Pedaqoji proses. Pedaqoji proses deyərkən təlim, tərbiyə və təhsilin, habelə bunlarla əlaqədar olan inkişafın vəhdəti nəzərdə tutulur.Pedaqoji proses cəmiyyətin yaranması və inkişafı ilə birlikdə yaranmış və inkişaf etmişdir. Cəmiyyətin ehtiyaclarına uyğun olaraq pedaqoji prosesin məzmunu, təşkili formaları, metod və prinsipləri dəyişmiş və təkmilləşdirilmişdir.
Pedaqoji proses - öyrədənlə öyrənən arasında xüsusi olaraq təşkil edilmiş elə bir qarşılıqlı təsir prosesidir ki, bu zaman həyat üçün zəruri olan bilik, bacarıq və təcrübənin mənimsənilməsi nəticəsində insanın inkişafı təmin edilir.
Pedaqoq- pedaqoji fəaliyyətin daşıyıcısı- xüsusi olaraq bu iş üçün hazırlanmış şəxsdir. Pedaqoji prosesin obyekti kimi o, fasiləsiz təhsil, özünütərbiyə, uşaqlarla ünsiyyət nəticəsində təsirlərə məruz qalır, özünü təkmilləşdirməyə səy göstərir. Pedaqoji prosesin subyekti kimi o, xüsusi təhsil alır, gənc nəslin həyata hazırlanmasında məsuliyyət daşıyır.
