O‘zbekiston Respublikasining qonuni



[OKOZ:

1.01.00.00.00 Konstitutsiyaviy tuzum / 01.10.00.00 O‘zbekiston Respublikasi Prezidenti / 01.10.02.00 Vakolat]

[TSZ:

1.Davlat va jamiyat qurilishi / Davlat hokimiyati organlari. Davlat va xo‘jalik boshqaruvi organlari]

O‘zbekiston Respublikasining qonuni
O‘zbekiston Respublikasi Prezidenti faoliyatining asosiy kafolatlari to‘g‘risida
1-modda. Ushbu Qonunning maqsadi
Ushbu Qonunning maqsadi O‘zbekiston Respublikasi Prezidenti o‘z vakolatlarini O‘zbekiston Respublikasining Konstitutsiyasiga muvofiq samarali amalga oshirishi uchun zarur sharoitlar yaratish sohasidagi munosabatlarni tartibga solishdan, shuningdek konstitutsiyaviy vakolat muddati tugab yoki sog‘lig‘i holatiga ko‘ra iste’foga chiqqan O‘zbekiston Respublikasi Prezidentiga (bundan buyon matnda O‘zbekiston Respublikasining eks-Prezidenti deb yuritiladi) zarur sharoitlar va kafolatlar yaratib berishdan iborat.
Oldingi tahrirga qarang.
1¹-modda. O‘zbekiston Respublikasi Prezidentining rasmiy ramzlari
O‘zbekiston Respublikasi Prezidenti O‘zbekiston Respublikasi Prezidentining belgisi va shtandartiga (bayrog‘iga) ega bo‘ladi.
O‘zbekiston Respublikasi Prezidentining belgisi va shtandarti (bayrog‘i) tavsifi, ulardan rasmiy foydalanish tartibi O‘zbekiston Respublikasi Prezidenti tomonidan belgilanadi.
(1¹-modda O‘zbekiston Respublikasining 2021-yil 25-oktabrdagi O‘RQ-724-sonli Qonuniga asosan kiritilgan — Qonunchilik ma’lumotlari milliy bazasi, 26.10.2021-y., 03/21/724/0994-son)
2-modda. O‘zbekiston Respublikasi Prezidentining daxlsizligi
O‘zbekiston Respublikasi Prezidenti daxlsizlik va immunitetga ega bo‘ladi. O‘zbekiston Respublikasi Prezidentining daxlsizligi uning turar joy va xizmat xonalariga, bagajiga, shaxsiy va xizmat transport vositalariga, yozishmalariga, foydalanadigan aloqa vositalariga, shuningdek unga tegishli hujjatlarga tatbiq etiladi.
O‘zbekiston Respublikasining eks-Prezidenti ham butun hayoti mobaynida daxlsizlik va immunitetga ega bo‘ladi.
O‘zbekiston Respublikasining eks-Prezidenti O‘zbekiston Respublikasi Prezidenti vakolatlarini bajarish bilan bog‘liq harakatlar uchun jinoiy va boshqa xil javobgarlikka tortilishi mumkin emas. Unga nisbatan ushlab turish, so‘roq qilish, tintuv o‘tkazilishi yoki uning shaxsi ko‘zdan kechirilishi mumkin emas.
[OKOZ:

1.16.00.00.00 Xavfsizlik va huquq tartibot muhofazasi / 16.03.00.00 Davlat xavfsizligi / 16.03.05.00 Davlat tomonidan qo‘riqlanadigan obyektlarning xavfsizligini ta’minlash]

[TSZ:

1.Mudofaa va milliy xavfsizlik / Oliy davlat hokimiyati va boshqaruv organlarining, mansabdor shaxslarning xavfsizligini ta’minlash]

