Mühazirə İnformasiya emalının inkişaf tarixi İnformasiya sistemlərinin inkişaf tarixi

İdarəetmə sənətinin nəzəriyyəsi və praktikası

İdarəetmənin texniki vasitələri, informasiyanın emalı və ötürülməsi
Yeni idarəetmə vasitələrinin meydana çıxması ilə rəhbər əməyinin texniki təchizatına baxış bucağı dəyişilmişdir. Yaxın keçmişdə yüksək rütbəli rəisin iş masası xüsusi yazı ləvazimatı və çoxsaylı telefonlarla²¹, iş otağı isə növbəti ölkə rəhbərinin portreti ilə təchiz edilirdi. Sonra nəhəng radioqəbuledici və televizor telefonları və yazı ləvazimatını əvəz etdi. Bundan əlavə, telefon konsentratoru və düyməli hesab maşını (kalkulyator) meydana çıxdı. Portret qaldı. Lakin bu, rəh­bərin deyil, arvad-uşağının portreti idi. Bu portret masanın üzərində qərarlaş­mışdı. Divarda dövlət gerbi, iş masasının yanında küncdə kiçik fərdi kompüter qoyulurdu ki, bundan da rəhbər nadir hallarda istifadə edirdi.

İdarəetmənin texniki vəsaitləri dedikdə, informasiyanın qəbulu və emal edilməsi üçün olan aparatura, zehni əmək texnikası nəzərdə tutulur. Bu texnika nə qədər mükəmməldirsə, rəhbər ondan bir o qədər yaxşı istifadə edir və nəticədə idarəetmə texnologiyası, idarəetmə əməyinin təşkili və idarəetmə prosesinin özü səmərəli olur.

İdarəetmənin texniki vəsaitləri kompleksinin (TVK) tətbiqinin səmərəliliyi çoxsaylı şərtlərdən: əvvəla, kompüter texnikasının və telekom­mu­nikasiya vasitə­lərinin imkanlarından və keyfiyyətindən, ikincisi, proqram təminatının mükəm­məl­liyindən və nəhayət bu texniki və proqram vasitələrinin istifadəçilərinin peşə hazırlığından asılıdır.

Kibernetikanın əldə etdiyi nailiyyətlər hesabına informasiyanı cəld emal edən güclü vasitə - elektron-hesablayıcı maşın meydana gəldi. Əfsanəvi “Ural-1” və bu ailədən olan “Ural-14D”, “Ural-16”, kiçik maşınlar olan “Promin”, “Strela”, “Mir”, “Nairi-2”, “Nairi-K”, 20-ci əsrin möcüzəsi olan və saniyədə 1 milyona yaxın əməliyyat apran “BESM-6”, maqnit barabanlı yaddaşa malik M-20 və M-222 seriyasından olan EHM-lər, EHM-lə operator arasında dialoq aparmağa imkan verən “Minsk-22” və “Minsk-32” və nəhayət, sosialist ölkələri inteqrasiyasının bütün üstünlüklərini özündə cəmləşdirən VS-EHM-lər seriyası barədə xatirələr yaşlı nəslin yaddaşında xoş təəssurat kimi yaşamaqdadır. SSRİ-nin süqutu Rusiyanı bu sahədə yarım əsr geri atdı. Hesablayıcı texnikanın inkişafının 60-70-ci illəri əhatə edən bu birinci dövrü elm və texnika tarixinə T-5M rəqəm və TA-80 hərf-rəqəm tabulyatorlarının yerinə gələn təkcə iriölçülü EHM-lər istehsalı, ixti­sas­laşdırılmış rabitə sistemi, informasiya banklarının yaradılması dövrü kimi deyil, həm də bu texnikanın yaradıcıları ilə istifadəçiləri arasında yaranmış psixoloji baryerin aşılması tarixi kimi daxil olmuşdur. Bu gün ən yüksək səviyyə məmurları ilə bilavasitə hesablayıcı texnika mütəxəssisləri arasında demək olar ki, elə bir ciddi düşüncə fərqi qalmamışdır. Halbuki ilk dövrlərdə hesablayıcı texnikaya münasibət qətiyyən müsbət olmamışdır. Tez-tez eşidilən söz bu idi ki: sizin kalkulyatordan mənim çötkəm daha ucuz və etibarlıdır.

İnformasiyanın emalı üzrə texniki vəsaitlərin inkişafı yalnız müxtəlif güclü EHM-lərin yaradılması istiqamətində getməmişdir. Bu inkişaf həm də elmi-tədqiqat və istehsal məqsədləri üçün nəzərdə tutulan analoq və idarəedici maşınların yaradılması istiqamətində getmişdir. Analoq-hesablayıcı maşınlar (AHM) öyrənilən fiziki və ya texnoloji prosesin eelektrik (elektron) analoqunu yaratmaq ideyasını həyata keçirir. Məsələn, tamamilə konkret xarakteristikalara²² malik olan real mövcud olan qaz boru xəttinin modeli sadə elektrotexniki elementlərdən²³ və ya elektron mikrosxemlərdən yığıla bilər. Analoq-hesablayıcı maşınlar (AHM) daim dəyişən fiziki kəmiyyətlər arasındakı münasibətləri və tədqiq edilən prosesin müvafiq ilkin dəyişənlərinin analoqlarını kifayət qədər dəqiq müəyyən edə bilir. Tədqiq edilən prosesin parametrlərinin ölçülməsinin yüksək dəqiqliyini təmin edə bilməsə də, AHM ənənəvi EHM-ə nəzərən bir sıra üstün­lüklərə malikdir. Belə ki, AHM-lərə xidmət etmək sadədir, dəyəri baha deyil, ən əsası, proqram təminatı mürəkkəb deyil.

İdarəedici-hesablayıcı maşınlar (İHM) xüsusilə mürəkkəb, sürətlə dəyişən və ya insan həyatı üçün təhlükəli olan texnoloji prosesləri nəzarətə götürmək və idarə etmək üçün istifadə edilir.

Elektron-idarəedici maşınlar (EİM) idarəetmə prosesinə daxil olan infor­ma­si­yanı emal edərək nəzarətə götürülmüş obyektin icra orqanlarına idarəedici siqnallar göndərməklə təsir göstərir. SSRİ-də 1964-cü ildən istehsal edilən M sinif EİM-lərin xarici ğlkələrdə analoqu olmadı. Bu maşınlar radiolokasiya stansiyalarının idarə edilməsindən və Yerin süni peyklərinin müşahidə edilməsindən ta “qazan-turbin-generator” kimi güclü enerji bloklarının avtomatlaşdırılmasınadək geniş tətbiq diapazonuna malik idi. 1974-cü ildən 1990-cı ilədək SSRİ-də 60 mindən artıq avtomatlaşdırılmış işçi yerləri (AİY) yaradılmışdı.

Kompüter texnikası. Mikroprosessor texnikasının meydana gəlməsi ilə böyük maşın zalı yaratmaq və nəhəng hava kondisionerləri yaratmaq problemi aradan qalxmışdır. Yüksək etibarlı və çox sürətli mikro-EHM və fərdi kompüterlər hesablayıcı texnikanın tətbiqi sferasını əhəmiyyətli dərəcədə genişləndirdi və informasiya texnologiyası daha səmərəli oldu. Bugün fərdi kompüter ədədi olmayan informasiyanın emalı²⁴ üçün uğurla tətbiq edilir. İndi “hesablayıcı texnika” termini həll edilən məsələlərin xarakterini tam əks etdirmir. Bugün demək olar ki, bütün dünya ölkələri eyni kompüter texnikasından istifadə edir. İndi böyükdən-kiçiyə hamının işlədiyi fərdi kompüter ən güclü EHM-lərdən bütün parametrlər üzrə üstündür. İndiki FK-lar saniyədə milyardlarla əməliyyat icra edir və praktiki olaraq hüdudsuz tutumlu yaddaşa malikdir. Fərdi kompüterlərin yaradılması üzrə inqilabi ideya 1976-cı ildə, iri EHM-lərin müzəffər yürüşü və bunların bazasında nəhəng Hesablama Mərkəzlərinin yaradılması epoxasında meydana çıxdı. S.Cobson və S.Voznyakın rəhbərliyi altında işləyən entuziastlar²⁵ qrupu 10 min dollar maliyyə ilə kiçik qarajda FK-nın ilk nüsxələrini yaratdılar. 2 ildən sonra “Apple” firmasının illik satış həcmi 7 milyon dollara yaxın, 1991-ci ildə isə 6 milyard dollardan artıq idi.

Müasir kompüterlər müxtəlif konfiqurasiyalı standart bloklardan: böyük inteqral sxem bazasında yığılmış mikroprosessordan²⁶, 128 və daha çox meqa­bayt­lıq operativ yaddaşdan və az qala milyon səhifəlik mətn yerləşən vinçesterdən yığılır. P5 Pentiumun mikrosxemi 3-dən artıq, P6 Pentiumun mikrosxemi 5,5 milyon tranzistordan yığılır. Müasir kompüterlər, bundan əlavə, müxtəlif ölçülü ekranları, qoruyucu qatı, 16 milyon müxtəlif rəng çalarları göstərən 2 meqabaytlıq böyük video yaddaşı olan monitorlarla, çoxdilli klaviaturalarla və mışla təmin olunurlar. IBM PC arxitekturalı kompüterlər ümumi kompüterlərin 80%-ni təşkil edir. Kompüter bazarına daxil olan yeni məhsulların istehsalının mənimsənilməsi və istehsalı müddəti əhəmiyyətli dərəcədə ixtisar olmuşdur. Son 15 ildə yeni hesablayıcı texnikanın buraxılışı müddəti 7 dəfə ixtisara düşərək 1 ildən az təşkil edir. Uzun illər əsas proqram təminatı kimi UNİX əməliyyat sisteminin müxtəlif variantlarından, həmçinin Microsoft firmasının hazırladığı MS DOS, 1992-ci ildən isə Windows əməliyyat sistemindən istifadə edilmişdir.

Verilənlər bazası müəssisə fəaliyyətinin ilkin statistik göstəricilərinin yığıl­ması ilə formalaşdırılır. Verilənlər bazası müəssisə fəaliyyətinin dinamik infor­ma­si­ya modeli olduğundan, verilənlərin tərkibi və strukturu daim dəyişdirilir. Kompüter lazımi periferiya texnikası ilə təchiz edildikdə fantastik imkanlar yaranır. Məsələn, kiçik bir idarəetmə pultu (coystik) və ya avtomobil sükanı və pedallarını kompüterə qoşmaqla avtomobil sürməyi öyrənmək olar. Yəni kompüter müxtəlif gerçəkliklərin virtual variantları ilə işləməyə, xarici dil öyrənməyə, diktant yazı yoxlamağa, filmə baxmağa, radio-televiziya verilişlərini izləməyə imkan verir.

