Məhərrəmin yeni şeirləri

SÖYLƏYİR

Üzü üzlər görən, yaltaq, ikiüzlü,

Gördüyünə görməmişəm söyləyir.

Şər-xəta, boşboğaz, dodağı sözlü,

Dediyinə deməmişəm söyləyir.
Tanınıb sayılır axmaq,gic-gicə,

Fərq etməz özünü aparsa incə.

Ellər qəh-qəh çəkib, gülər gülüncə,

Bildiyinə, bilməmişəm söyləyir.

Müftə maldan yoğunlayıb peysəri,

Tanınıb dolanır axmaq, sərsəri.

Yoxdu öz evində ağız kəsəri.

Sindiyinə sinməmişəm söyləyir.

Beləsi gəzdiyi yaldı, tavaqdı,

Tələdi, tənədi, həm badalaqdı.

Özütək dostları peyvənd, calaqdı,

Girdiyinə girməmişəm söyləyir.

Məhərrəm,beləsi gədadı, gəda,

Onunçün salınmır bir dəfə yada.

Əl tutub baxmayan aha-fəryada,

Güldüyünə gülməmişəm söyləyir.

AŞIQ
Ürəklərin deyəcəyi nə varsa,

Susan deyil deyəcəkdi dil aşıq.

Boşboğaz, davakün, dodağı sözlü,

Bilən deyil qədirini, bil aşıq.

Arzulara, diləklərə yet görək,

Qulluğunu öz xalqına et görək,

Ustadların yol-iziylə get görək,

Köklə sazı, səsin üstə zil aşıq.

Nə deyibsə, düz deyibdi dədələr,

Səni duymaz gəda oğlu gədələr.

Nə gərəkdi sənətkara hədələr,

Kamalınla sayılırsan fil aşıq.

Nanəcibə yaxşı nədi, pis nədi,

Gönü qalına çovğun nədi, sis nədi.

Məhərrəmə bu meydanda sus nədi,

Ömrümüzdən keçir ayla, il, aşıq.

GÖRƏ

Düyləyib yumruğu ağzının üstə,

Vurarlar uydurma yalana görə.

Özgəni şərləyib deməynən xəstə,

Güdazə gedərsən talana görə.
Oğrusan, doğruya doğruyam demə,

Sayılma sözünlə axmaq, sərsəmə.

Sənin ki əməlin bəlli aləmə,

Kişiyəm sözünü balana demə.

Məhərrəm haqq üstə olub davakar,

Tanrı dərgahında olmaz günahkar.

Qeyrətsizə sən deginən, a lal-kar,

Kürsülər gəzirsən xalana görə.

BİLƏRMİ

Allahın verdiyi hökmü, fərmanı,

Özündən bir qeyri bilə bilərmi?!

Elə nizamlayıb zamanı,anı,

Kimsə həqiqətə gülə bilərmi?!
Könül, gəz dünyanı hər an duyğulu,

Tanrı bəndəsinə ol haqqın qulu.

Yaşa ürəklərdə, sayıl sorğulu,

Dinsiz də bir dinə gələ bilərmi?!

Məhərrəm Hüseynli oxuyan vədə,

Düz sözüm çoxuna gətirməz zədə.

Var olsun düzlüyü düz görən didə,

Dost da dostluğunu tələ bilərmi?!

GÖRƏN
Əvvəlki deyilsən, dəyişən dostum,

Günahkar vəzifən puldurmu sənin?!

Bir gün deyəcəksən yediymi qusdum,

Ürəyin, nəfsinə quldurmu sənin?!

Peysərinlə cibin, şişibdi qarnın,

Buynuzumu olur azdıran harının.

Demirəm qədərini bilmə varının,

Onun da haramı boldurmu sənin?!

Bir yadan verənin almağı da var,

Axır tənəzzülə salmağı da var.

Məhərrəm, xəyala dolmağı da var,

Ədalət o haqsız yoldurmu sənin.

ARALANMIŞAM

Min bir həsrət ilə qəlbimə köçən,

Tənə sözlərindən qaralanmışam.