3-modda. O‘zbekiston Respublikasi Prezidentining muhofazasi
O‘zbekiston Respublikasi Prezidenti va uning oila azolariga davlat muhofazasi beriladi.
O‘zbekiston Respublikasining eks-Prezidentiga doimiy yoki vaqtincha turgan joylarida umrbod davlat muhofazasi beriladi. O‘zbekiston Respublikasi eks-Prezidentining butun hayoti davrida uning oila a’zolariga ham davlat muhofazasi beriladi.
Oldingi tahrirga qarang.
O‘zbekiston Respublikasi Prezidentining, O‘zbekiston Respublikasi eks-Prezidentining davlat muhofazasi va xavfsizligini ta’minlash qonunchilikda belgilangan normalar va talablarga muvofiq O‘zbekiston Respublikasi Prezidenti davlat xavfsizlik xizmati zimmasiga yuklanadi.
(3-moddaning uchinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
4-modda. O‘zbekiston Respublikasi Prezidentining faoliyati ta’minoti. Moddiy va ijtimoiy ta’minot
O‘zbekiston Respublikasi Prezidentining qonuniy faoliyatiga to‘sqinlik qilinishiga, shuningdek uning sha’ni va qadr-qimmatiga putur yetkazilishiga yo‘l qo‘yilmaydi hamda bunday harakatlar qonun bilan ta’qib qilinadi. Bu qoida O‘zbekiston Respublikasining eks-Prezidentiga nisbatan ham o‘z kuchini saqlab qoladi.
LexUZ sharhi
O‘zbekiston Respublikasi Jinoyat kodeksining 158-moddasi bilan O‘zbekiston Respublikasi Prezidentiga tajovuz qilganlik uchun javobgarlik belgilangan.
Oldingi tahrirga qarang.
O‘zbekiston Respublikasi Prezidentining mehnatiga haq to‘lash qonunchilikda belgilangan tartibda amalga oshiriladi.
(4-moddaning ikkinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
O‘zbekiston Respublikasi Prezidentiga muddati o‘ttiz olti ish kunidan iborat yillik haq to‘lanadigan ta’til beriladi.
O‘zbekiston Respublikasining eks-Prezidenti umrbod O‘zbekiston Respublikasi Oliy Majlisi Senati a’zosi lavozimini egallaydi.
O‘zbekiston Respublikasining eks-Prezidenti yoshidan qat’i nazar, amaldagi O‘zbekiston Respublikasi Prezidenti oylik mansab maoshining 70 foizi miqdorida umrbod oylik pul taminoti olish huquqiga ega.
O‘zbekiston Respublikasi eks-Prezidentining hayoti va sog‘lig‘i davlat budjeti mablag‘lari hisobidan amaldagi O‘zbekiston Respublikasi Prezidenti yillik mansab maoshiga teng summada majburiy davlat sug‘urtasidan o‘tkaziladi.
Eks-Prezidentning bevasi, hayot kechirishning boshqa manbalari borligidan qat’i nazar, boquvchisini yo‘qotganlik pensiyasi olishga haqli.
Oldingi tahrirga qarang.
Qonunchilikda O‘zbekiston Respublikasi Prezidenti va eks-Prezidenti faoliyatining boshqa kafolatlari ham nazarda tutilishi mumkin.
(4-moddaning sakkizinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
5-modda. Uy-joy, aloqa va transport ta’minoti. Tibbiy va sanatoriy-kurort ta’minoti
O‘zbekiston Respublikasi Prezidentiga Toshkent shahrida va Toshkent viloyatida qarorgohlar beriladi.
O‘zbekiston Respublikasi Prezidenti barcha aloqa turlari bilan ta’minlanadi.
O‘zbekiston Respublikasi Prezidentiga maxsus maqsaddagi avtotransport, shuningdek mamlakat ichkarisidagi va chet ellarga qilinadigan safarlar uchun maxsus jihozlangan samolyot va vertolyot beriladi. O‘zbekiston Respublikasi Prezidentining oila a’zolariga ham xizmat avtotransportidan foydalanish huquqi beriladi.
O‘zbekiston Respublikasi Prezidentiga va u bilan birga yashayotgan oila a’zolariga bepul tibbiy xizmat ko‘rsatiladi hamda sanatoriy-kurortda davolanish ta’min etiladi.
O‘zbekiston Respublikasiniig eks-Prezidentiga davlat hisobidan xizmat kvartirasi (turar joyi) va shahar tashqarisidagi – Toshkent viloyatidagi (Toshkent viloyatining Qaynarsoy tabiiy chegarasida joylashgan) qarorgohi mulk qilib berilib, tegishli xizmatlar ko‘rsatiladi va muhofaza qilinadi.
O‘zbekiston Respublikasining eks-Prezidenti maxsus, hukumat aloqalari hamda davlat organlari ixtiyoridagi boshqa aloqa turlaridan O‘zbekiston Respublikasi hududida bepul foydalanish huquqiga ega.
O‘zbekiston Respublikasining eks-Prezidentiga davlat hisobidan ikkita haydovchisi bo‘lgan avtomobil birkitib qo‘yiladi, xizmat transporti bilan xizmat ko‘rsatish ham ta’minlanadi. O‘zbekiston Respublikasi eks-Prezidentining u bilan birga yashayotgan yoki unga hamrohlik qilayotgan oila a’zolari ham xizmat transportidan foydalanish huquqiga ega.
O‘zbekiston Respublikasi Prezidentining konstitutsiyaviy vakolatlarini ijro etish tugallangan kunda O‘zbekiston Respublikasining eks-Prezidenti va uning oila a’zolari tibbiy xizmat hamda sanatoriy-kurortda davolanish bo‘yicha ega bo‘lgan imtiyozlar va afzalliklar ularda umrbod saqlanib qoladi.
6-modda. Xarajatlarni moliyalashtirish
Ushbu Qonunda nazarda tutilgan xarajatlarni moliyalashtirish davlat budjeti mablag‘lari hisobidan amalga oshiriladi.
O‘zbekiston Respublikasining Prezidenti I. Karimov
Toshkent sh.
2003-yil 25-aprel,
480-II-son


(O‘zbekiston Respublikasi Oliy Majlisining Axborotnomasi, 2003-y., 3-4-son, 34-modda; O‘zbekiston Respublikasi Oliy Majlisi palatalarining Axborotnomasi, 2019-y., 2-son, 47-modda; Qonunchilik ma’lumotlari milliy bazasi, 21.04.2021-y., 03/21/683/0375-son, 26.10.2021-y., 03/21/724/0994-son)