Avtomatlaşdırılmış idarəetmə sistemləri (AİS). AİS – insan-maşın sistemi olub, informasiyanın yığılması, saxlanması, emalı və təqdim edilməsi funksiya­la­rını icra edir. Operativ qərar qəbulu insanın öhdəsində qalır. AİS iki əsas hissədən ibarətdir: funksional və təminat hissələri. Funksional hissə obyektin optimal idarə edilməsi üçün yaradılmış məsələlər kompleksi və alt sistemlərdən ibarətdir. AİS-in dekompozisiyası, yəni tərkib hissələrinə (alt sistemlərə) bölünməsi funksional-təşkilati əlamət üzrə, idarəetmə obyektinin mövcud strukturu və xüsusiyyətləri (müəssisənin tipi, istehsalın xarakteri, fəaliyyətdə olan idarəetmə sistemi) nəzərə alınmaqla həyata keçirilir. AİS-in təminat hissəsi informasiya, texniki, proqram, təşkilati və hüquqi təminatlardan təşkil edilir. Bunların içərisində proqram təminatı nisbətən mürəkkəbdır. Çünki bu, texniki vəsaitlər kompleksinin fəaliyyətini təmin edən kompüter proqramlarını və alqoritmik dilləri əhatə edir. AİS-in funksional hissəsinin yaradılmasına ümumi əmək sərfinin 42%-i, təminat hissəsinin yara­dıl­masına isə 58%-i düşür. Bunun 19,5%-i informasiya təminatının, 77,5%-i riyazi və proqram təminatının, 1,5%-i texniki təminatın, 1,5%-i isə digər təminat­ların yara­dıl­masına sərf edilir.

İrimiqyaslı AİS-in yaradılması olduqca böyük əmək sərfi tələb edir ki, bu da yeni idarəetmə texnologiyalarının tətbiqi zamanı əsas əks arqument kimi həmişə ön planda saxlanır. Lakin təcrübə bu texnologiyanın tətbiqinin yüksək səmərəli oldu­ğu­nu sübut etmişdir. AİS idarəetmənin keyfiyyətini və operativliyini artırır, işçiləri ağır bezdirici işlərin icrasından azad edir, planlaşdırma və nəzarətin etibarlılığını və optimallığını artırır və müəssisənin texniki-iqtisadi göstəricilərinə əhəmiyyətli dərəcədə təsir göstərir. AİS tətbiqi mənfəəti 4-20%, məhsul buraxılışı həcmini 2-14%, rentabelliyi 3-6%, fondverimini 1-5%, əmək məhsuldarlığını 3-12%, dövrüyyə vəsaitlərinin dövranının sürətini 2-10% artırmağa, əsas fondları 2-5% azad etməyə, müqavilə öhdəliklərinin yerinə-yetirilməməsinə görə cərimələri 5-10% ixtisar etməyə, idarə işçilərinin əməktutumunu 10-30% azaltmağa imkan verir ki, bunun da nəticəsində idarəedici heyətin yaradıcılıq fəaliyyəti göstərməsi üçün daha çox vaxtı qalır. Aydındır ki, texniki və proqram vasitələrinin təkmilləş­diril­məsi və ucuzlaşdırılması ilə bağlı olaraq hal-hazırda həmin texniki-iqtisadi göstəricilər daha da yüksəlmişdir. 80-ci illərdəki miqyaslarda olmasa da, AİS və Texnoloji proseslərin AİS-i (TP AİS) bugün də tətbiq edilməkdədir. Bütün digər innovasiyalar kimi, AİS yaradılması da böyük iqtisadi, təşkilati və psixoloji xarakterli çətinliklərlə bağlı olmuşdur. İrihəcmli layihə işləri ilə yanaşı, verilənlərin normativ-informasiya bazasının yaradılması məsələlərinin həlli, elektron-hesablayıcı texnikanın seçilməsinin əsaslandırılması və satın alınması, kadrların öyrədilməsi və psixoloji cəhətdən hazırlanması ilə bağlı uzunmüddətli gərgin işlərin aparılması tələb olunurdu. AİS yaradılmasında müəssisə rəhbərinin rolu²⁷ müstəsna əhəmiyyət daşıyırdı. AİS yaradılması prosesi müəssisədəki mütəxəs­sis­ləri yeni informasiya ilə zənginləşdirir, müəssisənin idarəetmə strukturunu diqqətlə götür-qoy etməyi tələb edir və texnoloji və informasiya proseslərinə yeni baxış tərzi formalaşdırırdı. 80-ci illərin başlanğıcında yaradılan AİS-lər o dövrün ən güclü EHM-ləri olan EC-1022, EC-1033 və s. vahid seriya EHM-ləri bazasında yaradılırdı. Müasir AİS-lər isə daha mükəmməl texniki vasitələrə: vahid şəbəkədə birləşdirilmiş və inkişaf etmiş proqram və informasiya təminatlarına malik olan fərdi kompüter­lərə əsaslanır. Bütün bunlar müasir AİS-lərin yüksək səmərəliliyini təmin edir.

80-ci illərdə AİS yaradılarkən əsas çətinlik alqoritmləşdirmə, proqramlaş­dır­ma problem­ləri, verilənlərin informasiya bazasının yaradılması və ya informasiya emalının texniki vasitələrinin tətbiqi ilə deyil, müəsisənin idarə heyətinin AİS-in fəaliyyəti şəraitində işləməyə hazırlanması ilə bağlı idi. Çünki AİS illərlə qərarlaş­mış iş şəraitini kökündən dəyişdirirdi. İntellekt səviyyəsi aşağı olan işçi üçün displey və klaviatura qorxunc bir şey idi. Xüsusilə, əmr verməyə adət etmiş yüksək səviyyə məmurları və onların müavinləri klaviaturanı “makinaçı işi”nin elementi kimi qavrayaraq özlərinə layiq görmürdülər.

AİS-in kompüter texnikası üzərinə keçirilməsi yeni tip rəhbər formalaşdır­mış­dır. Bu rəhbər artıq öz tabeçiliyində olan işçidən asılı vəziyyətdən çıxmış, aşağıdan aldadılmaq qorxusundan azad olmuş, geniş informasiya mühitinə düşmüş, texno­loji proseslər barədəki biliyindəki qeyri-müəyyənlikləri ləğv edə bilmişdir. Müasir rəhbər kompüterlə telefonla işləyən kimi işləyə bilir. Bu o deməkdir ki, indi “insan-maşın” sistemi olan AİS-də bu iki komponent bir-birini daha yaxşı anlayır. Halbuki istifadəçinin kompüterə əlçatanlığı uzun müddət müşgül məsələ olmuşdur. Belə ki, ilk zamanlar EHM-lə ünsiyyət qurmaq üçün vasitəçi-proqramçı xidmətin­dən istifadə etmək lazım gəlirdi. İstifadəçi proqramçıdan tam asılı vəziyyətdə idi. Proqramçılar bu imkandan məharətlə istifadə edərək istədikləri hər şeyə nail ola bilirdilər. 80-ci illərin başlanğıcında istifadəçilərə alqoritmik dilləri öyrətmək məqsədəuyğun hesab edirdilər. Lakin hər il maşın dillərinin yeni versiyaları meydana çıxırdı, yeni, daha mükəmməl dillər yaradılırdı. Buna görə də bu üsul özünü doğrultmurdu. Nəhayət, prinsipcə yeni ideya – intellektual istifadəçi interfeysi yaratmaq ideyası ortaya atıldı ki, bu da istifadəçini kompüterə deyil, kompüteri istifadəçiyə uyğunlaşdırmağı nəzərdə tuturdu. Beləliklə, kompüterdə işləmək işçinin adət etdiyi iş qaydalarına maksimum yaxınlaşdırılaraq kompüteri işçinin dostuna, həmsöhbətinə çevirdi. İstifadəçi ilə kompüter arasındakı mövcud psixoloji uçurum aradan qaldırıldı. Yaponiyadan gələn sensasiyalı xəbər – saniyədə 32 trillion əməliyyat aparan, prinsipcə hüdudsuz yaddaşa malik olan yeni kompüterin yaradılması xəbəri artıq çətin formalaşdırılan evristik bilik sahələrinə aid məsələlərin də maşın həllinə imkan verəcəyinə ümid yaradır.

Müxtəlif mürəkkəblik dərəcəsi ilə xarakterizə olunan AİS-lərin yaradılması ilə yanaşı, süni intellekt yaradılması sahəsində də məhsuldar iş aparılır. Bu isə daha yüksək səviyyədə kompleks avtomatlaşdrmaya keçidə imkan verəcəkdir. Avto­ma­tika və telemexanika sistemlərinin etibarlılığının prinsipial surətdə artırıl­ma­sı, mühafizə və bloklaşdırma metodlarının tətbiqi ilə bağlı olaraq avtomatlaşdırılmış idarəetmə sisteminin ən etibarsız elementi olan insanı idarəetmə konturundan çıxarmağa və avtomatlaşdırılmış idarəetmədən avtomatik idarəetməyə keçməyi reallaşdıracaqdır. Bu prosesin vacibliyi onunla bağlıdır ki, Çernobıl AES-i də daxil olmaqla iri qəzaların 95%-i xidmətedici personalın günahı üzündən baş verir.

AİS-in yeni kompüter texnikası üzərinə keçirilməsi informasiyanın emalı müddətini ixtisar eetməyə, güclü verilənlər bazaları və VBS-lər yaratmağa imkan vermişdir²⁸.

AİS aşağıdakı əsas alt sistemlərdə birləşdirilmiş informasiya və normativ bağlılığı olan istehsalat məsələləri kompleksini həll etməyə imkan verir:

-İstehsalın texniki hazırlığı;

-Texniki-iqtisadi planlaşdırma;

-Əsas və köməkçi istehsalın operativ idarə edilməsi;

-Mühasibat uçotu;

-Maliyyənin, satışın və hazır məhsulun reallaşdırılmasının idarə edilməsi;

-Maddi-texniki təminat, həmçinin çoxsaylı avtonom (əlahiddə) məsələlərin²⁹ həlli.

Texniki vasitələr kompleksi və əlahiddə və ya vahid normativ-informasiya bazası əsasında həll edilən yüzlərlə məsələnin təqdim edilən qısa siyahısı göstərir ki, idarəetmə məsələlərinin həllinə, o cümlədən, müəssisələrin rəhbərləri və mütə­xəs­sisləri, həmçinin digər icraçıların əməyinin təkmilləşdirilməsinə yönəldilmiş güclü texniki və proqram vasitələri yaradılmışdır.

Kosmik proqramlardan başlamış, kiçik müəssisələrin idarə edilməsinədək olduqca geniş spektrdə fərdi kompüer və AİS-in uğurlu tətbiqinə dair çoxlu misal­lar gətirmək olar. Sevindirici hal kimi, göstərmək lazımdır ki, avtomatlaşdı­rılmış idarəetmə metodları artıq qeyri-dövlət (özəl) topdan və pərakəndə ticarət kimi yeni fəaliyyət sferalarında da tətbiq edilməyə başlamışdır.

