Tədqiqatın obyekti və predmeti. Tədqiqatın obyekti Azərbaycan dilində mətndir, predmeti isə Azərbaycan dilində mikro və makromətndə semantik əlaqə tipləridir.
Tədqiqatın məqsəd və vəzifələri. Dissertasiya mövzusu üzrə aparılan elmi tədqiqatın məqsədi Azərbaycan dilində mikro və makromətnin komponentləri arasında semantik əlaqə tiplərinin oxşar xüsusiyyətlərinin müəyyənləşməsi, onların qurulma mexanizmi, informasiya verimi zamanı mikrosistemlə makrosistemin əlaqələnməsi kimi bir sıra mühüm faktorları müəyyənləşdirməkdən ibarətdir. Bu məqsədə nail olmaqdan ötrü aşağıdakı vəzifələri yerinə yetirmək nəzərdə tutulub:
– Dilçilikdə mətn nəzəriyyəsinin formalaşmasının əsas istiqamətlərinə aydınlıq gətirmək;
– Mikromətnin formalaşmasının struktur-semantik təhlilinin nəzəri bazasının əsaslarını konkret faktlarla dərinləşdirmək;
– Makromətnin təşkili prinsiplərinə aydınlıq gətirmək;
– Mikromətnlə makromətnin qarşılıqlı əlaqəsini konkret faktlarla şərh edib nəticələr çıxartmaq;
