BARIŞAMMIRAM
Sazı oyuncağa döndərənlərlə,
Barışa bilmirəm, barışammıram.
Şöhrəti göylərdən endirənlərlə,
Yarışa bilmirəm, yarışammıram.
Milli simasını itirənlərlə,
Nifrəti, töhməti götürənlərlə,
Ozana əksiklik gətirənlərlə,
Duruşa bilmirəm, duruşammıram.
Məhərrəməm, haqq sözündən qalmazam,
Hər yetənin minnətini almaram.
Mən aşığam, hər yetənlə çalmaram,
Sayrışa bilmirəm, sarılammıram.
ÇƏKMƏZ
Nəfsinin qulu, xalqın qulduru,
Vətən dərdi çəkməz, el dərdi çəkməz.
Qoy onu əkənin çatlasın goru,
Axın dərdi çəkməz, sel dərdi çəkməz.
Kişi libasında canlı büt olan,
Gözü ac, cib dolu, daimi lüt olan,
Bədənə yerişən böyük bit olan,
Nə tufan, nə duman, yel dərdi çəkməz.
Zalım anlayarmı aman, ah nədi,
Sevib, sevindirmək, ya günah nədi.
Zülmət gecə nədi, nur sabah nədi,
Məhərrəməm, ölsə, dil dərdi çəkməz.
ÖZÜNƏ
Anasından tülkü kimi doğulan,
Kölgələrdə şir görünər özünə.
Sızqa olub quraqlıqda soğulan,
Ya xan Araz, Kür görünər özünə.
Gədalığı ədasından bilinən,
Nifrət dolu gülüşlərlə gülünən.
Təpəsinə qaramatlar əllənən,
Əvəzi yox, bir görünər özünə.
Danışığı çərçivəyə sığmayan,
Mərifəti toplamayan, yığmayan,
Boşalanda yağış kimi yağmayan,
Məhərrəməməm, sirr görünür özünə.
Dostları ilə paylaş: | 
