Pedagog xodimlarni qayta tayyorlash va malakasini oshirish instituti informatika va axborot texnologiyalari kafedrasi «zamonaviy dasturlash tillari»

O`ZBEKISTON RESPUBLIKASI XALQ TA'LIMI VAZIRLIGI 


PEDAGOG XODIMLARNI QAYTA TAYYORLASH VA MALAKASINI OSHIRISH INSTITUTI
INFORMATIKA VA AXBOROT TEXNOLOGIYALARI KAFEDRASI

«ZAMONAVIY DASTURLASH TILLARI» fanidan

MA'RUZA MATNLARI

TO`PLAMI

«Informatika va axborot texnologiyalari» kafedrasining

2005 yil 21 iyunda o`tkazilgan majlisi qarori bilan tasdiqlangan

(№ 21 - sonli bayonnoma)

 

Navoiy - 2005

Ushbu ma’ruza matnlari namunaviy dastur asosda tuzilgan bo`lib instiututlarning matematika-informatika yo`nalishidagi bakalavrlari uchun o`qitiladigan «Zamonaviy dasturlash tillari» maxsus fani bo`yicha bo`lajak mutaxassis egallashi kerak bo`lgan bilim va ko`nikmalarni o`z ichiga oladi. Bu ma’ruzalarda zamonaviy dasturlash tillaridan Maple amaliy dasturlar paketi va uning imkoniyatlari haqidagi ma’lumotlar yetarlicha yoritib berishga harakat qilingan.

Tuzuvchilar: o`qituvchi Sh.J.Xudoyorov

Taqrizchilar: f.-m.f.n.E.A.Cho`liyev

1 – ma'ruza


Zamonaviy dasturlash tillari haqida umumiy tushunchalar

REJA

1. 
   Matematik paketlar
   
2. 
   Matematik paketlarning maqsad va vazifalari
   
3. 
   Adabiyotlar tahlili
   

Tayanch iboralar

Matematik paket, Mathematica, Maple, Matlab, Derive, Mathcad, SPSS, Statistica, Statgraphics, Stadia.
Professional matematik paketlar deganda, odatda, hozirgi zamon kompyuterlarida qo'llanilayotgan Mathematica, Maple, Matlab, Derive, Mathcad kabi tizimlar va qiymatlarni statistik tahlil qilishga mo'ljallangan SPSS, Statistica, Statgraphics, Stadia va shunga o'xshash tizimlar oilalari nazarda tutiladi. Bu paketlar yordamida turli sonli va analitik (simvolli) matematik hisoblar-ni, oddiy arifmetik hisoblashlashlardan tortib, to xususiy hosilali differensial tenglamalarni yechish, optimallash masalalarini hal qilish, statistik gipotezalarni tekshirish hamda matematik modellarni yaratishga qadar turli zarur texnik hisoblashlarni amalga oshirish mumkin. Ularning barchasi takomillashgan ilmiy grafika vositalariga, qulay yordamchi axborot tizimiga va hisobot-larni rasmiylashtirish vositalariga ega. «Professional paket» atamasi «o'quv paketi» atamasiga muqobil ravishda tanlangan.
Hozirgi davrda bu paketlardan nafaqat oliy malakali mutaxassislar, professor-o'qituvchilar, balki oliy maktab talabalari, hattoki, liseylar, kasb-hunar kollejlari va maktablar o'quvchilari ham foydalanayotganligini kuzatish mumkin.
Bizning fikrimizcha, professional matematik paketlardan foydalanishning ommaviylashuviga asosiy ob'yektiv sabablar quyidagilardir:

• 
  kompyuterlar odatdagi uy elektr jihozlari qatoridan o'rin olib bormoqda;
  
• 
  kompyuter programmalari interfeysini tashkil etishda maxsus standartlar ishlab chiqilib, ulardan ommaviy ravishda foydalanilmoqda;
  
• 
  hozirgi zamon talabasi, ilmiy xodimi va mutaxassisi hayotida Internet to'ridan foydalanish kundalik ehtiyojga aylanmoqda;
  
• 
  talabalarga bilim berishda professional matematik paketlardan o'quv vositasi sifatida foydalanish darajasi oshmoqda;
  
• 
  fundamental va amaliy xarakterdagi ilmiy tad-qiqotlar bilan shug'ullanuvchilar uchun mos universal matematik paketlar yaratilmoqda va bu paketlar ilmiy tadqiqot natijalariga ijobiy ta'sir ko'rsatmoqda;
  
• 
  professional matematik paketlar bo'yicha maxsus adabiyotlar ko'paymoqda.