20.07.2001
AYXAN BALAM
Sən mənim ömrümə bir dayaq oldun,
Balamın balası, ay Ayxan balam.
Günəştək saçıldın, gültək açıldın,
Balamın balası, ay Ayxan balam.
Yerimsən, göyümsən, dinim imanım,
Sazımsan, sözümsən, canımda canım.
O dünyam, bu dünyam, yeddi cahanım,
Balamın balası, ay Ayxan balam.
Əslisən, nəslisən Xındı Məmmədin,
Çalış baban kimi olsun hörmətin.
Böyü, ay ər balam, igid ol, mətin,
Balamın balası, ay Ayxan balam.
10.09.2001
NƏYDİ MƏNİM GÜNAHIM
Bu qərib dünyada bağrım qan olur,
Aman fələk, nəydi mənim günahım?
Əlim çatmır vətənimə, elimə,
Aman fələk, nəydi mənim günahım?
Bir çay idim, çalxalandım, bulandım,
Sevdalandım, bu dünyanı dolandım.
Eşqə düşdüm, eşqin oduna yandım,
Aman fələk, nəydi mənim günahım?
Bu qürbət diyarda yananım hanı?
Arxamca gözləri dolanım hanı?
Gülabıyam, dərdə qalanım hanı?
Aman fələk, nəydi mənim günahım?
Dostları ilə paylaş: |
