Mühazirə materialları Mövzu İnsan resurslarının idarə edilməsinin (human resources management hrm) əsasları

İnsan resurslarının idarəedilməsinin formalaşması prinsipləri

Müasir müəssisələrdə insan resurslarının idarəedilməsi sisteminin formalaşması bir sıra prinsiplər əsas götürülməklə həyata keçirilir:

• 
  Komplekslilik , yəni insan resurslarının idarəedilməsi sisteminə təsir edən bütün amillərin nəzərə alınmasının zəruriliyi;
  
• 
  Elmililik – idarəetmə sisteminin qurulması zamanı bazar iqtisadiyyatı şəraitində ictimai istehsalın inkişaf qanunları nəzərə alınmaqla iqtisadiyyat, idarəetmə, psixologiya, sosiologiya, hüquq və s. sahəsində elmi müddəalara əsaslanmaq lazımdır;
  
• 
  Proqressivlik – insan resurslarının idarəedilməsi sisteminin formalaşması yerli və xarici əmək təcrübəsinə əsaslanmalıdır;
  
• 
  Perspektivlik – insan resurslarının idarəedilməsi sisteminin layihəsinin hazırlanması müəssisənin strateji inkişaf perspektivləri nəzərə alınmaqla “gələcəyi görərək” həyata keçirilməlidir;
  
• 
  Məqsədlərin inteqrasiyası və vəzifələr – insan resurslarının idarəedilməsi sisteminin səmərəliliyini onun səciyyəvi xüsusiyyətləri əsasında deyil, digər altsistemlərlə qarşılıqlı əlaqəsi, təşkilatın ümumi səmərəliliyinə, sərvətinə və korporativ məqsədlərin əldə olunmasına verdiyi töhfəsi nöqteyi-nəzərincə qiymətləndirmək lazımdır;
  
• 
  Adaptivliyi (uyğunlaşması) – insan resurslarının idarəedilməsi sistemi konkret müəssisənin spesifik fəaliyyətini, onun inkişaf strategiyasını, təşkilati mədəniyyət xüsusiyyətlərini əks etdirməlidir, yəni təşkilatin istər daxili, istərsə də xarici mühitində dəyiçilən məqsədlərə, vəziyyətə, şərtlərə uyğunlaşmağı bacarmalıdır;
  
• 
  Özünüinkişaf – insan resurslarının idarəedilməsi sistemi təşkilatın rəqabətqabiliyyətinin gücləndirilməsi və yüksək keyfiyyətlə inkişafı üçün təkmilləşdirmələrə, yenilənmələrə, innovasiyalara istiqamətlənməlidir;
  
• 
  Tamlığı (vəhdəti) – insan resurslarının idarəedilməsi sistemi onun tərkib elementlərinin məcmusu deyil, bütün təşkilatın tamlığını təmin edən, öz səciyyəvi xüsusiyyətlərinə malik, onun digər altsistemləri ilə qarşılıqlı təsirlə birgə məhdud sistemdir;
  
• 
  Bərabərlik – tabeçilik normaları, fəaliyyət həcmi və əməktutumu üzrə insan resurslarının idarəedilməsi sisteminin elementlərinin uyğunluğu deməkdir. Bu prinsip həlqələr, altbölmələr arasında qarşılıqlı təsirin rasionallığını, iş ahəngini, fəaliyyət intizamını müəyyən edir;
  
• 
  Paralellik prinsipi – ayrı-ayrı idarəetmə qərarlarının eyni zamanda yerinə yetirilməsi, heyətin idarə edilməsi operativliyinin yüksəlməsi deməkdir.
  
• 
  insan resurslarının idarəedilməsi sisteminin səmərəliliyi – yəni, insan resurslarının inkişafında investisiya nisbətlərinin hesabının uçotu və müəssisə fəliyyətinin nəticələri.