İdarəetmənin avtomatlaşdırılması ideyasının sonrakı inkişafı “Ümumdünya hörümçək toru”nun – İnternet şəbəkəsinin və “virtual müəssisə”lərin yaradılmasına gətirib çıxardı.

“Virtual müəssisə” konsepsiyası müasir “biznes-inqilabı”nın tələb­lə­rini, küt­lə­vi istehsal iqtisadiyyatından fərdi xidmətlər iqtisadiy­yatına, istehsalçı diktəsindən “həmişə haqlı olan” müştəri tələbinin ödənilməsinə keçidi əks etdirir. Süni surətdə yaradılan, mövcud resursların birgə istifadə edilməsi hesabına genişləndirilən virtual müəssisə yeni informasiya və kommunikasiya texnologiyalarının kompüter­ləşdirilmiş inteqrasiya edilmiş təşkili imkanı ilə mümkün olmuşdur. “Toyota” adlı Yapon avtomobil firmasının sifariş alındıqdan cəmi 72 saat sonra ixtiyari mühərrik gücünə, müəyyən sürətlər qutusuna, müştərinin seçdiyi kuzov (gövdə) və salon yaraşığına malik olan avtomobili müştəriyə təklif etməsi virtual məhsula misal göstərilə bilər. Virtual müəssisə kompüter şəbəkəsi ilə birləşdirilmiş texnoloji resurslara malik olan birgə müəssisələr şəbəkəsi kimi fəaliyyət göstərir. Nəticədə müştərinin sifariş etdiyi məhsul ən qısa müddətdə bazara çıxarılır. 1997-ci ildə 100 mindən artıq virtual müəssisə yaradılmışdı və 3 milyondan artıq adam çevik işçi vaxt rejimində işləmək imkanı qazanmışdı. Bu isə o demək idi ki, həmin işçilərin hər biri öz vəzifəsini daha münasib vaxtda icra etmək baxımından işə çıxa bilirdi. Belə ki, mühasiblər və proqramçılar evdə işləyə bilirdilər. Ticarət agentləri bilavasitə müştərilərlə işləyirdilər. Təchizatçılar malgöndərənlərin iş yerlərində məşğul olurdular. Bütün bu işçilər ofislə telefonla və ya elektron poçtla əlaqə saxlayırdılar. Bu isə ofissiz müəssisə demək idi.

İnternet. Fərdi kompüter televizor, soyuducu və mikrodalğalı soba kimi gündəlik həytımıza elə daxil olub ki, hətta böyük rəislər də kompüter oyunlarını oynamağı öyrənmişlər və “fayl”, “prosessor” və “printer” kimi sözləri əzbərləmiş­lər. Böyük EHM-lər fərdi kompüterlər tərəfindən günbəgün sıxışdırılıb sıradan çıxarılır. İndi böyük EHM-lər yalnız fayl serverləri kimi istifadə edilir.

Fərdi kompüterlərin müəssisənin fəaliyyətinə geniş tətbiqi vahid informasiya bankından birgə istifadə edilməsinin səmərəli üsullarının axtarılıb tapılması problemi ilə qarşılaşdı ki, bunun da həlli kompüter şəbəkələrinin yaradılması ilə nəticələndi.

Pentaqon üçün kompüter şəbəkəsi yaradılması üzrə işlər 1969-cu ildə ABŞ-da başlandı. Bu şəbəkənin əsas vəzifəsi düşmənin nüvə zərbəsi zamanı kommuni­ka­siya əlaqələrinin qorunmasından və elmi-tədqiqat təşkilatlarınnın əməkdaşlığının təmin edilməsindən ibarət idi. Sonra, 80-ci illərin başlanğıcında, “Korvus” adlı amerika şirkəti məktəblərin təhsil sistemində “Apple” kompüterləri üçün hesab­layıcı şəbəkə yaratmağa başladı. Rusiyada bu iş 1993-cü ildə, Azərbaycanda isə 2000-ci ilin astanasında reallaşdırılmağa başladı.

İlk kompüter şəbəkələri 5-10 meqabayt tutumu olan sərt maqnit diskləri (vinçesterlər) əsasında qurulmuşdu. Müasir lokal hesablayıcı şəbəkələr 100-lərlə meqabayt və hətta milyardlarla bayt (qiqabayt) tutumu olan yığıcılar bazasında yaradılır. Lokal şəbəkələr yaradılanadək kompüterlər arasında informasiya müba­diləsi disketlər vasitəsilə həyata keçirilirdi. Eyni faylla bir-neçə istifadəçinin eyni zamanda işləməsi mümkün deyildi.

Bir-neçə kompüterin hesablayıcı şəbəkədə birləşdirilməsi bir sıra kmpüter aparaturasının satın alınmasına ehtiyacı aradan qaldırır ki, bu da əlavə xərclərdən qaçmağa, əmək məhsuldarlığını artırmağa imkan verir. Lokal şəbəkə kollektivin işini əlaqələndirməyə, tele-iclaslar çağırmağa, elektron poçt işini həyata keçirməyə imkan verir.

Nəhayət, Ümumdünya hörümçək toru (WWW – World Wide Web) son illərdə son dərəcə populyarlaşmışdır. Beynəlxalq kompüter şəbəkəsi demək olan İnternet (International Network) görünməmiş imkanlar yaratmışdır. Kompüter modemin və ya xüsusi ISDN platasının köməyi ilə İnternet şəbəkəsinə qoşularaq elektron poçt (e-mail) üsulu ilə dünyanın ixtiyari nöqtəsindəki adresata ani ötürmə edə bilir. Ümumiyyətlə, İnternetin yaratdığı imkanları saymaqla bitən deyildir. İnternetdə FAQ³⁰, ASAR³¹ kimi şərti müxtəsər sözlərdən və hətta boynunu bükən insana oxşar emosiyanı ifadə edən simvollardan³² və s istifadə edilir. Elektron poçt ixtiyari məsafəyə və eyni zamanda bir-neçə adresata ani xəbər ötürə bilir. Mətnlə yanaşı, qrafik materiallar, audio fayllar və ya proqramlar da elektron poçtla ötürülür.

1997-ci ildə daha bir sensasiyalı xəbər yayıldı: İnformasiyanı elektrik şəbəkəsi ilə də ötürmək mümkündür!

Böyük Britaniya alimlərinin fikrincə, bu layihənin reallaşdırılması telefon kabellərini və televiziya antennalarını əvəz edəcəkdir. Bu halda informasiya siqnalları birbaşa elektrik rozetkasından qəbuledici qurğuya daxil olacaqdır.

1997-ci ilin sonuna Rusiyada cəmi 50 min İnternet istifadəçisi var idi. Halbuki ABŞ-da bu göstərici 20 milyonu xeyli ötmüşdü. Yəni ABŞ əhalisinin hər 10 nəfərindən biri İnternet istifadəçisi idi. İnternetə çıxan ilk Rusiya bankı 1995-ci ildə «Российский кредит» oldu. 1996-cı ildə Most-bank da İnternetə çıxdı. İnternetdə dövr edən pul vəsaitləri 1996-cı ildəki 9,5 milyard dollardan 2000-ci ildəki 196 milyard dollara yüksəlmişdi.

Kompüter sistemlərinin element bazasının inkişafı və daim təkmilləşdirilməsi templəri təsəvvürə sığmır. Mikroprosessorların məhsuldarlığının əhəmiyyətli dərə­cədə artması prinsipcə yeni texnologiyaların və silisium kristalında tranzistorların daha sıx yerləşdirilməsi hesabına əldə edilmişdir. Intel firmasının əsasını qoyanlar­dan biri olan Qordon Mur demişdir: “Əgər avtomobilqayırma yarımkeçiricilər sənayesinin təkamül sürəti ilə inkişaf etsəydi, indi “Rols-Roys” 1 bak benzinlə 500 min mil yol qət edərdi və onun atılması saxlanmasından ucuz başa gələrdi”.

Təşkilat texnikası. Bugün təşkilat texnikası bazarı dövlət xidməti təşkilat­ları­nı, sənaye müəssisələrini və kommersiya firmalarını güclü mətn və qrafik infor­ma­siya emalı və idarəetmə texnikası ilə təmin etməyi təklif edir. Ayrıca və ya şəbə­kə­də işləyən fərdi kompüterlərlə yanaşı, mikro-EHM-ə quraşdırılmış surətçıxarma durğuları, elektron yazı makinaları və kompozerlər³³, müxtəlif tip və müxtəlif təyi­natlı rabitə qurğuları, EHM yaddaşında saxlanan informasiyanı yüksək keyfiyyətli fotoformalara və ya ofset çap formasına dəyişdirməyə imkan verən fotoyığıcı texnika, mikrofilmləşdirmə aparaturası, diktə edilmiş mətni qısa müddətdə çap və ya xarici dilə tərcümə edə bilən diktofon texnikası və inzibatçılığa kömək üçün nəzərdə tutulan bir-çox başqa qurğular vardır. Hətta adi telefonun da funksional imkanları genişləndirilmişdir. Belə ki, uzaqdan idarə edilən, avtocavabverəni³⁴ olan, yığılmış nömrəni avtomatik surətdə təkrar yığan, kifayət qədər uzaq məsafə­dən işləyə bilən radiotelefonların geniş nomenklaturası təklif edilir. Yaponiyada kargüzarlıq işlərinin geniş avtomatlaşdırılması dəftərxana işlərinin səmərəliliyini bir-neçə dəfə artırmağa imkan vermişdir. Yaponiyada firmaların 100%-i fərdi kom­pü­terlərlə, 83%-i surətçıxaran maşınlarla, 98%-i faksimil aparatları ilə, 89%-i mətn edmalı prosessorları ilə təchiz edilmişdir. Peşəkar hazırlığı olan rəhbər özünün gündəlik işində idarəetmə texnikasının güclü və geniş arsenalının bütün imkanlarından istifadə etməyi bacarmaya borcludur.
İnformasiya emalının instrumental vasitələrinin inkişafı
Mübaliğəsiz demək olar ki, XIX əsrin son qərinəsi ilə XX əsrin sonu arasın­dakı müddər çoxsaylı irili-xırdalı inqilabların “beşiyi” olmuşdur. Belə ki, XIX əsrin sonu, XX əsrin əvvəlində sənaye inqilabı baş vermiş, Birinci Dünya müharibəsi sosial inqilablar dalğası yaratmış, Dünya təlatümə gəlmişdir. İkinci Dünya müharibəsi və sonrakı illər iqtisadiyyatın inkişafı, nüvə və mikromolekulyar fizika, bərk cisim elektronikası sahələrində aparılan tədqiqatlar, ilk hesablayıcı sənaye qurğularının yaradılması sənaye inqilabı yaratdı ki, bu da XX əsrin son rübündə informasiya texnologiyalarının güclü inkişafı üçün münbit zəmin yaratdı. Yəni, 1900-1920-ci illərdə sənaye inqilabı, 1920-1940-cı illərdə sosial inqilablar, 1940-1975-ci illərdə sənaye qurumları inqilabı, 1975-2000-ci illərdə informasiya inqilabı baş vermişdir.

