MÜASİR MƏTBUATDA FAKT VƏ HADİSƏLƏRİN ANALİZİ Həsən bəy Zərdabi demişdir: “Mətbuat həyatımızın güzgüsüdür”. Onun bu kəlamına əsaslanaraq deyə bilərik ki, hər dövrün öz mətbuat orqanları olmuş və onlar cəmiyyətdə baş verən prosesləri öz səhifələrində əks etdirmişdir. Dövründən asılı olaraq mətbuat orqanları, xüsusilə də qəzetlər müntəzəm və ya fasilələrlə ölkədə və dünyada baş verən prosesləri cəmiyyətə çatdırmışdır. Amma həmin mətbuat orqanları hadisələri yalnız informasiya formasında çatdırmaqla kifayətlənməmiş, həm də onları müxtəlif aspektlərdən şərh və analiz edərək cəmiyyətin həmin hadisələrlə əlaqədar müəyyən mövqe tutmasına, istiqamətlənməsinə kömək etmişdir. Təbii ki, bu işi həyata keçirməkdə jurnalistikanın janrları, o cümlədən operativ-analitik janrlar qrupu böyük rol oynamışdır. Yuxarıda qeyd etdiyimiz kimi xəbər, hesabat, müsahibənin informativ forması vasitəsilə cəmiyyət informasiya ilə təmin edilmişdirsə, analitik janrlar qrupu bu informasiyanın təhlil, analiz və təbliğində öz sözünü demişdir. Hər bir janrın özünəməxsus xüsusiyyətləri olduğundan, bu özünəməxsusluqdan istifadə edən jurnalistlər hadisələrin təhlili zamanı onları müxtəlif aspektlərdən analiz edə bilmişdir.
Bu fəsildə də üç fərqli ictimai-siyasi hadisənin müxtəlif qəzetlərdəki təhlilini araşdıracağıq. Nümunələr əsasında bu ictimai-siyasi hadisələrin necə təhlil olunduğunu, analiz üçün hansı janrlara üstünlük verildiyini görəcəyik.
