Məna sözün düzündədir. Buna baxmayaraq nitqdə məna düzlüyündən, reallıqdan qaşma hallarına təsadüf olunur. Bunun bəzi səbəbləri haqqında müxtəsər məlumat verildi. Onu da deməliyik ki, nitqdə reallıqdan uzaqlaşmanın digər bir səbəbi də natiqin nitq predmeti haqqında səthi məlumata malik olmasıdır. Məsələn, müasir təlim texnologiyaları, onların məktəbdə tədrisinin mövcud problemləri barədə aydın təsəvvürü, ətraflı məlumatı olmayan rəhbər maarif işçisinin müəllimlər qarşısında çıxışı istənilən effekti verə bilmir. Yaxud ölkəmizin xarici siyasəti haqqında səthi məlumatı olan mühazirəçinin, şərhçinin və başqalarının çıxışı maraqsız olur, yaxşı dinlənilmir.
