Humanitar fənər

Tapşırıq. Sosial şəbəkələrdə ünsiyyət üslubuna təsir göstərən amillərə
diqqət edin. Müxtəlif idarə və təşkilatların sosial şəbəkələrdəki səhifələrini və paylaşımlarını nəzərdən keçirin. Unutmayın ki, işgüzar ünsiyyətin bir neçə növü mövcuddur:

• 
  Mentorçu - öyrədici, nəsihətamiz;
  
• 
  Ruhlandırıcı - insanları ruhən yüksəldən, onlara öz mənəvi qüvvələrinə və şəxsi keyfiyyətlərinə inam aşılayan;
  
• 
  Qarşıdurma yaradan- insanlarda etiraz etmək, razılaşma­maq arzusu doğuran;
  
• 
  İnformasiya verən- izləyicilərə müəyyən məlumatların ve­rilməsinə, onların yaddaşında hansısa biliklərin bərpa edilməsinə yönəldilən.
  

Ünsiyyət üslubuna təsir göstərən amillər:

1. 
   Auditoriyanın(sizin dostluğunuzda olan insanların) tərkibi. Burada onun mədəni-təhsil, milli, yaş, psixoloji və peşəkarlıq keyfiyyətlərini səciyyələndirən hər bir məsə­lənin nəzərə alınması vacibdir. Müxtəlif auditoriyalar yaxşı kommu­nikasiya təsirinin əldə edilməsi üçün xüsusi yanaşma tələb edir.
   
2. 
   Paylaşılan materialının məzmunu və xarakteri. Məsələn, peşə­kar fəaliyyətin aktual məsələlərinin işıqlandırıldığı paylaşımda avtori­tar intonasiya, sərt mülahizələr yolverilməzdir. İnsanlara daha çox inam nümayiş etdirmək, bu prosesində onlarla məsləhətləşmək lazımdır. Bu zaman dostyana şəkildə fikir mübadiləsi, biliklərinizi qarşılıqlı surətdə zənginləşdirmək arzusunun açıq göstərilməsi kommunikativ ünsiyyətin etibarli variantıdır.
   
3. 
   Paylaşım edənin öz şəxsi-işgüzar keyfiyyətlərini, insanlara şərh etmək istədiyi problemlərə peşəkar bələdliyini obyektiv şəkildə qiymətləndirməsi. Elmi-iqtisadi və əməli hazırlığını qiymətləndirərkən nə çox yüksəyə qalxmaq, nə də olduqca aşağı enmək lazımdır. Şəxsi kommunikasiya keyfiyyətlərini tənqidi şəkildə qiymət­ləndirmək lazımdır. Paylaşım edən ünsiyyət texnikası üzərində ciddi düşünməli, ünsiyyət prosesində özünü nəzarətdə saxlamalıdır.