Ötən əsrin sonunu bürüyən keyfiyyət dəyişiklikləri çoxəsrlik tarixə malik idi.

Hesablayıcı texnika müasir inkişaf səviyyəsinə birdən-birə çatmamışdır. Bu günədək 4 nəsil və bunadək uzun tarixi müddət keçmişdir.

EHM-ə qədərki tarixi dövr. Ən qədim hesab aləti təbiətin insana bəxş etdiyi əl barmaqlarıdır. Ədəd və fiqur anlayışları gerçək dünyadan götürülmüşdür. 10 barmaqla saymaq ilk hesab əməli olmuşdur. Əlbəttə, bunu yaradıcılığın məhsulu hesab etmək düzgün olmazdı. Bir-çox dillərdəki say adları göstərir ki, ibtidai insanın saymaq aləti əsasən onun əl barmaqları olmuşdur. Təsadfi deyil ki, qədim ruslar təklik rəqəmi “перст” (barmaq), onluq ədədi “состав” (tərkib), bütün qalan sayları “сочинение” (qurama) adlandırmışlar. Bir-çox xalqlar əl mənasını “beş” sözünə yükləmişlər. Məsələn, malaylar “lima”dedikdə, həm əl, həm də “beş” nəzərdə tuturlar. Barmaqlar əsasında 5-lik,10-luq və 20-lik say sistemləri yaradıl­mış­dır. Bir sıra xalqlar hələ də barmaq hesabı saylardan istifadə edirlər. Barmaq hesabı Romada da geniş yayılmışdı.

Barmaq hesabı ilə yanaşı, ən qədim dövrlərdən ilk hesablama alətləri də yaranmağa başlamışdı. Buna misal, naxışlı (oymalı) çubuqlar³⁵ və düyünlü qaytanlar (iplər) göstərilə bilər. Lakin bu üsullar və vasitələr ticarətin inkişafı ilə bağlı hesablamalara artan tələbatı ödəmək iqtidarında deyildi. Yazılı hesablamanın inkişafına 2 cəhət mane olurdu. Əvvəla, yazı üçün işlədilən gil və mum lövhələr bu işə yaramırdı. İkincisi də, o dövrdə istifadə edilən say sistemləri ilə hesab əməlləri aparmaq çətin idi. Odur ki, “abak” deyilən ilk hesab aləti yaradıldı. Bu, bizim eradan əvvəl 500-cü ilə təsadüf edirdi. Abak müasir çötkənin ulu əcdadı hesab olunur. Bu barədə yuxarıda ətraflı məlumat verilmişdir.

EHM nəsilləri.

1943-cü il. Amerikalı Qovard Aykenin rəhbərliyi və IBM firmasının sifarişi və dəstəyi ilə Mark-1 adlı ilk proqramla idarə edilən kompüter yaradıldı. Bu, elektromexaniki relelər üzərində qurulmuşdu. Verilənlərin emalı proqramları perfolentdən daxil edilirdi.

1945-ci il. Amerikalı Con fon Neyman “Eniak maşını barədə ilkin məruzə” adlı hesabatda müasir proqramla idarə edilən kompüterin iş prinsiplərini və komponentlərini elan etdi. Bu komponentlər aşağıdakıla idi:

-hesab-məntiq qurğusu;

-idarəetmə qurğusu;

-yaddaş;

-informasiyanın daxil edilməsi və çıxarılması qurğusu.

Bu günədək istehsal edilən kompüterlərin böyük əksəriyyəti fon Neyman arxitekrturası ilə buraxılır.

1946-cı il. Amerikalı Con Presper Ekert və Con Uilyam Moçli Mark-1 maşı­nın­dan 1000 dəfə sürətli olan “Eniak”³⁶ adlı ilk güclü elektron-rəqəm kompüterini yaratdılar.

1956-cı il. Yüksək səviyyəli ilk alqoritmik dil olan FORTRAN yaradıldı. Bu dil, əslində, 1954-cü ildən 1957-ci ilədək Con Bekusun rəhbərliyi altında IBM korporasiyasında proqramçılar qrupu tərəfindən yaradılmışdı³⁷. FORTRAN adı FORmula TRANslator sözlərindən yaradılmış və düsturların tərcüməçisi deməkdir. Bu dil bu gün də elmi və mühəndis hesablamalarının aparılmasında geniş istifadə edilir.

1958-ci il. Amerikalı Cek Kilbi ilk inteqral sxem qurdu.

1960-cı il. ALQOL-60 alqoritmik dili yaradıldı.

1963-cü il. Dartmut kollecinin professorları Tomas Kurt və Con Kemeni BASİC³⁸ adlı alqoritmik dil işləyib hazırladılar. Bu dil proqramlaşdırmanı öyrət­mək üçün nəzərdə tutulmuşdu.

1964-cü il. Aprelin 7-də IBM firması System-360 kompüterləri ailəsinin yaradılması barədə elan verdi. Bu, kompüterlərin unifikasiyası, birgəliyi və stan­dart­laşdırılması yolunda ən mühüm addım idi. Həmin ildə nəşr edilən elmi məqalələrdə ilk dəfə “fərdi kompüter” termini işlədilmişdi.

1970-ci il. İsveçrəli Niklaus Virt Paskal adlı proqramlaşdırma dili işləyib hazırladı ki, bu da sonra proqramlaşdırmanın öyrədilməsində geniş tətbiq edildi.

1971-ci il. Intel firmasının mühəndisi Ted Xoffun rəhbərliyi altında 4 mərtəbəli (4004) ilk mikroprosessor yaradıldı ki, buna da “bir kristalda yaradılmış kompüter” deyirdilər. Bu mikroprosessor 2250 tranzistordan yığılmışdı və univer­sal kompüterin mərkəzi prosessorunun bütün funksiyalarını icra edə bilirdi.

1974-cü il. İntel 8080 prosessoru bazasında yaradılmış “Altair” adlı ilk mik­rokompüter bazara çıxarıldı. Hər bir alıcıya maşın təklif edən Albukerk şəhərindən olan kiçik MİTS şirkəti İBM və DEC firmalarının şahlıq etdiyi bazarın sakit həyatını pozdu.

1975-ci il. Pol Allen və Bill Qets adlı iki tələbə Altair adlı fərdi kompüter üçün Basic dilinin interpretatorunu hazırladılar. Bu gün fərdi kompüterlərin proqram təminatı üzrə nəhəng istehsalçıya çevrilmiş məşhur Microsoft şirkətinin təməlini həmin tələbələr qoymuşlar. Həmin dövrdə MOP-technoloqy 6502 adlı mikroprosessor yaradıldı ki, bu da 4300 tranzistordan yığılmışdı və o dövrün fərdi kompüterlərində geniş istifadə edilirdi. IBM firması ilk lazer printerlərdən biri olan IBM 3800 adlı printeri bazara çıxardı.

1977-ci il. Bu ildə 6502 prosessoru bazasında Apple-2 (Apple komputer), 8088 prosessoru bazasında PET (Commodore) və Z80 prosessoru bazasında TRS-80 (Tendy Corporation) adlı üç fərdi kompüter kütləvi istehsala buraxıldı.

1983-cü il. Apple Computer firması Apple Lisa adlı “mış”-la idarə edilən ilk fərdi kompüter qurdu. Həmin ildə çevik disklərin (disketlərin) kütləvi istifadə edilməsinə başlandı.

1985-ci il. Microsoft firması Windows 1.01 qrafik interfeysi əsasında fərdi kompüter üçün çoxməsələli əməliyyat mühiti yaratmağa ilk cəhd etdi.

1988-ci il. Apple firmasının banisi Stiv Cobs özünün Next Computer adlı yeni firmasında Next adlı kompüter və Next Step adlı əməliyyat sistemi yaradılmasına nail oldu. Philips firması CD-I (CD-Interactive) kompakt-disk üçün yazı standartı işləyib hazırladı.

1989-cu il. Tim Berners-Li³⁹ “bəşəri biliyin birləşdirilməsi” məqsədi ilə “Ümumdünya hörümçək toru” (World Wide Web - WWW) adlandırdığı pay­lan­mış informasiya sistemi konsepsiyasını təklif etdi. Bunun yaradılması üçün iki mövcud texnologiyanı – verilənlərin ötürülməsi üçün IP-protokollar texnologiyası ilə hiper-mətn texnologiyasını (Hypertext Technology) birləşdirdi.

1991-ci il. Hiper-mətnə baxış üçün əmr sətri rejimində işləyən ilk kompüter proqramı – brauzer ((Browser) yaradıldı. Bunun tətbiqi 1992-ci ildə son yekunda bütün planeti əhatə edən “tikişsiz informasiya mühiti” (Seamless Informational Area) yaradılmasına yönəldilmiş layihənin uğurla icrasına imkan verdi.

1993-cü il. Intel firması Pentium mikroprosessorunu təqdim etdi. Siemens firması özünün “Synapse1” adlı neyrokompüterini təqdim etdi ki, bunun da gücü 8000 işçi stansiyanın gücünə ekvivalentdir. Bu kompüter süni neyronlar şəbəkəsindən aldığı informasiyanın paralel emalını həyata keçirir. Sözü gedən neyrokompüter şəklin və niqtin tanınması üzrə həll edilən məsələlər üçün ideal qurğudur.

1995-ci il. Fərdi kmpüterlərin proqram təminatı sahəsində dünyəvi hadisə baş verdi: Windows-95 adlı çoxməsələli universal əməliyyat sistemi yaradıldı. 1995-ci ilin sentyabrında buraxılmış Windows-95 əməliyyat sistemi IBM PC kompüterləri üçün ilk qrafik interfeysli əməliyyat sistemi oldu. Sonra bu inkişaf etdirilərək Windows-98-ə, daha sonra isə növbəti versiyalara çevrildi. Aparat-proqram təminatı istehsalçıları qovşaq və qurğuları elə düzəldirlər ki, Windows əməliyyat sistemi ilə uyuşan olur. Yəni indiki kompüterlərə istənilən qurğunu qoşmaq heç bir problem yaratmır. Microsoft firması özüsazlanan qurğular üzrə yeni standart⁴⁰ daxil etdi.

1996-cı il. Hər bir sonrakı EHM nəslinə aid olan maşınlar əvvəlkilərdən daha cəld, daha etibarlı, daha ucuz və daha kiçik qabaritli olmaqla, daha mükəmməl giriş-çıxış qurğularına malik idi. Kompüter insanın informasion funksiyalarının texniki modeli kimi qəbul edildiyindən, giriş qurğuları görmə, eşitmə və taktil-toxunma kimi təbii dərketmə kanallarına yaxınlaşdırılmaq istiqamətində inkişaf etdirilir. Buna görə də kompüterdə iş günü-gündən daha münasib şəkil alır.

XX əsrin son rübündə sənaye EHM-ləri, sonra isə fərdi kompüterlər çoxfunksiyalı idarəedici sistemlərin və informasiya sistemlərinin yaradılmasının aparat-hesablayıcı təməlini təşkil etdi.

