O‘zbekiston respublikasi

Balllarni mezonlarga o‘tkazish jadvali

Shkalalarning nomlari va ochqichga mos keladigan javoblar miqdori

Qatorlar	MQ	RB	KX	AME
1.	62->	46->	27-31	18->
2.	51-61	38-45	22-26	15-17
3.	40-50	30-37	17-21	12-14
4.	33-39	22-29	13-16	10-11
5.	28-32	16-21	10-12	7-9
6.	22-27	13-15	7-9	5-6
7.	16-21	9-12	5-6	3-4
8.	11-15	6-8	3-4	2
9.	6-10	4-5	1-2	1
10.	1-5	0-3	0	0

Test natijalarini izohlash

“Moslashuvchanlik” metodikasining asosiy shkalalarini izohlash

Shkala- larning nomi	Fazilatning rivojlanish darajasi
	O‘rtachadan past (1-3-qatorlar)	O‘rtachadan yuqori (7-10-qatorlar)
RB	Asab-ruhiy buzilishga og‘ishni aniqlovchi xulqiy o‘z-o‘zini boshqarishning past darajasi, o‘z-o‘zini yuqori baholash bilan real harakatni anglash o‘rtasida muvofiqlikning mavjud emasligi	Asab-ruhiy barqarorlik va xulqiy o‘z- o‘zini boshqarishning yuqori darajasi, o‘z-o‘zini yuqori baholash bilan real harakatni anglash o‘rtasidagi yuqori muvofiqlik
KX	Kommunikativ qobiliyatlar rivojining past darajasi, atrofdagilar bilan aloqa o‘rnatishdagi qiyinchiliklar, tajovuzkorlikning namoyon bo‘lishi, ziddiyatga kirishishning ortishi	Kommunikativ qobiliyatlar rivojining yuqori darajasi, atrofdagilar bilan aloqani oson o‘rnatish, ziddiyatli emaslik
AME	Jamoadagi o‘rni va rolini munosib baholay olmaydi, umum qabul qilgan xulqiy me’yorlarga rioya qilishga intilmaydi	Jamoadagi o‘rni va rolini to‘g‘ri baholaydi, umum qabul qilgan xulqiy me’yorlarga rioya qilishga intiladi

“Moslashuvchanlik qobiliyati” (MQ) shkalasi bo‘yicha yakuniy baholashga ball ko‘rsatkichlarini uchta shkala bo‘yicha jamlash yo‘li bilan erishiladi. Bu holat formulada quyidagicha ifodalanadi:
MQ = “RB” + “KX” + “AME”

Foydalanish uchun adabiyotlar:

1. 
   Дудина М.М., Хаматнуров Ф.Т. Основы психолого-педагогической диагностики / Учеб.пособие. – Екатеринбург: Изд-во Рос.гос.проф.-пед. унив- та. 2016. – 190 с.
   
2. 
   Ингенкамп, Карлхайнц. Педагогическая диагностика / Пер. с нем. – М.: Педагогика, 2001. – С. 16-17.
   
3. 
   Pedagogik diagnostika / Ma’ruza matnlari. Tuzuvchi: X.Raxmatova. – Namangan: Namangan DU, 2014. – 100 b.
   
4. 
   Овсянникова С.К. Педагогическая диагностика и коррекция в воспитательном процессе / Учебно-метод.пособие. – Нижневартовск: Изд-во Нижневарт.гуманит.унив-а, 2011. – 243 с.
   
5. 
   Yo‘ldoshev J.G‘., Shirinov M.K., Ochilov F.I. Pedagogik diagnostika / O‘quv-metod.qo‘ll. – 2014. – 96 b.
   

XOTIMA

Zamonaviy sharoitda pedagogik diagnostika g‘oyalarini amaliyotda qo‘llash didaktik va tarbiyaviy jarayonlarni ilmiy, metodik, tashkiliy, amaliy jihatdan to‘g‘ri tashkillashtirilishini ta’minlaydi. O‘quvchilar tomonidan BKMning samarali o‘zlashtirilishi uchun sharoit yaratadi. Qolaversa, pedagogik jarayonda muayyan kamchiliklar ko‘zga tashlansa, ularni tezkor bartaraf etish, istiqbol vazifalarni oqilona belgilashga yordam beradi.

