Istidən əriyib möhkəm dəmir də
Insanın hökmüylə qəlibə dolar,
Yanmaq elə şeydir, qara kömür də
Ocaqda közərib ağappaq olar!
EHTİRAM
Bu yeri bizlərə babalar seçib,
Belə məmləkəti seçənə alqış.
Torpağı vətənə çevirmək üçün
Vuruşub, canından keçənə alqış!
Ürəyin oduyla yanıb ilk ocaq,
Zəhmətlə salınıb bu bağça, bu bağ.
Çiynində dağlara su daşıyaraq,
Daş üstə ağaclar əkənə alqış!
Bəxtinə düşsə də min dava, savaş,
İmdad diləməyib - gözlərində yaş,
Bir əlində qılınc, bir əlində daş,
Qalalar, saraylar tikənə alqış!
Onların yanında dilimiz gödək,
Nə iş görmüşük ki, toy-bayram edək?!
Zəhmətə qatlaşıb bal arısıtək
Hər güldən bir şirə çəkənə alqış.
Tayı-bərabəri bu yurdun hanı?
Dolaşır dillərdə şöhrəti, şanı,
Bizə miras qoyub belə obanı,
Dünyanı tərk edib, köçənə alqış!
Dostları ilə paylaş: | 
