Nur təFSİRİ

Hicabsızlığın bəlaları

Hicabsızlığın bir sıra bəlaları var: Şorgözlüyün və həvəsbazlığın genişlənməsi; fitnəkarlıq və fahişəliyin artımı; sui-qəsd və namusa təcavüz; qeyri-qanuni hamiləlik və abortlar; psixoloji və zöhrəvi xəstəliklər; intihar və evdən kənarlaşma; şorgöz kişilərin öz zövcələrinə biganəliyi; boşanmaların sayının artımı; ailə bünövrəsinin süstləşməsi; dəbdəbə rəqabəti; pak ailələr üçün sıxıntılı fəza.

Bildirişlər

1. Yaxşılığa çağırışa öncə yaxınlarımızdan başlayaq.

2. İlahi hökmlər istər peyğəmbərin zövcə və qızları, istərsə də başqa qadınlar üçün eynidir.

3. Qadın iffət və abırını qorumaq üçün şəxsiyyətini tanıtdıran geyim geyməlidir.

4. Xəstəqəlbli, başqalarının namusuna göz dikən insanlara bəhanə verməyin. (Ötən ayələrdə başqalarına əziyyət verənlərə xəbərdarlıq olundu. Bu ayədə isə əziyyətə məruz qalanların vəzifəsi bəyan olunur.)

5. Qadın iffətini qorumaqla evdən bayıra çıxa bilər.

6. Yaxşılığa çağırış və pisliyə qadağa zamanı əmr və qadağanın səbəbini bəyan edin.

7. İnsanların geyimi onların şəxsiyyəti, əqidəsini və məqsədlərini tanıtdıra bilər.

8. Qadınlara qarşı bir çox zorakı hərəkətlərin səbəbi onların geyim növüdür.

9. Hicablı qadınlar cəmiyyətdə görünməklə ümumi iffət fəzasını qorumalı, həvəsbazların manevr imkanlarını məhdudlaşdırmalıdırlar.

10. Hicaba riayət etmək qərarına gəlmiş qadına öncəki səhlənkarlığı bağışlana bilər.

11. Allahın əfvi Onun mərhəməti ilə yanaşıdır.

Ayə 60:

﴿لَئِن لَّمْ يَنتَهِ الْمُنَافِقُونَ وَالَّذِينَ فِي قُلُوبِهِم مَّرَضٌ وَالْمُرْجِفُونَ فِي الْمَدِينَةِ لَنُغْرِيَنَّكَ بِهِمْ ثُمَّ لَا يُجَاوِرُونَكَ فِيهَا إِلَّا قَلِيلًا﴾

“Əgər münafiqlər, qəlblərində xəstəlik olanlar və Mədinədə şayiə yayanlar (öz işlərindən) əl çəkməsələr hökmən səni onlara qarşı qaldırarıq. Onda bu şəhərdə sənin yanında yalnız qısa bir müddət qala bilərlər.”