Bugungi kunda har bir o‘qituvchi har o‘qituvchi pedagogik diagnostika asoslarini puxta bilishi, bu boradagi mavjud bilimlaridan ta’lim va tarbiya jarayonida samarali foydalana olishi zarur. Zero, shunda pedagogik jarayonning samaradorligini ta’minlash va o‘quvchilarni har tomonlama rivojlangan shaxs etib tarbiyalashga erishiladi.
O‘qituvchining pedagogik voqelikni diagnostik tadqiq qilishda ustuvor tamoyillari, pedagogik tashxislash darajalari hamda bosqichlaridan yetarlicha xabardor bo‘lishi tegishli jarayonni samarali tashkil etilishini ta’minlaydi. Pedagogik faoliyatni tashxislash afaqat o‘qituvchining kasbiy kompetentlik sifatlariga egaligi, shu bilan birga uning pedagogik faoliyatni tashxislashning metodik jihatlaridan xabardorli hamda pedagogik diagnostikani metodik jihatdan to‘g‘ri, oqilona tashkil etishga tayyorligi to‘g‘risi bir to‘xtamga kelishga yordam beradi.
Pedagogik tadqiqotlar ta’lim samaradorligini oshirish ob’ektiv va sub’ektiv omillarga bog‘liq ekanligini tasdiqlaydi. So‘nggi yarim asrlik vaqt oralig‘ida ob’ektiv va sub’ektiv omillarni inobatga olgan holda ta’lim samaradorligini oshirishga jiddiy e’tibor qaratilmoqda. Bugungi kunda bu borada bir qator yondashuvlar (m: texnologik, innovatsion, majmuaviy yondashuv)ning ta’lim samaradorligini ta’minlashdagi ahamiyati katta ekanligi aytilmoqda.
Pedagogik diagnostika va tadqiqotni tashkil etishda o‘lchash muhim ahamiyatga ega. Zero, o‘lchash ishini metodik jihatdan to‘g‘ri tashkil qilish tashxislash va tadqiqotning samarali borishini ta’minlaydi. Pedagogik jarayonlarda o‘lchashning bir necha turidan foydlaniladi. Ular orasida shkalalash alohida o‘rin tutadi. Shkalalashda boshlang‘ich amaliy natijalar shkalalarga asoslanuvchi baholashga o‘tkaziladi. Muayyan turdagi shkalalash belgilangan tartibda o‘quvchilarning bilim, ko‘nikma, malakalari, shuningdek, ularda ma’lum sifatning tarbiyalanganlik darajasini o‘lchash va baholashga imkon beradi. Shu sababli o‘qituvchi va tadqiqotchilar pedagogik o‘lchash ishlarini amalga oshirishga oid bilimlardan xabardor bo‘lishi orqali tashxislash hamda tadqiqot jarayonini samarali tashkil etish malakalarini o‘zlashtira olishlari zarur.
Uzluksiz ta’lim tizimida o‘quvchilar tomonidan bilim, ko‘nikma, malaka hamda muayyan ma’naviy-axloqiy sifatlarning o‘zlashtirilganligi pedagogik nazorat yordamida aniqlanadi va baholanadi. Pedagogik nazoratni tashkil etishda o‘qituvchining uning asoslari, xususan, turlari, funksiyalari, tamoyillari, mazmuni hamda imkoniyatlaridan xabardor bo‘lishi maqsadni to‘g‘ri shakllantirish, jarayonni tashkiliy-metodik jihatdan oqilona tashkil etishiga yordam beradi.
So‘nggi yarim asrlik vaqt oralig‘ida ob’ektiv va sub’ektiv omillarni inobatga olgan holda ta’lim samaradorligini oshirishga jiddiy e’tibor qaratilmoqda. Bugungi kunda bu borada bir qator yondashuvlar (m: texnologik, innovatsion, majmuaviy yondashuv)ning ta’lim samaradorligini ta’minlashdagi ahamiyati katta ekanligi aytilmoqda. Ana shunday yondashuvlardan yana biri tashxisli yondashuvdir. Pedagogik amaliyot tashxisli yondashuv, shu jumladan, P.I.Tretyakov tomonidan asoslangan “Ta’lim olganlik darajasini tashxislash” va G.A.Russkiy tomonidan ishlab chiqilgan “O‘quvchilarning o‘quv materaillari matni bilan mustaqil ishlashga tayyorlik darajasini tashxislash” kabi metodikalarning ta’lim, tarbiya jarayonini tashkil etishda alohida amaliy qiymatga egaligini tasdiqlaydi.
