Məhəbbətin boş kasaları

FƏSİL 8

MƏHƏBBƏTİN BEŞİNCİ DİLİ:

TOXUNUŞ

Heç kəsə sirr deyil ki, toxunuş — məhəbbəti ifadə etmək üsullarından biridir. Tədqiqatlar təsdiqləyir ki, tez-tez qucağa götürülən, öpülən, nəvaziş görən körpələr fiziki və emosional cəhətdən saatlarla tək qalan uşaqlara nisbətən daha yaxşı inkişaf edirlər. Ancaq bu, müasir kəşf deyil. Yəhudilər Məsihin böyük müəllim olduğunu qəbul edəndə, körpələri Onun yanına gətirdilər ki, O «...onlara toxunsun».^ Xatırlayırsınızmı, şagirdləri düşündülər ki, Məsihin belə boş işlərlə məşğul olmağa vaxtı yoxdur. Buna görə də uşaqların valideynlərini Onun yanına buraxmaq istəmədilər. Amma İsa acıqlanaraq onlara dedi: «Uşaqları buraxın, qoy Mənim yanıma gəlsinlər! Onlara mane olmayın! Çünki Allahın Padşahlığı belələrinə məxsusdur. Sizə doğrusunu deyirəm: kim Allahın Padşahlığını bir uşaq kimi qəbul etməsə, oraya əsla daxil ola bilməz»^. Müdrik valideynlər uşaqlara nəvaziş göstərməyin vacib olduğunu bilirlər.

Toxunuş vasitəsilə ər-arvad sevgisini də əks etdirmək olar. Bəzilərinin məhəbbəti hiss etməsi üçün bu, yeganə vasitədir. Onlar üçün əl-ələ tutmaq əhəmiyyətlidir. Onların öpülməyə və qucaqlaşmağa ehtiyacı var. Məhz onda onların məhəbbət kasası dolur və onlar sevildiklərini duyurlar. Əks halda, onlar həyat yoldaşının sevgisinə əmin olmurlar.

Belə bir atalar sözü var: «Kişinin ürəyinə yol onun mədəsindən keçir». Başqa sözlə desək, yemək kişinin məhəbbətini qazanmağa kömək edir. Ona görə də bir çox qadınlar öz ərlərini, sanki kəsilməyə aparılan heyvan kimi yedizdirirlər. Amma yenə də belə demək daha düzgün olardı: «Bəzi kişilərin ürəyinə yol onların mədəsindən keçir». Bir kişi mənə deyirdi: «Arvadım bütün gününü mətbəxdə keçirir. O, doğrudan da dadlı yeməklər hazırlayır və yeni xörəklər ixtira edir. Amma kimin üçün?! Mən ətlə kartof xoşlayıram. Mənə zərif yeməklər lazım deyil. Ona bu barədə deyəndə, o inciyir. Arvadıma elə gəlir ki, mən onu qiymətləndirmirəm. Mənim isə ona çox yazığım gəlir: o, nahaq yerə bu qədər vaxt itirir. Əgər o, bütün vaxtını mətbəxdə keçirməsəydi, biz daha çox birlikdə olar və onun başqa nəsə etməyə gücü qalardı». Aydın görünürdü ki, «başqa nəsə etmək» ər üçün yeməkdən daha xoşdur.

Həmin qadın səhv düşünürdü. Onun anası çox dadlı yeməklər hazırlayırdı. Hər dəfə atası masadan qalxanda deyirdi: «Hər şey çox dadlı idi! Səni o qədər sevirəm ki!» Atası anasının əziyyətini qiymətləndirirdi. Həm evdə, həm də qonaqlıqda arvadının kulinariya bacarığını tərifləmək imkanını əldən vermirdi. Buna görə onun qızı yaxşı yadında saxlamışdı ki, ərini razı salmaq üçün ona dadlı yeməklər bişirmək lazımdır. Amma onun əri atasına bənzəmirdi və məhəbbətin bu dilini başa düşmürdü.

Kişi ilə etdiyim söhbətdən anladım ki, onun nəzərdə tutduğu «başqa nəsə etmək» əslində seks idi. Yalnız bu halda o, arvadının sevgisinə inanacaqdı. Lakin bəzi səbəblərə görə arvadı yaxınlıq etməkdən imtina edəndə, onun bütün kulinariya axtarışları hədər olur və əri onun sevgisinə şübhə ilə yanaşırdı. Təbii ki, dadlı yeməklər onun xoşuna gəlirdi. Ancaq yemək onun «həqiqi sevgi» adlandırdığı şeyi əvəz edə bilmirdi.

Toxunuşlar bəzən məhəbbət,

Bəzən isə nifrəti ifadə edə bilər.

Seks — sadəcə bu məhəbbət dilinin bir dialektidir. Toxunma hissi digər dörd duyğulardan onunla fərqlənir ki, toxunuşla duyulan reseptorlar təkcə bədənin bir hissəsində deyil, bütün orqanizmdə yerləşdirilib. Onlar xarici qıcıqlanmaları qəbul edərək elektrik siqnallarına çevirir. Beyin bu siqnalları təhlil edir. Beləcə biz isti və soyuğu, yumşaq və bərk şeyləri ayırd edirik. Bizə ya xoş, ya da naxoş olacaq. Bu halda sevildiyimizi, ya da nifrət edildiyimizi hiss etmiş oluruq.

