:14 Chule hiche Lenggam Kipana Thupha hi vannoi pumpia kiseiphonga kihettohsah ding, chu jou tengleh kichai ding ahibouve.
Mat 24:15 “Hichejeh chun mi sumang thet umtah, Daniel Themgao kama kiseisa chu muntheng phunga adin namu tenguleh! (asim sim an he hen)
Mat 24:16 ‘Judea gama um chengse molsang sanga jam’u hen.
Mat 24:17 Inting vuma um jong insunga thilkeo kilah din kumlhah da hen.
Mat 24:18 Loukon jong ponsil kilah din kile da hen.
Mat 24:19 Ohe, chulai tah a numei agaiya le nao noi chepsah nalai ho chu ada na-e!
Mat 24:20 Najam cheh nau phat chu phalbi lai le Choldo nikho ahilouna din taovun!
Mat 24:21 Chutengle hesoh genthei chungnung hung um ding, hitobang hi vannoi kisemtil’a pat tulai geiya soh kha louhel lai ahin, hung jong hungsoh kit lou ding ahi.
Mat 24:22 Hiche nikho chu Pathenin asuhchom lou hileh tahsa mihing khat cha jong soh cha lou ding ahi, hijeh a chu lhenchomte jal’a hiche nikho hi kisuchom ding ahi.
Mat 24:23 “Hichepet hileh min najahuva, ‘Ven, hiche hi Messiah ahi,’ ati ham, ahiloule ‘Hiche hi Ama ahi,’ ati ham hijongle tahsan hih-uvin.
Mat 24:24 Ajeh chu Messiah lhem le Themgao lhem tampi hung kisem doh-un tin, ahithei le bon lhenchomte geiya pui mangna dia melchihna le thil kidang nasa tah tah ahinbol diu ahi.
Mat 24:25 Veuvin, ahung lhun masanga kahil masah dem nahiuve.
Mat 24:26 “Ahilouva, ‘Veuvin, Messiah gamthip laiya aum’e,’ atiu jongle chedoh a vet din gel dauvin; ‘Veuvin indan sung nunga aum’e’ tijongleu tahsan hih-un.
Mat 24:27 Ajeh chu kolphe nisolama ahung phet leh nilhum lam geiya asalvah banga Mihem Chapa hung kit ding chuti ding ahi.
Mat 24:28 “Hoikom hileh thilong phunga muthong kikhom tei ding ahi.
Mat 24:29 “Thoh genthei hesoh nikho kichaisoh tengleh nisa thim a, lha jong vah talou ding, vanlaijol’a kona ahsite pul lhan tin, van a thaneina jouse kihot lingsoh ding ahi.
Mat 24:30 Chutah le vanlaijol’a Mihem Chapa melchihna hung kilang ding ahin vannoi leiset phungtin a min dip le lai akidop’uva, van meilhang lah a Mihem Chapa thanei tah le loupi tah a hung amu dingu ahi.
Mat 24:31 Mihem Chapan sumkon gin nasatah ho thoa Avantilte’asol ding, lhenchomte chengse van mong lang khat’a pat among lang khat geiya, kolkimvel ning lia akhop khom diu ahi.
Mat 24:32 “Theichang phung hin thulem kihil’un. Ajih adot’a ana anou teng nipi naidol naheuve.
Mat 24:33 Hijeh chun hichengse hi namu tengu leh naiya hung ding koncha ahi heuvin.
Mat 24:34 Tahbeh a kaseipeh nahiuve, thil hicheng hi aguilhun masangsea hiche khang hi kichai lou ding ahi.
Mat 24:35 Van le leiset mang ding ahin, kathusei ho vang mang lou ding ahi.
Mat 24:36 “Hiche Nikho hi Pa tilou van a Vantilte le Chapan jong chule koimachan ahepoi.
Mat 24:37 Mihem Chapa hungkit hi Noah nikho lai thilsoh banga hungsoh ding ahi.