Aşağıdakı cədvəldə elektron-hesablayıcı qurğuların müxtəlif nəsillərinin parametrləri verilmişdir:

EHM nəsli	Element bazası	İşləmə sürəti	Proqram təminatı	Tətbiqi	Nümunələr
I (1946-1959)	Elektron lampaları	10-20 min əməl/san	Maşın dilləri	Hesablama məsələləri	ENIAK (ABŞ), MESM (SSRİ), URAL (SSRİ)
II (1960-1969)	Yarım­ke­çi­ri­cilər	100-500 min əməl/san	Alqoritmik dillər, dispetçer sistemləri, paket rejimi	Mühəndis, elmi, iqtisadi məsələlər	IBM 701 (ABŞ), BESM-6, BESM-4, Minsk-22 (SSRİ)
III (1970-1979)	İnteqral sxemlər	1 milyon əməl/san	Əməliyyat sistemləri, vaxt bölgüsü rejimi	AİS, LİAS, elmi-texniki məsələlər	IBM 360 (ABŞ), ES-1030,1060 (SSRİ)
IV (1980 və sonra)	Super BİS, mikrosxemlər	Yüzlərlə mln. əməl/san	VB və VBS-lər	İdarəetmə, kommunikasiya,AİY, mətn emalı, qrafika	Fərdi kompüterlər, serverlər

Superkompüterlər və klasterlər

“Superkompüter” sözü, adətən, elmi-fantastik filmlərdə “elektron beyin” adlan­dırılan nəhəng otaqlarda yerləşdirilən mürəkkəb hesablayıcı qurğu təsəvvürdə canlanır. Çünki ilk superkompüterlər həqiqətən çox iriölçülü idi. Mikroelektronika və nanotexnologiya sahələrindəki uğurlar superkompüterləri orta ölçülü biq otağa yerləşən bir-neçə “şkafa” çevirdi. Müasir superkompüter 1 saniyədə bir-neçə mil­yard sürüşən vergüllü əməliyyat icra edə bilir. Superkompüter çoxprosessorlu və (və ya) ümumi yaddaşlı və ümumi xarıcı qurğulara malik çoxmaşınlı kompleksdir. Superkompüter termini XX əsrin 60-cı illərinin sonlarında Livermor laborato­riya­sının əməkdaşları D.Mişel və S.Fernbaç tərəfindən işlədilsə də, 1920-ci ildə Nyu York qəzetlərindən birində “superhesablamalar” barədə məlumat dərc edilmişdi. “Superkompüter” termini ümumi leksikona Seymur Krey tərəfindən daxil edildi. Krey tərəfindən işlənib hazırlanmış hesablayıcı maşınlar ABŞ-da 60-cı illərin ortalarından 1996-cı ilədək hökumət idarələrində, sənaye müəssisələrində və elmi idarələrdə əsas hesablayıcı vasitə kimi geniş istifadə edilirdi. Bu gün də Krey kompüterləri superkompüter texnikası içərisində özünə layiqli yer tutur. 70-ci illər­dəki superkompüterlərin əksəriyyəi vektor prosessorları ilə təchiz edilmişdi. 80-ci illərin başlanğıcı və ortalarında paralel işləyən azsaylı (4-dən 16-ya qədər) vektor prosessorları praktiki olaraq superkompüter üçün standart layihə həllinə çevrildi. Tipik vektor kompüterinin tərkibinə tamədədli hesablayıcı olan skalyar prosessor, sürüşən vergüllü ədədlərin toplanması və vurulması üzrə funksional bloklar, vektor prosessoru və ümumi yaddaş daxildir. Bu kompüterlər “bölünən⁴¹ yaddaş – bir idarəetmə axını – çoxsaylı verilənlər axılanları”⁴² texnologiyası ilə qurulmuşdur. 1980-ci illərin sonu və 1990-cı illərin əvvəli superkompüterlərin verilənlərin vek­tor-konveyer emalına əsaslanan magistral istiqamətli inkişafının paralel birləş­diril­miş çoxsaylı və olduqca çoxsaylı skalyar prosessorlarla əvəzlənməsi ilə xarakterizə olundu. Kütləvi-paralel sistemlər yüzlər və minlərlə ayrı-ayrı prosessor element­lə­rini özlərində birləşdirirdi. Kütləvi-paralel kompüterlərin əksəriyyəti RİSC⁴³ arxitekturalı güclü prosessorlar əsasında⁴⁴ yaradılırdı.

Mikroprosessorların seriyalı istehsalı həm tələbat və imkandan asılı olaraq kompüterin gücünü çevik şəkildə dəyişməyə, həm də kompüter istehsalını əhəmiyyətli dərəcədə ucuzlaşdırmağa imkan verdi. Bu sinif superkompüterlərə nümunə olaraq Intel Paraqon, IBM SP, Cray T3D/T3E və bir sıra başqaları göstə­rilə bilər. 2002-ci ilin noyabrında Cray Inc. firması 52,4 Tflops⁴⁵ və 65,5 Tbaytlıq OYQ⁴⁶ kimi xarakteristikalara malik olan Cray X1 layihəsi barədə xəbər yaydı. Bu maşının ilk qiyməti 2,5 milyon dollardan başlanırdı. Bu komplekslə dərhal İspaniya meteoroloji mərkəzi maraqlandı. Həmin vaxt Top 500 siyahısı (http://www.top500.org) nəşr edildi ki, bu siyahıya da rəsmi olaraq maksimal məhsuldarlıq nümayiş etdirən hesablayıcı sistemlər daxil edilmişdi. Siyahıya “Yerin kompüter modeli”⁴⁷ adlı Yapon mərkəzi və NEC tərəfindən yaradılmış 35,86 Tflops nəticə göstərmiş 5120 prosessorlu eyniadlı⁴⁸ hesablayıcı kompleks başçılıq edirdi. Siyahıda 2-ci və 4-cü yerləri xeyli zəif⁴⁹ olan ASCI layihələri tuturdu. Bu maşınlar⁵⁰ Los-Alamada yerləşən nüvə tədqiqatları laboratoriyasında bu gün də istifadə edilir.

Cray Inc. şirkəti son 10 il ərzində petaflopsluq⁵¹ həddi fəth etməyi hədəfə almışdır. Yaponlar da son 10 ili hədəfləmişlər. Tokioda GRAPE layihəsi⁵² çərçi­və­sində GRAPE-6 modeli hazırlanır. Bu maşın 12 klasterdən və 2048 prosessordan yığılmış və 2,889 Tflops⁵³ məhsuldarlıq nümayiş etdirir.

Perspektivdə GRAPE layihəsinə 20 min prosessor qoşulacaq və bu, cəmi 10 milyon dollara başa gələcək­dir. Lakin rekord xarakteristikalı unikal layihələr, adətən, kütləvi istehsalda olan və biznesdə geniş tətbiq edilən sistemlərlə müqa­yi­sədə xeyli baha olur.

Şəbəkə texnologiyaları sahəsindəki tərəqqi öz sözünü dedi: kommunikasiya texnologiyalarına əsaslanan ucuz, lakin səmərəli layihələr meydana çıxdı. Bu, klas­terli hesablayıcı sistemlərin yaranması üçün ilkin şərt oldu. Nəticədə hesabla­yıcı proseslərin kütləvi paralelizmi⁵⁴ ilə seçilən kompüterlərin inkişafı istiqamət­-lərin­dən biri yaranmış oldu.

Hesablayıcı klaster – iri hesablama məsələsinin həlli üçün müəyyən şəbəkə çərçivəsində birləşdirilmiş kompüterlər məcmusudur. Şəbəkə düyünü olaraq 1 prosessorlu kompüterlər, 2 və ya 4 prosessorlu SMP-serverlər⁵⁵ işlədilir. Hər bir şəbəkə düyünü özünün ƏS nüsxəsinin idarəsi altında işləyir. Bu məqsəd üçün, adətən, Linux, NT, Solaris və s. kimi standart ƏS-lər tətbiq edilir.

Hesablayıcı klaster dedikdə, həm 10 Mbaytlıq Ethernet şəbəkəsində birləş­di­ril­miş 2 kompüter, həm də Alpha prosessorları bazasında qurulmuş, paralel proq­ram əlavələrinin dəstəklənməsi üçün istifadə edilən yüksək sürətli Myrinet, idarə­etmə məqsədi ilə yaradılan Giqabit Ethernet və xidməti məqsədlər üçün yaradılan Fast Ethernet şəbəkələri ilə əlaqələndirilmiş minlərlə işçi stansiyanı birləşdirən iri bir layihə çərçivəsində fəaliyyət göstərən geniş miqyaslı hesablayıcı sistem nəzərdə tutula bilər. Şəbəkə düyünlərinin tərkibi və gücü hətta bir klaster çərçivəsində fərqli ola bilər. Bu, lazımi gücdə genişmiqyaslı heterogen (bircins olmayan) sis­tem­lər yaratmağa imkan verir. Konkret kommunikasiya mühitinin seçilməsi bir sıra amillərlə: həll edilən məsələlərin xüsusiyyətləri ilə, klasterin sonrakı genişlən­dirilməsi üçün əlçatan maliyyələşdirmə ilə və s. təyin edilir. Hesablayıcı klasterin konfiqurasiyasına ixtisaslaşdırılmış kompüterlər, məsələn, İnternet vasitəsilə klas­terə məsafədən müraciət edə bilən fayl-server daxil edilə bilər. Müasir bazara hazır klaster layihələri təklif edənlərin sayı elə də çox deyildir. Bu, ilk növbədə, kom­plektləşddiricilərin əlçatanlığı ilə, sistemlərin qurulmasının asanlığı ilə, daha çox azad yayılan proqram təminatına istinadetmə ilə, klaster texnologiyalarının köməyi ilə həll edilən məsələlərin unikallığı ilə əlaqədardır. Bazara məhsul çıxaran daha çox tanınmış layihə­ləş­di­ri­cilərdən: SGI, VALinux və Scali Computer misal göstə­rilə bilər.

2000-ci ilin yayında ABŞ-da, Kornell universiteti klaster texnologiyaları üzrə Konsorsium⁵⁶ təsis etdi. Həmin konsorsiumun əsas məqsədi klaster texnologiyaları sahəsində əlaqələndirmə işləri aparmaqdan ibarətdir. Konsorsiumun infrastruktu­ru­nu təmin edən aparıcı şirkətlər olan Dell, Intel və Microsoft kompüter avadanlıqları və proqram təminatı üzrə iri istehsalçılara çevrildilər. Konsorsiumun digər üzvləri sırasında Arqonn milli laboratoriyasını, Nyu-York, Kornell və Kolumbiya univer­sitetlərini, Compaq, Giqanet, IBM, Kuck & Associates və s. şirkətləri gös­tər­mək olar.

