Ödənişin idarə olunması funksiyası. İşçilər təşkilati xidmətləri qarşılığında mükafat gözləyərlər. Bu mükafatlardan biri və bəlkə də ən önəmlisi ödənişlərdir. Fərdlər öz xidmət və mükafatları ilə təşkilatdakı digər fərdlərin xidmət və mükafatlarını müqayisə edirlər və uyğunsuzluq olduqda gərginlik hissi keçirirlər. Yüksək ödəniş alan işçilər tanındığını, xidmətlərinin təşkilatda bilindiyini, bacarıqlarının müsbət qiymətləndirildiyini və uğurlu olduğunu düşünür. Bu, onun özünə olan inamını artırır və bacarıqlarının daha da təsirli olaraq işə cəlb olunmasına imkan yaradır. İşçinin iş uğuru və xidmətlərinin qiymətləndirilərək yüksək ödəniş alması onun haqqında müsbət düşüncə formalaşdığını düşünməyə əsas verir. Bu cəhətdən ödənişlərin idarə olunması funksiyası stimul kimi çıxış edə bilər. Ödəniş işçini təşkilata cəlb edər, müsbət xüsusiyyətləri olan işçini təşkilatda saxlayar və işçini təşkilata maksimum fayda vermək yönündə həvəsləndirər. Bu səbəbdən də eyni səviyyədə olan işə eyni qiymət verilməli və işçilər arasında olan bu tarazlıq gözlənilməlidir.