Bədənin bəzi hissələri xarici qıcıqlanmalara qarşı çox həssasdır. Bu, reseptorların bədəndə qeyri-müntəzəm paylanması ilə izah olunur. Məsələn, onlar dilin, barmağın, burnun ucunda çox, amma çiyinlərdə və kürəkdə nisbətən azdır. Lakin gəlin fiziologiyanın dərinliyinə varmayaq. Bu məsələyə psixoloji nöqteyi-nəzərdən yanaşaq.

Bayaq dediyim kimi, toxunuş həm məhəbbəti, həm də nifrəti ifadə edə bilər. Həyat yoldaşınız məhəbbətin bu dilində danışırsa, onda o, «Səni sevirəm» və ya «Sənə nifrət edirəm» sözlərindən çox toxunuşa inanacaq. Şillə istənilən uşaq üçün təhqir sayılır. Doğma məhəbbət dili toxunuş olan uşaq üçün şillədən daha pis heç nə ola bilməz. Öpüşcüklər hər uşağa xoşdur. Amma məhəbbətin bu dilində danışan uşaq öpüşcüklərdə sevgi görür. Eynilə böyüklərdə də belədir.

Həyat yoldaşınıza məhəbbəti toxunuş vasitəsilə müxtəlif cür bildirmək olar. Toxunmaqla duyulan reseptorlar bütün bədəndə mövcuddur. Deməli, istənilən zərif toxunuş sevgidən bəhs edir. Amma bəzi zərif toxunuşlar həyat yoldaşınız üçün daha xoş ola bilər. Hansı toxunuşlar? Ən yaxşısı, bunu onun özündən soruşmaq lazımdır. Əgər yoldaşınızı sevmək istəyirsinizsə, onun dialektini bilməlisiniz. Siz ona onun xoşuna gəldiyi tərzdə və istədiyi halda toxunmalısınız. Ola bilsin ki, bəzi toxunuşlar onu qıcıqlandırsın. Əgər o, bu barədə sizə bildirirsə, bunları etməməyə çalışın. Əks təqdirdə, sevginizi göstərə bilməyəcəksiniz. Elə görünəcək ki, siz yalnız öz qayğınıza qalır, ona isə etinasız yanaşırsınız. Sizin xoşunuza gələnin onun da xoşuna gələcəyini düşünmək böyük səhvdir.

Elə toxunuşlar var ki, sizdən diqqət tələb edir: masaj, intim münasibətlər. Lakin nəvaziş ötəri də ola bilər. Məsələn, fincana qəhvə süzərkən əlinizi onun çiyninə qoymaq və ya yanından keçərkən yüngülcə ona sığınmaq. Əlbəttə, ilk qeyd etdiyimiz nəvazış üsulu daha çox vaxt tələb edir. Çünki siz əvvəlcə başa düşməlisiniz ki, həyat yoldaşınızın xoşuna gələn nədir. Əgər o, masajı xoşlayırsa, onda masaj kurslarına yazılın. Bunun üçün vaxtınıza və pulunuza qənaət etməyin. Əgər onun doğma dialekti seksual yaxınlıqdırsa, onda bu mövzuda kitablar oxuyun. Onlar sizə sevginizi ifadə etməyə kömək edəcək.

Ötəri nəvaziş vaxt tələb etmir. Xüsusən də bu dil sizə yad olarsa, ya da nəvazişə öyrəşməmisinizsə, o, sizə çox çətin gələ bilər. Yanbayan əyləşib televizora baxanda, həyat yoldaşınızı qucaqlayın. Bu, xüsusi güc tələb etməsə də, ona olan sevginizdən bəhs edəcək. Həyat yoldaşınız işə gedəndə və ya evə qayıdanda, onu öpün. Bu, çox vaxt aparmır. Lakin onun üçün çox vacibdir.

Toxunuşun həyat yoldaşınızın doğma məhəbbət dili olduğunu dərk edəndə, yalnız öz fantaziyalarınızla məhdudlaşmış olursunuz. Əvvəllər insanların qarşısında nəvazişdən qaçırdınızsa, indi vərdişlərinizi dəyişin. Restoranda olarkən arvadınızın əlindən tutun, çıxanda isə onu qucaqlayıb belindən tutun, maşına əyləşəndə onu öpün. Beləcə siz onun məhəbbət kasasını doldurursunuz. Arvadınız mağazaya getməyə hazırlaşanda, evdən çıxanda, onu öpün, bəlkə o, daha tez qayıdar. Zərif davranın. Toxunuşunuzun həyat yoldaşınızın xoşuna gəlib-gəlmədiyini soruşmağa unutmayın. Yadda saxlayın, son söz onundur. Onun dilini öyrənin.