Rusiyada hazırlanmış layihələr içərində Sankt-Peterburq universitetində Fast Ethernet texnologiyası⁵⁷ bazasında reallaşdırılmış klasterlər vahid sərbəst tədris sinfi kimi istifadə edilən hesablayıcı müəssisədə iri elmi-tədqiqat məsələləri həll edilir. Samara elmi mərkəzində heterogen hesablayıcı klaster yaratmaq yolu seçil­mişdir. Bu klaster Alpha və Pentium III prosessorları bazasında qurulmuş kompü­ter­lərə əsaslanır. Sankt-Peterburq Texniki universitetində Alpha prosessorları və Myrinet şəbəkəsi əsasında klaster yaradılır. Bu klasterdəki hesablayıcı düyünlərdə lokal disklərdən istifadə edilmir. Ufa dövlət aviasiya texniki universitetində 12 Alpha-stansiya və Fast Ethernet və OS Linux şəbəkələri⁵⁸ bazasında klaster layihələşdirilir. Superkompüter və klaster texnologiyaları ilk olaraq elmi tələbatın ödənməsi üçün, yəni, nəhəng hesablayıcı güc tələb edən fundamental və tətbiqi fizika, mexanika, astronomiya, meteorologiya, materiallar müqaviməti və s məsə­lə­lərinin həlli üçün inkişaf etdirilirdi.

Bu məhsuldarlıq idarə edilən mürəkkəb sistemlərin (təyyarələrin, raketlərin, kosmik stansiyaların) layihələşdirilməsində, verilmiş xassələrə malik sintetik dərmanların yaradılmasında, gen mühəndisliyində, hava və təbiət kataklizmalarının proqnozlaşdırılmasında, atom elektrik stansiyalarının səmərəliliyinin və etibarlılı­ğının yüksəldilməsində, makroiqtisadi effektlərin və bir çox başqa məsələlərin həllində əvəzedilməzdir.

Növbəti nəsil kompüterləri.

Hesablayıcı qurğuların ölçüləri daim kiçilir. Vaxt var idi ki, elə bilirdilər, maşınların gücü artdıqca periferiya qurğularına və yaddaşa daha böyük sahə tələb olunacaqdır. Bu təsəvvürün yanlış olduğu aşkara çıxdı. 1965-ci ildə Qordon Mur müəyyən etdi ki, hər 18 ayda hesablayıcı sistemlərin məhsuldarlığı 2 dəfə artır⁵⁹. Bu qayda hal-hazırda Q.Mur qanunu adlanır. Q.Murun inteqral mikrosxemlərdəki tranzistorların sayının zamandan asılılığı üçün aşkarladığı empirik qanuna əsasən ayrı-ayrı tranzistorların miniatürləşddirilməsi templərini müəyyən etmək mümkün­dür. Q.Mur qanununa görə, elementar hesablayıcı modullarının ölçülərinin ildə 10-30% azalması göstərir ki, yaxın 5-10 il ərzində elementar modulların ölçüləri təqribən 100-200 anqstrem, yəni, 0,01-0,02 mikron təşkil edəcəkdir. Bu o demək­dir ki, elementar hesablayıcı qurğuların ölçüləri sürətlə molekul və hətta atom ölçülərinə yaxınlaşır.

Lakin bu səviyyədə klassik fizika qanunları işləmir. Bu səviyyə kvant fizikası qanunlarının hökmünə tabedir ki, bunların da təbiəti nəzəri səviyyədə hələ axıradək öyrənilməmişdir.

Bu qurğuların işini təsvir etmək üçün informatikanın klassik obyektləri və metodları yaramır. Belə ki, Heyzenberqin qeyri-müəyyənlik prinsipinə əsasən sözü gedən mikroskopik sistemlərdə “bit” anlayışına analoq tapmaq mümkün deyildir. Yeni qurğular 2-lik rəqəmlər əvəzinə “dalğa funksiyaları” ilə (“kvantlıq bitlərlə”) iş görəcəkdir.

İnformatika öz inkişa­fında, müəyyən mənada, “hesab”dan “funksional təhlil”ə keçid edəcəkdir. Bu, bir tərəfdən, əsas klassik alqoritmlərin yenidən düşünül­mə­sinə və əvəzlənməsinə şərait yaradırsa, digər tərəfdən də süni intellekt problem­lərinin həllinə yaxınlaşdırır.

İri universitetlərin elmi-tədqiqat laboratoriyalarında və transmilli informasiya texnologiyaları (TİT) şirkətlərində yeni nəsil hesablayıcı qurğuların element baza­sının yaradılması üzrə əsas istiqamətlərin aşağıdakı bir-neçə variantı üzərində işlər aparılır⁶⁰:

-nüvə maqniti və ya elektron paramaqnit rezonansı prinsiplərinə əsaslanan element bazası;

-Pauli və ya Penninq tələlərində yerləşdirilən atom ionlarına əsaslanan element bazası;

-yüksəkkeçiricilik hadisəsinə əsaslanan element bazası;

-qeyri-üzvi yarımkeçirici sistemlərdə kvant nöqtələrinə əsaslanan element bazası;

-kvant məntiqinin optik simulyasiyasına və ya metal-bioloji hibridə əsaslanan element bazası.

Bu istiqamətlərin əksəriyyəti ciddi nöqsanlara malik olduqlarından, hələlik rəqabətqabiliyyətli hesablayıcı qurğuların yaradılmasını qeyri-mümkün etməkdə­dir. Buna xarakterik misal olaraq IBM korporasiyasının 1999-cu ildə işləyib hazırladığı molekulyar element bazası layihəsini göstərmək olar. Belə ki, bu layihənin reallaşdırılmasına 5 il ərzində 17 milyard dollar xərclənmiş və 5 və ya 7 kvantlıq bitlə əməliyyat apara bilən 7 ton çəkiyə malik, yalnız primitiv məsələləri⁶¹ həll etməyə qadir olan bir maket hazırlanmışdı⁶².

Hal-hazırda yeni nəsil kompüterlər üçün element bazasının yaradılması üzrə nisbətən daha perspek­tivli istiqamət elektrostatik və ya maqnit tipli qarşılıqlı fəaliyyət əsasında kvantlı bitllər funksiyasını icra edən bərkcisimli sistemlərdə özünü təşkil edə bilən kvant nöqtələrindən istifadəyə əsaslanan istiqamətdir.

İnformasiya emalının müasir üsulları
Müxtəlif təbiətli sistemlərdə informasiyanın emalı qanunlarının ümumiliyi informasiya prosesləri nəzəriyyəsinin fundamental təməlini təşkil edir. Bu nəzəriyyənin öyrənmə obyekti informasiyadır. İnformasiya anlayışı istifadə edildiyi konkret bilik sahəsindən bir qədər kənarda olan mücərrəd anlayışdır. İnformasiya resursları müasir cəmiyyətdə maddi resurslardan önə çıxmaqdadır. Belə ki, malı kimə, nə vaxt və harada satmaq barədə bilik malın özündən qiymətlidir. Bununla əlaqədar olaraq informasiya emalı üsulları diqqət mərkəzinə çəkilir. Hər gün yeni, daha mükəmməl kompüterlər, münasib proqramlar, informasiyanın saxlanması, ötürülməsi və mühafizəsi üzrə müasir üsullar meydana çıxır.

Bazar mövqeyindən, informasiya çoxdan əmtəədir. Bu vəziyyət cəmiyyətin kompüterləşdirilməsi nəzəriyyəsini, praktikasnı və sənayesini inkişaf etdirmək üçün əın güclü stimuldur.

Kompüter, informasiya mühiti olaraq, nəinki təkcə sənayenin, elmin və bazarın təşkilində ciddi keyfiyyət sıçrayışı etmiş, həm də olduqca qiymətli istehsal sahələrinin, o cümlədən, hesablayıcı texnika, telekommunikasiya və proqram məhsulları istehsalının ön plana çıxmasını şərtləndirmişdir.

Cəmiyyətin kompüterləşdirilməsi meylləri hesablayıcı texnika və digər müx­tə­lif kateqoriyalı EHM istifadəçiləri şəklində meydana çıxan peşələrin yaranması ilə bağlıdır.

Əgər 60-70-ci illərdə elektronika mühəndisləri və proqramçılar kimi yeni hesablayıcı texnika və yeni təbiqi proqram paketləri yaradan mütəxəssislər üstünlük təşkil edirdisə, indi hər biri öz spesifik məsələsini həll edən peşəkar olmayan müxtəlif peşə sahibləri EHM istifadəçiləridir. İndi istifadəçi yalnız kompüter mühitində informasiya proseslərinin təşkilinin ümumi prinsiplərini bilməli, özünə lazım olan informasiya sistemini və texniki vasitələri seçməyi və həmin texnikanı öz predmet oblastında tətbiq etməyi bacarmalıdır.
İnformasiya emalı sistemlərinin inkişaf tarixi.
Professor Buadeyə görə, latınca, information – izah etmək⁶³, aydınlaşdırmaq, məlumatlandırmaq mənasında olan informasiya dedikdə, verilmiş predmet barə­dəki biliyimizdəki qeyri-müəyyənlik dərəcəsini azaldan hər şey başa düşülür. Bu tərif ötürülən informasiyanın konkret ünvan üçün faydalılığını, qiymətliliyini təyin edir. Yəni, aldığımız məlumatda yeni heç nə yoxdursa, onda bu informasiyanın miqdarı sıfra bərabərdir. Buna görə də “verilənlər” anlayışı daha ümumidir. Çünki burada istehlakçı qiymətləndirməsi tələb olunmur.

XIX əsrin ikinci yarısınadək “ibtidai” informasiya texnologiyasından istifadə edilirdi. Bu informasiya texnologiyasının əsasını qələm (pero), mürəkkəb qabı və mühasibat kitabı təşkil edirdi. İnformasiyanın ötürül­məsi vasitəçilərin, poçtal­yon­ların, kuryerlərin vasitəsilə həyata keçirilirdi. Bu rabitə etibarsız idi, çoxsaylı kənar amillərdən, havadan, kuryerin sağlamlığından, əhval-ruhiyyəsindən və s-dən asılı idi. İnformasiya emalının məhsuldarlığı olduqca aşağı idi. Hər bir yazının (məktubun) üzü ayrıca əl ilə köçürülürdü. Toplama əl ilə aparılırdı. Qərar qəbulu üçün başqa informasiya yox idi.

XIX əsrin sonunda “mexaniki” informasiya texnologiyası meydana gəldi. Yazı makinası, telefon, diktofon və modernləşdirilmiş poçt sistemi informasiya texnolo­gi­yasını prinsipial şəkildə dəyişdirdi. İnformasiya texnologiyasının məh­sul­dar­lığı xeyli artdı. Mexaniki texnologiya, mahiyyətcə, mövcud müəssisə­lərin təşki­la­ti strukturunu formalaşdırdı.