Yalan vədlər verib, and-aman içən,

Adımla adından aralanmışam.
Sənin yollarında qaldığım üçün,

Məhəbbət havası çaldığım üçün.

Saf eşqə səcdələr qıldığım üçün,

Özüm öz dostumdan paralanmışam.

Ömrün karvanı geriyə dönməz,

Göynəmiş bu dilim sən deyib dinməz.

Sənin səviyyənə Məhərrəm enməz,

Başqa bir gözəldən çaralanmışam.

DÜŞDÜ

Yaxşı axtarırdım qoca dünyada,

Taleyim yamanca yamana düşdü.

Bəxtim bəd gətirdi, düşdüm fəryada,

Ruzigarım sərt keçən zamana düşdü.
Pay ummaram pay verməyən sirdaşdan,

Qara qabaq ilə hər sallabaşdan.

Zəhləm gedir qalmaqaldan, savaşdan,

Onunçün min aha-amana düşdü.

Məhərrəm sən varsan söz meydanında,

Şadlıq axır damarında,qanında.

Qələm, kağız, telli saz var yanında,

Qismətim dərd bilən qanana düşdü.

A DOSTUM

Dərk eyləyib bu dünyanın işini,

Bilməlisən,bilməlisən, a dostum.

Yaxşı arvad kişi eylər kişini,

Dinməlisən,dinməlisən, a dostum.
Hər zurnanın qaydası var, oynu var,

Adamların danəndəsi, qoynu var.

Yekə başın fır bağlayan boynu var,

Gülməlisən, gülməlisən, a dostum.

Arif olan tez anlayar mətləbi,

Şairlərin var ihamı, var təbi.

Böyük dərsdi ata-ana məktəbi

Görməlisən, görməlisən, a dostum.

Məhərrəmin hər sözünü sayan var,

O sözlərdə şəffaflıq var, əyan var.

Quranda da yol göstərən bəyan var,

Dönməlisən, dönməlisən, a dostum.

EYLƏR

Ana əməliylə doğma qızını,

İsmətli, abırlı, həyalı eylər.

Çəkdirər dost, qardaş, ərin nazını,

Amalnı yaxşılar amalı eylər.
Ana görüb balasını anarlar,

Anası tək balasını sanarlar.

Dərrakəsin, qafasını qanarlar,

Onu bir oğlanın halalı eylər.

Ananın cehizi məhəbbət olar,

Tərbiyə, qanacaq sədaqət olar.

Məhərrəməm, bir də xoş adət olar,

Ana öz-özünü bahalı eylər.

QALIB
Hələ deyilməmiş min bir duyğulu,

Şeirim, dastanım, söhbətim qalıb.

Əzəldən olmuşam saz-sözün qulu,

Ürəklər oxşayan ülfətim qalıb.

Məni itirməyə tələsmə bir az,

Nə desəm dilimdən ağ kağıza yaz.

Sizə nələr deyir sinəmdəki saz,

Qəlblərə axmağa həsrətim qalıb.

Deyim dədələrin dədə sözünü,

Saflaşıb dərk eylə özün-özünü.

Unuda bilməzsən ozan izini,

Onlardan tükənməz sərvətim qalıb.

Hələ sağlığımla gərəyəm-gərək,

Vədəsiz durmasın sinəmdə ürək.

Gəzsəz, tapammazsız əlində çələk,

Aşıq Məhərrəməm, hörmətim qalıb.

HƏLƏ

Güvəncim tanrıdı, diləyim sağlıq,

Coşub çağlayıram,yazıram hələ.

Ürəyim dilimə eyləyir qılıq,

Həmsöhbət olmağa hazıram hələ.

Saç ağarıb,diş tökülüb getsə də,

Saz sinəmdə qəmli-qəmli ötsə də,

Bu qocalıq məni məyus etsə də,

Yuxu tək tərsinə yozuram hələ.
Məhərrəm sözündən dönmək istəmir,

Bir xalqı ikiyə bölmək istəmir.

Arzuya yetməmiş ölmək istəmir,

Yaddaşdan yamanı pozuram hələ.