Toxumların səpinə hazırlanması, səpin müddəti, üsulu və norması. Vələmirin səpini
çeşidlənmiş iri toxumlarla aparılır. Xüsusən sünbülcüyün aşağı toxumları daha iri, ağır kütləli, daha
yaxşı inkişaf etmiş, ən yüksək səpin keyfiyyətinə və məhsuldarlıq xüsusiyyətinə malik olurlar.
Yuxarı dənlərdən böyümüş bitkilərə nisbətən aşağıdakı dənlərdən daha güclü və məhsuldar bitkilər
inkişaf edir. Toxumun təmizliyi 97%-dən, cücərməsi isə 90%-dən az olmamalıdır. Səpindən əvvəl
toxumlar təmizlənərək iriliyinə görə çeşidlənərək qranozon, merkuran və raksil preparatlarının biri
ilə quru üsulda dərmanlanır. Tozlu sürməyə qarşı 40%-li formalin məhlulu ilə tona 0,4 litr
hesabında səpinə 3-4 gün qalmış dərmanlanır. Kök çürüməsi və toz sürməyə qarşı hektara 3-3,5 kq
75%-li vitavaksın tətbiqi yaxşı nəticə verir. Səpindən 4-5 gün əvvəl toxumları açıq havada işıq
altında isidirlər.
Ən yaxşı səpin müddəti torpağın fiziki yetişkənliyə çatması dövrüdür. Orta sutkalıq
temperatur 12-14
0
C-yə çatdıqda səpin aparılır. Səpinin bir qədər gecikdirilməsi məhsulun kəskin
azalmasına səbəb olmur. Bu onunla əlaqədardır ki, yazlıq buğda və arpaya nisbətən vələmir
torpağın 1,5 metr dərinliyinə işləyən ikinci mənşəli köklərini tez əmələ gətirir, İsveç və Hessen
milçəyinin zədələnməsindən az əziyyət çəkir.
Səpin SZ-3,6, SZP-3,6, SZS-2,1 səpici aqreqatlarla adi cərgəvi və ya darcərgəli üsulla
aparılır.
Səpin norması səpin müddətindən, səpin üsulundan, torpağın alaqlarla zibillənmə
dərəcəsindən və digər şərtlərdən asılı olaraq müəyyənləşdirilir. Səpin norması hər hektara cücərmə
qabiliyyəti olan 3,5-4,0-5,0 mln. ədəd toxumdur. Toxumların iriliyindən və torpaq tipindən asılı
olaraq basdırılma dərinliyi 4-6 sm-dir. Qranulometrik tərkibi ağır olan nəmli torpaqlarda 3-4 sm
dərinliyə basdırılır.
Əkinlərə qulluq. Vələmir əkinlərinə edilən əsas qulluq işləri buğda və arpa əkinlərində
olduğu kimidir. Toxum arata səpilməyibsə şırımlarla səpsuvar aparılır. Payız dövründə əkinlərdə
alaqlanma çox olarsa onlara qarşı mübarizə aparmaq lazımdır. Zərərvericilərdən gəmiricilərə qarşı
payız-qış dövründə aldadıcı yemlər hazırlanır və tarlaya səpilir. Erkən yazda tarla köndələninə
malalanır. Eyni zamanda hektara 30 kq azot və 20 kq fosfor norması ilə 1-ci yemləmə gübrəsi
verilir. 2-ci yemləmə gübrəsi isə boruyaçıxma fazasının əvvəlində həyata keçirilir. Suvarma
zonalarında əkinlər 2-3 dəfə şırımla suvarılır. Su norması hektara 800 – 1000 m
3
olmaqla bitkilərin
inkişaf fazaları ilə əlaqələndirilməlidir.
