MİSİR QADINLARININ ƏZİZİN ARVADININ EVİNDƏ TOPLAŞMALARI 30. Şəhərdəki qadınlar dedilər: “Vəzirin arvadı cavanı (cavan qulunu) tovlayıb yoldan çıxartmaq istəyir. (Yusufun) məhəbbəti onun bağrını qan etmişdir. Biz onun açıq-aşkar (doğru) yoldan çıxdığını görürük.
31. (O, qadınların) gizli dedi-qodularını eşitdikdə onlara xəbər göndərib ziyafətə dəvət etdi, onlar üçün gözəl bir məclis düzəltdi. Onların hər birinə bir bıçaq verdi, sonra (Yusufa): “Onların qarşısına çıx!” – deyə əmr etdi. (Qadınlar Yusufu) gördükdə onu həddindən artıq təriflədilər və əllərini kəsdilər. Onlar: “Aman Allah! Bu ki, bəşər deyildir. Bu ancaq (Allah yanında) möhtərəm (əziz) olan bir mələkdir!” – dedilər.
