MƏMMƏD
(Dostum Məmməd İsmayıla)
Axıb-axıb şəlalətək duruldun,
Söz- söhbətin cəsarətin var, Məmməd.
Məhəbbətlə, sevgi ilə soruldun,
Günəş dolu hərarətin var, Məmməd.
Yada düşüb anılırsan sözünlə,
Haqq-kəlamlı doğrun ilə, düzünlə.
Gərəklisən nur tökülən üzünlə
Adətinlə hər şöhrətin var, Məmməd.
Baş qoşmadın yaltaqlara, axmağa,
Vərdişkarsan şimşək kimi çaxmağa.
Bənzəyirsən əl çatmayan bir dağa,
Təməlindən qeyrətin var, Məmməd.
Bir məktəbsən əməlinlə işinlə,
Qızıl zərsən yekliyinlə, şeşinlə.
Ad qazandın dırnağınla,dişinlə,
Hörmət ilə adətin var, Məmməd.
Səndə gördüm at keçməyən yolları,
Qucaq açdı türk oğlunun qolları.
Məhərrəməm, kənar etdin dolları,
Könül adlı sərvətin var, Məmməd.
Dostları ilə paylaş: | 
