QAŞUN ARASINDA XALUN
Qaşun arasında xalun,
Nə gözəldi gül camalun,
Bilmirəm nədi xəyalun,
Kafir qızı yandım axı,
Al qana boyadım axı!
Alagözlüm, al bu canım,
Ayrılığa yox tavanım,
Sənə qurban olsun canım.
Nəqərat
Yarım gəlir uzaqdan,
Mənə göz eylir iraqdan,
Əlində gül budaqdan.
BAŞUVA DOLANIM
Başuva dolanım, harda qalmısan?
İntizar gözümü yolda qoymusan.
Belə məlum olur məndən doymusan.
Getdi yar, getdi yar, aldatdı məni,
Yarımın qüssəsi saraltdı məni.
Mən sənə neyləmişəm, ceyran balası,
Ürəyimə vurmusan hicran yarası,
O yarı mən sevirəm, yoxdi çarası.
Nəqərat
Boynuma salmısan zülfündən zəncir,
Mən sənun əsirinəm, gəl, məni dindir,
Şirin-şirin danışıb məni sevindir.
YAR BİZƏ QONAQ GƏLƏCƏK
Şamamalar irəfdədi,
Hər biri bir tərəfdədi,
Görməmişəm bir həftədi,
Yar bizə qonaq gələcək,
Bilmirəm nə vaxt gələcək.
Samavara od salmışam,
İstəkana qənd salmışam,
Yarım gedib tək qalmışam.
Nəqərat
Şamamalar xallı-xallı,
Yar geyinib allı-allı,
Boyu bəstə, üzü xallı.
GÜL OĞLAN
Qızılgül oyum-oyum,
Dərim qoynuma qoyum,
Yağış yağar, yer doymaz.
Mən səndən necə doyum.
Özü bir gül, sözü bir gül,
Saçı sünbül, gül oğlan!
A boz papaq, tirmə çuxa,
Çit arxalıq, gül oğlan,
Atını yan çək, hamıdan göyçək gül oğlan!
Top qara bircək, gül oğlan!
Nəqərat
Bu dağdan aşmaq olmaz,
Narıncı başmaq olmaz,
Bir cüt öpüşdən ötrü,
Yarla savaşmaq olmaz!
Dostları ilə paylaş: |
