Paulo Tecetta I Efeseannar Paul's letter to the Ephesians ranta 1

8 Vi-tyarnes same úve ilya sailiéva ar handeva, 9 cárala sinwa ven indómeryo fóle, mára nirmeryo cilmenen: 10 tulcie pano ya carumnes anwa íre i lú náne manwa, hostien uo ilye nati i Hristosse – i nati menelde ar i nati cemende – sénen. 11 Sesse anelve yando tulcaine ve aryoni, návelvanen nóvo sátine i mehtenen yeo mole ilqua indómeryo cilmenen, 12 návelvan laitale alcareryava, elve i nóvo sámer estel i Hristosse. 13 Mal yando elde sámer estel sesse apa hlasselde i quetta nanwiéva, i evandilyon rehtieldo. Sénen, apa sávelde, anelde yando *lihtaine vandaryo Aire Feanen, 14 ya ná tanwa rantalvo ve aryoni, ve *nanwere véra lieryan, alcarinqua laitaleryan.