Rashid turgunbaev kompyuter grafikasi: adobe photoshop cc dasturida ishlash

Tasvirning qismini o‘chirish

Photoshop dasturida Eraser (o‘chirg‘ich) uskunasi piksellarni fon rangiga yoki shaffofga o‘zgartiradi. Agar tasvirning fon qavati yoki shaffoflik xususiyati o‘chirilgan qavati bilan ishlanganda piksellarning rangi fon rangiga o‘zgaradi, qolgan hollarda shaffofga o‘zgaradi.
Bundan tashqari, Eraser uskunasini tasvirning belgilangan joylarini uning tarix panelida belgilangan holatiga qaytarish uchun ham ishlatiladi. Buning uchun quyidagilarni bajarish kerak:

1. 
   Uskunalar panelidan Eraser uskunasi tanlanadi;
   
2. 
   Tasvirning fon qavati yoki shaffofligi o‘chirilgan qavat o‘chirilishi kerak bo‘lsa orqa fon rangi belgilanadi;
   
3. 
   Dasturning xususiyatlar panelidan Mode elementiga qiymat belgilanadi. Mode elementining Brush va Pencil qiymatlari o‘chirg‘ichni mo‘yqalam va qalam ko‘rinishiga keltiradi. Block qiymati o‘chirg‘ichni o‘zgarmas o‘lchamga ega to‘rtburchak ko‘rinishiga o‘zgaradi;
   
4. 
   Brush va Pencil qiymatlari uchun mo‘yqalam andozasi, xiralik (Opacity) va bosish kuchi (Flow) xususiyatlari belgilanadi;
   
5. 
   Tasvirning belgilangan holatiga o‘chirib qaytarish uchun tarix panelidan tasvirning kerakli holati yoki holat surati belgilanadi. Xususiyatlar panelidan Erase To History elementi belgilanadi.
   
6. 
   Tasvirning kerakli maydonlaridan o‘chirg‘ich uskunasi yurgiziladi.
   

Photoshop dasturi mo‘yqalam bilan ishlaganda intellektual silliqlashni amalga oshirishi mumkin. Buning uchun Brush (mo‘yqalam), Pencil (qalam), Mixer Brush (Aralashtirgich mo‘yqalami) yoki Eraser (o‘chirg‘ich) uskunalari bilan ishlaganda dasturning xususiyatlar panelidan Smoothing elementiga 0 dan 100 gacha bo‘lgan qiymatlarni kiritish kerak. 0 qiymati intellektual silliqlashni bajarmaydi, qiymat yuqori bo‘lgani sari intellektual silliqlash darajasi ha yuqori bo‘ladi.
Magic Eraser uskunasi yordamida tasvir qavatining bir xil piksellar rangi shaffofga o‘zgaradi. Agar belgilangan qavatning shaffoflik xususiyati o‘chirilgan bo‘lsa piksellarning rangi fon rangiga o‘zgaradi. Magic Eraser uskunasi yordamida qavatning ma’lum chegarasidagi piksellarni o‘chirish yoki qavatdagi barcha bir xil piksellarni o‘chirishni tanlab olish mumkin.
Magic Eraser uskunasidan foydalanish uchun quyidagilarni bajarish kerak:

1. 
   Uskunalar panelidan Magic Eraser uskunasi tanlanadi;
   
2. 
   Dasturning xususiyatlar panelidan quyidagilar belgilanadi:
   

- piksellar bir xilligini belgilovchi Tolerance qiymati belgilanadi. Kichik qiymat piksellarning rangini belgilangan piksel rangiga yaqin bo‘lishini, katta qiymat piksellarning rangini belgilangan piksel rangiga o‘xshash boshqa piksellarni ham o‘chiradi;

• 
  Anti-aliased elementi o‘chrilayotgan maydon chegaralarini silliqlaydi;
  
• 
  Contiguous elementini belgilanishi tanlangan piksel joylashgan maydonga chegaradosh piksellarni o‘chiradi, Contiguous elementini belgilanmasa tasvir qavatidagi tanlangan pikselga o‘xshash barcha piksellarni o‘chiradi;
  
• 
  Sample All Layers elementi belgilangan pikselning rangini tasvining o‘sha joydagi barcha qavatlarning piksellari ranglari kombinatsiyasi orqali belgilaydi;
  
• 
  Opacity elementining qiymati o‘chirishning xiraligini belgilaydi. Opacity elementining 100% qiymati piksellarni butunlay o‘chiradi. Opacity elementining kichik qiymati piksellarni qisman o‘chiradi.
  

3. 
   Magic Eraser uskunasi tasvir qavatining o‘chirilishi kerak bo‘lgan joyiga bosiladi.
   

Background Eraser uskunasi tasvirning qavatidagi belgilangan namunadagi piksellarni shaffofga o‘zgartiradi. Background Eraser uskunasi rang namunasini o‘chirg‘ich markazidan oladi va o‘chirg‘ich doirasidagi barcha shu rangdagi piksellarni o‘chiradi. Uskunadan foydalanish uchun quyidagilarni bajarish kerak:

1. 
   Qavatlar panelidan o‘chirilishi kerak bo‘lgan qavat tanlanadi;
   
2. 
   Uskunalar panelidan Backgroud Eraser uskunasi tanlanadi;
   
3. 
   Xususiyatlar panelidan o‘chirg‘ich andozalari tugmasi bosiladi va quyidagi panel ochiladi:
   

Ochilgan paneldan o‘chirg‘ichning o‘lchami (Size), qattiqligi (Hardness), o‘chirishda joy tashlanishi (Spacing), burchagi (Angle) va yumaloqligi (Roundness) kabi xususiyatlari belgilanadi.

4. 
   Xususiyatlar panelidan rang namunasini olishning quyidagi usullarini belgilab olish mumkin:
   

• 
  Continuous - o‘chirg‘ich yurgizilganda o‘chirish uchun rang namunasi doimiy ravishda o‘chirg‘ich markazidan olinadi;
  
• 
  Once - rang namunasi o‘chirg‘ich markazidan bir marta olinadi;
  
• 
  Background Swatch - uskunalar panelida tanlangan orqa fon rangi olinadi;
  

5. 
   O‘chirg‘ich tasvirning o‘chirilishi kerak bo‘lgan maydonlarida yurgiziladi.