Global axborotlashuv sharoitida shaxsning ta’lim olganlik darajasini tashxislash, unda kreativlik sifatlarini rivojlantirish dolzarb pedagogik masala sifatida kun tartibiga qo‘yilmoqda. Ushbu vazifaning samarali hal qilishda pedagogik tashxislash muhim ahamiyatga ega. Ta’lim jarayonida P.I.Tretyakovning “Yaqin va bevosita rivojlantiruvchi hududni tashxislash” hamda G.A.Russkiyning “Bilimlar tizimini o‘zlashtirganlik darajasini tashxislash” metodikasi, shuningdek, o‘quvchining kreativ fikrlash qobiliyatiga egaligini tashxislovchi metodlar: “Aqliy hujum”, “Oltita rangli qalpoqcha”, “Morfologik quti” (“Morfologik tahlil”), “Fokal ob’ektlar”, “Sinektika”, “Mental xarita” (“Idrok xaritasi”), “Bilvosita strategiyalar” kabilarning didaktik imkoniyatidan foydalangan holda tashxislashni amalga oshirish samarali natijalarni beradi.
Tarbiyaning mazmunida shaxsni har tomonlama tarbiyalash uchun zarur bo‘lgan pedagogik shart-sharoitlarni yaratishga yo‘naltirilgan faoliyat mohiyati namoyon bo‘ladi. O‘quvchilarning axloqiy tarbiyalanganlik darajasini tashxislash va natijalarni tahlil qilish bir qator afzalliklarni kafolatlaydi. Tashxislash orqali o‘quvchining tarbiyalanganlik darajasi – unda ma’lum sifatning mavjudlik holati to‘g‘risidagi ma’lumot qo‘lga kiritiladi. Qolaversa, tashxislash natijasida olingan natijalarga tayangan holda o‘quvchida yangi ma’naviy-axloqiy sifatlarni tarbiyalash, ana shu maqsadda individual ishlash dasturini ishlab chiqishga muvaffaq bo‘linadi. Tarbiyalovchi vaziyatlar o‘quvchilarda axloqiy sifatlarni shakllantirish va rivojlantirishda muhim o‘rin tutadi. Shuningdek, tarbiyalovchi vaziyatlarga tahliliy yondashish pedagogik jarayonning yutuq va kamchiliklarini o‘rganish imkonini beradi. Muvaffaqiyatli vaziyat o‘quvchilarda ijtimoiy faollikni rivojlantirish, o‘z-o‘zini anglash, o‘z-o‘zini tarbiya qilish, o‘z-o‘zini baholash va boshqarishda asosiy omillardan biri bo‘lib qoladi.
Umumiy o‘rta ta’lim maktablari o‘quvchilarini kasb-hunarga yo‘naltirish jarayonining yaxlit tizimini yaratish, tizim asosida pedagogik faoliyatni olib borishda pedagogik diagnostika tamoyillariga tayanish ko‘zlangan maqsadning ijobiy yechimini topishga yordam beradi. O‘quvchilarni kasbga yo‘naltirishda ular o‘rtasida kasb-hunar asoslari borasidagi nazariy bilimlarni targ‘ib etish, ularda ma’lum kasb yoki hunar yo‘nalishida dastlabki ko‘nikma va malakalarni hosil qilishga e’tibor qaratish muhim ahamiyatga ega. Inson kapitali va undan samarali, oqilona foydalanishga bo‘lgan ehtiyojning yuzaga kelishi ayni vaqtda umumiy o‘rta ta’lim maktablari oldiga o‘quvchilarni kasbga samarali yo‘naltirish vazifasini qo‘ymoqda. O‘quvchilarning muayyan kasb yoki hunarga bo‘lgan qiziqish va
qobiliyatini tashxislash ularni kasbga yo‘naltirish jarayonining samarali kechishiga yordam beradi. Tashxis xarakteriga ega metod va mualliflik metodiklari ana shu maqsadga xizmat qiladi.
Jamoa bir necha a’zo (kishi)lardan tashkil topgan muayyan guruh bo‘lib, u ijtimoiy ahamiyatga ega bo‘lgan umumiy maqsad asosida birlashadi hamda mazkur maqsadni amalga oshirish uchun yo‘naltirilgan faoliyatni tashkil etadi. Jamoa o‘zida bir necha xususiyat (belgi)larni namoyon qiladi. Jamoani shakllantirish muayyan qonuniyatlarga bo‘ysunadigan uzoq muddatli, murakkab jarayon bo‘lib, u ko‘pchilik tadqiqotchilarning e’tirof etishlariga ko‘ra to‘rt bosqichdan iborat bo‘ladi. Jamoani shakllantirish o‘ziga xos metodika asosida amalga oshiriladi. Jamoaning mustahkam bo‘lishi, a’zolari o‘rtasida o‘zaro yordam hamda hamkorlikning qaror topishida jamoa an’analari muhim ahamiyat kasb etadi.
