Microsoft Word saylanma abdulla oripov ziyouz com doc

www.ziyouz.com kutubxonasi 
49
BAXTLI ODAM 
Tashvishga chulg‘anib qoldi bu yurak, 
Tashvishlar ko‘paydi haddan ziyoda. 
Beshigida yotgan go‘dakdan bo‘lak, 
Tugal baxtli odam yo‘qdir dunyoda. 
1987 
MARD BO’LSANG 
Qadimdan bir gapni uqdirar hayot: 
Mard bo‘lsang, o‘z to‘g‘ri yo‘lingdan qolma. 
O’ladigan bo‘lsang o‘z go‘ringda yot, 
Birovning mozorin egallab olma. 
1987 
TAASSUROT 
Tabiat kimga ko‘p yo oz beribdi, 
Kimgadir xalacho‘p yo soz beribdi, 
Vo ajab, mana bu mashshoq gadoyga 
Tengi yo‘q shohona ovoz beribdi. 
1987 
* * * 
Har gal ayyomlarni aylarman tavob 
Garchand biri moddiy, o‘zgasi sarob 
Sho‘rlik ona zamin birlikka zor-ku 
Unga talpinish ham, demak, zo‘r savob. 
1987 
* * * 
Oqshomdan boshlangay odatda tonglar 
Sukutdan uzilgay gulduros, bonglar 
Boshing egma sira, xoksor banda, 
Erta ruhing topgay oliy ohanglar. 
1987 
* * * 
May asli pokdomon dilga arzirlik, 
Zahmatkash, mehnatkash elga arzirlik 
Bayram-ku, har kuni kelavermaydi. 
Lekin zavqi qolar yilga arzirlik! 
1987 
UMR 

---

Saylanma. Abdulla Oripov 
www.ziyouz.com kutubxonasi 
50
Inson tug‘iladi asli belibos, 
Bir parcha et bo‘lib kelar jahonga, 
Libosu hashamdan bo‘lgay u xalos, 
Ketar chog‘ida ham so‘nggi makonga. 
Lekin o‘rtadagi umr-chi, umr... 
O’chmas tamg‘a bo‘lib qolgay to abad. 
Balki yog‘ar unga rahmat degan nur, 
Balki ko‘mar uni malomat, nafrat. 
1988 
O’G‘LIM ILHOMJONGA 
Umr o‘tayotir, 
Hushyor bo‘l, bolam, 
Endi qaqshayotir otang asabi. 
Malol kelayotir hatto baytlar ham 
Omoch tortayotgan qo‘sh ho‘kiz kabi. 
Tashqarida sekin qoraymoqda kuz, 
Barglarni zil havo kelmoqda bosib 
Tomay-tomay degan tomchiday yulduz 
Mening ruhiyamga g‘oyat munosib. 
Nimani ko‘rdim men yorug‘ dunyoda, 
Nahot shuncha og‘ir tiriklik ishi. 
Dardim yetmaganday, undan ziyoda 
Jajji opalaring cheksiz tashvishi 
Yolg‘izlik, nadomat, og‘riq, xusumat 
Umr yo‘llarimni burjga tiqdilar. 
Taqirda o‘stirgan edim bir daraxt 
Mevamni terdilar, so‘ngra yiqdilar 
Charchoq yengayotir, unutma bolam, 
Ehtiyot boq endi o‘ngu hushimga. 
Orom olsam agar, niyat qil har dam 
Yorug‘ kunlar kirsin mening tushimga. 
1988 
MALAK 
Nechun o‘g‘irlading o‘yu fikrimni, 
Nechun xayolimni aylading sarson. 
Endi men bilmasman borar yerimni, 
Endi tuyg‘ularim qoldi sargardon. 
Seni ko‘rgandayman tushimda faqat, 
Uchib o‘tgandaysan misoli yulduz. 
Samoviy mo‘’jiza, ilohiy tal’at, 
Tengi yo‘q bir malak, qoshlari qunduz. 

---

Saylanma. Abdulla Oripov