XX əsrin 40-60-cı illərində “elektrik” texnologiyası yarandı. Bu texnolo­giya­da elektromexaniki yazı makinası, surətçıxaran maşın, portativ diktofon və s. istifadə edilirdi. Bu texnika müəssisənin fəaliyyətini yaxşılaşdırdı, sənədlərin emal keyfiyyətini və hazırlanma sürətini artırdı. 60-cı illərin 2-ci yarısında böyük məhsuldarlığa malik EHM-lərin müəssisə fəaliyyətinə cəlb edilməsi informasiya­nın emalının forması ilə yanaşı, həm də məzmununa təsir etməyə başladı. Beləliklə, informasiya texnologiyasının “elektron” dövrü başlandı.

Məlum olduğu kimi, informasiya texnologiyası informasiya emalının ən azı 3 mühüm komponentini – uçotu, təhlili və qərar qəbulunu əhatə edir. Bu komponent­lər sənədlərin kağız “bataqlığında” reallaşdırılır ki, bu bataqlıq da günbəgün dərinləşir. Avtomatlaşdırılmamış informasiya sistemlərinin ən ciddi nöqsanı informasiyanın yığılması, emalı və istifadə edilməsi proseslərinin ayrı-ayrılıqda baş verməsidir. Bu o deməkddir ki, müəssisənin ayrı-ayrı bölmələrinin hər biri özünəməxsus ayrıca “verilənlər bazası”na malikdir və bir bölmənin işçiləri “özgə” bölmənin “verilənlər bazası”na daxil olmaq hüququna malik deyildir. Odur ki, hər bölmənin işçiləri özlərinin “verilənlər bazası”nı özləri sərbəst surətdə yaratmağa məcburdur. Bu, orta əsrlərdəki hər ailənin özü üçün tikdiyi yel dəyirmanına və ya su çarxına bənzəyirdi. Hal-hazırda, demək olar ki, bütün kütləvi tələbat məhsulları mərkəzləşdirilmiş şəkildə istehsal edilir və tələbata uyğun şəkildə istehlak edilir. Bu baxımdan, idarəetmənin avtomatlaşdırılmasının əsas məqsədlərindən biri müəssisədəki hər bir əməkdaşı, aid olduğu bölmədən asılı olmayaraq məxfilik tələbləri ödənilməklə lazımi vaxtda, lazımi formada və lazımi həcmdə zəruri informasiya ilə təchiz etməkdən ibarətdir. Bunun üçün vahid inteqrasiya edilmiş verilənlər bazası, lokal hesablayıcı şəbəkə və hər bir işçi üçün lazımi avadanlıqlarla təchiz edilmiş avtomatlaşdırılmış iş yeri (AİY) lazımdır. Bu yanaşma müəssisənin kompleks avtomatlaşdırılmasını nəzərdə tutur. Bu isə o deməkdir ki, müəssisə üçün kompüterləşdirilmiş idarəetmə sistemi yaradılmalıdır ki, burada da alt sistemlərin qarşılıqlı fəaliyyəti təmin edilməli, informasiyaya operativ müraciət mümkün olmalı və qərar qəbulu dəstəklənməlidir. SSRİ-də ilk müəssisə avtomatlaşdırılmış idarəetmə sistemləri (MAİS-lər) və verilənlərin emalı sistemləri (VES-lər) 60-cı illərdə yaradılmışdı. Bunlar kollektiv istifadə olunan azməhsuldar, nəhəng hesablayıcı texnika ilə təchiz edilmiş müəssisə informasiya-hesablayıcı mərkəzlər bazasında yaradılırdı. Bu sistemlər əsasən uçot və planlaşdırma məsə­lə­lə­rini həll edirdi. Çox hallarda isə həll edilən məsələlər yalnız əmək haqqı hesablamalarından və kadrlar uçotuna aid informasiyanın emalından ibarət olurdu. Verilənlərlə işləməyin çətinliyi onunla bağlı idi ki, infformasiya sistemində hesablayıcı texnika ilə yanaşı, informasiyanın kağıza yığılması və İnformasiya-Hesablayıcı Mərkəzə daşınması və burada EHM-ə daxiletmə ilə bağlı olaraq perfokartların hazırlanması prosesləri əl üsulu ilə yerinə-yetirilirdi. Emal nəticələri də kağıza çıxarılırdı.

80-ci illərdə ABŞ-da “avtomatlaşdırılmış ofis” termini geniş yayılmağa başladı. Burada söhbət bir-sıra idarəetmə funksiyalarının, o cümlədən, mətnlərin hazırlanması, emalı və redaktə edilməsinin, sistemləşdirilib saxlanmasının, infor­-ma­siya axtarışının, rəhbər işçilərə informasion xidmət göstərilməsinin və s. avto­matlaşdırılmasından gedirdi.

Bu tip sistemlərin tətbiqi bir-sıra işçilərin, məsələn, katibələrin, referentlərin funksiyalarının dəyişilməsinə, onların sayının ixtisar edilməsinə, əmək məhsul­dar­lığının yüksəlməsinə səbəb oldu. “Avtomatlaşdırılmış ofis” konsepsiyası bu gün də uğurla inkişaf edir. Proqram təminatı istehsalçıları olan bir-sıra iri firmalar, o cümlədən, Corel, Microsoft və s. “Ofis” adlı⁶⁴ yeni-yeni inteqrasiya edilmiş proq­ram paketləri hazırlayır.
Müasir informasiya emalı sistemləri
Müasir informasiya emalı sistemlərində (İES-lərdə) kağız daşıyıcılardan imtina edilən və AİY-lər arasında verilənlər mübadiləsini şəbəkə vasitəsilə real­laşdıran rəqəmsal texnologiyalardan istifadə edilir. Bu texnologiyalar həm də hər hansı məsələnin həllində əməkdaşlar qrupunun real vaxt rejimində birləşdiril­məsini nəzərdə tutur. Rəqəmsal texnologiya telekonfranslar təşkil etməklə fikir mübadiləsi etməyə, müəyyən suallar ətrafında müzakirələr açmağa, elektron poçt vasitəsilə operativ material ötürülüşü etməyə, elektron elanlar lövhəsi yaratmağa və s. imkan verir. Bu sistemlər müəssisənin bütün işlərini əhatə etdiyindən, “biznes-proseslərin korporativ idarəetmə sistemləri” termini ilə ifadə edilir. Bu cür sistemlər üçün “müştəri-server” texnologiyasından istifadə edilməsi, qlobal İnternet şəbəkəsi vasitəsilə uzaqdakı istifadəçilərin prosesə qoşulması xarakterikdir. Müxtəlif ölkələrdə və qitələrdə yerləşən 40 mindən artıq istifadəçinin ümumi informasiya məkanında birləşdirilməsini reallaşdıran sistemlər geniş istifadə edilir. Məsələn, McDonalds şirkəti öz bölmələrini bütün dünyaya yaymışdır.
İnformasiya emalının kompüter üsulu ilə bağlı problemlər
Mövcud informasion strukturu köklü surətdə yenidən qurmadan, sadəcə əməkdaşların iş yerlərinə fərdi kompüter qoyub onları lokal şəbəkədə birləşdirmək idarəetmədə nəzərəçarpacaq müsbət səmərə verə bilməz. Köhnəlmiş iş üsullarını avtomatlaşdırmaqla yalnız kompüteri yüksək sürətli kağız sənəd istehsalçısına çevirmək olar. Belə ki, ABŞ müəssisələrinin işinin təhlili göstərmişdir ki, bir işçinin müvəqqəti olaraq müəssisəyə qəbul edilməsi üçün 113 səhifəlik 43 müxtəlif sənəd⁶⁵ tərtib etmək lazım gəlir. Çünki mövcud informasiya sistemində ayrı-ayrı bölmələr və işçilər arasında əlavə əlaqələr vardır. Müəssisənin normal fəaliyyəti üçün cəmi 20-30 daxili kommunikasiya kifayət edəcəyi halda, mövcud olan kommunikasiyaların sayı bundan 3-4 dəfə çoxdur. Müəssisənin idarə edilməsinin avtomatlaşdırılması təcrübəsi göstərir ki, məhsuldar kompüterin qurulması “hər ehtimala qarşı” çap edilən və yayılan əlavə nüsxələr hesabına kommunikasiyaların sayını artırmaq mümkündür. Buna görə də müəssisədə kompüter texnikası tətbiq edilməzdən əvvəl lazımsız kommunikasiyalar optimal səviyyəyə qədər ixtisar edilməlidir. Yayılmış əsas təhlükələrdən biri kompüterin imkanlarını həddən artıq şişirtməkdir. Fərdi kompüter, nə qədər baha və nə qədər məhsuldar olsa da, bizim mürəkkəb iqtisadi məsələlərimizi həll edə bilməsi üçün həmin məsələlərin proq­ra­mı­nı tərtib etməyi tələb edir. Kompüter texnikasının tətbiqi ilə bağlı olaraq kol­lek­tivdə yaranan sosial-psixoloji problemlər böyük diqqət tələb edir. Çünki işçilərin ixtisara düşmək qorxusu və qalan işçilərə daha ciddi nəzarət etmək imkanı yaranır.

Kompüterləşdirmə mühasibat uçotu və təsərrüfat fəaliyyətinin təhlili texnolo­giyasını əhəmiyyətli dərəcədə dəyişdirir. Ənənəvi texnologiyada mühasibat uçotu və təsərrüfat fəaliyyətinin təhlili jurnal-orderdə və kağız sənədlərdə həyata keçirilirdi. Bu sənədlərin bir çoxu kompüter sistemində də istifadə edilir. Lakin bu sənədlər çox hallarda elektron formada olur. Əsas uçot sənədləri (mühasibat kitabı və jurnallar) verilənlər faylı şəklində saxlanır ki, bunları da kompütersiz dəyişmək mümkün deyildir. Kompüter texnologiyası bir-sıra xüsusiyyətlərə malikdir.

Verilənlərin kompüter texnologiyasının adi texnologiyadan fərqi.

Əməliyyatların eyni cür icrası.

Mühasibat uçotunun eyni, tam oxşar əməliyyatlarının icrası üçün kompüter texnologiyasında eyni əmrlərdən istifadə edilir ki, bu da əl üsulu ilə işlənmə zamanı tez-tez rast gələn təsadüfi səhvlərin yaranmasına praktiki olaraq imkan vermir. Əksinə, proqram səhvləri və ya aparat və proqram vasitələrindəki digər sistematik səhvlər bütün qalan şərtlərin dəyişməz olduğu hallarda da tamoxşar əməliyyatların icrası zamanı yanlış nəticələrə səbəb olur.

Funksiyaların ayrılması.

Kompüter sistemi, adi halda müxtəlif mütəxəsislərin yerinə-yetirdiyi bir-sıra daxili nəzarət prosedurlarını icra edə bilir. Bu halda, kompüterlə işləyən mütə­xəs­sislər digər funksiyaların icrasını da öz üzərlıərinə götürmək imkanı əldə edirlər. Nəticədə kompüter sistemi nəzarət sistemini lazımi səviyyədə saxlamaq üçün əlavə tədbirlərin görülməsini tələb edir. Bu tədbirlərdən biri parollar ssiste­mi­nin tətbi­qi­dir.

