Microsoft Word saylanma abdulla oripov ziyouz com doc

IRIM 
(Hazil) 
Kim nimani aylasa armon, 
Qo‘msab kelgan o‘shani azal. 
Ataganlar qizni O’g‘ilxon, 
Bu - o‘g‘ilga ishora, masal. 

---

Saylanma. Abdulla Oripov 
www.ziyouz.com kutubxonasi 
54
Hozir mehr bulog‘i tindi, 
Bu holni ham irimga yo‘ying. 
Qizlaringiz tug‘ilsa endi, 
Nomlarini Mehrixon qo‘ying.
1988 
TOQAT 
Bozordan tutoqib qaytar uyga chol, 
Go‘sht qayda? Yog‘ qani? Va’da so‘zdami? 
Kampiri xo‘rsinib yupatar darhol: 
- O’kinmang, taqchillik faqat bizdami? 
Yonboshlab gazeta varaqlaydi chol, 
To‘polon chiqibdi zavod, Vuzdami. 
Kampiri yupatar surgancha xayol: 
- O’ylamang, janjal ham faqat bizdami? 
Oqshom televizor ko‘rayotib chol 
Birdan sapchib tushar. Esi o‘zdami? 
- Davlatga tosh otdi kimdir bemalol 
Kampiri yupatar: faqat bizdami?! 
Toqatim toq bo‘ldi, deydi endi chol, 
Toqat yurakdami? Toqat ko‘zdami? 
Kampiri yer chizib shivirlar behol: 
Chidang-da, toqat ham faqat bizdami?! 
1988 
GO’ZALLIKNI YO’QLASH 
Yuzlaringda ajin, sochlaringda oq, 
Yelkangdan yuk bo‘lib bosibdi yillar. 
Quralay ko‘zlarda tubsiz bir charchoq, 
Bekor gap, kim desa: yoshdir ko‘ngillar. 
Bir vaqtlar nomingni eshitgan zahot 
Yonardik o‘t ketgan kabi to‘qayga. 
O, hissiz tabiat, shafqatsiz hayot, 
Shunday go‘zallikni bekitding qayga? 
1988 
TASKIN 
Atir hidi bilan borma mozorga, 
Bormagin u tomon kiyinib bashang. 
Alam qilar yotgan har bir xoksorga, 
Ularning xo‘rligi oshadi, bilsang. 

---

Saylanma. Abdulla Oripov 
www.ziyouz.com kutubxonasi 
55
Axir ko‘ngillari ularning yarim, 
Axir, aslo o‘lmas hayot degan o‘y. 
Degil:. Havas qilmang, birodarlarim 
Bir kun yoningizga kelurman, deb qo‘y. 
1988 
BU YO’LLAR 
Bu yo‘llar xayoldek bilmas intiho, 
Shoshilar o‘zining manzilotiga. 
Bu yo‘llar eltadi na Makka, na yo 
Birlashgan Millatlar Tashkilotiga. 
Bu yo‘llar dunyoni tinmay aylanib, 
Intilar sirli bir ko‘ngil qulfiga. 
Axiyri tasmadek qolar boylanib 
Seningdek go‘zalning qora zulfiga. 
1988