| Miriametrlik (ifrat uzun) və kilometrlik (uzun) dalğa diapazonlarından əvvəllər radioteleqrafda geniş istifadə olunurdu. Bu diapazonlardakı dalğaların əsas yayılma kanalı Yer-ionosfera kanalıdır. Bu dalğalar Yer səthilə çox yaxşı yayılır.
Lakin bu diapazondakı dalğaları yayımlamaq üçün çox güclü və ölçüləri böyük olan antenalar tələb olunur. Miriametrlik və kilometrlik dalğalar həm yerin səthindən, həm də ionosferin aşağı təbəqələrindən (yer səthindən 80–100km hündürlüklərdə yerləşən) kifayət qədər yaxşı əks olunur. İfrat uzun və kilometrlik diapazonlardakı dalğalardan radiorabitədən başqa, yeraltı faydalı qazıntıları axtarmaq və həmçinin yerin quruluşunu geoloji tədqiq etmək üçün yaradılan cihazlarda və s. istifadə olunur. Bu dalğaların radiorabitə cəhətdən əsas çatışmazlığı rabitə kanalının ensiz olmasıdır ki, bu da öz növbəsində mürəkkəb radiosiqnalların ötürülməsinə imkan vermir. Bundan başqa, göstərilən dalğalar yayılarkən enerji itkisi çox olur.
Son vaxtlar miriametrlik dalğalardan yeraltı radiorabitə məqsədi ilə istifadə etmək sahəsində intensiv tədqiqat işləri aparılır. Bu, Yeraltı küylərin səviyyəsinin atmosferdəkindən xeyli az olması ilə əlaqədardır. Yeraltı kanalda küylərin səviyyəsi 10 dB-dir. Atmosfer küyləri isətəxminən 130dB səviyyəsindədir. Bu dalğalar dəniz suyunda az udulduğundan sualtı radiorabitədə də geniş tətbiq olunur.
Dostları ilə paylaş: |
