Yanacağa sərf olunan dövriyyə vəsaitlərinin normativi əsas xammal və materiallar üzrə hesablanma qaydasından istifadə olunmaqla müəyyənləşdirilir. Yanacağın sərfi hesablanarkən istehsal və qeyri-istehsal ehtiyacları üçün yanacağın sərf olunması nəzərə alınmalıdır. İstehsal ehtiyacları üçün yanacağa tələbat istehsal proqramı və məhsul vahidinə məsrəf norması əsasında müəyyən olunur; qeyri-istehsal ehtiyacları üzrə isə yanacağa tələbat yerinə yetirilən işlərin həcminə görə hesablanır.
Taralaradövriyyəvəsaitlərininnormasıonlarınhazırlanmasıvəsaxlanmasıüsullarındanasılıdır. Buna görə də ayrı-ayrı sahələrdə taralara tələbatın hesablanması metodları bir-birindən fərqlənir.
Məhsulların qablaşdırılması üçün iri taralardan istifadə edən müəssisələrdə məsrəf norması xammal və materiallarda olduğu kim hesablanır.
Hazır məhsulun qablaşdırılması üçün istifadə olunan və dəyəri onun (məhsulun) topdansatış qiymətinə daxil edilən və həm də öz istehsalı olan taralar üzrə günlük ehtiyat norması taranın hazırlanmasından məhsulun qablaşdırılmasına qədər onun (taranın) anbarda qaldığı müddətlə müəyyən olunur. Əgər müəssisənin öz istehsalı olan taraların dəyəri hazır məhsulun topdansatış qiymətinə deyil, ümumi və əmtəəlik məhsulun dəyərinə daxil edilirsə, onun üçün normativ hesablanmır, çünki o hazır məhsul normativində nəzərə alınır.
Qaytarılmaq şərti ilə xammal və materallarla birlikdə alınan taralar üzrə dövriyyə vəsaitlərinin normativi taranın dəyərinin ödənilməsi anından taranın qaytarılması ilə məhsul alandan həmin məbləği müəssisəyə geri ödəməsinə qədərki müddətdən asılıdır. Xammal, material, hissə və yarımfabrikatların anbarlarda və sexlərdə saxlanması üçün nəzərdə tutulmuş taraların dəyəri taralar üzrə dövriyyə vəsaitlərinin normativi müəyyən olunarkən nəzərə alınmır, çünki onların bir hissəsi əsas fondlar kimi uçota alınır, bir hissəsi isə azqiymətli və tezköhnələn əşyaların tərkibinə daxil edilir.