Səhvlərin və qeyri-dəqiqliyin yaranması üçün potensial imkanlar.

Adi mühasibat uçotu texnologiyasına nisbətən kompüter texnologiyası icazə­siz müdaxiləyə daha açıqdır. Bu, müəyyən səhvlərin və qeyri-dəqiqliyin yaranma­sına yol aça bilir. Tətbiqi proqramların tərtibi zamanı buraxılmış səhvlər uzun müddət nəzərdən yayına bilir.

Rəhbərlik tərəfindən nəzarətin gücləndirilməsi üzrə potensial imkanlar.

Kompüter sistemi firma rəhbərliyinin ixtiyarına külli miqdarda aalitik vasitələr verir ki, bunların köməyi ilə fəaliyyəti qiymətləndirmək və nəzarətə götürmək mümkün olur. Bu, fəaliyyətin qeyri-səmərəli olması riskini xeyli azaldır.

Müəyyən əməliyyatların icrasına kompüter tərəfindən təşəbbüs göstə­ril­məsi.

Kompüter sistemi bəzi əməliyyatları əlavə icazəyə ehtiyac duymadan avto­ma­tik olaraq icra edə bilir. Çünki bu əməliyyatların avtomatik icrası əvvəlcədən rəhbərliklə razılaşdırılmış olur.

Beləliklə, təsərrüfat fəaliyyətinin təhlili və mühasibat uçotunun kompüterləş­dirilməsi müəssisədə həm dərin struktur dəyişikliyi törədir, həm də yeni texnolo­giya yeni metodlarla birgə tətbiq edilir. Bu isə bir-sıra beynəlxalq standartların qəbul edilməsi zərurətini meydana çıxarır ki, bu da müəyyən qanunvericilik aktlarının dəyişdirilməsini tələb edir.

II Bölmə

Kompüter elmlərinin metodologiyası

1. Elm haqqında ümumi məlumat

Dünyagörüşü formalarından biri olan Elmin əsas funksiyalarına: izahetmə, anlama və öngörmə aid edilir.

İzahetmə ən geniş mənada, hadisə və ya faktın müəyyən ümu­mi qanun, nəzəriyyə və ya konsepsiya baxımından yekunlaş­dırılması kimi başa düşülür. Yəni, hər han­­sı faktı izah etmək üçün hökmən müəyyən nəzəriyyə və ya qanun mənti­qindən çıxış etmək lazım gəlir. Məsələn, iqti­sadi tarazlıq faktı bazarda fəaliyyət göstərən tələb-təklif qanu­nuna əsasən izah edilir. Lakin izahetmə müxtəlif səviy­yə­­lərə malik olur. Belə ki, məsələn, cismin genişlənməsi ilk ba­xış­­­da qızdır­ma­nın nəticəsi kimi nəzərə gəlirsə, daha dərin dərketmə səviyyəsində molekulyar-kinetik nəzəriyyə əsa­sında izah edi­lir. Çünki həmin nəzəriyyəyə görə, qızdırma nəticə­sində mole­­kullar arasındakı məsafə artır.

Elmin bu və ya digər sahəsinin məşğul olduğu proseslər nə qədər mürək­kəb olursa, onların daha çox xassə­sini və digər proseslərlə əlaqələrinin daha çox hissə­sini abstrak­siya etmək və onların fəaliyyətinin ümumi, məcmu nəti­­cəsini qabaq­cadan xəbər vermək olduqca çətin olur.

Müxtəlif elmlərdə istifadə edilən konkret, tək-tək xüsu­si qayda və üsullar bir-birindən köklü surətdə fərqlənsələr də, dərketməyə ümumi yanaşma, tədqiqat metodu mahiyyətcə də­yiş­­mir. Odur ki, müxtəlif elmlərdə istifadə edilən xüsu­si, spesifik üsullar tədqiqatın taktikası, ümumi üsullar isə strategiyası kimi xarakterizə edilir.

Zehni əməyin fiziki əməkdən ayrılması ilə əlaqədar olaraq yeni biliklər əldə edil­məsi üsullarının öyrənilməsi tələbi ilə elm, müxtəlif metodların təhlili və qiymətlən­dirilməsi ilə bağlı olaraq isə metodologiya adla­nan xüsusi təlim meydana çıxmışdır.

Metod dünya haqqında obyektiv gerçək bilik almağa xidmət etdiyindən, dünyanın həmin oblastının analoqu kimi çıxış etməlidir. Bu baxımdan, dərketmənin son məqsədi mövcud ha­di­­sələri idarə edən obyektiv qanunları aşkarlamaqdan iba­rət­­dir. Elmin aşkarladığı qanunlardan baxılan oblastın digər xüsusi hadisələrinin tədqiqində spesifik metodların təməli kimi istifadə edilir. Məsələn, elektromaqnitizm me­tod­­ları konkret elektrik, maqnit və optik proseslərin öyrə­nil­məsində uğurla tətbiq edilir. Bundan fərqli olaraq meto­do­logiyada adətən elmlərin əksəriyyəti tərəfindən dərketmə fəaliyyətinin müxtəlif mərhələlərində istifadə edi­lən ən ümumi tədqiqat metodları seçilir.

Tədqiqatın empirik və ya təcrübi mərhələsində əsas eti­barı ilə hissi-əyani metod­lardan istifadə edilir ki, bunla­ra da müntəzəm müşahidə, eksperiment və ölçmə aiddir.

Müşahidə ilkin informasiya mənbəyidir, lakin elmdə mü­şa­­hidə nəzəriyyədən əhəmiyyətli dərəcədə asılıdır. Çünki mü­şahidə etmək üçün əvvəlcə nəyisə axtarmaq barədə müəyyən ideya, fərziyyə və ya heç olmazsa, sadəcə güman olmalıdır. Bu­na görə də elmdə qabaqcadan məqsədli müşahidə aparmadan tə­sa­düfi kəşf­lər son dərəcə nadir hallarda baş verə bilir. Elmi müşahidə zamanı riayət ediləcək əsas tələblər: müntə­zəmlik, nəzarətedilənlik və diqqətlilikdir.

Eksperiment – empirik tədqiqatın vacib metodudur. Ekspe­ri­ment elə qoyulur ki, hadisə və ya prosesi kənar təsirlərin ən az olduğu mövqedən müşahidə etmək mümkün olsun. Bu məna­da, eksperiment zamanı əhəmiyyətsiz amillər sərfnəzər edi­lir⁶⁶. İlk dəfə nəzarət edilən və riyazi cəhətdən emal edi­lən eksperimentlər qoyan Qalileydən bəri elmdə görün­mə­miş sıç­ra­­yış­lar yaranmışdır. Odur ki, mahiyyətindəki qüsura bax­mayaraq eksperiment təbiətşü­nas­­lıqda geniş istifadə edilən tədqiqat metoduna çevril­miş­dir. Bu metod hal-hazırda həm texnika ilə təchiz olunmaq cəhətdən, həm də nəzəriyyə ilə qarşılıqlı fəaliyyət baxı­mından çox mürəkkəbləşmiş­dir. Bu sonuncu isə özünü ekspe­ri­mentin planlaşdırılması nəzəriyyəsinin və nəticələrin statistik emalı metodları­nın meydana çıxmasında göstər­mək­dədir.

Ölçmə xüsusi empirik metod olmasa da, ixtiyari ciddi el­mi müşahidə və ekspe­rimentin zəruri tamamlayıcısı kimi çıxış edir. Müasir dövrdə ölçmələrin nəticələrinin ema­lı üçün ən yeni statistik üsullar və komüterlərdə istifadə edilən hesablama metodları tətbiq edilir.

Nəzəri mərhələdə abstraksiya ön plana keçir, anlayışlar daxil edilir, fərziyyələr və nəzəriyyələr qurulur, elmin qanun­­­ları kəşf edilir. Tədqiqat prosesi, empiristlərin düşün­­düyü kimi, fakt toplanmasından deyil, problemin irəli sürülməsindən başlanır. Bu fikrin doğruluğunu bəzi fakt­la­rın köhnə nəzəriyyə ilə izah edilə bilməməsi və yeni nəzə­riyyə yaradılmasına ehtiyac əmələ gəlməsi sübut edir. Odur ki, yaranmış problemli situasiya hansı faktların köhnə empirik və nəzəri biliklərlə nədə uyğun gəlmədiyini aydın­laşdır­maq ehtiyacı kimi meydana çıxır. Belə halda yaran­mış problemin sınaq həlli üçün fərziyyə irəli sürülür və sonra həmin fərziyyənin mövcud empirik məlumatlar və nəzə­ri biliklər baxımından təsdiq edilib-edilməməsi ətraf­lı təhlil edilir. Sonra fərziyyədən məntiq qaydaları üzrə elə nəticə hasil edilir ki, həmin nəticə müşahidə və ekspe­ri­men­tin köməyi ilə bilavasitə yoxlanıla bilən olsun. Odur ki, empirik yoxlanılabilənlik elmi fərziyyənin çox mühüm şərtidir. Çünki fərziyyədən hasil edilən nəticənin gerçək­liyinin yeganə və başlıca qarantı müşahidə və təcrübə mə­lu­matları ilə tutuşdurulması imkanının olmasıdır. Əgər fərziyyədən çıxan nəticə empirik məlumatlarla uyğun gəl­mirsə, onda məntiqi inkar prinsipi (modus tollens) tətbiq edilərək fərziyyə rədd edilir.

Ən çətin iş fərziyyənin təsdiqidir. Bəzən deyirlər ki, əgər fərziyyənin nəticəsi təcrübədə təsdiq olunursa, bu, hə­min fərziyyənin gerçəkliyini göstərir. Lakin bu, tələsik çıxa­rılan nəticədir. Çünki məntiq qaydalarına görə nəticə­nin gerçəkliyi əsasın, baxılan halda fərziyyənin gerçəkli­yinə həmişə dəlalət etmir. Əslində, fərziyyənin təsdiqinin bu və ya digər dərəcəsi barədə söhbət gedə bilər. Çünki son­rakı yoxlamalar elə fakt aşkara çıxara bilər ki, fərziyyəni ya tamamilə, ya da qismən rədd edər. Aydındır ki, fərziyyəni təsdiq edən faktlar çoxaldıqca fərziyyənin gerçəkliyinə daha böyük inam yaranacaqdır. Lakin bu halda da prinsipcə, fərziyyəni rədd edən faktın meydana çıxması mümkünlüyü yenə qalacaqdır. Belə ki, Albert Eynşteyn (1879-1955) tərəfindən nisbilik nəzəriyyə­sinin yaradılmasınadək Nyutonun Ümum­dün­ya cazibə qanunu mütləq gerçəklik kimi qəbul edilirdi. Lakin Ümumi nisbilik nəzəriyyəsinin eksperimental yoxlan­ma­sı onun təxminiliyini üzə çıxardı.

2. Elm və İnsan problemi

1.