Mat 24:38 Noah nikho lai twisang let masang, Noah kong alut ni geiyin, mihon aneuvin adon’un, akichengun, chen jong akichensah-ui;
Mat 24:39 twisang lenin achup mang kahseuvin, kho helouvin aum’uve. Mihem Chapa hungkit jong chuti ding ahi.
Mat 24:40 Chuteng mi ni louva umkhom jong khat kila khat kida lha ding,
Mat 24:41 numei ni sumhei khat’a chang goikhom te ni jong khat kila khat kida lha ding ahi.
Mat 24:42 Hijeh chun na-Pakaiyu hung ding nikho nahet loujeh-un kiging phauvin.
Mat 24:43 Gucha itih a hung ding inneipan heleh kiging jinga um ding, a-in aphet vangsah lou ding naheuve.
Mat 24:44 Hichejeh chun kiging jingin um’un, nakigin loupet tah-uva Mihem Chapa hung ding ahi.
Mat 24:45 “Soh tahsan um le chingtah, a-insung mite aphat cha neh le chah hoppeh dia, insung vaipoa apun anganse chu koi ham?
Mat 24:46 Apu hung teng hitobanga anatoh atokhah soh chu anun nom’e!
Mat 24:47 Tahbeh a kaseipeh nahiuve, ama chu apun anei jouse chunga vaipoa akoi ding ahi.
Mat 24:48 Soh gilou chun alung gel’in, ‘Kapu hungvah ponte,’ tin
Mat 24:49 asoh chanpi chengse deng panta hen, anop nop nehen don taleh,
Mat 24:50 hiche sohpa chun agel lou nikho le ahet loupet tah a apu hung ding,
Mat 24:51 asohpa chu tum ni asoa, mipha lhem ho talen amatsah ding, hikoma chu kap le hagel gel’a um ding ahi
Mat 25:1 “Hiche phat hileh van a Lenggam chu athaomeiyu kichoi cheh a ji nei dingpa lamto goah nu-ngah som tobang ding ahi.
Mat 25:2 Nu-ngah nga chu lungthimbei ahiuvin, nga chu lungthim pha ahiuve.
Mat 25:3 Lungthimbei hon thaomei aken vangun thaotwi akeng pouve;
Mat 25:4 lungthim pha hon vang athaomeiyuva det kham thaotwi haiya akenthauve.
Mat 25:5 Ji nei dingpa ahung geibehseh phat’in nu-ngah ho alu lhu’uvin, a-ihmusoh tauve.
Mat 25:6 “Jan khangkim laiyin kholhang akisamin, ‘Veuvin ji nei dingpa ahungtai! Hungun galam touvin” akiti.
Mat 25:7 Chutah-in nu-ngah ho athouvun thaomei akigot tauve.
Mat 25:8 Hichun lungthimbei hon lungthim pha ho jah a, ‘Kathaomeiyu thaotwi aumtapoi, thaotwi them khat beh neipeuvin,’ tin athum tauve.
Mat 25:9 Ahinla lungthim pha hon adonbut’un, ‘Igom’uva din lhing ponte, chusangin cheuvin lang ajoh ho koma gakichoh vah tauvin,’ atiuve.
Mat 25:10 Lungthimbei ho thaotwi choa ache lan’un ji nei dingpa ahung paiyin, kigingsa um chengsen kichen golvahna mun’ah akijot lut piuvin, kot akikhah tai.
Mat 25:11 “Chom khat jouvin lungthim bei nu-ngah ho ahungun, ‘Kapu, kapu, kot neihon’un!’ tin asamtauve.
Mat 25:12 Ji nei dingpan, ‘Tahbeh a kaseipeh nahiuve, nang ho kahe khapoi,’ ati tai.
Mat 25:13 “Anikho le anidan tah nahet loujeh-un kigingun.”
Mat 25:14 “Hiche phat hileh van a Lenggam chu khol gamla tah chedoh goa, asohte koukhoma, anei jouse asohte ngansepa thusim tobang ding ahi.
