Nur təFSİRİ

Həyat yoldaşı seçimi

İnsanlar həyat yoldaşı seçimində adətən bir neçə meyardan faydalanırlar: sərvət, gözəllik, əsil-nəsil. Hədisdə oxuyuruq: “Həyat yoldaşı seçimində onun əqidə və təfəkkürünü əsas götür.⁹ Digər bir hədisdə oxuyuruq: “Çox olar ki, gözəllik fəlakətə, sərvət tüğyana səbəb olar.”¹⁰

Allahın rəsulu (s) buyurur: “Dinini və əmanətdarlığını bəyəndiyiniz bir şəxs qızınıza elçi gəldikdə ona rədd cavabı verməyin, yoxsa böyük fitnə-fəsada düçar olarsınız.”¹¹ Bir şəxs İmam Hüseynlə (ə) öz qızının izdivacı barədə məsləhətləşirdi. Həzrət buyurdu: “Təqvalı (Allahdan qorxan) kürəkən seç. Beləsi qızını sevərsə, sevdiyi üçün əziz tutar, sevməzsə təqvasına xatir ona zülm etməz.”¹² Rəvayətdə oxuyuruq: “Spirtli içki içənlərə, pis əxlaqlı və qeyri-sağlam düşüncəli şəxslərə, günahkar ailədə böyüyənlərə qız verməyin.¹³

Bir daha qeyd edək ki, izdivac iki növdür: daimi və müvəqqəti. Hər iki izdivacla bağlı Quran və rəvayətlərdə göstərişlər verilmişdir. Təəssüf ki, daimi izdivac bəzi məntiqsiz adət-ənənələrə, qız və oğlan evinin yersiz tələblərinə, uzun-uzadı arzulara görə keçilməz səddə dönmüşdür. Müvəqqəti izdivac isə o qədər pis qəbul olunmuşdur ki, insanlar ondan imtina edib günaha üz tuturlar.

Ayə 28:

﴿قَالَ ذَلِكَ بَيْنِي وَبَيْنَكَ أَيَّمَا الْأَجَلَيْنِ قَضَيْتُ فَلَا عُدْوَانَ عَلَيَّ وَاللَّهُ عَلَى مَا نَقُولُ وَكِيلٌ﴾

“(Musa Şüeybin təklifini qəbul edib) dedi: “Bu (razılıq) mənimlə sənin aranda bərqərar oldu. Bu iki müddətdən hansını başa vursam, mənə sitəm qılınmayacaq. Allah danışdıqlarımıza vəkildir.”