Mərhum ağa Bəhcət buyururdu ki, bu duanı çox oxuyun: "Ya Allahu, ya Rəhmanu, ya Rəhim! Ya Muqəllibəl-qulub! Səbbit qəlbi əla dinik". Yəni ey Allah, ey Rəhman, ey Rəhim, ey qəlbləri dəyişən, mənim qəlbimi öz dinin əsasında möhkəmləndir! O, fərzi bir irada cavab da verirdi; ola bilsin kimsə desin ki, "qəlbimi öz dinin əsasında möhkəmləndir" – sözünü nə üçün deyirik? Bizim dinimiz düzgündür, məntiqlidir, möhkəmdir; yəqin bu, aşağı təbəqələr üçündür. O buyururdu ki, insanın qəlbi, imanı və dindarlığı hansı dərəcədə olsa, o dərəcədən enmək geriyə qayıtmaqdır. Bu duanın mənası odur ki, dini həmin yüksək dərəcədə saxla və möhkəmləndir. Əgər belə olsa, o zaman həyat şirin və ölüm rahat olar.