Mat 25:15 Soh khat chu talent nga apen, khat talent ni apen, khatma chu talent khat apen, athan ajokhop cheh-in ahoppeh-in khol’a achetai.
Mat 25:16 Talent nga sangpa akipat’a kiveina aneileh talent nga ma aveikan bei.
Mat 25:17 Talent ni sangpa jong akiveiyin Talent ni ma aveikan bei.
Mat 25:18 Talent khat sangpan vang lei alaiyin apupa sum chu asel tai.
Mat 25:19 “Phat sotpi nungin hiche soh ho pupa hi ahung kile kit tan, asohte toh sum asutouve.
Mat 25:20 Talent nga sangpan talent nga ma ahinchoi ben, ‘Kapu, talent nga neipen, talent nga ma kavei kan bei,’ tin apetai.
Mat 25:21 Apun, ‘Tahsan umtah soh pha, nabol pha lheh jenge! Thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati.
Mat 25:22 Talent ni sangpan, ‘Kapu, talent ni neipen, talent ni ma kaveikan bei,’ tin apetai.
Mat 25:23 Apun, ‘Tahsan um soh pha, nabol pha lheh jenge! Nang jong thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati.
Mat 25:24 Talent khat sangpa jong ahungin, ‘Kapu, mi kikhel nahi kahen, natuna louva at theiya, nathe na louva jong chomkhom thei nahin,
Mat 25:25 nang kagin jeh-in kachen natalent chu lei noiya kaseltai. Hiche hi nasum ma ma nakilah kit ahi,’ tin apetai.
Mat 25:26 Apun jong, ‘Vo soh gilou le thase! Katuna louva ka-atjia kathe na louva kachomkham ji nahet ahiye ong!
Mat 25:27 Kasum chu sumkolvei ho koma apung dia nanakoi leh itim? Chutileh kahung phat’a kasumpi le akan kilah tha ta dinga!
Mat 25:28 Hichepa talent chu lahpeh-un lang talent som neipa chu petauvin,
Mat 25:29 ijeh-inem itile aneiya kipehbea anei letset ding, anei lou vang aneisun jong kilahpeh ding ahi.
Mat 25:30 Chule hiche soh phachomlou hi polam muthim lah a gapai mangun, hikoma chu kap le hagel gel’a um ding ahi,’ ati.
Mat 25:31 “Mihem Chapa aloupinaa Vantilte toh ahung teng leh alaltouna loupi tah a tou ding,
Mat 25:32 namtin vaipi a-angsunga kikhom kimsoh keiya, kelngoi chingpan keltah lah a kelngoi chengse alhendoh banga, Aman jong miho alhen khen a, achom khen ding,
Mat 25:33 kelngoi chengse ajet lama akhindoh a, keltah chengse aveilama akhindoh ding ahi.
Mat 25:34 Chutah le lengpan ajet lama umte jah a, ‘Hungun ka-Pa phatthei boh changte, vannoi kisemtil’a pat nang ho dia gonsa kikoi Lenggam chu hung lo’uvin,
Mat 25:35 ajeh chu kakel pet’in neh ding neipeuvin, kadangchah pet’in don ding neipeuve; Kakholjin naa nei lhunsah-un,
Mat 25:36 ponbeiya ka-umin jong pon neisilpeh-ui. Kadammon nei hung veuvin, songkul kalut’in jong neihung vil’ui,’ ati ding ahi.
Mat 25:37 “Chuteng midih hon, ‘Pakai, itih a nakel pet toh kha neh ding kapeh-uva, chule nadangchah toh kha don ding kapeh khah-uvam?
Mat 25:38 Hoikom nakholjin na kalhunsah khah-uva, itih a ponbeiya naum kamu’va pon kasilpeh khah-u ham?
Mat 25:39 Itih nadammo veiset pet’a kahung vet’uva, itih a nasongkul lutpet kahung vil’uvam?’ ati diu ahi.
