(91-Cİ SURƏ; 15 AYƏ)
OTUZUNCU CÜZ
“ŞƏMS” SURƏSİNİN SİMASI
Şəms surəsi Məkkədə nazil olmuşdur. Bu surə 15 ayədən ibarətdir.
Onun adı surənin ilk ayəsindən götürülmüşdür. Surə günəşə (“şəms”) andla başlayır.
Qurandakı bir çox andlar bu surədə ardıcıl şəkildə bəyan olunur. Bir-birinin ardınca 11 dəfə günəş və aya, gündüz və gecəyə, səma və yerə, nəfsi yaradana və ona paklanma yolunu öyrədənə and içilir.
Surədə bildirilir ki, insan ilahi bir ilhamla yaxşı işi pis işdən seçə bilər. Nicat tapmaq istəyən şəxs öz batinini paklamalıdır. İnsan xeyir işlərlə öz ruhunu inkişaf etdirməlidir. Əks təqdirdə əbədi səadətdən məhrum olasıdır.1 (Qeyd)
Surənin davamında Səmud qövmünün əhvalatı deyilənlərə sübut göstərilir. Onlar öz peyğəmbərləri Salehi təkzib edib, onun dəvəsini öldürməklə ağır əzaba düçar oldular. Həmin dəvə Allahın möcüzəsi idi.
Dostları ilə paylaş: | 
