Xidmətlərin saxlanıla bilməməsi. Xidmətlərin çox vacib fərqli xüsusiyyəti – onların “dərhallığı”dır. Xidmətləri saxlayıb, sonra satmaq mümkün deyil, onları “bir az” sonra müştəriyə göstərmək olmaz. Məsələn, mehmanxanada boş qalan otaqları, satılmamış aviabiletləri daha bərpa etmək mümkün deyil. Əgər xidmətlərə tələb təklifi üstələyirsə, sənayedə olduğu kimi, anbardan məhsul götürərək vəziyyəti dərhal düzəltmək mümkün deyil. Analoji olaraq xidmətin istehsalı (xidmət gücü) ona olan tələbatı üstələyirsə, xidmətlərdən gözlənilən mənfəət (gəlir) itir və (və ya) xidmətlərin qiyməti xeyli aşağı düşür.
Xidmət marketinqində üç məqamı nəzərə almaq lazımdır:
xidmət sahəsində marketinq nisbətən son zamanlar tətbiq olunur, ona görə də siz bu çətin yolda ilkin addımlayanlardansız;
marketinq özü heç nə yaratmır, ona görə də onun səmərəliliyinin ölçülməsi çətin işdir;
xidmət marketinqinin ən mürəkkəb aspekti – satış üçün yaxşı şəraitin yaradılmasıdır.
Əslində, marketinq xidmətinin açar anlayışları – fayda və gəlirdir. Bunları xidmət təşkilatına müraciət edən müştəri almalıdır. Digər açar anlayışlar: məqsədli bazar; xidmətin irəliləməsi və s. ola bilər.