Mat 25:40 Lengpan adonbut’a, ‘Kichentah a kaseipeh nahiuve, hiche kasopite lah a aneopen khat nabol nau chu kei neibol nau ahi,’ tinte.
Mat 25:41 “Chuteng aveilama umho jah a, ‘Gaosap chang ho, kakoma konin potdoh’un lang Satan le avantilte dia gonsa kikoi tonsot mitmo meilhum sunga lut tauvin,
Mat 25:42 ijeh-inem itile kakelpet’in neh ding neipepouvin, kadangchah-in don ding neipepouvin,
Mat 25:43 kakholjin na a neilhunsah dauvin, ponbeiya ka-um jong pon neisilpeh pouve; kadammo la neihung ve pouvin, songkul kalut’in la neivil pouve,’ ati ding ahi.
Mat 25:44 “Chutah le amahon donbut’un tin, ‘Pakai, itih a keihon nagilkel, nadangchah, nakholjin, ponbeiya na-um, nadammo chule songkul’a na-um kamu’va don louva kakoi khah-um?’ tin sei yunte.
Mat 25:45 Lengpan ajah-uva, itobang ijase loupen hijongle hiche ho lah a khat nabol lou nau chu Keima neibol louvu ahi,’ ati ding ahi.
Mat 25:46 Chuteng amaho hi tantih neilou talen man dia cheuva, midih ho vang tonsot hin naa lut diu ahi,” ati.
Mat 26:1 Hicheng hi ahilchaisoh phat’in Jesun aseijuite jah a,
Mat 26:2 “Nahet banguva ni ni jou teng Kalchuh kut hi ding, Mihem Chapa hi thingpel a khetbeh dia min apehdoh ding ahitai,” ati.
Mat 26:3 Hichepet hin Thempu pipu ho le upate Thempulen Caiaphas inpia akikhom’un,
Mat 26:4 Jesu chu doha bol’a mat ding, chule tha theina ding akihou somtauve.
Mat 26:5 Ahivangin, “Kut lai hida le phante, ajo le japi lah a boina um khante,” atiuve.
Mat 26:6 Jesu chu Bethany khoa Simon miphah pa ina aum pet’in,
Mat 26:7 numei khat’in songval hai khat’ah thao namtui manlu tah ahinchoiyin, Jesun ankong aum pet’in aluchanga asun khum’e.
Mat 26:8 Athilbol hi seijuiten amu phat’un alung hanguvin, “I-bol’a thao namtui hi amoh suh mang ham?
Mat 26:9 Sum tampi man a joh a vaicha gentheite peh khamset hi la ahin,” atiuve.
Mat 26:10 Jesun akihou nau ahen ajah-uvah, “Idia numei nu chu nasuh lung gim’u ham? Aman thilpha tah eibolpeh ahi,
Mat 26:11 ajeh chu mivaicha gentheite chu nakom’uva um jing ding ahin, Keivang nakomu’va um jing ding kahi poi.
Mat 26:12 Aman thao namtui eisun khum hi vui ding lima eisem ahitai.
Mat 26:13 Tahbeh a kaseipeh nahiuve, hoikom hijongle vannoiya hiche Kipana Thupha kiseiphongna chan a athilbol jong hi amanu het jingna dia kiseitha jing ding ahi,” ati.
Mat 26:14 Seijui som le ni lah a khat Judas Iscariot kitipa chu Thempu pipu ho henga achen,
Mat 26:15 “Jesu khu matsah leu veng ipi neipe nom’un natem,” atileh, amahon, dangka somthum apeuve.
Mat 26:16 Hichea pat hin Judas-in Jesu matsahna thei phat kitup kom ave-lhi jingtai.
Mat 26:17 Cholsolou changlhah kut ni masa nin seijuite Jesu henga ahungun, “Kalchuh kut an nanehna ding hoikom gago leu veng nadeiyem?” tin adongui.
Mat 26:18 Jesun, “Khopi sunga lut’uvin pasal khatpen jah a, “Houhil’in Keidia phat kiteppeh ahung naitai, kaseijuite toh na-in a kalchuh kut an kaneh diu ahi,’ tin aseiye gatiuvin,” ati.
