14.4. Gön ayaqqabılara verilən estetik tələblər Estetik tələblər gön ayaqqabıların keyfiyyətinə qoyulan ən vacib istehlak xassələrindən birisi sayılır. Çünki ayaqqabı insan geyiminin ansamblına daxil olan əsas geyim növlərindən birisi sayılmaqla nəinki bir ayaqqabı kimi öz funksiyasını yerinə yetirməlidir, eyni zamanda, əksəriy-yət hallarda insanın estetik tələblərinin ödənilməsinə də xidmət etməlidir.
Ayaqqabının xarici ölçüləri, cizgiləri, silueti, fasonu, dabanı və burunun forması onun təyinatına uyğun gəlməli, geyilmə rahatlığına cavab verməlidir. Bununla yanaşı, ayaqqabının xarici görünüşü geyimin ümumi ahəngdarlığını pozmamalıdır. Ayaqqabının estetik tələblərinin ödənilməsi və modanın müasirliyi öz növbəsində seçilmiş konstruksiyadan, üz və astarlıq materiallarının növündən və tərtibatından, alt materiallarının nö-vündən, bəzəndirici elementlərinin istifadə səviyyəsindən, dekorativlik işlərin olub-olmamasından, hazırlanması səviyyəsindən, altının üzünə bər-kidilməsində istifadə olunan bərkitmə üsullarının növündən və s. asılıdır.
