Мювлана ъялаляддин

Allahın Rəsulu Səlləlahu əleyhi və alehin xəstələnmiş səhabəsinə baş çəkməsi və onun faydası
Peyğəmbər səhabından, bir cənab xəstələndi,

Xəstəlikdən əridi, başına kül ələndi!

Mustafa, o xəstəyə bir baş çəkim söylədi,

Çünki Onun ürəyi, lütfi-kərəmli idi.

Baş çəkmənin xəstəyə, bil ki, faydası vardır,

Faydadan sənə çatan, fayda qaydası vardır.

Birinci fayda odur, həmin şəxs bir əlildir,

Onun rəhbəri vardır, o da Şahi-Cəlildir!

Yoxdur bəsirət gözün, sən ey, bildiyin edən!

Sən heç başa düşmürsən, ud²⁷³ nədən, odun nədən?!

Dünya bir xəzinədir, heç ondan incimə Sən,

Heç bir viranəliyi, xəzinəsiz bilmə Sən!

Hər dərvişin məqsədi boşboğaz olmaq deyil,

Cəddin məqamın öyrən, təvafın²⁷⁴ yerini bil,

Səndə batini görmək, gücü olmasa belə,

Hər vücudun daxilin, xəzinə hesab eylə.

Istiqamət olmasa, sevdiyin yol göstərər,

Şah atlı olmasa da, ordusuna at verər.

Xülasə yol-yoldaşın, payını lazımlı bil,

Ya piyada, ya atlı, sayını lazımlı bil!

Əgər düşmən olsa da, kərəm etmək yaxşıdır,

Düşməni dost eyləmək, lütfi-kərəm naxşıdır.

Əgər dost olmasa da, onun kini az olar,

Çünki kərəmi görsə, küdurəti azalar.

Bu yolun faydası var, bu yoldan başqa bir yol,

Sənə fayda gətirməz, ey dost, sən də ayıq ol!

Bu işin sonu belə, dost sev, dostluq qanan ol,

Büt yonantək sən də yon, daşdan dostluq yonan ol!

Bütün karivan əhli, tutsa bir yerdə qərar,

Yol kəsənlər oxların, dallarında sındırar!