Mat 26:19 Jesun ahil bangun seijuiten abol’un kalchuh kut an chu agagong tauve.
Mat 26:20 Nilhah phat’in Jesun seijui som le ni toh ankong aumtai.
Mat 26:21 A-an neh laitah-un aman, “Tahbeh kaseipeh nahiuve, nalah-uva khat’in mi eimatsah ding ahi,” ati.
Mat 26:22 Seijuite alung dong lheh jengun, khat khat’in, “Keivang kahilou ahina ong Pakai?” atiuve.
Mat 26:23 Jesun adonbut’in, “Lheng sunga changlhah kadekotpi pa tah hin eimatsah ding ahi.
Mat 26:24 Mihem Chapa aumchan ding Pathen lekhabua kisun banga soh tei ding ahin, hinla Mihem Chapa matsahna dia manchah a pangpa chu ohe adana-e! Ama chu apen a peng lou hileh ama dia phajo ta dinga!” ati.
Mat 26:25 Jesu pedoh a matsah dingpa Judas chun adonbut’in, “Kei neisei ahipoi ong Houhil?” ati. Jesun adonbut’in, “Chutia nasei ahi,” ati.
Mat 26:26 An neh laitah-in Jesun changlhah alan, phatthei aboh jouvin aheh bal bal’in seijuite apen, “Kilah-un neuvin, hiche hi katahsa ahi,” ati.
Mat 26:27 Chuin khon chu alan, athangvah jouvin seijuite apen, “Nabonchan donsoh keiyun;
Mat 26:28 hiche hi chonset ngaidamna dia mi tamtah dinga kilhoh lha kathisan ahi.
Mat 26:29 Kaseipeh nahiuve, ka-Pa Lenggama nang ho to athah a kadon khom nikho hung lhun kit kahsea lengpiga twi hi kadon kit lou ding ahitai,” ati.
Mat 26:30 Chuin la khat asauvin Olive mol jonin achetauve.
Mat 26:31 Jesun aseijuite jah-a, “Tujan teng kachunga nakisuhmo soh hel diu ahi, ajeh chu, ‘Kelngoi chingpa kavoh lhuh teng kelngoite cheh soh diu ahi,’ tin Pathen lekhabua akisun’e.
Mat 26:32 Hijongle hinga eikikaithou teng Galilee gama nang ho sangin masajo tange,” ati.
Mat 26:33 Peterin Jesu jah a, “Midangin nadalhah soh hel jongle kenvang dalha hih hel inge,” ati.
Mat 26:34 Jesun Peter jah a, “Tahbeh a kaseipeh nahi, tujan ah khon masanga thumvei neiseilep ding ahi,” ati.
Mat 26:35 Peterin ajah a, “Nangto thitha ding hi jong leng naseilep hih hel inge,” ati. Seijui dangsen jong chutin asei cheh-ui.
Mat 26:36 Jesu le seijuite chu Gathsemani kiti laiya acheuvin, Jesun ajah-uvah, “Khu koma kachea kaga tao sungsen hikoma hin anatou jingun,” ati.
Mat 26:37 Jesun Peter le Zebedee chapa te ni akipuiyin, chuin lung gim hesoh nasa tah-in ahinphan,
Mat 26:38 ajah-uva, “Thina khop hel’in kalung hesoh behseh tai, hikoma hin um’un neikiginpi jngun,” ati.
Mat 26:39 Chuin themkhat ache chonin, tol’a mai asulut’in, “Hepa! Ahithei leh hiche khon hi Keiya konin tolmangin, hinla Kei dei hilouvin Nang lungdei joh hihen,” tin ataove.
Mat 26:40 Chujouvin seijui thum henga ahung leh ana-ihmut’u atoh khan, Peter jah a, “Iti nidan khat jeng jong neikiginpi jou louvu ham?
