Microsoft Word bankir ziyouz com doc
Yüklə 0,96 Mb. Pdf görüntüsü
|
|
O’n birinchi bob Palmer bankni Berns bilan uchrashuvga yigirma daqiqa kechikishni mo‘ljallab tark etdi. U Beshinchi avenyu bo‘ylab dadil odimlar bilan yurib borardi. Kuz quyoshining yengil nurlari siyraklashgan kashtan barglari orasidan o‘tib yerga yoyilardi. Kun kutilmaganda iliq keldi. Palmer paltosi bilan shlyapasini ish stoli ortidagi maxfiy javonda qoldirdi. U erkalovchi yengil havodan chuqur nafas olib borardi. Yo‘l bo‘ylab unga duch kelayotgan barcha qizlar unga xushro‘y bo‘lib ko‘rinar, ularning yengil odim tashlashlari ko‘zni quvnatib, dilni yayratardi. Do‘konlarning ko‘rgazma oynalarida hafsala bilan joylashtirilgan bashang buyumlar o‘zlarini ko‘z-ko‘z qilardi. Palmer odatdagidan tezroq yurib Ellik birinchi ko‘chaga burildi-da, ko‘zi bilan Nyu-Yorkning mashhur restorani «Yigirma bir»ning lavhasini qidira boshladi. U Oltinchi avenyuga yaqinlashganda birdan restoran Ellik ikkinchi ko‘chada joylashganini esladi. U to‘xtab o‘yladi, bu xato — o‘ziga xos ogohlantirish bo‘lsa kerak, Palmer qo‘pol xatoga yo‘l qo‘yayotganga o‘xshaydi. Oltinchi avenyu muyulishida turib, o‘tgan-ketganlarga qararkan, Palmer bu ko‘chadagi ayollar bir mahalla narida ko‘rgan xonimlardan qanchalik farq qilishi haqida o‘yladi. Lekin kayfiyati nega birdaniga o‘zgarib qolganiga tushunmasdi. Uning kayfiyati tez-tez o‘zgarib turishi avvaldan ma’lum edi. Uning asosiy kamchiliklaridan biri shu edi. Bundan qutulish kerak deb otasi ham ta’kidlagandi. Palmer endi Oltinchi avenyu bo‘ylab sekin, shoshmasdan yurib borardi. Bu yerdagi do‘konlarning uniqqan ko‘rgazma oynalarida turib qolgan buyumlar ko‘zga tashlanardi. Devorlarda: «Shoshilinch, arzon sotiladi» degan yozuvlar ko‘zga tashlanadi. Otasining cheklanganligi Palmerning hamisha g‘ashiga tegsa-da, oxir-oqibat u shunday xulosaga keldiki, otasiga uni o‘rab turgan dunyo bilan tabiiy muomala usuli bo‘lib xizmat qilayotgan muhrlar to‘plami yordamida haqiqatni tiklash chindan ham ancha oson bo‘larkan. Ellik ikkinchi ko‘cha muyulishida Palmer qadamini sekinlatdi va atrofga alangladi. Bu yerdagi mo‘‘jazgina do‘koncha vaqtincha saylov mavsumi idorasiga aylantirilgan edi. Unda shahar mahkamalariga navbatdagi saylovga tayyorgarlik boshlab yuborilgandi. Do‘konning devorlariga |