Microsoft Word bankir ziyouz com doc

www.ziyouz.com kutubxonasi 
70
tayinlashganini men endi tushunib yetdim. 
— Odatda, — dedi Palmer, — bu lavozimga huquqshunoslik firmasidagi bank manfaatini ifoda 
qiluvchi katta sherikni tayinlaydilar. Sayyoramizning kelajagi huquqshunoslarnikidir. 
— Tanlov an’analarga zid ravishda amalga oshirilgan deb hisoblaysizmi? — Virjiniya bir zum jim 
qoldi, so‘ng davom ettirdi:  — Shubham bor. Meningcha, ularga bank ishiga tug‘ma mayli bor odam 
kerak bo‘lgan. 
— Ehtimol bu gaplaringizni xushomad deb qabul qilishim kerakdir, — xo‘rsindi Palmer. — Bilasizmi, 
mening «Yunayted benk»ka tayinlanishim munosabati bilan juda ko‘p savollar tug‘ilgan edi, ular 
xususida hali o‘zim ham qoniqarli javob ololganim yo‘q. 
— Aynan qanday savollarga? 
Palmer astagina yelkalarini qisib qo‘ydi. — Bu savollar asosan texnik xarakterdadir, — istamaygina 
javob berdi u, muhokamaga kirishmoqni istamagan holda. U Virjiniya Kleriga qarab qo‘ydi. Bu borada 
u uncha sir boy bermayotir. Aftidan, buning uchun u ancha aqlli ko‘rinadi. 
— Agar siz... — deya boshlamoqchi bo‘ldi miss Kleri. 
— Darvoqe, shuni esdan chiqarmaslik kerakki, —  uning gapini bo‘ldi Palmer, bu mavzuga 
qaytmaslikka qat’iy qaror qilib, — biz bank ishi borasida tushunchamizdagi bo‘shliqni to‘ldirish uchun 
hali biror qadam qo‘yganimizcha yo‘q. 
Miss Kleri taassuflanganday ko‘zlarini kattaroq ochdi. 
— Men o‘zimni firma uchun oshiqcha yuk his qila boshladim. 
— Bu sohada uncha-muncha narsani bilishingiz sizga dalda bo‘lishi kerak. Bankimizda 
ishlayotganlarning ko‘pchiligi o‘z ishini sizchalik tushunmaydi, axir. 
— Men foizlar, xususiy qarzlar, amortizatsiyalash hamda Federal zaxira tizimi bilan bog‘liq 
masalalarning farqiga boraman, — bidirlab ketdi Virjiniya. — Unda nimani bilmayman o‘zi? 
— Sizda umumiy tizim haqida aniq tasavvur yetishmaydi. 
Ofitsiant qiz qahva olib keldi. Palmer Virjiniyaning o‘z finjoniga sut qo‘shib, shakar solib 
aralashtirganini kuzatib turdi. 
— Men hali eslatib o‘tdim, — davom etdi Palmer, — hozirgi zamon kishisi hayotida pul shunaqa 
ahamiyat kasb etadiki, u havo va ovqat misoli zarur bo‘lib qoladi. Bu siz yaxshi o‘zlashtirib olishingiz 
lozim bo‘lgan sohadir. 
— Pulning qanday ahamiyatga ega ekanligini menga tushuntirib o‘tirishning hojati yo‘q. 
Ishonavering.  
Palmer miss Kleriga o‘qrayib qaradi: 
— Siz, aftidan, yana gapni hazilga olib, mavzuga chap berib ketmoqchiga o‘xshaysiz. 
—  Kechirasiz, bu odat menga onamdan yuqqan. Yo‘q, men chindan ham nima haqida 
gapirayotganingizni tushunishni istayman. 
— Juda soz. — dedi Palmer, qahvadan ichib. — Shunday qilib, jamiyat tashkilotning 
takomillashuviga qarab, pul borgan sari hal qiluvchi omilga aylana boradi... Xullasi kalom, inson pulsiz 
munosib ravishda na yashay oladi, na o‘la oladi. 
— Sizningcha, shunaqa bo‘lishi kerakmi? 
— Ehtimol, yo‘q, — javob berdi Palmer. — Lekin biz faylasuflar emas, bankchilarmiz. Biz eng 
qimmatli mulk —  pulni ta’minlash, asrash, nazorat qilishni tashkil etamiz. 
— Siz eng qimmatli narsa pul deb hisoblaysizmi? 
— Sizningcha, eng qimmatli nima? 
— Sog‘liq-chi? 
— Sog‘liqni pul yordamida saqlaydilar va tiklaydilar. 
— Tushunarli. Aytaylik, hm-m, sevgi, nafrat ham pulga olinadimi? 
— O’zingiz bir o‘ylab ko‘ring. Hozir biz ikkalamiz falsafiy tadqiqotlar bilan shug‘ullanayotganimiz 
yo‘q. Sevgi-muhabbatsiz va nafratsiz ham yashash mumkin. Lekin inson pulsiz yashay olmaydi. 
— Ammo bu hayotning bir sohasi, xolos. 

---

Bankir (roman). Lesli Uoller