Plevra boşluğu. Ağciyərlər plevra kisələrinin daxilində yerləşir. Plevra seroz kisələrdən olub, visseral və parietal səfhələrə ayrılır. Səfhələrin arasında yarığabənzər boşluq vardır. Bu boşluqda seroz maye olur. Seroz maye plevra səfhələrini sürtünmədən qoruyur, ağciyərləri daima nəm saxlayır. Visseral səfhə ağciyərləri xaricdən örtür. Parietal səfhə isə döş boşluğunun divarını daxildən əhatə edərək, qabırğa, diafraqma və orta divar plevrasına ayrılır. Bunların bir birinə keçən yerlərində qabırğa-diafraqma və qabırğa –orta divar cibləri əmələ gəlir. Qabırğa-diafraqma cibi nisbətən böyük olub, patoloji proses zamanı burada maye toplanır.