Qurban bayramı – qədim və ümumxaq bayramlarımızdan biridir. İslam dünyasında müqəddəs hesab edilir və xüsusi təmtəraqla qeyd olunur. Qurbanlıqda kəsilən qurbanın əti kasıblara, əlil və kimsəsizlərə paylanır. Xalq arasında kəsilən qurbana “İsmayıl qurbanı ” deyilir. İslamda qurban bayramı İbrahim peyğəmbərin adı ilə bağlıdır.Qurani-Kərimdən məlum olur ki, o, Allaha olan sədaqətini sübut etmək üçün oğlu İsmayılı qurban vermək istəyir; bu zaman Allah Cəbrayıl vasitəsilə iki qoç göndərərək oğlunun yerinə onları kəsməyi İbrahimə əmr edir [19, s. 72]. Qurban bayramının adı özündə bayramın mahiyyətini əks etdirir. Azərbaycan Milli Məclisin qəbul etdiyi 1992-ci il 27 oktyabr tarixli “Azərbaycan Respublikasının bayramları haqqında” Qanuna əsasən Qurban bayramı ölkədə də dövlət səviyyəsində bayram edilir .