Mat 26:41 Lhepna nalhah louna din kigingin tao jingun, lhagaovin ago nan tahsa alhasam behseh jenge!” ati.
Mat 26:42 Anivei nan Jesu ache kit’in, “Hepa! Hiche khon hi kadon lousea kitol mang thei lou ahileh Nangma lung got got hita hen!” tin ataove.
Mat 26:43 Ahung kile kit leh, seijuite ihmutsoh behseh a ihmut mildel ahungtoh-e.
Mat 26:44 Seijuite dalhan athumvei chan nan agataovin, asei ngai ngai agaseiyin ahi.
Mat 26:45 Chuin aseijuite henga ahungin, “Ihmua kicholdo nalai nahiuvem? Veuvin phat alhingtan, Mihem Chapa hi mi chonsete khut’a apehdoh diu ahitai.
Mat 26:46 Kipat’un chetaute. Veuvin! Eipedoh pan kakom ahin phatai!” ati.
Mat 26:47 Jesun thu asei nalaiyin, seijui som le ni lah a Judas chu Thempu pipu ho le, Thempulen ho le upate hinsol, chemjam le moltum thoa hung kon, mipi toh lhonin ahung lhungtai.
Mat 26:48 Jesu pedoh a pangpan miho chu melchihna ahilmasah a, “Kachop pen pen chu Ama ahi, man jengun!” ati ahi.
Mat 26:49 Judas chun Jesu ajon jangkeiyin, “Chibai, Houhil!” tin achoptai.
Mat 26:50 Jesun ajah a, “Golpa, nahung lo na bol jengin,” ati. Chutah chun mipin ahindelvuh-un Jesu man’un akantauve.
Mat 26:51 Jesu to umkhom ho khat’in chemjam asatdoh-in Thempu pipu soh pa asat jengleh, abilkol lang khat asat lhai.
Mat 26:52 Jesun, “Nachemjam chu apaiya khum jengin, chemjam pan jouse chemjama lou ding ahi.
Mat 26:53 Tutah jenga jong ka-Pan Vantilte sang som sagi le sang ni val jen eihinsolpeh dia kathummo a nabol ham?
Mat 26:54 Chutin kibol leh Pathen thu hitobanga thilsoh dia asei chu iti guilhun thei ding ham?” ati.
Mat 26:55 Hichea hin Jesun mipi jah a, “Gucha michom man ding banga, chemjam le moltum thoa Kei man dia hungkon nahiuvam?” ati. Niseh-in Houin a katouvin mi kahil jin la nei man pouvin,” ati.
Mat 26:56 Hoi hileh Pathen lekhabua Themgaote sutsa jouse guilhunna dinga hicheng hi soh ahi,” ati. Chutah chun seijuiten adalhauvin ajam mang tauve.
Mat 26:57 Jesu man hon Jesu chu Thempu chungnung Caiaphas in a akaiyu leh, hikoma chun Danthu them ho le upate anakikhom’ui.
Mat 26:58 Peterin Jesu chu galkangin ahinjuipeh-in, Thempu chungnung inpi leitol geiyin ahunge; hichea hin, “Achaina munge,” tin alut’in lhacha ho lah a atouve.
Mat 26:59 Thempu len chengse le Hou vaipoloi chengsen Jesu tha theina din adou nan jouthu jeng hettohsah ahol’un,
Mat 26:60 mitampin jou thua hettohsah abol vangun athina thei lom khat cha aseidoh pouve. Akhon nan mi nin,
Mat 26:61 “Hiche Pa hin, ‘Pathen Houin kaphet lhah a nithum sunga kasahdoh thei ahi,’ tin aseiye,” atilhone.
Mat 26:62 Thempu Chungnung akipat doh paiyin, “Nahehset na chengseu hi nadonbut lou ding ham?” tin Jesun adonge.
Mat 26:63 Jesu la athip beh jenge. Hichun Thempu chung nungin ajah a, “Hing jing Pathen min a kahahsel’a kasol nahi, Pathen Chapa Messiah chu nahi ha nahilou ham-seiyin?” tin anoi.