Oilaning tarbiyaviy imkoniyatlarga egaligi shaxsning ruhiy, jismoniy, axloqiy jihatdan kamolga etishida muhim o‘rin tutadi. Shu sababli pedagogik diagnostikada har oilaning tarbiyaviy imkoniyatga egaligini o‘rganish, uning darajasini tashxislashga e’tibor qaratiladi. Oilaning tarbiyaviy imkoniyatlarga egaligini tashxislashda uning farzandlarni har jihatdan sog‘lom qilib tarbiyalovchi omillar, sharoitlar, xususan, sog‘lom muhit va sog‘lom turmush tarzi ega bo‘lish hamda farzandlarni oilaviy hayotga samarali tayyorlashdagi kuch-quvvati, qobiliyati o‘rganiladi. Bu yo‘nalishda tashxislashni amalga oshirish oilaning farzandlar tarbiyasidagi o‘rni va rolini kuchaytirish, mavjud imkoniyatlardan oqilona foydalanish choralarini belgilashga yordam beradi.
Pedagogik diagnostikaning muhim tarkibiy elementi, tashxislash natijasida aniqlangan salbiy holatlarni bartaraf etishning natijasi korreksiyalash (pedagogik tuzatish) sanaladi. Umumiy o‘rta ta’lim maktablarida ko‘p kuzatiladigan salbiy hodisalar fanlarni o‘zlashtira olmaslik hamda xulqiy me’yordan og‘ish sanaladi. Pedagogik tashxislash natijalariga ko‘ra tashkil etiladigan korreksiyalash (pedagogik tuzatish) fanlarni o‘zlashtira olmaslik hamda xulqiy me’yordan og‘ish kabi salbiy holatlarni to‘liq yoki qisman bartaraf qilish imkonini yaratadi.
Umumiy o‘rta ta’lim maktablarida kuzatiladigan fanlarni o‘zlashtira olmaslik o‘quvchining o‘qish, hisoblash, tahlil qilish va sintezlash qobiliyatining pastligi, mantiqiy fikrlash olmaslik, fikrni og‘zaki hamda yozma bayon qila olmaslik kabilar bilan izohlanadi. Fanlarni o‘zlashtira olmaslik bir qator pedagogik, ijtitmoiy, psixologik va biologik sabablarga ko‘ra yuzaga keladi. Korreksiyalash (pedagogik tuzatish)da fanlarni o‘zlashtira olmaslikni keltirib chiqaruvchi sabablarni o‘rganish, uning darajasini tashxislash muhim ahamiyatga ega. Maqsaddan kelib chiqqan holda o‘quvchilarning fanlarni o‘zlashtira olmasligini korreksion faoliyat bir necha bosqich (pedagogik tashxislash, pedagogik konsilium, tibbiy tekshirish va tahlil, ota-onalar uchun psixologik-pedagogik maslahat, korreksion-rivojlantiruvchi mashg‘ulotlar, pedagogik refleksiya, pedagogik strategiya)da amalga oshiriladi.
Global axborotlashuv, marginallik (“marginalis” – chekkada turadigan; turli madaniyatlar qorishmasi)ning keskin rivojlanayotganligi, ijtimoiy tarmoqlardagi muloqotga nisbatan qat’iy ijtimoiy-axloqiy talablarning belgilanmaganligi,
“ommaviy madaniyat” ta’sir ko‘lamining kengayishi umumiy o‘rta ta’lim maktablari o‘quvchilari orasida me’yordan xulqiy og‘ish ko‘rinishlarining faol kuzatilishiga sabab bo‘lmoqda. Me’yordan xulqiy og‘ishning asosiy turlari (jismoniy, ruhiy, ijtimoiy va pedagogik)ning xususiyatlarini o‘rganish, ularni tashxislash hamda korreksiyalash “Pedagogik diagnostika va korreksiya” fanining tadqiqot predmeti sanaladi. Korreksiyalash jarayonida ustuvor tamoyillarning aniqlanishi, pedagogik shartlarning inobatga olinishi kutilgan natijani qo‘lga kiritish imkonini beradi.