3.Yaş fiziologiyasının da pedaqoji psixologiya ilə əlaqəsini xüsusi olaraq qeyd etmək lazımdır. Yaş fiziologiyası ayrı-ayrı yaş dövrlərində fizioloji proseslərin qanunauyğunluqlarını aşkara çıxarır. Burada anatomik-fizioloji dəyişmələrin psixi inkişafa təsiri, ali sinir fəaliyyətinin tipləri, onların tərbiyə prosesində təzahürü, sinir sisteminin xassələrinin işgüzarlığın tempinə təsiri və s. məsələlər diqqəti cəlb edir.
4.Pedaqogikanın pedaqoji psixologiya ilə əlaqəsini daha aydın hiss etmək mümkündür. Pedaqoji psixologiya bir növ ümumi psixologiya ilə pedaqogikanın sərhəddində dayanan xüsusi sahədir. Təlim-tərbiyə nəzəriyyəsinə bələd olmadan pedaqoji psixologiya öz predmetini həll etməkdə çətinlik çəkərdi. Pedaqoji psixologiya üçün pedaqogika digər elmlər içərisində birinci yer tutu. Çünki həm pedaqogika, həm da pedaqoji psixologiya gənc nəslin təlim və tərbiyəsini müxtəlif istiqamətdən öyrənir.
5.Xüsusi metodikalar da pedaqoji psixologiya ilə sıx əlaqəyə malikdir. Ayrı-ayrı fənlərin təlim və tərbiyə imkanlarını nəzərə almaqla pedaqoji psixologiya həmin fənlərin tədrisinə, onların tədris üsullarının təkmilləşdirilməsinə və səmərəliliyinə əsaslı təsir göstərir.
2. Pedaqoji psixologiyanın tədqiqat metodları Plan: 1. Müşahidə və eksperiment metodu
2. Müsahibə və sosiometrik metodu
3. Fəaliyyət məhsullarının təhlili və tərcümeyi-hal metodu
4. Anket, test və əkizlər metodu
5. Pedaqoji-psixoloji eksperiment, pedaqoji-psixoloji testləşdirmə
6. Tədqiqat metodların qruplaşdırılması
7. Psixoloji məsləhət və korreksiyanın əhəmiyyəti
Ümumi psixologiyada, yaş psixologiyasında və psixologiyanın digər sahələrində istifadə olunan tədqiqat metodlarından pedaqoji psixologiyada da istifadə olunur. Bu metodlara müşahidə, eksperiment, müsahibə, sosiometrik, fəaliyyət məhsullarının təhlili, tərcümeyi-hal, anketlər, testlər, əkizlər metoduvə s. aid etmək olar. Pedaqoji psixologiyada bu metodlardan istifadə edərkən uşaqların yaş xüsusiyyətləri, tərbiyəlilik səviyyələrini aşkara çıxarmaq imkanları nəzərə alınaraq müvafiq dəyişikliklər edilir. Məsələn, uşaqların müxtəlif həyati məsələləri həll edərkən əldə etmiş olduqları bilik və vərdişləri tətbiq edə bilmək bacarığını aşkara çıxarmaq üçün pedaqoji müşahidədən istifadə etmək olar. Daha yaşlı-yeniyetmə və gəncləri öyrənərkən bu məqsədlə yazılı sorğu və testlərdən, məktəbəqədər və kiçik məktəb yaşlı uşaqlarla şifahi sorğudan istifadə etmək mümkündür. Həmin metodların qısa xarakteristikasını nəzərdən keçirək.