Mat 26:64 Jesun adonbut’in, “Chutia nasei ahi! Hinla kaseipeh nahi, tua pat Mihem Chapa hi Thaneipen jet’a touva, vanlaijol, meilom lah a hung namu diu ahi,” ati.
Mat 26:65 Chutah chun Thempu chungnungin aponsil akibo-eh paiyin, “Pathen ataitomtai. Hettohsah dang angai tapoi! Tutah a Pathen ataitom najah cheh tah-u chu me!
Mat 26:66 Iti nagel’um?” ati. Mihon, “Athemmoi, thi tei tei ding ahi,” atiuve.
Mat 26:67 Chutah chun mihon Jesu maiya chil asetkhum’un, achum’un, loi khat man abengun,
Mat 26:68 “Messiah, gaovin lang seitemin, koiham nadenga chu?” tin ahouseuve.
Mat 26:69 Peter chu polam leitol’a atouve. Soh nu-ngah khat ahungin, “Nang jong Galilee mi Jesu to kiloi nahibouve,” ati.
Mat 26:70 Hinla Peterin japi angsunga aseilep’in, “Ipi nasei ham kahepoi,” ati.
Mat 26:71 Kelkot polam a agapotdoh leh, soh nu-ngah khatman amudoh kit’in chukoma um ho ja a chun, “Hichepa jong hi Nazareth Jesu toh kivopsa ahi,” ati.
Mat 26:72 Peterin kihahsel to thon aseilep kit’in, “Hichepa khu kahe khapoi,” ati kit’e.
Mat 26:73 Chom khat jouvin chu koma ding miho ahungun Peter jah a, “Nang jong amaho lah a khat mong mong nahibouve, napao dan hin nakiphong doh tai,” atiuve.
Mat 26:74 Hiche phat vang hin Peter jong kigaosap le kihahsel thon, “Hiche pa him him kahe kha hih hel’e!” tia aseilep pet tah-in ah ahung khongtai.
Mat 26:75 Hichun, “Ah khon masanga thumvei neiseilep ding ahi,” tia Jesun asei chu Peterin ageldoh tan, polama apotdoh loiyin lhase tah-in akaptai.
Mat 27:1 Jingpi tah-in Thempulen ho le upate Jesu tha na thei ding akihousom tauve.
Mat 27:2 Jesu chu thihkhaovin akan’un, akaiyun Rome gam vaipo Pilate apedoh tauve.
Mat 27:3 Jesu matsah a pang Judas chun, Jesu tha dia thu kitan ahetdoh phat’in akisih behseh jengin, dangka somthum chu Thempu len ho le upaho alepeh kit’in,
Mat 27:4 “Themmonabei tha dinga kapehdoh chu kathemmotai!” ati. Amahon la, “Keiho i-kin hiya ong? Nangin kivet tange,” atiuve.
Mat 27:5 Judas-in sum chu Houin sunga aseplhan, apotdoh paiyin agakikhai lihtai.
Mat 27:6 Thempulen hon dangka chujat chu alauvin, “Hiche sum hi thisan man ahin, Houin sung sumkholnaa koi ngai ahipoi,” atiuve.
Mat 27:7 Akihoutoh phat’un gamdang miho lhan mol din, beldengpa lou mun achoh natauve.
Mat 27:8 Hijeh a chu tuni geiya hiche mun khu, “Thisan mun,” kiti ahi.
Mat 27:9 Hichea hin Jeremiah Themgao seisa, “Israel miten man tuh a atepsau dangka somthum chu mihon alauvin,
Mat 27:10 Pakaiyin eithupeh bangin beldingpa loumun choh nan anei tauve,” kiti chu aguilhunge.
Mat 27:11 Jesu chu Rome gamvai popa angsunga adinsah tauvin, gamvaipon ajah a, “Judate lengpa nahim?” tin adonge. Jesun, “Chutia nasei ahi,” ati.