2001-ci il. İran prezidenti Hatəminin Moskvaya rəsmi səfərindən sonra Rusiya İrana silah satışını bərpa etdi.
2002-ci il. Corc Buş İranı terroristlərə yardım etməkdə və atom bombası əldə etmək üçün çalışmaqda suçlayaraq, onu “Şər oxu” ölkələrinin siyahısına daxil etdi.
2003-cü il. Corc Buş İranın nüvə silahı əldə etmək səylərini əsas tutaraq İranın beynəlxalq təcridinə çalışsa da, Fransa, Rusiya, Böyük Britaniya və Almaniya buna qarşı çıxdılar. Lakin Fransa, Almaniya və İngiltərənin xarici işlər nazirləri İran tərəfini Atom Enerjisi üzrə Beynəlxalq Agentliyinin bu ölkədə təftiş aparmasını öngörən sənədi imzalamağın zəruriliyinə inandıra bilirlər və sənəd imzalanır. Fəqət İran Parlamenti onu təsdiq etmir. Bununla belə, Atom Enerjisi üzrə Beynəlxalq Agentliyi ölkədə uranın zənginləşdirilməsi üçün bir neçə sentrofuqanın qurulduğunu təsbit edə bilir.
İranın nüvə proqramından narahat olan İsrail həmin ilin iyulunda ABŞ-dan 500-ü lazerlə yönləndirilən və dərində yerləşən möhkəmləndirilmiş obyektləri məhv etmək üçün nəzərdə tutulan bomba olmaqla, 5 min idarəedilən bombanın alınması barədə 319 milyon dollarlıq müqavilə imzalayır.
