09.11.1993
NEYLƏYİM
Ala gözlüm, sən yadıma düşəndə,
Ömrüm xəzan kimi soldu, neyləyim.
Dərd dərdə söykənib başdan aşanda,
Hicran rübabını çaldı, neyləyim.
Güldün, ürəyimdə bir yaz açıldı,
Ağladın, könlümə bir qəm saçıldı.
Ömrüm bir zəmidi, zəmim biçildi,
Könül mülkü viran qaldı, neyləyim.
Dünyadan xan kimi xan atam getdi,
Mənə can-can deyən, can anam getdi.
Getdi, sonalar tək bir sonam getdi,
Gedən getdi, olan oldu, neyləyim.
Gözəllər vəfasız olarmış, Allah!
Vəfasız, insafsız olarmış,Allah!
Gülabı da arsız olarmış ,Allah!
Neyləyim ki,dərdi boldu,neyləyim!
Dostları ilə paylaş: |
