Belə olduqda onlar soruşdular: «Bəs onda kimsən? Olmaya, İlyassan?»
O: «Xeyr», - dedi.
«Bəlkə, həmin o Peyğəmbərsən?» O, yenə inkar etdi.
Onda onlar dedilər: «Axı sən kimsən? Özün haqqında bir şey de ki, bizi göndərənlərə cavab verə bilək».
O cavab verdi: «Mən Əşiya peyğəmbərin dediyi, çöllükdə: “Yehovanın yolunu hamarlayın!” - deyə car çəkənin səsiyəm».
Gələnlər isə fərisilərdən idilər. Onu yenə sorğu-suala çəkdilər: «Əgər sən nə Məsih, nə İlyas, nə də həmin o Peyğəmbər deyilsənsə, bəs onda nəyə görə vəftiz edirsən?»
Yəhya onlara cavab verib dedi: «Mən suda vəftiz edirəm. Lakin aranızda bir nəfər var, siz onu tanımırsınız. O, məndən sonra gəlir, amma mən onun səndəlinin bağını belə, açmağa layiq deyiləm».
